Bulombodi budi bukuambuluisha
Bible mmuambuluishe bantu ba bungi mu nsombelu inayi idi ilonda eyi:
1. Dibaka
Bantu badi ne mmuenenu mishilashilangane bua dibaka ne bua tshia kuenza bua kusomba bimpe mu dibaka.
TSHIDI MUKANDA WA NZAMBI WAMBA: “Yonso wa kunudi udi ne bua kunanga mukajende bu mudiye mudinange; mukaji pende udi ne bua kuikala ne kanemu kakole kudi bayende.”—Efeso 5:33.
DIUMVUIJA: Nzambi ke udi muenze dibaka, nunku mmumanye tshidi mulume ne mukajende ne bua kuenza bua bobu kusomba bimpe. (Mâko 10:6-9) Mulume ne mukajende bobu batabalelangana ne muoyo mujima, nebasombe bimpe be! Mulume udi munange mukajende udi umutabalela ne umuenzela malu bimpe. Mukaji udi unemeka bayende udi umuelesha diboko mu malu adiye wenza ne wakula nende ne kanemu.
MUDI MUBELU EU MUAMBULUISHANGANE: Quang ne Thi, ba mu Vietnam, kabavua basombe bimpe mu dibaka diabu to. Quang uvua musombeshe Thi kasekeseke. Udi wamba ne: “Tshivua nditeka pa muaba wa Thi to. Mvua mmufuisha bundu pa tshibidilu.” Thi wakajinga kushipa dibaka. Udi wamba ne: “Tshivua kabidi ngeyemena bayanyi anyi mmunemeka to.”
Quang ne Thi bakalonga tshidi Bible wamba mu Efeso 5:33 ne muvuabu mua kutshitumikila. Quang udi wamba ne: “Mvese eu wakangambuluisha bua kumona ne: bivua bikengela ngikale muena malu malenga kudi Thi, ngenze bua adiumvue munangibue, ikale mu bukubi ne mu ditalala. Thi mmunnange bikole mpindieu ne udi unnemeka bualu ndi mmuenzela malu aa.” Thi udi wamba pende ne: “Pandi ntumikila mubelu udi Efeso 5:33 ne nnemeka bayanyi bikole, udi pende unnanga bikole, unkuba, ne wenza bua ngikale mu ditalala.”
Bua kumanya malu makuabu a mua kusomba bimpe mu dibaka, bala Tabulukayi! No. 2 2018, udi ne tshiena-bualu tshia ne: “Malu 12 adi endesha mêku bimpe” mu jw.org.
2. Mua kuenzela bakuabu malu
Pa tshibidilu, bantu batu bakina badi bashilangane nabu ku dikoba, tshisamba, tshimuenekelu, tshitendelelu, anyi batu ne mmuenemu mushilangane ne wabu mu tshilumbu tshia disangila.
TSHIDI MUKANDA WA NZAMBI WAMBA: “Nunemeke bantu ba mishindu yonso.”—1 Petelo 2:17.
DIUMVUIJA: Bible kena utuanyishila bua kukina bantu ba dikoba dikuabu, tshisa tshikuabu, anyi badi balala ne bantu ba mubidi umue nabu to. Kadi udi utulomba bua kunemeka bantu bonso, nansha bobu kabayi ba dikoba dietu, ba tshisa tshietu, anyi bikale babanji peshi bapele. (Bienzedi 10:34) Nansha tuetu tubenga bidi bakuabu bitaba anyi bidibu benza, tudi anu tubanemeka ne tubenzela malu malenga.—Matayi 7:12.
MUDI MUBELU EU MUAMBULUISHANGANE: Daniel uvua mukolele mu ditunga muvua bantu bamona bena mu Asie bu baluishi ba ditunga diabu. Wakalua kukina bantu bonso ba mu Asie ne uvua ubapenda pa bantu. Udi wamba ne: “Mvua ndiambila ne: mvua ntua buena muetu mpanda. Tshivua nansha mmona ne: meji amvua ngela anyi malu amvua ngenza avua mabi to.”
Daniel wakalua kulonga Bible. Udi wamba ne: “Ngakakaja meji anyi onso. Ngakatuadija kumona bantu mudi Nzambi ubamona, tuambe ne: tuetu bonso tudi mushindu umue nansha tuetu ba muaba kayi.” Daniel udi uleja mukadiye umvua mpindieu padiye upetangana ne bantu. Udi wamba ne: “Tshisa tshia bantu katshitshiena tshiangambila bualu to. Mpindieu nkadi munange bantu ba tshisa tshionso ne ndi mudie bulunda ne bantu ba nseke yonso.”
Bua kumanya malu makuabu, bala Tabulukayi! No. 3 2020, udi ne tshiena-bualu tshia ne: “Kudiku buanga bua kansungansunga anyi?” mu jw.org.
