1. Muoyo utudi nawu udi ne mushinga kayi ku mêsu kua Yehowa?

 FUANYIKIJABI ne: mulunda webe udi ukupesha tshintu tshizola tshia kale menemene kadi tshikale tshia mushinga mukole. Katshitshiena muvuatshi kumpala to, tshikadi ne manyanu ne ntshiele mitanta. Nansha mukaditshi mushindu au, tshidi mushinga wa ndola miliyo ne miliyo. Kakuyi mpata, newanyishe tshintu atshi ne neutshilame bimpe. Bia muomumue, Yehowa mmutupeshe dipa dia mushinga mukole dia muoyo. Bushuwa mmuleje mudiye wangata muoyo wetu ne mushinga padiye mufile Muanende bu mulambu wa kutupikula nawu.​—Yone 3:16.

2. Anu mudi 2 Kolinto 7:1 uleja, Yehowa mmusue tuenze tshinyi?

² Yehowa ke Mpokolo wa muoyo. (Mis. 36:9) Mupostolo Paulo uvua mumanye bulelela abu pakambaye ne: “Tudi ne muoyo, tudi tuenda, ne tudiku bua bualu buende.” (Bien. 17:25, 28) Nunku mbikumbane bua kuamba ne: muoyo wetu ndipa dia Nzambi. Udi utupesha bitudi tukengela bua kushala ne muoyo ne dinanga dionso. (Bien. 14:15-17) Kadi katu ukuba mioyo yetu mu tshishima to. Mmusue bua tutabalele makanda etu a mubidi ne a mu nyuma bua tuikale tumuenzela mudimu. (Bala 2 Kolinto 7:1.) Bua tshinyi mbimpe tulame muoyo wetu ne makanda etu a mubidi bimpe? Mmunyi mutudi mua kuenza nanku?

3. Mbualu kayi budi butusaka bua kudienzeja bua kuikala ne makanda a mubidi?

³ Kuenzela Yehowa mudimu ne muetu muonso ke bualu budi butusaka bua tudienzeje bua kuikala ne makanda a mubidi.  (Mâko 12:30) Tudi basue kufila ‘mibidi yetu bu mulambu udi ne muoyo, wa tshijila ne udi muanyishibue kudi Nzambi,’ nunku katuena tuenza malu atudi bamanye ne: neanyange makanda etu a mubidi to. (Lomo 12:1) Bushuwa, kudi anu malu a bungi atudi mua kuenza bua kuikala ne makanda a mubidi. Kadi tudi tuenza tshionso tshidi tshikengela bualu tudi basue kuleja Tatu wetu wa mu diulu ne: tudi tuanyisha dipa dia muoyo.

4. Ntshinyi tshivua mukalenge Davidi musue kuenza?

⁴ Mukalenge Davidi wakumvuija tshivua tshimusaka bua kuanyisha dipa dia Nzambi dia muoyo pakafundaye ne: “Kufua kuanyi, kupueka kuanyi mu dijimba, kudi ne dikuatshisha kayi? Lupuishi nelukutumbishe anyi? Neluambile bantu bualu bua lulamatu luebe anyi?” (Mis. 30:9) Davidi uvua mua kuikala mufunde mêyi au lua ku ndekelu kua muoyo wende. Kadi uvua mudisuike bua kutungunuka ne kuikala anu ne muoyo bua kumona mua kutumbisha Yehowa. Bushuwa tuetu bonso tudi basue kuenza bia muomumue.

5. Ntshinyi tshitudi mua kuenza nansha tuetu ne bidimu bungi kayi anyi basame mushindu kayi?

⁵ Masama ne bukulakaje bidi mua kutupangisha bua kuenza malu a bungi atuvua tuenza kumpala. Ke bualu kayi bidi mua kutubungamija bikole menemene. Kadi ki mbimpe tulengulule makanda etu a mubidi nansha kakese. Bua tshinyi? Bualu tudi anu mua kutumbisha Yehowa anu bu mukalenge Davidi nansha tuetu ne bidimu bungi kayi anyi basame mushindu kayi. Bidi bitukolesha ku muoyo bua kumanya ne: Nzambi wetu utu utuanyisha nansha mutudi bena mapanga. (Mat. 10:29-31) Nansha biobi bitulomba bua kufua, neajinge bikole bua kutubisha ku lufu. (Yobo 14:14, 15) Patutshidi ne muoyo apa, tudi basue kuenza tshionso tshidi tshikengela bua kutabalela muoyo wetu ne makanda etu a mubidi.

