1. Ntshinyi tshidi tshileja ne: Yezu uvua wangata Mifundu ne mushinga?

 FUANYIKIJA muvuabi mua kuikala wewe uteleja Yezu ulongesha. Uvua utamba kutela Mifundu minsantu mikuata mu mutu. Mêyi a kumpala avuaye muambe panyima pa dibatijibua diende ne a ndekelu avuaye muambe kumpala kua yeye kufua avua a mu Mifundu. b (Dut. 8:3; Mis. 31:5; Luka 4:4; 23:46) Uvua ne tshibidilu tshia kubadila bantu Mifundu, uyitela ne uyumvuija. Wakenza nanku mu bidimu bisatu ne tshitupa yeye mumane kubatijibua ne kumpala kua kufuaye.​—Mat. 5:17, 18, 21, 22, 27, 28; Luka 4:16-20.

2. Ntshinyi tshivua tshiambuluishe Yezu bua kumanya Mifundu bimpe pavuaye wenda ukola? (Tangila tshimfuanyi tshia pa tshizubu.)

² Bidimu bia bungi kumpala kua Yezu kutuadija kuyisha, uvua ubala Dîyi dia Nzambi ne uditeleja misangu ne misangu. Kakuyi mpata pavuaye kumbelu uvua umvua Mariya ne Jozefe batela Mifundu dituku dionso pavuabu bayukila mu dîku. c (Dut. 6:6, 7) Tudi batuishibue ne: Yezu uvua uya mu nsunagoga dituku dionso dia Nsabatu ne bena mu dîku diabu. (Luka 4:16) Muomu amu, uvua ne bua kuikala uteleja bimpe menemene Mifundu ivuabu babala. Mu kupita kua matuku, wakalonga mua kuikala kudibadila Mifundu ya tshijila ayi. Ke bualu kayi, wakafika ku dimanya Mifundu bimpe, ku diyinanga ne ku diyilekela ilombola  bienzedi biende. Tshilejilu, vuluka tshivua tshienzeke ku ntempelo dîba divua Yezu ne bidimu 12 patupu. Balongeshi bavua bamanye mikenji ya Mose bimpe “bakakema bikole bua lungenyi [lua Yezu] ne mandamuna ende.”​—Luka 2:46, 47, 52.

3. Ntshinyi tshituamona mu tshiena-bualu etshi?

³ Tuetu tubala Mifundu pa tshibidilu tudi petu mua kulua kunanga Dîyi dia Nzambi ne kudimanya. Kadi mmunyi mutudi mua kumvua buimpe bua malu atudi tubala? Tshivua Yezu muambile bamanyi ba mikenji abu pamue ne bafundi, Bafalese, ne Basadoke tshidi mua kutulongesha. Bamfumu ba bitendelelu abu bavua babala Mifundu pa tshibidilu, kadi bakapangila bua kumvua buimpe bua malu avuabu babala. Yezu wakatela malu asatu avua bantu abu ne bua kuenza bua bobu kushisha kumvua buimpe bua malu avuabu babala mu Mifundu. Malu avua Yezu mubambile neatuambuluishe bua kuakaja mushindu wetu 1) wa kumvua bitudi tubala bimpe, 2) wa kukeba malu a mushinga mu Dîyi dia Nzambi, ne 3) wa kulekela Dîyi dia Nzambi ditufumba.

4. Ntshinyi tshidi Luka 10:25-29 utulongesha bua dibala Dîyi dia Nzambi?

⁴ Tutu basue kumanya tshidi malu atudi tubala mu Dîyi dia Nzambi umvuija. Tshianana malu au kaakutuambuluisha menemene to. Tshilejilu, tumonayi mushindu uvua Yezu muyukile ne “mumanyi wa Mikenji mukuabu.” (Bala Luka 10:25-29.) Pavua muntu au muebeje Yezu tshivuaye ne bua kuenza bua kupeta muoyo wa tshiendelele, Yezu wakamuambuluisha bua kupeta diandamuna mu Dîyi dia Nzambi kumuebejaye ne: “Mbafunde tshinyi mu Mikenji? Mmunyi muudi ubala?” Muntu au wakafila diandamuna dimpe, kutelaye mêyi a mu Mifundu adi akula bua dinanga Nzambi ne mukuetu. (Lew. 19:18; Dut. 6:5) Kadi mona tshiakebejaye pashishe: “Mukuanyi nnganyi menemene?” Muntu au wakaleja patoke muvuaye kayi umvua bimpe menemene malu avuaye ubala to. Ke bualu kayi, kavua mumanye mua kutumikila mvese ayi bimpe to.