3. Makuta
Bantu ba bungi mbasue kulua babanji bua kupeta disanka ne kuikala ne matuku atshilualua mimpe.
TSHIDI MUKANDA WA NZAMBI WAMBA: “Meji adi bukubi anu bu mudi makuta mikale bukubi, kadi buimpe bua dimanya budi nunku: Meji adi alama muoyo wa muenawu.”—Muambi 7:12.
DIUMVUIJA: Tudi dijinga ne makuta, nansha nanku, ki nguowu adi mua kutupesha disanka anyi matuku atshilualua mimpe to. (Nsumuinu 18:11; 23:4, 5) Kadi bua tuetu kupeta disanka dilelela ne kuikala ne nsombelu muimpe matuku atshilualua, tudi ne bua kutumikila mibelu idi mu Bible.—1 Timote 6:17-19.
MUDI MUBELU EU MUAMBULUISHANGANE: Muntu mulume mukuabu wa mu Indonésie diende Cardo, uvua mudifile mu dikeba bubanji. Udi wamba ne: “Mvua ne bionso bidi bantu bakeba panu. Mvua ngenza ngendu, nsumba bintu bia kupana bia makuta a bungi, nsumba mashinyi, ne nzubu.” Kadi bubanji buende buakamujika. Udi wamba ne: “Bakanshima, kunnyemabu ne makuta onso amvua muenzele mudimu mukole munkatshi mua bidimu bia bungi. Mvua mudiine ne kasuki mu dikeba bubanji, kadi ngakedibua mâyi ku makasa bualu mvua mushale bianza bitupu ne tshitshiyi ndimona ne mushinga to.”
Cardo wakatuadija kutumikila mibelu idi Bible ufila bua makuta. Katshiena kabidi udifila ku dikeba bubanji to, kadi mmukepeshe bintu mu nsombelu wende. Udi wamba ne: “Bubanji bulelela budi bufuma ku dikala mu malanda makole ne Nzambi. Nkadi ndala bimpe butuku buonso ebu ne ndi ne disanka dia bungi.”
Bua kumanya malu makuabu a tshidi Bible wamba bua makuta, bala tshiena-bualu tshia “Makuta ne dilonga tulasa ke biakufikisha ku nsombelu muimpe matuku atshilualua anyi?” mu Tshibumba tshia Nsentedi No. 3 2021, mu jw.org.
4. Disangila
Bantu badi ne mmuenenu ya bungi mu tshilumbu tshia disangila.
TSHIDI MUKANDA WA NZAMBI WAMBA: “Nudikande ku masandi. Yonso wa kunudi amanye mua kulama mubidi wende mu bunsantu ne bunême, kayi ne majinga makole a kusangila a lukuka adi kaayi bukuatshi bu mudi bisamba bikuabu bidi kabiyi bimanye Nzambi bikale nawu.”—1 Tesalonike 4:3-5.
DIUMVUIJA: Mukanda wa Nzambi mmukandike amue malu mu tshilumbu tshia disangila. Muaku “masandi” udi ukongoloja masandi a basele, bundumba, disangila dia bantu badi kabayi baselangane, disangila dia balume ne balume anyi dia bakaji ne bakaji, ne disangila ne nyama. (1 Kolinto 6:9, 10) Kusangila ndipa didi Nzambi mupeshe anu mulume ne mukaji badi baselangane.—Nsumuinu 5:18, 19.
MUDI MUBELU EU MUAMBULUISHANGANE: Mamu mukuabu wa mu Australie diende Kylie udi wamba ne: “Pamvua mujike, mvua mmona ne: kulala ne muntu kuvua mua kuenza bua ndiumvue mu bukubi ne munangibue. Kadi pangakenda masandi, tshia pa muoyo tshiakashala tshintuta, meme kudiumvua bibi be!”
Panyima pa matuku, Kylie wakalonga tshidi Bible wamba bua disangila dia mulume ne mukaji, yeye kutshitumikila. Udi wamba ne: “Ndi mumone ne: mikenji ya Nzambi idi ituepula ku ntatu ne tunyinganyinga. Ndi mpindieu mu bukubi ne munangibue bualu nkadi ngenza malu adi Yehowa musue.”
Bua kumanya malu a bungi, bala tshiena-bualu tshia “Vivre en couple sans être mariés : Qu’en dit la Bible?” tshidi mu jw.org.
Mufuki wetu udi mua kutuambuluisha bua kumanya tshidi tshimpe ne tshidi tshibi. Nansha mudi kutumikila mibelu kakuyi kupepele, bidi bikengela tudienzeje bua kuyitumikila. Tuikale anu bajadike ne: kuyitumikila nekutupeteshe masanka a kashidi.
