‘Mpekatu mmubuele mu ba pa buloba kupitshila kudi muntu umue, ne lufu ndubuele bua mpekatu au, ne mushindu eu lufu ndutampakane kudi bantu bonso.’​—LOMO 5:12.

Nzambi uvua mufuke Adama ne Eva baledi betu ba kumpala ne meji ne mubidi bipuangane. Uvua kabidi mubateke mu Mparadizu pa buloba uvuabu babikila ne: budimi bua Edene. Uvua mubambile ne: bavua mua kudia bimuma bia mitshi yonso ya mu budimi, pakumbusha bia mutshi umuepele. Kadi Adama ne Eva bakadia tshimuma tshia mutshi au; ke mpekatu uvuabu benze au. (Genese 2:15-17; 3:1-19) Bu muvuabu babenge kutumikila Nzambi, wakabipata mu budimi ne nsombelu wakabakolela. Bakalua kulela bana; ne nsombelu kukolelaye bana abu pabu. Bonso bakakulakaja, kufuabu. (Genese 3:23; 5:5) Tudi tusama, tukulakaja, ne tufua bualu tudi ba mu dîku dia kumpala adi.

“Ba pa buloba buonso badi ku bukokeshi bua mubi.”​—1 YONE 5:19.

“Mubi” au badi bamubikila ne: Satana. Ntshifukibua tshia mu nyuma tshidi katshiyi tshimueneka tshivua tshitombokele Nzambi. (Yone 8:44; Buakabuluibua 12:9) Bifukibua bikuabu bia mu nyuma biakalua kutua Satana mu nyima. Badi babibikila ne: bademon. Nyuma mibi ayi itu ishimakaja bantu ne bukole  buayi ne ibapambuisha kudi Mufuki wetu. Itu isaka bantu ba bungi bua kuenza malu mabi. (Misambu 106:35-38; 1 Timote 4:1) Satana ne bademon batu basue kukengesha bantu.

“Tshionso tshidi muntu ukuna ke tshiapuolaye kabidi.”​—GALATIYA 6:7.

Tuetu bonso tudi tukenga mu mishindu mishilashilangane bua mpekatu utudi bapiane ne bua malu adi Satana usakangana bua kuenza pa buloba apa. Kadi misangu mikuabu bantu badi badikengesha pabu. Mushindu kayi? Padibu benza malu mabi anyi bangata mapangadika adi kaayi ne mutu, misangu ya bungi batu bapeta malu mabi. Ku lukuabu luseke, patu bantu benza malu mimpe, batu bapeta malu mimpe. Tshilejilu, tatu udi ne bululame, wenza mudimu bikole, ne unanga dîku diende, neapete malu a bungi mimpe ne bena mu dîku diende nebikale ne disanka. Kadi tatu udi unaya manaya a makuta, muikale kanuayi, anyi muena lulengu, udi udibueja yeye ne dîku diende mu bupele. Nunku mbimpe tuteleje Mufuki wetu. Mmusue bua tupete malu mimpe a bungi, bu mudi “ditalala divule.”​—Misambu 119:165.

“Mu matuku a ku nshikidilu . . . , bantu nebikale badinangi, banangi ba makuta, . . . kabayi batumikila baledi babu, . . . kabayi badikanda, bena luonji, kabayi banange malu mimpe.”​—2 TIMOTE 3:1-5.

Lelu bantu bungi badi benza malu anu mukavua mêyi au mambe. Ngenzelu wabu wa malu udi pende ufila tshijadiki tshia ne: tudi mu “matuku a ku nshikidilu” wa bukuapanu ebu. Mifundu ikavua mileje ne: tshikondo tshietu etshi kuvua ne bua kuikala mvita, biyole bia nzala, dikanka dikole dia buloba, ne masama. (Matayi 24:3, 7, 8; Luka 21:10, 11) Malu aa adi akebela bantu makenga a bungi ne lufu.