“Wewe Muteleji wa disambila, bantu ba mishindu yonso nebalue kuudi.”​—Misambu 65:2.

Kudi bantu badi basambila anu bualu disambila didi dienza bua bumvue bimpe nansha mudibu kabayi bajadike ni kudi muntu udi ubateleja. Kadi disambila kadiena anu bualu bua kuenza bua kupeta disulakana patudi mu ntatu nansha. Bible udi utujadikila ne: “Yehowa * udi pabuipi ne bonso badi bamubila, ne bonso badi bamubila mu bulelela. . . . Udi umvua muadi wabu wa dilomba diambuluisha.”​—Misambu 145:18, 19.

Nanku mbimpe tuikale batuishibue ne: Yehowa Nzambi udi uteleja masambila a batendeledi bende. Udi wamba ne dinanga dionso ne: “Nenumbikile, nenulue ne nenundombe mu disambila, ne meme nennuteleje.”​—Yelemiya 29:12.

“Nusuminyine mu disambila.”​—Lomo 12:12.

Bible udi utukankamija bua ‘kutungunuka ne kusambila’ ne bua ‘kutungunuka ne kusambila dîba dionso.’ Mêyi aa adi aleja patoke ne: Yehowa Nzambi mmusue bua tumusambile.​—Matayi 26:41; Efeso 6:18.

Bua tshinyi Nzambi mmusue bua tumusambile? Tshilejilu: Mmuledi kayi utu kayi musue ne: muanende amuambile ne: “Tatu, ngambuluisha koku”? Bulelela budi ne: tatu udi mua kuikala ukadi mumanye tshidi muanende natshi dijinga anyi mudiye umvua, kadi padiye umvua muana umuambila mêyi aa, bidi bimushindikila ne: muanende au udi umueyemena ne udi nende mu malanda mimpe. Bia muomumue, patudi tusambila Yehowa Nzambi, tudi tumuleja ne: tudi tumueyemena ne tudi basue kuikala mu malanda mimpe nende.​—Nsumuinu 15:8; Yakobo 4:8.

‘Numupuile ntatu yenu yonso, bualu yeye udi unutabalela.’​—1 Petelo 5:7.

Nzambi mmutunange ne udi ututabalela, ke bualu kayi mmusue ne: tuikale tumusambila. Mmumanye bualu buonso budi bututatshisha ne butusamisha mutu, ke bualu kayi mmusue kutuambuluisha.

Mukalenge Davidi wakasambila Yehowa Nzambi umulomba diambuluisha ne umuambila yende ya munda mu nsombelu wende mujima. (Misambu 23:1-6) Nzambi uvua umvua mushindu kayi bua Davidi? Uvua munange Davidi, ne wakateleja masambila ende a bungi. (Bienzedi 13:22) Bia muomumue, Nzambi udi uteleja masambila etu bualu udi ututabalela.

Mufundi mukuabu wa mukanda wa mu Bible wa Misambu ke uvua muambe mêyi au. Uvua mujadike ne: Nzambi uvua uteleja masambila ende, ne dimanya adi divua dimukolesha. Uvua udiumvua pabuipi menemene ne Nzambi, bimupetesha bukole bua kupita bimpe ne ntatu yende ne malu avua mamutonde.​—Misambu 116:1-9.

Tuetu batuishibue ne: Nzambi udi uteleja masambila etu, netutungunuke anu ne kumusambila. Mona tshivua tshifikile Pedro udi musombele lua ku nord kua ditunga dia Espagne. Muanende wa bidimu 19 wakafua mu njiwu ya mashinyi. Pavuaye ne kanyinganyinga apu, wakapumuina Nzambi muoyo wende, kusambilaye misangu ne misangu bua kupeta busambi ne diambuluisha. Tshiakenzeka ntshinyi? Pedro udi wamba ne: “Yehowa wakandamuna masambila anyi, kuenzaye bua bena Kristo netu batusambe ne batuambuluishe.”

Nansha muvua disambila kadiyi dijule muanende ku lufu, divua dimuambuluishe yeye ne bena mu dîku diende mu mishindu ya bungi. Mukajende María Carmen udi wamba ne: “Masambila akangambuluisha bua kutantamena kanyinganyinga kanyi. Mvua mutuishibue ne: Yehowa uvua unteleja, bualu mvua ngumvua ditalala ne muoyo mutukije pamvua mmusambila.”

Bible ne malu adi bantu balonde aa bidi bituleja patoke ne: Nzambi udi uteleja masambila. Kadi, bidi bimueneka kabidi ne: Nzambi katu wandamuna masambila onso to. Bua tshinyi udi wandamuna amue masambila, ubenga kuandamuna makuabu?