Kuoku bualu budi butusaka bua kuitaba ne: makenga neajike, nunku ditekemena adi didi mua kuakaja mushindu utudi tumona Nzambi ne utudi tumona malu mu nsombelu wetu.

Bantu ba bungi mbasue kujikija makenga, kadi kabena mua kukokesha bua kuenza malu a bungi bua kuajikija to. Mona malu adi alonda aa:

Nansha mudi malu a luondapu maye kumpala . . .

• Disama dia muoyo ditshidi anu tshikebeshi tshitambe bunene tshia lufu.

• Kansere kadi kashipa bantu miliyo ne miliyo tshidimu tshionso etshi.

• Doktere David Bloom mmufunde mu tshibejibeji kampanda ne: “Bantu badi batungunuka ne kukengeshibua ne masama mabi a tshiambu munkatshi mua bidimu bia bungi, kudi a mapiamapia adi mabuele mu bantu, ne makuabu a kale adi mapingane.”​—Frontiers in Immunology.

Nansha mudi amue matunga mikale ne makuta a bungi . . .

• Tshidimu tshionso etshi, bana miliyo ne miliyo badi bafua. Bitu bitamba kuenzeka miaba idi bantu bikale bapele.

• Bantu miliyare ne miliyare kabena ne nkumba mimpe to.

• Bantu miliyo nkama ne nkama kabena ne mâyi mimpe a kunua to.

Nansha mudi bantu ba bungi lelu bamanye mua kuenzela bakuabu malu . . .

• Luapolo lua bulongolodi bua matunga masanga ludi luleja ne: “Mu matunga a bungi ne miaba ya bungi, badi batungunuka ne kupanyisha bantu ne kabena balumbuluisha bantu badi benza bualu ebu to. Bidi bienzeka nanku bualu bamfumu badi mua kuikala kabayi bamanye ne: badi bapanyisha bantu anyi bualu kabena ne mushindu wa kukuata bantu abu to.”

  BUA KUMANYA MALU MAKUABU

  Tangila filme wa Bukalenge bua Nzambi ntshinyi? udi mu site wa jw.org.

Nzambi udi ututabalela.

Kena ulengulula makenga ne tunyinganyinga tuetu to.

“[Nzambi] ki mmupetule anyi mukine makenga a muntu udi mukengeshibue; yeye ki mmumusokoke mpala wende to. Pavuaye mumudidile ulomba diambuluisha, yeye wakateleja.”​—MISAMBU 22:24.

‘Numupuile ntatu yenu yonso, bualu yeye udi unutabalela.’​—1 PETELO 5:7.

Makenga kaakuikalaku bua kashidi to.

Bible udi ulaya ne: Nzambi neakumbaje tshidiye mutulongoluele.

“Nzambi . . . neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi.”​—BUAKABULUIBUA 21:3, 4.

Nzambi neajikije malu adi akebela bantu makenga.

Neenze nanku ku diambuluisha dia Bukalenge buende, budi Bible uleja ne: mmbulamatadi mulelela.

“Nzambi wa mu diulu neajadike bukalenge bukuabu buikala kabuyi mua kubutudibua nansha kakese. Bukalenge ebu kabuakuya kudi tshisamba tshikuabu to. . . . Buobu nkayabu nebushalaku kashidi.”​—DANYELE 2:44.