UDIKU MUA KUSUNGULA TSHIKALA MATUKU EBE ATSHILUALUA ANYI? Kudi bantu badi bela meji ne: tshidibu atshi ntshimana kufunda, ne bobu kabena ne tshidibu mua kuenza bua kushintulula malu to. Padibu bapangila bua kukumbaja amue malu avuabu bajinga, badi basaka makaya bamba muvuabi anu ne bua kuikala nanku. Badi bamba ne: “Bikavua bimana kufunda ne: tshiakukumbaja bualu ebu to.”

Bakuabu pabu badi bajimija ditekemena dionso padibu bamona ne: kabena ne tshidibu mua kuenza bua kuepuka malu mabi adi enzeka pa buloba to. Imue misangu mbatete bua kulengeja nsombelu wabu, kadi balua kumona malu bu mudi mvita, malu mabi, bipupu, ne masama binyangakaja misangu yonso malu avuabu balongolole. Badi badiambila ne: ‘Bua tshinyi kusamisha mutu?’

Bulelela, malu adi akufikila adi mua kushintulula bikole malu audi mulongolole. (Muambi 9:11) Kadi bua pa bidi bitangila matuku ebe atshilualua a tshiendelele, udi ne tshiudi ne bua kuenza. Mu bulelela, Bible udi uleja ne: matuku ebe atshilualua adi mu bianza biebe. Tukonkonone tshidiye wamba.

Mose, mulombodi wa tshisamba tshia kale tshia Isalele, wakambila bantu pakavuabu pa kubuela mu Buloba Bulaya ne: “Ndi muteke muoyo ne lufu, dibenesha ne mulawu kumpala kuebe; udi ne bua kusungula muoyo bua ushale ne muoyo, wewe ne ndelanganyi yebe, pa kunanga Yehowa Nzambi webe, kuteleja dîyi diende ne kumulamata bikole.”​—Dutelonome 30:15, 19, 20.

“Ndi muteke muoyo ne lufu, dibenesha ne mulawu kumpala kuebe; udi ne bua kusungula muoyo.”​—Dutelonome 30:19

Eyowa, Nzambi uvua mupikule bena Isalele mu bupika mu Ejipitu ne mubapeshe mpunga wa kuikala badikadile ne kuikala ne disanka mu Buloba Bulaya. Kadi mabenesha aa kaavua ne bua kudiluila to. Bua kuapeta, bavua ne bua “kusungula muoyo.” Mushindu kayi? ‘Pa kunanga Nzambi, kuteleja dîyi diende ne kumulamata bikole.’

Lelu eu, wewe pebe udi ne disungula dia muomumue dia kuenza, ne tshiwasungula netshileje tshikala matuku ebe atshilualua. Paudi usungula bua kunanga Nzambi, kuteleja dîyi diende, ne kumulamata bikole, mu bulelela udi usungula muoyo, mmumue ne: muoyo wa tshiendelele mu mparadizu pa buloba. Kadi malu onso asatu aa adi umvuija tshinyi?

Dinanga ke ngikadilu munene wa Nzambi. Mupostolo Yone wakafunda ku bukole bua nyuma muimpe ne: “Nzambi udi dinanga.” (1 Yone 4:8) Bua bualu ebu, pavuabu bebeje Yezu bua kumanya mukenji munene kupita yonso, wakamba ne: “Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso.” (Matayi 22:37) Malanda makole ne Yehowa Nzambi adi ne bua kuimanyina pa dinanga, ki mpa ditshina anyi ditumikila didi kadiyi dielela meji to. Kadi bua tshinyi tudi ne bua kusungula bua kumunanga?

Mushindu udi Yehowa munange bantu udi anu bu mutu baledi bimpe banange bana babu. Nansha mudi baledi bimpe bapange bupuangane, badi balongesha bana babu, babakankamija, babatua mpanda, ne babapesha dinyoka bualu mbasue bua bana bikale ne disanka ne baye kumpala. Baledi badi batekemena tshinyi bua malu onso aa? Mbasue bua bana babu babanange ne bangate malu onso adibu babalongeshe bua diakalenga diabu ne mushinga. Kabienaku bikumbana bua Tatu wetu wa mu diulu udi mupuangane atekemene pende bua tumunange ne tuleje dianyisha bua malu onso adiye mutuenzele anyi?