5. Mmunyi mudi disambila ne kubala Dîyi dia Nzambi bitekete bitekete bituambuluisha bua kumvua malu atudi tubala bimpe?

⁵ Tuetu tudienzeja bua kuikala ne bibidilu bimpe bia dibala, tudi mua kuakaja ngumvuilu wetu wa Dîyi dia Nzambi. Mona amue malu adi mua kukuambuluisha. Sambila kumpala kua kubala. Tutu basue Yehowa atuambuluishe bua tumvue Mifundu bimpe, nunku mbimpe tumulombe nyuma wende muimpe bua tumone mua kutuma ntema ku bitudi tubala. Pashishe bala bitekete bitekete. Kuenza nanku nekukuambuluishe bua kumvua biudi ubala bimpe. Pamuapa neumone ne: mbimpe kubala ne dîyi dikole anyi kulondesha dibala dia Bible dia mêyi makuata mu Bible webe. Wewe wenza nanku, nebikuambuluishe bua kumvua malu audi ubala mu Bible ne kuavuluka ne kabidi kumanya malu makuabu a bungi a mu Dîyi dia Nzambi. (Yosh. 1:8) Paudi ujikija kubala, sambila kabidi bua kuela Yehowa tuasakidila bua dipa dia Dîyi diende ne mulomba akuambuluishe bua kutumikila malu audi mubale.

6. Bua tshinyi kudiela nkonko ne kufunda tumalu tukese paudi ubala kudi mua kukuambuluisha? (Tangila kabidi tshimfuanyi.)

⁶ Mona ngenyi mikuabu ibidi idi mua kukuambuluisha bua kumvua malu audi ubala mu Bible bimpe. Diela nkonko bua malu audi ubala. Paudi ubala bualu kampanda mu  Bible, diebeja ne: ‘Mbanganyi badibu bakuila? Udi wakula nganyi? Udi wakula ne nganyi? Bua tshinyi udi wakula nende? Mmuaba kayi udi malu aa menzekele? Mmenzeke dîba kayi?’ Nkonko ya nanku neyikuambuluishe bua kumona ngenyi minene idi mu biudi ubala ne mua kuyitumikila. Ikala ufunda kabidi tumalu tukese paudi ubala. Paudi utufunda, udi utuelela meji bikole, ne bidi bikuambuluisha bua kutumvua bimpe. Kufunda kudi kuambuluisha kabidi bua kuvuluka malu audi ubala. Udi mua kufunda nkonko, malu audi mukebulule, ngenyi minene, ne muudi mua kutumikila malu audi mubale, anyi kufunda patupu muudi umvua bua biudi ubala. Pamuapa neumone ne: kufunda tumalu tua nanku kudi mua kukufikisha ku dimona Dîyi dia Nzambi bu mukenji mukutumina anu wewe.

7. Nngikadilu kayi utudi ne bua kuikala nende patudi tubala? Bua tshinyi? (Matayi 24:15)

⁷ Yezu wakaleja ngikadilu wa mushinga utudi ne bua kuikala nende bua tumone mua kumvua bitudi tubala mu Dîyi dia Nzambi. Ngikadilu au ndijingulula dia malu. (Bala Matayi 24:15.) Dijingulula dia malu ntshinyi? Mbukole bua kumona mudi lungenyi lupetangana ne lukuabu anyi mudilu lushilangana ne lukuabu peshi kumona diakamue tshidi katshiyi tshiamba patoke. Bualu bukuabu, Yezu wakaleja ne: mbimpe tuikale ne dijingulula dia malu bua kumanya mianda idi ikumbaja mêyi a buprofete a mu Bible. Tudi kabidi dijinga ne ngikadilu eu bua bionso bitudi tubala mu Bible bituambuluishe menemene.