6. Yehowa mmusue bua tuenze tshinyi pa bidi bitangila kudia ne kunua?

⁶ Nansha mudi Bible kayi mukanda wa malu a makanda a mubidi anyi wa malu a ndilu, udi uleja mutu Yehowa umona malu aa. Tshilejilu, Yehowa udi utubela bua ‘kuepula mubidi wetu ku bintu bibi’ bidi mua kuwunyanga. (Muam. 11:10) Bible udi ukandika budiavi ne dikuatshika dia maluvu bualu bidi mua kunyanga mubidi wetu. (Nsu. 23:20) Yehowa mmusue bua tuikale tutabalela bitudi tusungula bua kudia ne kunua ne bungi buabi.​—1 Kol. 6:12; 9:25.

7. Mmunyi mudi mubelu udi mu Nsumuinu 2:11 utuambuluisha bua kuangata mapangadika mimpe pa bidi bitangila makanda etu a mubidi?

⁷ Tudi mua kuangata mapangadika adi aleja ne: tudi tuanyisha dipa dia muoyo didi Nzambi mutupeshe bikole patudi tuenza malu ne bukokeshi buetu bua kunana lungenyi. (Mis. 119:99, 100; bala Nsumuinu 2:11.) Tshilejilu, mbimpe tuikale ne busunguluji mu bitudi tudia. Tuetu banange tshiakudia kampanda kadi eku bamanye ne: netshitusamishe, busunguluji nebutusake bua kubenga kutshidia. Tudi tuleja kabidi mutudi ne busunguluji patudi tulala mêba bungi bukumbane, tudibidija pa tshibidilu, tulama tshibidilu tshimpe tshia kuikala ne mankenda, ne tulama lubanza luetu bimpe.

8. Ntshinyi tshidi Bible uleja bua mushindu udi Yehowa umona didikuba ku njiwu?

⁸ Mu mikenji ivua Yehowa muelele bena Isalele muvua ivua ibambuluisha bua kudikuba ku njiwu minene ivua mua kuenzeka kumbelu anyi ku mudimu. (Ekes. 21:28, 29; Dut. 22:8)  Njiwu ya lufu ivua ikebela bantu bavua bashipangana kabiyi ku bukole ntatu ya bungi. (Dut. 19:4, 5) Mikenji ivua ilomba bua kunyoka bantu bavua benzela muana utshivua munda mua mamuende bibi kabiyi nansha ku bukole to. (Ekes. 21:22, 23) Bible udi uleja patoke ne: Yehowa mmusue bua tudikube ku njiwu.

9. Mmalu kayi atudi mua kuenza bua kuepuka njiwu? (Tangila kabidi bimfuanyi.)

⁹ Tudi tuleja mutudi tuanyisha dipa dia muoyo dia Nzambi patudi tudienzeja bua kudikuba kumbelu anyi ku mudimu. Tshilejilu, tuetu ne bintu bidi bitapa, bintu bidi bilewula anyi manga a kunua, mbimpe tubiteke muaba muimpe udi bana batekete kabayi mua kubimona to. Mbimpe tuikale badimuke patudi tutemesha kapia, tusabisha mâyi anyi tuenza mudimu ne biamu bia nzembu bua katulu kubilekela tshianana tshianana to. Ki mbimpe tuendeshe mashinyi lungenyi luetu luolu lunyanguke bua mutudi banue manga, maluvu makole anyi bikale ne tulu; peshi katudibueji mu ditanaji tuyukila ku kamu patudi tuendesha to.

