Bua tshinyi bantu kabatshiena banemeka muoyo?
BUA TSHINYI BIDI NE MUSHINGA BUA KUNEMEKA MUOYO?
Kuenza malu adi mua kutukebela tuetu ne bakuabu njiwu kudi kuleja ne: katuena tunemeka muoyo to.
-
Kunua makanya kutu kukebelangana kansere ne kupangisha mubidi bua kukaluisha. Bantu bia pa lukama bitue ku 90 mbafue kansere ka mu bisulusulu kakebesha kudi dinua dia makanya anyi kudi muishi wawu.
-
Mishi ya bingoma itu ikebela bantu masama a mitu tshidimu tshionso. Luapolo lua iniversite wa Stanford ludi luamba ne: “Makebulula adi aleja ne: nansha muvua bantu bavua bapanduke ku bingoma bivuabu batute mu tshilongelu atshi kabayi batapike, mbashale ne masama a mitu abatatshisha.”
-
Bantu bobu bakuatshike maluvu anyi banue bintu bidi binyungulula mutu padibu bendesha mashinyi, badi bateka mioyo ya bantu mu njiwu nansha aba badi bendela kumpenga kua njila. Padi bantu baleja mudibu kabayi bangata muoyo ne mushinga, badi batatshisha bantu badi kabayi ne bualu.
TSHIUDI MUA KUENZA
Kuba makanda ebe a mubidi. Dîba ki ndianji kupita bua kulekela tshikadilu tshidi mua kukukebela ntatu bu mudi tshia kunua makanya, kunua maluvu kupitshisha, ne kunua bintu bidi binyungulula mutu to. Kunua bintu ebi kudi kuteka muoyo webe mu njiwu ne kudi kuleja ne: kuena unemeka muoyo wa bakuabu anyi wa bena mu dîku diebe anyi dienu to.
Kuba muoyo webe ne wa bakuabu. Bua kuepuka njiwu, bidi bikengela utungunuke ne kulama nzubu webe bimpe. Ikala wendesha mashinyi bimpe ne utungunuke ne kuenza bua ikale anu mimpe. Kulekedi bakuabu bakusaka bua kuenza malu adi mua kukukebela njiwu minene anyi lufu to.
Enzela bakuabu malu mimpe. Kunemeka muoyo kudi kumvuija kuenzela bantu bonso malu mimpe, nansha bobu ba makoba mashilangane, ba matunga mashilangane, babanji anyi bapele, balonge anyi kabayi balonge. Mu bulelela, dielelangana meji mabi ne lukinu ke bitu bikebesha tshikisu tshia bungi ne mvita pa buloba.
TSHITU BANTEMU BA YEHOWA BENZA
Bantemu ba Yehowa batu balongesha bakuabu mua kuikala ne makanda a mubidi mimpe. Programe wetu wa dilongeshangana Bible mmuambuluishe bantu bua kubenga kuikala bakanuayi ba bintu bidi binyanga mubidi.
Tutu tutumikila mikenji ya mua kudikuba ne muoyo mujima patutu tuenza midimu yetu ya luibaku. Miaba yetu ya kuenzela bisangilu ne Nzubu yetu mikuabu bitu biambuluisha bua kuenza mudimu wetu wa dilongeshangana Bible. Nunku batu balongesha bana betu badi bayibaka mua kuepuka njiwu. Kutu bana betu batu ne mudimu wa kuikala kutangila Nzubu yetu ayi bua yikale yinemeka mikenji ya mua kudikuba ya muaba udibu bayibakile.
Tutu tuambuluisha bantu ba miaba idi bipupu bienzeke. Mu ngondo 12 mishale eyi, tuvua batula makuta miliyo ya ndola mitue ku 12 ivuabu bafile kudi bana betu bu mapa bua kuambuluisha bantu bavua bapete ntatu mu bipupu bitue ku 200 bivua biteke mioyo ya bantu mu njiwu pa buloba bujima.
Pavua tshipupu tshia Ebola tshibudike ku Ouest kua Afrike (2014) ne mu ditunga dia République démocratique du Congo (2018), tuakalongesha bantu bua bamanye tshia kuenza bua kabatampakaji disama adi to. Tuakatuma baleji-mpala betu bua kumvuija bana betu tshiena-bualu tshia ne: “Ditumikila didi disungila mioyo.” Tuakafila bintu bia kuowela bianza, kubitekabu ku tshibueledi tshia muaba wetu onso wa kutendelela. Tuakatamba kuimanyina pa mushinga wa kuowa mâyi ku bianza ne kumvuija mishindu mikuabu ya mua kubenga kutampakaja disama adi.
Bakela Bantemu ba Yehowa kalumbandi ku tshisanji kampanda tshia mu Sierra Leone bua muvuabu bambuluisha Bantemu nabu ne bantu bakuabu ba tshianana bua kuepuka disama dia Ebola adi.
Muaba wa kowela mâyi ku bianza wa ku Nzubu wa Bukalenge pavua disama dia Ebola dibudike mu Libéria mu 2014
a Mu Asie, mukenji wa meji eu uvua uleja muvua bantu baditatshisha ne muoyo mujima bua kukuba bena mu mêku abu ne bantu bakuabu.
