Diyukidilangana dilelela didi dienzeka paudi wewe ne bana bebe nulejangana malu adi mu meji enu ne munudi nudiumvua.

Diyukidilangana didi mua kulua bualu bukole nangananga pakadi bana bitende. Pamuapa patshivua bana bapuekele bivua bienze anu bu ne: bavua bakukuatshila malu abu onso. Kadi padibu benda bakola bakadi bayukila nebe badilaminyina, kuyi kabidi ne mushindu wa kumanya meji adibu nawu ne mudibu badiumvua. Nansha bana bebe bamueneka kabayi ne dijinga dia kuyukila nebe, etshi ke tshikondo tshidibu dijinga menemene ne muyuki.

Yukila ne muanebe dîba dionso didiye musue. Enza nunku nansha biobi munda-nkulu.

Lisa udi wamba ne: “Udi mua kumvua bua kumuambila ne: ‘Ke dîba diudi ukeba tuyukile edi? Kuonso eku uvua kuepi?’ Kadi bua tshinyi kudilakana bikala muana ujinga kutukuatshila malu ende? Ki ntshitu muledi yonso eu ukeba anyi?”

Herbert udi wamba ne: “Ntu musue kulala kumpala kua dîba, kadi miyuki mimpe intu muyukile ne bana banyi ba bitende nya munda-nkulu mumane kupita.”

DÎYI DINENE DIA MU BIBLE: “Muntu yonso katungunuki ne kukeba anu diakalenga diende nkayende, kadi atungunuke ne kukeba dia muntu mukuabu.”​—1 Kolinto 10:24.

Luisha ditanaji. Tatu mukuabu udi wamba ne: “Misangu mikuabu ntu ndimona nkadi mutume meji kua tshianana padi bana banyi bayukila nanyi. Padibi bienzeka nunku batu bamona ne: meji anyi adi kua tshianana!”

Biobi bikuenzekela nunku, kanga televizion ne tuamu tuonso. Tuma meji ebe ku tshidi muana ukuambila, ne angata malu adiye ukuambila ne mushinga, nansha wewe uamona bu a mukodi.

Maranda udi wamba ne: “Tudi ne bua kushindikila bana betu ne: tudi tuangata mushindu udibu badiumvua ne mushinga. Bobu kabayi bamone nanku, nebadilaminyine malu abu anyi nebaye kuambila bantu ba tshianana.”

Anthony udi wamba ne: “Nansha mushindu udi muanebe wela meji kawuyi muimpe, kumutandishi to.”

DÎYI DINENE DIA MU BIBLE: “Nudimuke mushindu unudi nuteleja.”​—Luka 8:18.

Babidila nsombelu mikuabu. Imue misangu bana batu bayukila ne baledi babu badilekelele padibu kabayi basombe batangilangane.

Nicole udi wamba ne: “Tutu tutamba kuyukila patudi mu mashinyi. Kusomba ne bana ku luseke luetu katuyi batangilangane nkutuambuluishe bua kuyukila nabu bimpe menemene.”

Mêba a kudia atu apetesha kabidi mpunga muimpe wa kuyukila.

Robin udi wamba ne: “Patudi tudia dilolo, yonso wa kutudi udi ulonda bualu bubi ne bualu buimpe buvua bumuenzekele dituku adi. Kuenza nunku nkutuambuluishe bua kuikala mu buobumue ne bua kumanya ne: yonso wa kutudi kena ne bua kuluangana ne ntatu yende nkayende to.”

DÎYI DINENE DIA MU BIBLE: ‘Ikala ne lukasa ku diteleja, ne lujoko ku diakula.’​—Yakobo 1:19.