10. Ntshinyi tshitudi mua kuenza kumpala kua tshipupu kuenzeka ne pakaditshi tshienzeke?

¹⁰ Misangu mikuabu katutu ne mushindu wa kupangisha malu atu akebelanga njiwu to. Bidi nanku nangananga bua bipupu, masama ne bimvundu. Kadi padi malu a nanku enzeka, tudi mua kudienzeja bua kuikala mu bukubi ne kupanduka ku njiwu tuetu tutumikila tshidi bakokeshi batuambila bua kumbuka muaba utudi ne kutumikila mikenji mikuabu idibu bela. (Lomo 13:1, 5-7) Tudi mua kudianjila kuenza malu makuabu, nanku mbimpe tutumikile malu onso adi bakokeshi ba muaba utudi batuambila bua kudilongolola ku bipupu. Tshilejlu, bidi mua kuikala bimpe bua tuetu kulama mâyi, biakudia bidi kabiyi binyanguka ne bintu bikuabu bia mushinga.

11. Disama dia tshiambu diodi dibudike muaba utudi, ntshinyi tshitudi ne bua kuenza ne muoyo mujima?

¹¹ Ntshinyi tshitudi ne bua kuenza padi disama dia tshiambu dibudika muaba utudi? Mbimpe tutumikile mikenji idi bakokeshi bela bu mudi ya kuowa kua bianza, kuikala ntanta ne bakuabu, kuvuala maske, ne kuteka muntu muaba wa nkayende. Patudi tutumikila mikenji ayi, bidi bileja mutudi tuanyisha dipa dia muoyo didi Nzambi mutupeshe bikole.

12. Mmunyi mudi mêyi adi mu Nsumuinu 14:15 atuambuluisha bua kumanya ngumu itudi mua kuitaba padiku bipupu?

¹² Mu nsombelu ya tshimpitshimpi, kudi misangu itubu bendesha ngumu ya dishima kudi balunda betu, bena mutumba betu ne ku Enternete. Mbimpe tuteleje ngumu mijalame menemene idi bena mbulamatadi ne baminganga bafila pamutu pa tuetu kuitaba “dîyi dionso” ditudi tumvua. (Bala Nsumuinu 14:15.) Bena mu Kasumbu kaludiki ne bena ku biro bia filiale, batu benza muabu muonso bua kupeta ngumu mijalame kumpala kua kufila buludiki budi butangila bisangilu bia tshisumbu ne mudimu wa diyisha. (Eb. 13:17) Patudi tulonda buludiki abu, tudi tudikuba tuetu bine ne bakuabu ku malu adi mua kutuenzela bibi. Tshisumbu tshia muaba utudi netshikale patshi ne lumu luimpe.​—1 Pet. 2:12.

13. Mmunyi mutudi tuleja ne: tudi tuanyisha dipa dia muoyo didi Nzambi mutupeshe mu tshilumbu tshia mashi?

¹³ Bantemu ba Yehowa mbamanyike ne: batu bangata mashi bu tshintu tshia tshijila. Tudi tutumikila mikenji ya Yehowa idi itangila mashi patudi tubenga bua kabatuedi nawu nansha biobi bilomba bua batuondope ne lukasa. (Bien. 15:28, 29) Kabiena bileja ne: tutu basue kufua to, kadi mbualu tutu tuanyisha dipa dia muoyo didi Nzambi mutupeshe. Tutu tukeba baminganga bapiluke bikole batu basue kuondopa bimpe menemene kabayi belangana mashi to.

14. Ntshinyi tshitudi mua kuenza bua kuepuka mishindu ya luondopu idi ne njiwu?

¹⁴ Tuetu batabalele makanda etu a mubidi patudi tutumikila malu atudi bakuile mu tshiena-bualu etshi, pamuapa kabakutupanda anyi kutuondopa ne mishindu mikuabu ya luondapu idi ne njiwu to. Tuetu bikale ne makanda a mubidi tumatuma, netumvue bimpe ne lukasa bobu batupande. Tudi kabidi mua kukepesha njiwu ya dipandibua lukasa lukasa patudi tumbusha bintu bidi mua kutukebela njiwu mu lubanza luetu ne muaba utudi tuenzela mudimu ne patudi tutumikila mikenji ya mu njila ne muoyo mujima.

