2 Tudi mua kudiela tshilumbu pambidi bua makenga etu anyi?
Bua tshinyi lukonko elu ludi ne mushinga?
Diandamuna diodi ne: eyowa, nunku tudi mua kukokesha bua kukepesha makenga etu.
Anji elabi meji
Mmushindu kayi udi bantu bakebesha malu adi alonda aa adi enza bua kuikale makenga?
-
Dienzelangana bibi.
Bulongolodi budi butangila malu a makanda a mubidi pa buloba budi butshinka ne: muntu mukole umue pa banayi uvua mukengeshibue ne tshikisu tshikole tshikondo kampanda patshivuaye muana, kabidi ne: muntu mukaji umue pa basatu uvua mukengeshibue anyi bende nende masandi ku bukole (anyi bionso bibidi) mu nsombelu wende.
-
Kanyinganyinga ka difuisha.
Luapolo lua mu 2018 lua bulongolodi budi butangila malu a makanda a mubidi pa buloba ludi luleja ne: “Mu 2016 badi batshinka ne: mbashipe bantu 477 000 ku bukole pa buloba bujima.” Badi batshinka kabidi ne: anu mu 2016 amu bavua bashipe bantu bakuabu 180 000 mu mvita ne mu bimvundu.
-
Masama.
Mufundi kampanda Fran Smith udi wamba mu tshiena-bualu tshikuabu tshivuabu bapatule mu tshibejibeji kampanda ne: “Bantu bapite pa muliyare umue badi banua mfuanka, ne mfuanka udi mu bintu bitanu bidi bikebesha lufu bu mudi masama a mioyo, a dipatakana ne ditayika dia tujilu tua mu buongo, disama dia mieyelu ipata, masama a munanunanu a bisulusulu, ne kansere ka mu bisulusulu.”—National Geographic.
-
Dishilangana dia nsombelu.
Jay Watts mumanyi wa malu a mitu udi wamba ne: “Bupele, dishilangana dia nsombelu ya bantu, dikengeshibua bua dikoba, dimona bantu bakaji bu bashadile, tshimuangi, ne ditembangana dia bisa bidi bivudija pamuapa tunyinganyinga tua mu nsombelu.”
BUA KUMANYA MALU MAKUABU
Tangila filme wa Bua tshinyi Nzambi uvua mufuke buloba? udi mu site wa jw.org.
Tshidi Bible wamba
Bantu ke badi bakebesha makenga a bungi adi pa buloba lelu.
A bungi a kudiwu mmakebeshe kudi mbulamatadi ya tshikisu idi imuenesha bantu kasuba payi yamba mudiyi yibenzela mudimu.
‘Muntu udi ukokesha muntu mukuabu bua kumukengesha.’—MUAMBI 8:9.
Makenga adi mua kukepa.
Mêyi manene a mu Bible adi ambuluisha bantu bua kuikala ne makanda a mubidi mimpe ne kusomba mu ditalala ne bakuabu.
“Muoyo mupole udi upesha mubidi muoyo, kadi mukawu udi dibola bua mifuba.”—NSUMUINU 14:30.
“Nulekele dilaminangana munda dibi dia mishindu yonso, tshiji, bumfiika munda, dielelangana mbila, bipendu ne malu a mishindu yonso adi enzelangana bibi.”—EFESO 4:31.