Mu muakulu uvuabu bafunde Bible, muaku “kuteleja” utu utamba kumvuija “kutumikila.” Ki ntshitutu tukeba kuamba patudi tuambila muana ne: “Teleja baledi bebe” anyi? Nunku, kuteleja dîyi dia Nzambi kudi kulomba kulonga malu adiye wamba ne kuatumikila. Bu mutudi katuyi mua kumvua dîyi dia Nzambi, tudi tumuteleja patudi tubala Bible Dîyi diende ne tutumikila malu adimu.​—1 Yone 5:3.

Bua kuleja mushinga wa kuteleja dîyi dia Nzambi, Yezu wakamba umue musangu ne: “Muntu udi ne bua kuikala ne muoyo, kabuyi anu bua diampa nkayadi, kadi bua dîyi dionso didi dipatuka mukana mua Yehowa.” (Matayi 4:4) Anu mudi kudia biakudia kuikale ne mushinga bua makanda etu a mubidi, kulonga mua kumanya Nzambi kudi koku ne mushinga mupitshidile. Bua tshinyi? Solomo mukalenge wa meji wakumvuija ne: “Meji adi bukubi anu bu mudi makuta mikale bukubi, kadi buimpe bua dimanya budi nunku: Meji adi alama muoyo wa muenawu.” (Muambi 7:12) Dimanya ne meji bia kudi Nzambi bidi mua kutukuba lelu ne kutuambuluisha bua kuangata mapangadika mimpe adi afikisha ku muoyo wa tshiendelele mu matuku atshilualua.

Vuluka tshilejilu tshia Yezu tshituvua bamone mu tshiena-bualu tshishale muvuaye muambe ne: “Tshiibi tshidi tshikese ne njila udi mubumbakane udi ufikisha ku muoyo, bantu bakese badi bamupeta.” (Matayi 7:13, 14) Tuetu tuendela mu njila eu, kakuyi mpata netupete buludiki bua kudi mulombodi mupiluke ne netushale nende pabuipi bua kufika kutudi tuya, mmumue ne: kupeta muoyo wa tshiendelele. Nunku, kudi bualu bunene budi butusaka bua kushala pabuipi ne Nzambi. (Misambu 16:8) Kadi tshia kuenza ntshinyi bua kushala pabuipi nende?

Dituku dionso edi, kudi malu a bungi atudi ne bua kuenza ne makuabu mapite atudi basue kuenza. Malu aa adi mua kutufikisha ku dikala ne bia bungi bia kuenza anyi kutupesha ditanaji tushala anu ne dîba dikese anyi mene katuyi nadi bua kuela meji ku malu adi Nzambi musue bua tuenze. Ke bualu kayi Bible udi utuvuluija wamba ne: “Ikalayi badimuke bikole bua mushindu unudi nuenda kawikadi bu wa bantu badi kabayi ne meji, kadi wikale bu wa bena meji, nuenza malu bimpe bitambe ne dîba dienu, bualu matuku mmabi.” (Efeso 5:15, 16) Tudi tushala pabuipi ne Nzambi patudi tuenza bua malanda etu nende ikale tshintu tshia mushinga mukole menemene mu nsombelu wetu.​—Matayi 6:33.

Nansha muudi kuyi mua kushintulula malu akadi menzeke, udi mua kuenza bua matuku ebe atshilualua ne a bantu baudi munange ikale mimpe. Bible udi uleja ne: Yehowa Nzambi, Tatu wetu wa mu diulu, mmutunange bikole ne udi utumanyisha tshidiye musue bua tuenze. Tangila tshivua muprofete Mika muambe:

“Wewe muntu, yeye mmukuambile tshidi tshimpe. Nanku, ntshinyi tshidi Yehowa ukulomba? Anu bua kuenza malu makane, kunanga lulamatu, ne kuenda ne Nzambi webe ne bupuekele!”​—Mika 6:8.

Newitabe dibikila dia Yehowa dia kuenda nende ne kupeta mabenesha a kashidi adiye mulamine bantu badi benda nende anyi? Dipangadika didi mu bianza biebe!