1. Ntshinyi tshivua Yezu muambile bayidi bende bua dîba divua nshikidilu ne bua kulua? Ndidimuija kayi divuaye mubapeshe?

 MATUKU makese kumpala kua Yezu kufua, bayidi bende banayi bakamuebeja ne: “Ntshinyi tshikale tshimanyinu . . . tshia nshikidilu wa ndongoluelu wa malu eu?” (Mat. 24:3) Bayidi abu bavua pamuapa badiebeja tshivuabu mua kuambila bantu bakuabu bua dîba divua nshikidilu wa ndongoluelu wa malu wa bena Yuda ne bua kulua. Yezu wakabandamuna, kubambilaye bua nshikidilu wa ndongoluelu wa malu wa bena Yuda ne “wa ndongoluelu wa malu” utudi tusanganyibua lelu eu. Kadi bua dîba divua nshikidilu ne bua kulua, wakabambila ne: “Bua dituku adi ne dîba adi muntu nansha umue ki mmumanye, nansha banjelu badi mu diulu, nansha muana, kadi anu Tatu.” Pashishe wakadimuija bayidi bende bonso bua ‘kushala batabale’ ne kuikala ‘badimuke.’ (Mâko 13:32-37)

2. Bua tshinyi bivua ne mushinga bua bantu bavua mu ndongoluelu wa malu wa bena Yuda bashale batabale?

² Bena Kristo bena Yuda ba mu bidimu lukama bia kumpala bavua ne bua kushala batabale bua bobu kupandishibua. Yezu wakambila bayidi bende bua kukeba mua kumanya dîba divua ndongoluelu wa malu wa bena Yuda ne bua kubutudibua. Wakabambila ne: “Panudi numona Yelushalema munyunguluka kudi biluilu bia basalayi biase tshitudilu, nunku numanye ne: dibutuka diende ndisemene pabuipi.” Dîba adi bavua ne bua kutumikila didimuija dia Yezu dia ‘kutuadija kunyemena ku mikuna.’ (Luka 21:20, 21) Bantu bavua bateye ntema ku didimuija adi bakapanduka pavua bena Lomo babutule Yelushalema.

3. Ntshinyi tshituamona mu tshiena-bualu etshi?

 ³ Lelu tudi mu matuku a ku nshikidilu wa ndongoluelu mubi wa malu eu. Nunku tuetu petu tudi ne bua kulama bieledi bietu bia meji ne kushala batabale. Mu tshiena-bualu etshi netumone mutudi mua kuikala ne nkatshinkatshi patudi tumona malu adi enzeka panu, mutudi mua kuikala badimuke, ne mutudi mua kuenza malu bimpe bitambe ne dîba didi ditushadile.

4. Bua tshinyi mbimpe tuteye ntema ku malu adi enzeka panu bua kumona mudiwu akumbaja mêyi a buprofete a mu Bible?

⁴ Kudi malu mimpe adi atusaka bua kuteya ntema ku malu adi enzeka panu bua kumona mudiwu akumbaja mêyi a buprofete a mu Bible. Tshilejilu, Yezu wakatela mulongolongo wa malu masunguluke adi mua kutuambuluisha bua kumanya ne: nshikidilu wa ndongoluelu wa Satana eu ukadi pabuipi. (Mat. 24:3-14) Mupostolo Petelo wakatukankamija bua kuteya ntema ku dikumbana dia mêyi a buprofete bua ditabuja dietu dishale anu dikole. (2 Pet. 1:19-21) Mukanda wa ndekelu wa mu Bible udi utuadija ne mêyi aa: “Buakabuluibua bua Yezu Kristo, buvua Nzambi mumupeshe, bua kuleja bapika bende malu adi ne bua kuenzeka mu katupa kîpi emu.” (Buak. 1:1) Nunku tudi ne dijinga dikole dia kumanya malu adi enzeka panu ne mudiwu akumbaja mêyi a buprofete a mu Bible. Pamuapa tudi tuzuka bua kulondelangana malu aa.

5. Ntshinyi tshitudi ne bua kuepuka? Kadi ntshinyi tshitudi ne bua kuenza? (Tangila kabidi bimfuanyi.)

⁵ Patudi tuakula bua mêyi a buprofete mbimpe tuepuke kubuka malu. Bua tshinyi? Bualu katuena basue kuamba bualu nansha bumue budi mua kukebesha matapuluka mu tshisumbu to. Tshilejilu, tudi mua kumvua balombodi ba panu bamba mudibu bajinga kujikija bimvundu kampanda ne kubueja ditalala ne bupole. Pamutu pa kutuadija kuamba ne: malu adibu bamba au adi akumbaja mêyi a buprofete adi mu 1 Tesalonike 5:3, mbimpe tuikale bamanye ngumvuilu mupiamupia wa mvese au. Tuetu tuamba malu adi mu mikanda idi bulongolodi bua Yehowa bupatule, tudi tuenza bua bena mu tshisumbu bikale mu buobumue anyi mu “lungenyi lumue.”​—1 Kol. 1:10; 4:6.

