BUA BANSONGA
11: Ikala muenji wa mudimu
TSHIDIBI BIUMVUIJA
Benji ba mudimu kabatu banyema mudimu to. Kadi batu basue kuenza mudimu mukole bua kudikumbajila majinga abu ne kuambuluisha bakuabu, nansha mudimu udibu benza muikale mushadile.
BUA TSHINYI BIDI NE MUSHINGA
Nansha bibande anyi bipueke, muntu yonso udi ne bia bungi bia kuenza. Lelu bantu ba bungi kabatu basue kuenza mudimu mukole to, kadi wewe muikale muenji wa mudimu newikale wa muabi.—Muambi 3:13.
Reyon udi wamba ne: “Ndi mufike ku dimona ne: paudi wenza mudimu mukole, bidi bikuenza disanka ne udi udiumvua bimpe. Kudiumvua bimpe nunku nkunsake bua kunanga mudimu. Kunanga mudimu bikole nekukupeteshe kabidi lumu luimpe.”
DÎYI DINENE DIA MU BIBLE: “Mudimu mukole wonso udi ne difutu.”—Nsumuinu 14:23.
TSHIUDI MUA KUENZA
Londa malu adi alonda aa bua wikale ne mmuenenu muimpe wa mudimu.
Ikala ne disanka dia kulonga mua kuenza malu bimpe. Nansha wewe wenza midimu ya kumbelu, ujikija ya mu kalasa, anyi wenza mudimu wa bianza, dibuinkamu. Paudi ulonga mua kuenza mudimu kampanda bimpe, keba mishindu ya kupiluka bua kuwenza lukasa anyi bimpe menemene. Paudi wenda upiluka, mudimu au neukusankishe kabidi bikole.
DÎYI DINENE DIA MU BIBLE: “Udiku mumone muntu udi mupiluke mu mudimu wende anyi? Yeye neimane kumpala kua bakalenge; kakuimana kumpala kua bantu tshianana to.”—Nsumuinu 22:29.
Ikala umona kule. Mu nsombelu pabuipi ne yonso, paudi ukumbaja midimu yebe bimpe, bidi biambuluisha bakuabu. Tshilejilu, paudi wenza midimu ya kumbelu ne tshisumi, udi upepejila bena mu dîku bakuabu bujitu.
DÎYI DINENE DIA MU BIBLE: “Disanka dia kufila ndipite dia kuangata.”—Bienzedi 20:35.
Ikala wenza upitshisha. Pamutu pa kuenza anu mudimu udibu bakulombe, ikala wenza upitshisha pa tshidibu bakulombe. Wewe wenza nunku, newikale ne malu mu bianza, mmumue ne: udi wenza mudimu wa bungi ki mbualu mbakuenzeje to, kadi bualu udi musue.—Matayi 5:41.
DÎYI DINENE DIA MU BIBLE: “Wenze bualu buimpe kabayi bakuenzeje, kadi ku disua diebe.”—Filemona 14.
Ikala ne nkatshinkatshi. Benji ba mudimu kabatu bena lulengu anyi kabatu benza mudimu bu bapika to. Badi bawenza ne nkatshinkatshi, bansaka bua mudimu mukole ne basanka bua kuikisha.
DÎYI DINENE DIA MU BIBLE: “Dianza dijima dia dikisha ndimpe kupita manza abidi majima a mudimu mukole ne dipata dia lupepele.”—Muambi 4:6.
Mona bikuabu:
TSHIBUMBA TSHIA NSENTEDI
Mua kunanga mudimu mukole
Konkonona imue mishindu idi Bible ufila mibelu mimpe bua kupeta disanka ne musangelu bua mudimu.
TABULUKAYI!
Muudi mua kuenza malu bimpe ne dîba diebe
Umue mushindu wa kuenza malu bimpe ne dîba diebe nkukonkonona nsombelu webe ku diambuluisha dia mmuenenu ibidi ya malu. Nyepi ayi?
