Bantu ba bungi badi babenga Nzambi bualu badi bamuela tshilumbu pambidi bua makenga.

Bamfumu ba bungi ba bitendelelu mbalongeshe bantu buludiludi anyi mu mishindu kampanda ne: Nzambi ke udi ukebesha makenga atudi nawu. Tshilejilu, bamue badi bamba ne:

• Bipupu bidi bienzeka ndinyoka dia kudi Nzambi.

• Bana badi bafua bualu Nzambi udi dijinga ne banjelu ba bungi mu diulu.

• Nzambi utu ne luseke kampanda mu mvita, payi itu ikebesha makenga a bungi.

Mbikumbane bua kuamba ne: malu adi bamfumu ba bitendelelu balongesha bua Nzambi nga dishima anyi? Kadi bikala Nzambi mumane kubabenge?

Nzambi katu ukebesha makenga atudi nawu to.

Yeye muenze nanku, nebibengangane ne ngikadilu yende idibu baleje mu Bible. Tshilejilu:

“Njila [ya Nzambi] yonso mmiakane. . . . Yeye udi muakane ne mululame.”​—DUTELONOME 32:4.

“Kabiena mua kuenzeka bua Nzambi mulelela kuenza malu mabi to, bua Wa Bukole Buonso kuenza bibi nansha!”​—YOBO 34:10.

“Wa Bukole Buonso katu ukonyangaja kulumbuluisha kuakane nansha.”​—YOBO 34:12.

Nzambi udi ubenga bitendelelu bia dishima.

Mu bitendelelu abi mudi bidi bilongesha ne: Nzambi ke udi ukebesha makenga, ne ebi bidi bibuelakana mu malu a mvita ne a tshikisu.

“Baprofete badi bamba mêyi a buprofete a dishima mu dîna dianyi [dia Nzambi]. Meme tshiena mubatume peshi mubatumine dîyi anyi muakule nabu to. Tshikena kumona tshia mafi ne . . . dishima dia muoyo wabu ke bidibu banuambila mu mêyi a buprofete.”​—YELEMIYA 14:14.

Yezu wakela lubombo lua bena mu bitendelelu patoke.

“Ki [mmuntu] yonso udi umbikila ne: ‘Mukalenge, Mukalenge,’ wabuela mu Bukalenge bua mu diulu to, kadi anu eu udi wenza disua dia Tatu wanyi udi mu diulu ke wabuela. Bantu ba bungi nebangambile dituku adi ne: ‘Mukalenge, Mukalenge, katuvua bambile bantu mêyi a buprofete mu dîna diebe, bipate bademon mu dîna diebe ne benze midimu ya bukole mu dîna diebe anyi?’ Kadi dîba adi, meme nembambile ne: ‘Tshitu munumanye to! Umbukayi kundi, nuenu bashipi ba mikenji!’”​—MATAYI 7:21-23.