“PAMVUA MUANA, MVUA NGUMVUA BIPENDU NE DIELELANGANA MBILA BIKOLE.” Ke muvua mamu kampanda diende Patricia muambe. Wakamba kabidi ne: “Tshivua mulonge bua kufuilangana luse to. Nansha ku bukulumpe eku, bobu bangenzele bibi mvua anu nshala nyingalala, mpangila ne tulu.” Mu bulelela, difiikilangana munda ne dilaminangana munda kabitu bipetesha disanka anyi makanda a mubidi to. Malu akadi baminganga bamone adi aleja ne: bantu batu kabayi bafuilangana luse badi mua

• Kulekela tshiji anyi dilaminangana munda bibanyangila malanda ne bakuabu, bashala ba katadi wa pa buende anyi bantu nkaya

• Kulua bantu badi bafiikilangana munda lukasa, kabualu nansha kakese kabatonda, anyi kabatshiokesha mu lungenyi bikole menemene

• Kutamba kuimanyina pa bualu bubi budibu babenzele bibapangisha ne disanka

• Kumona ne: kabena ne ditalala dia nsongo bualu mbamanye ne: kufuilangana luse ke tshidibu ne bua kuenza

• Kupeta tunyinganyinga tua bungi ne njiwu mikole ya kupeta masama bu mudi luendu lua mashi, masama a mioyo, ne a mubidi utakanyika bu mudi dia masungu ne mutu usama *

DIFUILANGANA LUSE NTSHINYI? Nkubuikidila muntu udi muetuenzele bibi, kulekela tshiji, kubenga kumulamina munda, ne kulekela lungenyi lua kudisombuela. Ki nditaba bubi butuenzela, kubupepeja, anyi kuenza bu ne: kabuvua buenzeke to. Kadi mbualu budi muntu welela meji ne usungula bua kuenza budi buleja mudiye ne dinanga didi dimusaka bua kusomba ne udi mumuenzele bibi au mu ditalala ne kudia nende malanda mimpe anyi kualama.

Difuilangana luse didi dileja kabidi mutudi tumvuilangana. Muntu utu ufuilangana luse mmumanye ne: tuetu bonso tutu tutupakana, anyi tuenza mpekatu, mu mêyi ne mu bienzedi. (Lomo 3:23) Bible udi wamba bualu bua muomumue ebu ne: “Nutungunuke ne kulejangana lutulu ne kufuilangana luse ne muoyo mujima nansha muntu yeye tshilumbu ne mukuabu.”​—Kolosayi 3:13.

Nunku tudi mua kuamba ne: difuilangana luse ntshibadi tshia dinanga didi “tshisuikidi tshipuangane tshia buobumue.” (Kolosayi 3:14) Bushuwa, bilondeshile site wa Enternete wa Mayo Clinic, difuilangana luse didi difikisha ku

•   Dikala mu malanda mimpe ne bakuabu, ne ku diditeka kaba ka udi mutuenzele bibi, kumumvuila, ne kumuleja luse

• Dikala ne ditalala dia mu lungenyi dia bungi ne kuikala mu ditalala ne Nzambi

• Dibenga kutamba kusamisha mutu anyi kunyingalala peshi kuikala lukuna ne muntu

• Dikepesha malu adi atshiokesha mu lungenyi

DIFUILA WEWE MUINE LUSE. Bilondeshile tshikandakanda kampanda, didifuila luse didi mua kuikala “bualu bukole menemene bua kuenza” kadi “mbualu budi ne mushinga wa bungi menemene bua kuikala bimpe” mu lungenyi ne ku mubidi. (Disability & Rehabilitation) Ntshinyi tshidi mua kukuambuluisha bua kudifuila luse?

• Kutekemenyi ne: newikale mupuangane mu biudi wenza to, kadi itaba ne: newenze bilema anu bu bantu bonso.​—Muambi 7:20

• Bilema biebe bikulongeshe bua kubenga kubienzulula

• Ikala udileja lutulu wewe muine; bimue bilema biutu wenza ne bibidilu bibi bikuabu biudi nabi kabiakujika anu dimue dimue to.​—Efeso 4:23, 24

• Ikala usomba ne balunda badi bakankamijangana, badi bamona malu mu mushindu muimpe, ne badi ne malu mimpe kadi badi mua kukuleja bilema biebe patoke.​—Nsumuinu 13:20

• Wewe muenzele muntu bibi, itaba bualu abu ne lomba luse ne lukasa. Paudi ulengejangana ne muntu au, newikale ne ditalala dia munda.​—Matayi 5:23, 24

Patricia utukadi batele wakalonga mua kufuilangana luse pavuaye mulonge Bible. Wakafunda ne: “Tshiji tshivua tshinyangila nsombelu katshitshiena tshingele muonji mu nshingu to. Tshitshiena nkenga anyi nkengesha bakuabu to. Mêyi manene a mu Bible adi ajadika mudi Nzambi mutunange ne musue diakalenga dietu.”

Muntu mukuabu diende Ron wakamba ne: “Tshivua mua kukanda meji avua bantu bela ne malu avuabu benza to. Kadi mvua mua kukanda meji anyi ne bienzedi bianyi meme. Bu mumvua musue kuikala ne ditalala, mvua ne bua kulekela dilaminangana munda. Ngakatuadija kumona ditalala ne dilaminangana munda bu ku mutu ne ku manda kua mâyi. Tshivua mua kuikala miaba yonso ibidi ayi musangu umue to. Ndi mpindieu ne kondo ka muoyo kimpe.”