FUANYIKIJABI ne: udi wendela mu kajila kakese panshi pakadi pafiike. Nansha mukadi dîba dimane kubuela kukadi mêba a bungi, kuena utshina ne: neujimine to, bualu udi ne torshe udi ukenkesha bikole. Paudi utua torshe panshi, udi umona bimpe bintu bidi mu mêsu ebe. Kadi paudi umutua kumpala, bukenke buende bukole budi bukenkesha kajila kumpala kuudi uya.

Mu mushindu kampanda, Bible mmuenze anu bu torshe. Anu bu mutuvua bamone mu biena-bualu bishale, Dîyi dia Nzambi didi mua kutuambuluisha bua kumanya mua kupita ne ntatu itudi nayi, mbuena kuamba ne: ntatu ya buatshia buila itudi tuetu bonso tutuilangana nayi mu buloba butudi katuyi bamanye tshiatufikila malaba ebu. Kadi Bible kena wimanyina anu apu to. Udi utuambuluisha kabidi bua kumona matuku atshilualua bimpe, utupesha mushindu wa kumona njila udi ufikila ku disanka ne ditalala bia kashidi ne kumulonda. (Misambu 119:105) Mushindu kayi?

Tukonkononayi mishindu ibidi idi Bible utupesha ditekemena bua matuku atshilualua: 1 Udi utuambuluisha bua kumanya kipatshila ka nsombelu wetu, ne 2 utulongesha mua kudia bulunda bua kashidi ne Mufuki wetu.

Bible udi ufila mibelu ya kueyemena idi ituambuluisha bua kupita ne ntatu yetu, kadi kena anu mukanda udi wambuluisha muntu bua kudijikijala ntatu yeye nkayende to. Bible kena utukankamija bua kuimanyina pa malu etu nkayetu to, kadi udi utulongesha bua kumona ne: katuena anu nkayetu, tudi munkatshi mua bantu. Anu tuetu tudimona nanku ke padi nsombelu wetu upeta tshipatshila tshia nsongo.

Tshilejilu, tuangate dîyi dinene dia mu Bible edi: “Disanka dia kufila ndipite dia kuangata.” (Bienzedi 20:35) Udi mua kuvuluka tshikondo kampanda tshiuvua muambuluishe muntu uvua ukengela tshintu anyi? Anyi uvua mua kuikala mudifile bua kuteleja mulunda webe uvua ukuambila yende yonso ya munda. Kuvuaku mumvue bimpe bua kuambuluisha muntu mukuabu bua kudiumvuaye bimpe anyi?

Tudi tupeta disanka dia bungi menemene patudi tupeshangana bintu katuyi tuindila bua batupeshe petu. Mufundi kampanda wakamba ne: “Mbikole bua wewe kupanga mua kupeta bintu bia bungi wewe mudifile  bua kuambuluisha bakuabu: kadi nebienzeke nanku anu wewe mudifile kuyi ne lungenyi lua ne: bakuenzele pebe.” Kadi tuetu tudifila bua kuambuluishangana, kuambuluisha nangananga bantu badi kabayi ne mushindu wa kutupingajila malu mimpe mabenzela, tudi bushuwa tupeta difutu. Katuakudimona nkayetu to. Mu bulelela, netuikale tuenza mudimu beleshangane diboko ne Mufuki wetu nkayende; yeye udi umona bienzedi bimpe ebi bu bintu bimusombesha. (Nsumuinu 19:17) Udi wangata malu atudi tuenzela bapele ne mushinga wa bungi, ne udi ulaya bua kutufuta muoyo wa tshiendelele mu mparadizu pa buloba. Bushuwa, edi nditekemena dimpe ditambe bua matuku atshilualua.​—Misambu 37:29; Luka 14:12-14. *

Tshidi tshipite bionso ntshia ne: Bible udi utulongesha ne: tudi mua kupeta tshipatshila tshia nsongo mu nsombelu wetu tuetu tutendelela Yehowa Nzambi mulelela. Dîyi diende didi ditukankamija bua kumutumbisha, kumupesha bunême, ne kumutumikila bualu mbimukumbanyine. (Muambi 12:13; Buakabuluibua 4:11) Tuetu tuenza nunku, tudi tukumbaja bualu kampanda bua mushinga bua kuelela meji ebu: tudi tulenga muoyo wa Mufuki wetu mu mushindu muimpe. Yeye muine udi utukankamija ne: “Ikala ne meji, usankishe muoyo wanyi.” (Nsumuinu 27:11) Anji elabi meji: patudi tuangata mapangadika mimpe adi mimanyine pa mêyi manene a mu Bible, tudi tusankisha muoyo wa Tatuetu wa dinanga udi mu diulu. Bua tshinyi? Bualu udi ututabalela ne mmusue bua tulonde buludiki buende bua tuikale ne diakalenga. (Yeshaya 48:17, 18) Bushuwa, ntshipatshila kayi tshidi mua kupita tshia kutendelela Mukalenge Munene wa diulu ne buloba ne kuikala ne nsombelu udi usankisha muoyo wende?

Bible udi utulongesha kabidi bua kudia bulunda ne Mufuki wetu. Udi wamba ne: “Semenayi pabuipi ne Nzambi ne yeye neasemene pabuipi nenu.” (Yakobo 4:8) Kudi misangu itudi mua kuikala tudiebeja ne: bidiku mua kuenzeka bushuwa bua kuikala balunda ba Mufuki wa bukole buonso anyi? Kadi Bible udi utujadikila ne: tuetu ‘bakebe Nzambi, netumupete bushuwa’ bualu kena “kule ne yonso wa kutudi.” (Bienzedi 17:27) Mubelu wa mu Bible wa kulua mulunda wa Nzambi udi wambuluisha bikole bua matuku etu atshilualua. Mushindu kayi?

Ela meji ku bualu ebu: Nansha tuetu benze tshinyi, kakuena muntu nansha umue wa kutudi udi mua kunyema muluishi wetu wa ndekelu, mmumue ne: lufu, ku bukole buende nkayende to. (1 Kolinto 15:26) Kadi Nzambi yeye ngua tshiendelele. Kakufua nansha kakese, ne mmusue bua balunda bende bikale pabu ne muoyo kashidi. Bible udi uleja tshidi Yehowa ujinga bua bantu badi bamukeba, utshiamba mu mêyi mapepele kadi malenga aa: “Nuikale ne muoyo bua kashidi.”​—Misambu 22:26.

Ntshinyi tshiudi mua kuenza bua kudia bulunda bua tshiendelele bua nunku ne Nzambi? Ikala ulonga malu ende ku diambuluisha dia Bible, Dîyi diende. (Yone 17:3; 2 Timote 3:16) Mulomba akuambuluishe bua umvue malu adi mu Bible. Bible udi utujadikila ne: tuetu ‘tutungunuka ne kulomba Nzambi’ meji ne muoyo mujima, neatupeshawu. * (Yakobo 1:5) Ndekelu wa bionso, dienzeja bua kutumikila malu audi ulonga, witaba bua Dîyi dia Nzambi dikale “muendu bua dikasa” diebe ne “butoke mu njila” webe, mpindieu ne bua kashidi ne tshiendelele.​—Misambu 119:105.