Mukantshi mua bidimu bia bungi, muntu nansha umue kavua mumanye menemene diandamuna dia lukonko elu to. Pabi, bipupu bia masama mbishipe bantu miliyo ya bungi. Ndekelu wa bionso, bena malu a sianse bakalua kumanya bulelela. Bakalua kumanya ne: misangu ya bungi mikrobe anyi tuishi bu mudi tua bakteri peshi tua virise ke tutu tukebesha masama. Kumanya bulelela bumue abu nkuambuluishe bantu bua kuepuka masama a bungi ne kuondopa makuabu. Bualu ebu mbufikishe bantu miliyare ne miliyare ku dilala bidimu bia bungi ne ku dikala ne makanda a mubidi mimpe.

Netuambe tshinyi bua nkonko mikuabu ya mushinga? Buebe wewe, mmunyi mudi dikeba bulelela budi butangila nkonko idi ilonda eyi mua kukuambuluisha?

• Nzambi nnganyi?

• Yezu Kristo nnganyi?

• Bukalenge bua Nzambi ntshinyi?

• Mmalu kayi enzeka mu matuku atshilualua?

Bantu miliyo ya bungi mbapete mandamuna a nkonko eyi ne mbalengeje nsombelu wabu. Mandamuna a nkonko eyi adi mua kukuambuluisha pebe.

Udi mua kudiebeja ne: ‘Kudiku mushindu wa kumanya bulelela mu malu onso anyi?’ Mu kuamba kuimpe, bidi bimueneka ne: bidi bienda bikola menemene bua kumanya bulelela mu malu a bungi. Bua tshinyi?

Bantu ba bungi kabena batekemena ne: mbulamatadi, malongolodi a bungenda, anyi tudiomba ne bikandakanda nebibambile bulelela to. Ki mbipepele bua bantu kumanya bikala bakuabu babambila malu mudiwu anyi bikalabu babambila patupu ngenyi yabu, babasokoka malu makuabu, peshi mene babashima to. Bu mudi bantu kabayi beyemenangana, ne malu a bungi mikale a dishima, kabena ne ngumvuilu wa muomumue mu malu adibu bumvuija ne mudiwu mua kubambuluisha to.

Nansha nanku, kudi mushindu wa kupeta mandamuna malelela a nkonko minene ya mu nsombelu. Mmushindu kayi au? Enza muutu wenza bua kupeta mandamuna a nkonko mikuabu ya tshianana.

Mu mushindu kampanda, utu ukeba bulelela dituku dionso edi. Tuangate tshilejilu tshia Jessica. Udi wamba ne: “Tumbele tutu tuenza muananyi wa bakaji bibi menemene, yeye mudie nansha katete ka kambele udi mua kufua.” Jessica utu wenza muende muonso bua tshia kudia tshidiye usumbila muanende katshikadi tshiela tumbele to. Udi wamba ne: “Tshia kumpala, ntu nganji mbala bidibu bafunde pamutu patshi bua kumanya bidibu belamu. Pashishe ntu ngenza makebulula makuabu, ngebeja too ne badi batshienze bua ngikale mutuishibue ne: nansha kapuishipuishi ka kambele ki nkapitakanamu to. Ntu ngenza makebulula makuabu miaba ya kueyemena bua ngikale mujadike ne: mushindu utu kumpanyi ulamba biakudia abi mmuimpe.”

Mushindu uutu ukeba bulelela mu malu kampanda dituku dionso udi mua kuikala mushadile ku wa Jessica, kadi anu bu yeye, udi mua kulonda malu adi kuinshi eku bua kupeta mandamuna a nkonko iudi nayi.

• Manya malu mudiwu.

• Enza makebulula makuabu.

• Ikala mujadike ne: miaba iudi wenzela makebulula nya kueyemena.

 Kuenza nunku kudi mua kukuambuluisha bua kupeta mandamuna malelela a nkonko minene ya mu nsombelu. Mushindu kayi?

Jessica wakakeba bulelela bua mu Bible mu mushindu wa muomumue ne udiye ukebela muanende wa bakaji biakudia bidi kabiyi mua kumuenzela bibi. Udi wamba ne: “Kubala malu ne ntema yonso ne kuenza makebulula ne tshisumi kuakangambuluisha bua kupeta bulelela bua mu Bible.” Anu bu Jessica, bantu miliyo ya bungi mbafike ku dimanya tshidi Bible wamba bua nkonko eyi:

• Bua tshinyi tudi ne muoyo?

• Ntshinyi tshitu tshienzekela muntu padiye ufua?

• Bua tshinyi bantu badi bakenga?

• Ntshinyi tshidi Nzambi wenza bua kujikija makenga onso?

• Ntshinyi tshitudi mua kuenza bua kupeta disanka mu dîku?

Wewe ubala Bible ne wenza makebulula makuabu mu site wa www.pr418.com, udi mua kupeta mandamuna malelela a nkonko eyi ne mikuabu kabidi.