Mmunyi mudi biamu mua kunyanga ngelelu webe wa meji?
Bantu badi anu balonga malu a bungi adi atangila tulasa, mudimu, anyi malu makuabu. Biamu bidi mua kubambuluisha bikole. Katshia katshia, kumpala kabivua bipepele bua bantu kulongela malu a bungi basombele anu kumbelu to.
Kadi bantu ba bungi badi bakuata mudimu bikole ne biamu ebi mbamone ne: . . .
-
bitu bibakolela bua kutuma meji abu onso ku bidibu babala.
-
dienza mudimu ne biamu nanku ditu dibabueja mu ditanaji bipepele.
-
mu matuku makese batu bumvua bibi bua dikala pa nkayabu.
TSHIUDI NE BUA KUMANYA
DIBALA
Bamue batu babuela ku Enternete bangata bidibu basanganaku kabayi ne lutulu lua kuanji kubibala bua kumvua malu onso adimu.
Mbimpe kuya ne malu lukasa nanku dîba diudi ukeba diandamuna dia lukonko kampanda lukasa lukasa. Kadi wewe musue kubala tshiena-bualu kampanda ne dijinga dia kutshiumvua bimpe menemene, kuyi lukasa lukasa nanku to.
NKONKO YA KUELELA MEJI: Utu ukumbana bua kubala malu a bungi bimpe anyi? Bua tshinyi wewe ubala malu bimpe bimpe nebikuambuluishe bua kupeta dimanya?—NSUMUINU 18:15.
DITEKA MEJI KABA KAMUE
Bamue badi bamba ne: biamu bidi bibambuluisha bua kuenza malu abidi musangu umue—Tshilejilu, batu bafundilangana mesaje ne balunda babu eku benda balonga. Kadi bobu kabayi bateke meji ku bualu bumue, bakeba kuenza onso abidi musangu umue, kabakuenza onso bimpe to, nangananga owu alomba kuteka meji kaba kamue.
Kuteka meji kaba kamue kudi kulomba kudienjeja bikole menemene, kadi nebikuambuluishe bua kupeta dimanya. Nsonga wa tshitende kampanda diende Grace udi wamba ne: “Kuakuenza bilema bia bungi ne kabiakutamba kukusamisha mutu to. Ndi mulonge ne: mbimpe kuteka meji ku bualu bumuepele, kuepuka dienza malu a bungi musangu umue bualu adi afila ditanaji.”
LUKONKO LUA KUELELA MEJI: Dienza malu a bungi musangu umue ditu dikupangisha bua kumvua malu audi ulonga, upanga mua kuavuluka anyi?—NSUMUINU 17:24.
DIDIUMVUA NKAYA
Bamue batu badiumvua bibi padibu nkayabu kakuyi wa kubayukidisha, ke bualu kayi batu babanga kujikija lutetuku ne biamu biabu. Mamu kampanda diende Olivia udi wamba ne: “Meme tshiyi mutue minu mu telefone, mu tablete, anyi tshiyi mutemeshe TV nansha bua minite 15 tshitu ndiumvua bimpe to.”
Kadi tshikondo tshitudi pa nkayetu atshi si ntshikondo tshimpe tshitudi mua kuelangana meji bikole. Tumanye ne: dielangana meji ndilonga padi. Ki mbualu budi butangila bansonga nkayabu to, nansha bantu bakole kabidi.
LUKONKO LUA KUELELA MEJI: Pautu pa nkayebe, utu welangana meji anyi?—1 TIMOTE 4:15.
TSHIUDI MUA KUENZA
KONKONONA MUSHINDU UUDI UKUATA MUDIMU NE BIAMU BIEBE
Ntshinyi tshiudi mua kuenza bua biamu biebe biambuluishe ngelelu webe wa meji? Ndîba kayi didibi mua kukupangisha bua kuteka meji kaba kamue bua kulonga?
DÎYI DINENE DIA MU BIBLE: “Ulame meji adi ambuluisha ne bukokeshi bua kunana lungenyi.”—NSUMUINU 3:21.