15. a) Bua tshinyi mbimpe tuikale ne karte ketu ka dibenga kuedibua mashi? (Tangila kabidi tshimfuanyi.) b) Anu mudibu baleje mu filme, mmunyi mutudi mua kuangata mapangadika mimpe mu tshilumbu tshia mashi?

 ¹⁵ Bu mutudi tuanyisha dipa dia muoyo, mbimpe tuwuje karte ka dibenga kuedibua mashi ne tuikale naku misangu yonso. b Mu karte aku, tudi tuleja mutudi tumona diedibua dia mashi ne mutudi basue bua batuondope. Ukadi muakajilule karte kebe ka dibenga kuedibua mashi anyi? Wewe ukeba kuwuja karte aku anyi kukakajilula, kuladikiji malu to. Bushuwa kufunda mutudi basue bua batuondope nekutupeteshe luondapu ne lukasa bualu katuakujimija dîba bua kuleja kabidi badoktere mmuenenu wetu to. Netubambuluishe kabidi bua kabatuondopi ne manga adi mua kutukebela njiwu to. c

16. Ntshinyi tshitudi mua kuenza tuetu katuyi bamanye mua kuwuja karte ka dibenga kuedibua mashi?

¹⁶ Nansha tuetu bana anyi bikale ne makanda tumatuma, tudi mua kupeta njiwu anyi kusama. (Muam. 9:11) Nunku mbia meji bua tuetu kuwuja karte ka dibenga kuedibua mashi. Wewe kuyi mumanye mua kuwuja karte  aku, lomba bakulu ba tshisumbu tshienu bua bakuambuluishe. Batu badienzeja bua kumanya mua kuwuja karte aku, kadi kabakukuangatshila mapangadika mu tshilumbu tshia luondapu to. Abu mbujitu buebe. (Gal. 6:4, 5) Badi mua kukumvuija bimpe bidi mu karte aku ne kukuleja mua wewe kukuwuja.

17. Mmunyi mutudi mua kuleja ne: katuena bena malu makole pa bidi bitangila makanda etu a mubidi?

¹⁷ Kondo ketu ka muoyo kalongesha kudi Bible ke kadi katusaka bua kuangata mapangadika a bungi adi atangila makanda etu a mubidi ne ngodapilu. (Bien. 24:16; 1 Tim. 3:9) Patudi tuangata mapangadika ne tualeja bakuabu, mbimpe tutumikile dîyi dinene didi mu Filipoyi 4:5 edi: “Enzayi bua bantu bonso bamanye munudi kanuyi bena malu makole.” Tudi tuleja ne: katuena bena malu makole patudi katuyi tuditatshisha bikole bua makanda etu a mubidi anyi tusaka bakuabu bua benze anu tshitudi tuetu basue to. Tudi banange bena Kristo netu ne tubanemeka nansha padibu bangata mapangadika adi mashilangane ne etu.​—Lomo 14:10-12.

18. Mmunyi mutudi mua kuleja dianyisha bua dipa dia muoyo?

¹⁸ Tudi tuleja mutudi ne dianyisha kudi Yehowa Mpokolo wa muoyo patudi tukuba muoyo wetu ne tumupesha tshidi tshitambe buimpe. (Buak. 4:11) Mpindieu, netuikale anu tutata ne masama ne tukenga. Kadi Mufuki wetu kavua musue bua tuikale ne nsombelu wa nunku to. Mu matuku makese emu neatupeshe muoyo wa tshiendelele, katuakukenga anyi kufua kabidi to. (Buak. 21:4) Bua mpindieu, mbitambe buimpe bua tuetu kuikala ne muoyo ne kuenzela Yehowa Tatu wetu wa mu diulu udi mutunange mudimu.