6. Mmalongesha kayi atudi mua kupetela mu 2 Petelo 3:11-13?

⁶ Bala 2 Petelo 3:11-13. Mupostolo Petelo udi utuambuluisha bua tuikale ne nkatshinkatshi patudi tukonkonona mêyi a buprofete a mu Bible. Udi utulomba bua ‘kulama dikalaku dia dituku dia Yehowa mu meji etu bimpe.’ Bua tshinyi? Ki mbualu tudi basue kumanya ‘dituku ne dîba’ dialua Armagedone to, kadi mbualu tudi basue kuenza malu bimpe ne dîba didi ditushadile bua kuikala ne ‘bienzedi bia tshikadilu tshia tshijila ne bienzedi bia dilamata Nzambi.’ (Mat. 24:36; Luka 12:40) Mu mêyi makuabu, tudi basue kuikala ne bikadilu bimpe ne kutuishibua ne: tudi tudienzeja bua kuenzela Yehowa mudimu bualu tudi bamunange bikole. Tudi ne bua kuikala badimuke bua kushala anu ne dishindika edi.

7. Mmunyi mutudi tuleja ne: tudi badimuke? (Luka 21:34)

⁷ Yezu wakambila bayidi bende bua bikale badimuke ne bikale bateya ntema ku malu adi enzeka panu. Bualu ebu budi bumuenekela bimpe mu didimuija divuaye mufile mu Luka 21:34. (Bala.) Mona tshidi Yezu wamba: “Nudimuke.” Muntu udi mudimuke mmumanye njiwu yonso idi mua kunyanga malanda ende ne Yehowa, ne udi ukeba tshia kuenza bua kuyepuka.  Yeye muenze nanku, udi udilama mu dinanga dia Nzambi.​—Nsu. 22:3; Yuda 20, 21.

8. Ndidimuija kayi divua mupostolo Paulo mupeshe bena Kristo?

⁸ Mupostolo Paulo wakadimuija bena Kristo bua bikale badimuke. Tshilejilu, wakambila bena Kristo ba mu Efeso ne: “Ikalayi badimuke . . . bua mushindu unudi nuenda kawikadi bu wa bantu badi kabayi ne meji, kadi wikale bu wa bena meji.” (Ef. 5:15, 16) Satana udi udienzeja misangu yonso bua kunyanga malanda etu ne Yehowa. Ke bualu kayi Bible udi utubela bua ‘kutungunuka ne kujingulula tshidi disua dia Yehowa,’ bua tumone mua kukandamena mateta onso.​—Ef. 5:17.

9. Mmunyi mutudi tujingulula tshidi Yehowa musue buetu?

⁹ Bible kena uleja njiwu yonso idi mua kunyanga malanda etu ne Yehowa to. Pa tshibidilu tutu tuangata mapangadika mu malu adi Bible kayi muleje tshia kuenza patoke to. Bua tuetu kuangata mapangadika mimpe, mbimpe tujingulule anyi tumanye “disua dia Yehowa.” Tudi mua kufika ku dienza nanku tuetu tudilongela Dîyi dia Nzambi pa tshibidilu, ne tuelengana meji a malu atudi tubalamu. Tuetu tuenda tumanya disua dia Yehowa, ne tudienzeja bua kuikala ne “meji a Kristo,” netuende bu “bena meji” nansha kuoku kakuyi mikenji misunguluke idi mua kutulombola. (1 Kol. 2:14-16) Bitu bipepele bua kujingulula imue njiwu, kadi bua mikuabu yoyi bitu bikole.

10. Nnjiwu kayi itudi ne bua kuepuka?

¹⁰ Imue njiwu itudi ne bua kuepuka nyoyi eyi: kuambishangana, dikuatshika dia maluvu, budiavi, kuambangana mêyi mabi, kutangila manaya a tshikisu, bindidimbi bia bantu butaka, ne bintu bikuabu bia muomumue. (Mis. 101:3) Muena lukuna wetu Diabolo udi ukeba misangu yonso mpunga ya kunyanga malanda etu ne Yehowa. (1 Pet. 5:8) Tuetu katuyi badimuke, Satana udi mua kukuna ngikadilu mibi eyi mu meji etu ne mu muoyo wetu: dialakana, dipanga bululame, lukuka, lukinu, lutambishi ne dilaminangana munda. (Gal. 5:19-21) Ku ntuadijilu udi mua kumona bu ne: ngikadilu eyi ki mmibi to. Kadi tuetu katuyi bakebe tshia kuenza diakamue bua kuyumbusha mu muoyo wetu, neyitungunuke ne kukola anu bu tshisonsa tshibi tshia lulengu ne neyitukebele ntatu.​—Yak. 1:14, 15.