8. Mmunyi mutudi mua kubala ne dijingulula dia malu?

⁸ Yehowa utu upesha bena mudimu bende dijingulula dia malu. Nunku sambila umulombe bua wikale ne ngikadilu eu. (Nsu. 2:6) Mmunyi muudi mua kuenza malu mu diumvuangana ne disambila diebe? Ikala ukonkonona biudi ubala bimpe bimpe, umone mudibi bipetangana ne malu makuabu audi mumanye.  Bala mikanda yetu ya kudilongela nayi Bible idi mua kukuambuluisha, bu mudi Mukanda wa makebulula wa Bantemu ba Yehowa. Mikanda eyi neyikuambuluishe bua kujingulula diumvuija dia mvese wa mu Bible ne mushindu uudi mua kumutumikila. (Eb. 5:14) Wewe ubala ne dijingulula dia malu, neumvue kabidi Mifundu bimpe.

9. Mbulelela kayi bua mushinga budi mu Mifundu buvua Basadoke balengulula?

⁹ Basadoke bavua bibidilangane bikole ne mikanda itanu ya ntuadijilu ya Mifundu ya mu tshiena Ebelu, kadi balengulula bulelela bua mushinga buvua mu mikanda mifundisha ku nyuma ayi. Tshilejilu, tumonayi muvua Yezu mubandamune pavuabu bamuebeje bualu bua dibishibua dia bantu ku lufu. Wakabebeja ne: “Kanuena babale mu mukanda wa Mose, mu muyuki wa bualu bua kamutshi ka mêba, muvua Nzambi mumuambile ne: ‘Ndi Nzambi wa Abalahama, Nzambi wa Izaka ne Nzambi wa Yakoba’ anyi?” (Mâko 12:18, 26) Nansha mukavuabu babale bushuwa mvese au misangu ne misangu, lukonko luvua Yezu mubele ludi luleja ne: bavua balengulula bulelela bua mushinga budi mu Mifundu ebu: dilongesha dia dibishibua dia bantu ku lufu.​—Mâko 12:27; Luka 20:38. d

10. Ntshinyi tshitudi ne bua kutabalela patudi tubala?

¹⁰ Malu aa adi atulongesha tshinyi? Patudi tubala Bible, tudi basue kutabalela tshidi malu onso adi mu mvese kampanda anyi bualu kansanga butudi tubalamu mua kutulongesha. Mbimpe tujingulule malongesha a nshindamenu ne malu male ne mêyi manene bidi bisokoka.

11. Bilondeshile 2 timote 3:16,17, mmunyi muudi mua kupeta malu a mushinga adi mu Bible?

¹¹ Mmunyi muudi mua kupeta malu a mushinga paudi ubala Bible? Mona tshidi 2 Timote 3:16, 17 wamba. (Bala.) Mona ne: “Dîyi dionso didi mu Mifundu didi. . . diambuluisha” 1) bua kulongesha, 2) bua kubela, 3) bua kululamija malu, ne 4) bua kunyoka. Udi mua kupeta malu anayi adi ambuluisha aa nansha mu mikanda ya mu Bible iutu kuyi utamba kubala to. Konkonona bualu buudi ubala bua kumona tshidibu bukulongesha bua Yehowa, bua malu adiye mulongolole, ne bua mêyi manene a Nzambi. Manya mudibu mua kukuambuluisha bua kubela. Bua kuenza nanku, mona mudi mvese ayi ikuambuluisha bua kumanya meji mabi anyi bikadilu bibi biudi ne bua kulekela bua kushala ne lulamatu kudi Yehowa. Konkonona mudi mvese ayi mua kululamija anyi kuakaja mmuenenu mubi wa malu udi pamuapa kudi muntu uudi mutuilangane nende mu buambi. Keba dinyoka didi mvese ayi ifila didi mua kukuambuluisha bua kumona malu  mutu Yehowa uamona. Wewe mulame malu anayi adi ambuluisha aa mu lungenyi, neupete malu a mushinga adi mua kukuambuluisha bua kumvua buimpe bua malu audi ubala mu Bible.

12. Bua tshinyi Yezu wakebeja Bafalese ne: ‘Kanuvua babale anyi?’

¹² Yezu wakebeja kabidi Bafalese ne: ‘Kanuvua babale anyi?’ bua kubaleja ne: bavua bamona Mifundu mu mushindu mubi. (Mat. 12:1-7) e Musangu au, Bafalese bavua bamba muvua bayidi ba Yezu bashipe mukenji wa Nsabatu. Yezu wakabandamuna ne bilejilu bibidi bia mu Mifundu, kutelaye mvese wa mu Hoshea bua kuleja ne: kabavua bumvue bimpe tshivuabu belele mikenji ya Nsabatu to, ne kabavua bumvuilangana luse to. Bua tshinyi bantu abu kabavua balekele Dîyi dia Nzambi divuabu babala dibafumba? Bualu bavua badibala ne lungenyi lua ditontolola anyi lua lutambishi. Lungenyi alu luakabapangisha bua kumvua bivuabu babala bimpe.​—Mat. 23:23; Yone 5:39, 40.

