MMISANGU BUNGI KAYI IUKADI MUMVUE BAMBA MUDI MUNTU NE DISANKA NE MUTANTE ANU BUALU UDI NE BINTU BIA BUNGI ANYI MUBANJI? Lungenyi elu ndusake bantu ba bungi bua kuenza mudimu mêba a bungi adi atshiokesha bua kupeta makuta a bungi. Kadi makuta ne bintu bidi mua kupetesha disanka dia matuku a bungi anyi? Malu akadi menzeke adi aleja tshinyi?

Bilondeshile tshikandakanda kampanda, patudi anu tupeta bintu binene bitutu nabi dijinga, tudi tumona ne: kuvudija kabidi makuta kakuena kutupetesha disanka dipite pa dituvua nadi anyi kuenza bua tuikale bimpe kupita mutuvua to. (Journal of Happiness Studies) Tshilumbu ki ntshia makuta to. Tshiena-bualu tshia mu tshikandakanda kampanda tshivua tshiambe ne: “Tshidi tshipangisha disanka nkudisunsula bua kupeta [makuta].” (Monitor on Psychology) Mêyi aa adi amba bualu bua buena buvuabu bafunde mu Bible kukadi bidimu bitue ku 2000 bua ne: “Dinanga dia makuta didi muji wa malu mabi a mishindu yonso, ne bua dipatshila dinanga edi, bamue bantu . . . mbadisunsule mubidi mujima ne tunyinganyinga tua bungi.” (1 Timote 6:9, 10) Tunyinganyinga atu tudi mua kuikala tua bishi?

DISAMISHA MUTU NE DIPANGA TULU BUA KUKUBA BUBANJI BUETU. “Tulu tua muena mudimu ntushême, nansha yeye udia bikese anyi bia bungi, kadi bintu bia bungi bia mubanji kabiena bimuladika tulu.”​—Muambi 5:12.

DIEDIBUA MÂYI KU MAKASA PADI DISANKA DITUDI BATEKEMENE KADIYI DILUA. Tshia kumpala, tudi tuedibua mâyi ku makasa bualu dijinga dia makuta kaditu dijika to. “Muntu udi munange arjan kakukuta arjan nansha, anyi muntu udi munange biuma kakukuta tshidiye upeta to.” (Muambi 5:10) Tshibidi, nzala ya bubanji idi mua kusaka muntu bua kulengulula malu a mushinga atu apetesha disanka, bu mudi: kusomba ne bena mu dîku ne balunda anyi kuenza malu a Nzambi.

TUNYINGANYINGA NE DIUMVUA BIBI PADI MAKUTA AKEPA MUSHINGA WAWU NE BINTU BITUDI BELE MAKUTA KABIYI BIYE KUMPALA. “Kudisunsudi bua kupeta bubanji. Lekela ne leja muudi ne lungenyi. Paudi welaku mêsu ebe, kabuenaku, bualu mu bulelela, nebuase masala bu nyunyi wa mukanku, nebubuke.”​—Nsumuinu 23:4, 5.

KUSANKA NE BITUDI NABI. “Katuena balue ne tshintu panu, ne katuena mua kumbukapu ne tshintu to. Nunku bu mutudi ne biakudia ne bilamba, tusanke ne bintu ebi.” (1 Timote 6:7, 8) Bantu badi basanka ne bidibu nabi kabatu batamba kudilakana anyi kudiabakena to, ne lungenyi elu ludi lubambuluisha bua kubenga kuikala ne dialakana. Bu mudibu kabidi kabayi bajinga bidibu kabayi mua kukokesha, badi badiepula ku tunyinganyinga ne ku disamisha mutu bia tshianana.

MUOYO WA TSHIPAPAYI. “Disanka dia kufila ndipite dia kuangata.” (Bienzedi 20:35) Bantu badi ne muoyo wa tshipapayi batu ne disanka bualu batu basue kuambuluisha bakuabu bua kuikala ne disanka, nansha bobu bafila anu ndambu wa dîba diabu anyi wa bukole buabu. Batu batamba kupeta bintu bidi makuta nansha wowu bungi kayi kaayi mua kusumba, bu mudi: dinanga, kanemu, ne balunda balelela batu balua kubapesha pabu bintu ne tshianza tshilekelela!​—Luka 6:38.

KUTEKA BANTU KUMPALA KUA BINTU. “Kudia bisekiseki muaba udi dinanga nkuimpe kupita kudia ngombe wa manyi muaba udi lukinu.” (Nsumuinu 15:17) Bidi biumvuija ne: kunanga bakuabu kudi ne mushinga kupita biuma. Netumone kabidi ne: kunangangana kudi ne mushinga wa bungi bua kuikala ne disanka.

Sabina wa mu Amerike wa ku sud wakalua kumona mushinga wa mêyi manene a mu Bible. Pavua bayende mumulekele, wakatuadija kuluangana bua kukumbaja majinga ende yeye a mushinga ne a bana bende babidi. Uvua wenza midimu ibidi ne uvua ujuka dituku dionso patshiatshia. Nansha muvuaye ne bia bungi bia kuenza bivua bimutshiokesha, wakadisuika bua kulonga Bible. Tshiakenzeka ntshinyi?

Malu ende a mpetu kaakashintuluka to. Kadi mushindu wende wa kumona malu wakashintuluka bikole be! Tshilejilu, wakapeta disanka didi difumina ku dikumbaja malu a mu nyuma. (Matayi 5:3) Wakapeta balunda balelela munkatshi mua bena kuibatuja nende. Kupetaye kabidi disanka dia kufila pavuaye wambila bakuabu malu avuaye mulonge.

Bible udi wamba ne: “Meji adi adibingisha ku bipeta biawu.” (Matayi 11:19; dimanyisha dia kuinshi kua dibeji) Bua mvese eu, kusanka ne bitudi nabi, kuikala ne muoyo wa tshipapayi, ne kuteka bantu kumpala kua bintu mbileje patoke ne: bidi bipetesha disanka!