Dipangadika diudi ne bua kuangata
Mikenji ya malu a bikadilu itudi tutumikila lelu ke yenza bua tuikale ne disanka anyi katuikadi nadi to. Yehowa Nzambi mmumanye bualu abu. Ke bualu kayi udi utulomba bua tutumikile mikenji yende.
Yehowa mmusue bua tuikale ne nsombelu wa ditalala ne disanka.
“Meme, Yehowa, ndi Nzambi webe, Yeye udi ukulongesha bua diakalenga diebe, Yeye udi ukulombola mu njila uudi ne bua kuendela. Bu wewe nansha muteye ntema ku mêyi anyi! Nunku ditalala diebe divua mua kulua anu bu musulu ne buakane buebe bu mavuala a mbuu.”—Yeshaya 48:17, 18.
Nzambi mmumanye tshitudi mua kuenza bua kupeta nsombelu muimpe bualu mMufuki wetu. Udi utulomba bua kutumikila mibelu yende bua tupete diakalenga. Patudi tuyitumikila, katuakusamisha mutu tuela meji ne: tudi bangate dipangadika dibi to. Netuikale anu tuangata mapangadika mimpe atutuadila disanka ne ditalala.
Yehowa kena utulomba malu adi matupite bukole to.
“Dîyi dindi nkuambila lelu edi ki ndikupite bukole anyi dikale kule nebe to.”—Dutelonome 30:11.
Kutumikila mikenji ya Nzambi kudi mua kutulomba bua kuakaja meji atudi tuela ne bienzedi bietu. Nansha nanku, Yehowa kena utulomba malu adi matupite bukole to. Mu kuamba kuimpe, bu mudiye Mufuki wetu, mmumanye tshitudi tukumbana bua kuenza. Patudi tuenda tumumanya bimpe, netumone ne: “mikenji yende kayena ne bujitu” to.—1 Yone 5:3.
Yehowa mmulaye bua kuambuluisha badi batumikila mikenji yende.
“Meme, Yehowa Nzambi webe, ndi nkuata tshianza tshiebe tshia balume bikole, Yeye udi ukuambila ne: ‘Kutshinyi to. Nenkuambuluishe.’”—Yeshaya 41:13.
Nzambi neatuambuluishe bua tupete nsombelu udiye musue bua tuikale nende. Udi mua kutuambuluisha kupitshila ku Bible, Dîyi diende, didi ditukankamija ne ditupetesha ditekemena.
Bantu bungi tshianana mbafike ku dimona ne: kutumikila mikenji idi mu Bible nkuakaje nsombelu wabu. Kuenaku mua kudilongela mibelu ya bungi mimpe idi mu Bible anyi? Udi mua kutuadija kudilongelayi wewe ukonkonona broshire wa Shala ne muoyo kashidi! uudi mua kupeta mu jw.org tshianana kuyi ufuta to. Mu broshire au mudi malongesha aa:
-
Mudi Bible mua kukuambuluisha
-
Bible udi ukupetesha ditekemena dia malu mimpe
-
Mbimpe kuitaba malu adi Bible wamba anyi?
Wewe ubala Bible Dîyi dia Nzambi, neumone ne: mibelu idimu itshidi ne mushinga; ‘mmijalame misangu yonso, mpindieu ne bua kashidi.’ (Misambu 111:8) Kutumikila mikenji ya malu a bikadilu idi mu Bible kudi kutupetesha nsombelu mulenga wa katshia. Nansha nanku, Nzambi kakutuenzeja bua kuyitumikila to. (Dutelonome 30:19, 20; Yoshua 24:15) Muntu yonso udi ne bua kusungula bua kuyitumikila anyi kubenga kuyitumikila.