13. Tudi ne bua kubala Bible ne lungenyi kayi? Bua tshinyi?

¹³ Tshivua Yezu muambe tshidi tshitulongesha ne: bidi bikengela tuikale tubala Bible ne lungenyi luimpe. Bidi bikengela tuikale ne budipuekeshi ne dijinga dia kumanya bua katufuanyi Bafalese to. Tudi ne bua ‘kuitaba ne bupole buonso dibueja dia dîyi munda muetu.’ (Yak. 1:21) Tuetu ne bupole, netulekele Dîyi dia Nzambi diela miji mu muoyo wetu. Malongesha a mu Bible adi akula bua luse, kumvuilangana, ne dinanga, neatulombole anu tuetu balekele lungenyi lua kutontolola anyi lua lutambishi.

14. Mmunyi mutudi mua kumanya ni mBible ke udi utufumba? (Tangila kabidi bimfuanyi.)

 ¹⁴ Mushindu utudi tuenzela bakuabu malu udi mua kuleja ni nDîyi dia Nzambi ke didi ditufumba. Bafalese bakapangila bua kulekela Dîyi dia Nzambi dilenga mioyo yabu, ke bualu kayi bavua ‘bapisha bantu bavua kabayi ne dipila to.’ (Mat. 12:7) Bia muomumue, mushindu utudi tumona bantu ne tubenzela malu udi uleja ni nDîyi dia Nzambi ke didi ditufumba. Tshilejilu, tutuku ne tshibidilu tshia kuakula malu mimpe adi bakuabu benza anyi, peshi tutu anu ne lukasa ku diakula bua bilema biabu? Tutuku tumvuila bakuabu ne badiakaje bua kubafuila luse anyi? Peshi tutu tubabipisha ne tubalamina munda padibu batuenzela bilema? Kudiela nkonko ya mushindu eu kudi kuleja ni tudi balekele malu atudi tubala alombola meji etu, bienzedi bietu, ne mutudi tudiumvua.​—1 Tim. 4:12, 15; Eb. 4:12.

15. Mmunyi muvua Yezu umvua bua Mifundu minsantu?

¹⁵ Yezu uvua munange Mifundu minsantu bikole, mêyi adi mu Misambu 40:8 akavua maleje muvuaye mua kumvua. Mvese au udi wamba ne: “Kuenza disua diebe, Nzambi wanyi, ke disanka dianyi, mukenji webe udi munda muanyi menemene.” Bu muvuaye munange Mifundu, wakatuta diakalengele ne wakatungunuka ne kuenzela Yehowa mudimu ne disanka. Tuetu tubala Dîyi dia Nzambi ne badinange, netuikale petu ne disanka ne malu etu neende bimpe.​—Mis. 1:1-3.

16. Mmalu kayi audi ne bua kuenza bua kumvua buimpe bua malu audi ubala mu Dîyi dia Nzambi? (Tangila kazubu ka “ Mêyi a Yezu adi mua kukuambuluisha bua kumvua biudi ubala bimpe.”)

¹⁶ Mu diumvuangana ne mêyi a Yezu pamue ne tshilejilu tshiende, tuakajayi mushindu wetu wa kubala Bible. Tudi mua kuakaja ngumvuilu wetu wa mvese ya mu Bible patudi tusambila, tubala bitekete bitekete, tudiela nkonko, ne tufunda tumalu tukese. Tudi mua kukuata mudimu ne dijingulula dia malu, tuetu tukonkonona bimpe bimpe malu atudi tubala ku diambuluisha dia mikanda yetu itu yumvuija malu a mu Bible. Tuetu tukeba malu a mushinga mu mvese utudi tubala, netumvue Mifundu bimpe menemene nansha mvese itutu katuyi tubala pa tshibidilu to. Tudi mua kulekela Dîyi dia Nzambi ditufumba, tuetu tubala Bible ne lungenyi luimpe. Tuetu tudienzeja bua kuenza malu aa, netumvue buimpe bua malu atudi tubala mu Bible, ne netusemene pabuipi menemene ne Yehowa.​—Mis. 119:17, 18; Yak. 4:8.