11. Nnjiwu kayi ya muinshimuinshi itudi ne bua kuepuka? Bua tshinyi?

¹¹ Njiwu mikuabu ya muinshimuinshi mmalunda mabi. Tuangate tshilejilu etshi. Udi wenza mudimu ne muntu udi kayi Ntemu to. Bu muudi musue bua ikale umona Bantemu ba Yehowa mu mushindu muimpe, udi umuenzela malu ne bulenga, ne umuambuluisha. Udi mua kuitaba kabidi bua kutuadija kudia nende. Katantshi aka ukadi udia nende pa tshibidilu. Musangu mukuabu udi umvua wakula malu a busenji, wewe kuanji kualengulula. Kadi mu kupita kua matuku, udi utuadija kuibidilangana bikole ne malu au kutshiyi umvua akutonda kabidi to. Dituku dikuabu udi witaba dibikila dia muena mudimu nebe au dia kuya kunua nende maluvu padi mudimu ujika. Ndekelu wa bionso, udi utuadija kuenza malu bu muena mudimu nebe au. Mu bualu ebu tudi tumona ne: kabiakunenga bua wewe kutuadija kuenza malu bu yeye to. Bushuwa tutu bantu bimpe ne tutu tunemeka muntu yonso, kadi mbimpe tuvuluke ne: bantu batudi tusungula bua kusomba nabu badi mua kunyanga bikadilu bietu anyi kubiakaja. (1 Kol. 15:33) Tuetu balonde mubelu wa Yezu wa kuikala badimuke, netuepuke balunda babi badi kabayi batumikila mikenji ya  Yehowa to. (2 Kol. 6:15) Dîba adi netujingulule njiwu ne netuyepuke.

12. Ntshinyi tshivua bayidi ba Yezu ne bua kuenza pavuabu bindile nshikidilu wa ndongoluelu wa malu wa bena Yuda?

¹² Bayidi ba Yezu kabavua ne bua kushala bavunge maboko pavuabu bindile nshikidilu wa ndongoluelu wa malu wa bena Yuda to. Yezu wakabapesha mudimu wa kuenza. Wakabatumina dîyi bua kuyisha lumu luimpe “mu Yelushalema, mu Yudaya mujima ne mu Samalea, too ne ku miaba ya kule menemene ya pa buloba.” (Bien. 1:6-8) Au si uvua mudimu wa dikema uvua Yezu mupeshe bayidi bende! Pavuabu badifila ne muabu muonso mu mudimu au, bavua benza malu bimpe bitambe ne dîba diabu.

13. Bua tshinyi mbimpe tuenze malu bimpe bitambe ne dîba dietu? (Kolosayi 4:5)

¹³ Bala Kolosayi 4:5. Bua tuetu kuikala badimuke, mbimpe tumanye mua kuenza malu ne dîba dietu, bualu “malu adi kaayi matekemena” adi mua kufikila yonso wa kutudi. (Muam. 9:11) Lufu ludi mua kutukuata mu tshimpitshimpi.

14-15. Mmunyi mutudi mua kuenza malu bimpe menemene ne dîba dietu? (Ebelu 6:11, 12) (Tangila kabidi tshimfuanyi.)

¹⁴ Tudi mua kuenza malu bimpe menemene ne dîba dietu patudi tuenza disua dia Yehowa,  ne tukolesha bulunda buetu nende. (Yone 14:21) Mbimpe ‘tuikale bashindame, katuyi kunyungisha, bikale amu ne bia bungi bia kuenza mu mudimu wa Mukalenge.’ (1 Kol. 15:58) Dîba adi palua nshikidilu, ni ngua muoyo wetu anyi wa ndongoluelu mubi wa malu eu, katuakuikala ne bualu bua kunyingalela to.​—Mat. 24:13; Lomo 14:8.

¹⁵ Lelu, Yezu udi utungunuka ne kulombola bayidi bende padibu benza mudimu wa kuyisha lumu luimpe lua Bukalenge pa buloba bujima. Ukadi mukumbaje tshivuaye mulaye. Ku diambuluisha dia bulongolodi bua Yehowa, udi utulongesha mua kuyisha, ne udi utupesha bitudi nabi dijinga bua kumuangalaja lumu luimpe. (Mat. 28:18-20) Tudi tuenza tshietu tshitupa patudi tudienzeja bikole bua kuyisha ne kulongesha, ne tushala batabale bindile bua Yehowa abutule ndongoluelu wa malu eu. Tuetu batumikile mubelu udi mu Ebelu 6:11, 12, netuikale anu ne ditekemena dietu “too ne ku ndekelu.”​—Bala.

16. Tudi badisuike bua kuenza tshinyi?

¹⁶ Yehowa ukadi muteke dituku ne dîba diabutulaye ndongoluelu mubi wa malu wa Satana eu. Pakumbana dituku adi, neakumbaje mêyi a buprofete onso akavuaye mufundishe mu Dîyi diende. Imue misangu tudi mua kuela meji ne: nshikidilu wa ndongoluelu wa malu eu kakulua mpindieu to. Kadi dituku dia Yehowa ‘kadiakujanguluka nansha!’ (Hab. 2:3) Nunku tudisuikayiku bua ‘kushala batangile kudi Yehowa,’ tuleja “lungenyi lua kuindila Nzambi wa lupandu [luetu].”​—Mika 7:7.