BULOBA BUETU EBU NEBUSHALAKU KASHIDI ANYI?
Metu
BAMANYI ba malu a metu batu bamba ne: “Metu ke adi alama bantu ne muoyo.” Badi bamba nanku bualu mitshi itu ikoka kapepe kabi kadi mua kutuenzela bibi. Itu kabidi ipatula kapepe kimpe katutu tueyela. Bia pa lukama bitue ku 80 bia mitshi ne nyama itu mu metu. Metu owu kaayiku, tudi tufua.
Tshidi tshitusaka bua kulama metu
Batu bashimbula miliyare ne miliyare ya mitshi tshidimu tshionso etshi, bashiya buloba anu tshipela nangananga bua kuenza madimi. Kutuadijila anu ku ndekelu kua bidimu bia 1940, tshia bibidi tshia metu a buloba bujima atu akoka mvula ntshibutuke.
Padibu bashimbula metu, bukua nyama ne bintu bionso bidimu bidi bijimina.
Mbafuke buloba bua bushalaku kashidi
Miaba mikuabu itubu bupula metu itu ikokesha kupatulula kabidi metu makuabu mu mushindu wa dikema, mafuane kualabala kabidi. Matuku mashale aa, bamanyi bakuabu mbakeme bikole pavuabu bamone muvua miaba ivua bantu bupule metu, mitshi mibange kudipatukilapu nkayayi ne lukasa luonso, ilua kabidi ditu dinene. Tshilejilu:
-
Bakebuludi badi benda balonga miaba ivua metu avua bantu bupule bashiye buloba tshipela bua kuenza madimi, kadi balue kuyilekela, metu masasulule kabidi. Pavuabu balonge miaba 2 200 ya nanku ya mu Amerike ne mu Afrike wa ku Ouest, bavua bamone ne: metu adi mua kusasulula kabidi miaba ayi mu bidimu bitue ku 10 tshianana.
-
Bakebuludi badi batshinka ne: bilondeshile malu avua bamanyi kampanda balonge, mu bidimu bitue ku 100 patupu, metu avua mua kupinganununa miaba ayi anu muawu ne kale.—Tshibejibeji tshia Science.
-
Bidimu bishale ebi, bamanyi ba malu a bia panu ba mu Brésil mbamone dishilangana didi pankatshi pa dikola dia metu adibu bakununune mu maloba avua bantu kabayi banyange ne dia metu a mu maloba adibu banyange.
-
Tshikandakanda kampanda tshidi tshiakula bua malu avua bamanyi balonge au tshiamba ne: “Padibu bajingulule ne: kukuna mitshi kakuena ne mushinga, mbumvue disanka dia katshia!” (National Geographic) Miaba ivua muntu kayi mukune mitshi ivuabu balonge ayi “ikavua miuwule tente ne mitshi itu miaba ayi” anu mu bidimu 5 tshianana.
Tshidi bantu benda benza
Mbandienzeje bikole pa buloba bujima bua kulama metu adiku ne kupingajulula akavuabu basunsule. Ke bualu kayi Bulongolodi bua Matunga Masanga mbuleje ne: “Tshia bibidi tshia metu avuabu bashimbula kumpala pa buloba bujima ntshikepele mpindieu” kupita muvuabi bienzeka bidimu 25 bishale ebi.
Kadi bionso bidibu benze ebi ki mbikumbane bua kulama metu to. Bilondeshile luapolo kampanda “mushindu uvuabu bupula metu bidimu bishale ebi ki mmushintuluke bikole to.”—Global Forest Watch
Metu a bungi adi enda ajimina lelu bualu kudi kumpanyi itu ipeta makuta miliyare ya bungi bua mitshi ya momu ituyi iba bua kupana.
Tusumbu tua balami ba metu batu bakosa mitshi ikadi mikulakaje bua kumona mua kutenteka ya miana
Malu adi ajadika ne: metu kaakujimina to—Tshidi Bible wamba
“Yehowa a Nzambi wakatoluesha mitshi yonso ivua mimpe kumona ne ivua mimpe bua kudia pa buloba.”—Genese 2:9.
Mufuki wa metu onso mmuafuke ne bukole bua kusasulula ne kuambuluisha bantu. Mmusue kulama metu bua bintu bionso bidimu kabijiminyi to.
Bible udi uleja ne: Nzambi neabutule bantu badi banyanga bintu bia pa buloba bua dibulunge edi ne bintu bionso bidi ne muoyo kabibutuki to. Tangila tshiena-bualu tshia “Nzambi udi ulaya ne: buloba buetu ebu nebushalaku kashidi,” mu dibeji dia 15.
a Yehowa ke dîna dilelela dia Nzambi.—Misambu 83:18.
