Mu tshiena-bualu tshikuabu tuvua bakule bua muyuki wa Crésus uvuabu bapambuishe kudi muakuidi wa ku Delphes, kufikishabi mukalenge wa Pelasa ku dimutshimuna. Kadi Bible yeye udi ne mêyi a buprofete a dikema adi atangila mukalenge wa Pelasa avua makumbane mu kalu ne kalu konso.

Bidimu bitue ku 200, kumpala menemene kua mukalenge Kolesha kuledibua, Yeshaya muprofete muena Ebelu wakamutela mu dîna ne kulejaye muvuaye ne bua kutshimuna tshimenga tshia bukole tshia Babilona.

Yeshaya 44:24, 27, 28: “Mona tshidi Yehowa wamba: . . . ‘Yeye udi wambila mâyi male ne: “Kama, ne nengumishe misulu yebe yonso”; Yeye udi wamba bua Kolesha ne: “Yeye udi mulami wanyi wa mikoko, ne neakumbaje disua dianyi dionso tshishiki”; Yeye udi wamba bua Yelushalema ne: “Nebamuibakulule,” ne bua ntempelo ne: “Nebase tshishimikidi tshiebe.”’”

Bilondeshile Hérodote mufundi wa malu a kale, tshiluilu tshia Kolesha tshiakatshingulula mâyi a musulu wa Pelata avua apuekela mu Babilona. Mayele a Kolesha aa akambuluisha basalayi bende bua kuendela mu musulu mume bua kubuelamu. Kolesha mumane kukuata Babilona, wakalekela bena Yuda bavuabu bakuatamu, kubanyishilaye bua kupingana ku Yelushalema (uvuabu babutule kukavua bidimu 70) ne kumuibakulula.

Yeshaya 45:1: ‘Mona tshidi Yehowa wambila muela manyi wende, wambila Kolesha, muena tshianza tshia balume tshindi mukuate bua kukokesha bisamba kumpala kuende, bua kunyenga bakalenge bia mvita, bua kukangula biibi bia bitupa bibidi bibidi kumpala kuende, bua kabakangi biibi.’

Bena Pelasa bakabuela mu tshimenga ku biibi binene bivua ne bitupa bibidi bibidi bivua mu tshimanu tshia tshimenga bivuabu bapue muoyo bua kukanga. Bu bena Babilona bamanye tshivua Kolesha ujinga kuenza, bavua mua kuikala bakange biibi bionso bivua luseke lua musulu. Kadi anu mua kenzekabi, tshimenga katshivua mu bukubi to.

Dîyi dia buprofete edi ndimue dia ku mêyi a buprofete a bungi a mu Bible avua makumbane anu muvuabu baambe. * Misangu ya bungi batu bamba mudi malu atshilualua adi bantu badianjila kumanyisha afumina kudi nzambi yabu ya dishima. Kadi mêyi a buprofete a mu Bible wowu adi afumina kudi Nzambi uvua muambe ne: “Ndi ndianjila kumanyisha ndekelu wa bualu ku tshibangidilu tshiabu, ne mmanyisha kumpala menemene malu adi kaayi manji kuenzeka.”​—Yeshaya 46:10.

Anu Nzambi mulelela muena dîna dia Yehowa ke  udi mua kuamba bualu ebu. Bushuwa, dîna edi didi diumvuija “Yeye udi uvuija.” Didi dileja bukole budiye nabu bua kumanya malu atshilualua ne kualongolola bilondeshile disua diende. Didi ditujadikila ne: neakumbaje malu onso adiye mulaye kakuyi mpata.

Udi musue kumanya tshidi mêyi a buprofete a mu Bible amba bua matuku etu aa anyi? Kukadi bidimu bitue ku 2 000, Bible ukavua mumanyishe ne: “mu matuku a ku nshikidilu” nekuikale “bikondo bia malu makole bidi bikole mua kupita nabi.” Matuku a nshikidilu wa tshinyi? Ki mmatuku a nshikidilu wa buloba anyi wa bantu to, kadi mmatuku a nshikidilu wa bimvundu, dikengeshibua, ne ntatu bidi bikengeshe bantu munkatshi mua bidimu ne bidimu. Tukonkononayi mêyi a buprofete makese adi aleja ne: tudi mu “matuku a ku nshikidilu.”

2 Timote 3:1-5: “Mu matuku a ku nshikidilu . . . , bantu nebikale badinangi, banangi ba makuta, bena diambu, badibandishi, bapendi ba Nzambi, kabayi batumikila baledi babu, kabayi ne dianyisha, kabayi ne lulamatu, kabayi banange bana babu, kabayi ne lungenyi lua kumvuangana, bashiminyinyanganyi ba malu, kabayi badikanda, bena luonji, kabayi banange malu mimpe, batungidianganyi, bena mutu mukole, badiuwuja ne lutambishi, banangi ba masanka pamutu pa kuikala banangi ba Nzambi, bikale ne tshimuenekelu tshia dilamata Nzambi kadi bienzedi biabu kabiyi bileja bukole bua dimulamata edi.”

Kuena umona pebe ne: bikadilu ebi mbivulangane mu bantu bikole anyi? Udiku mumone ne: tudi munkatshi mua bantu badi badinange bikole, banange makuta, ne badi ne lutambishi lukole anyi? Kuena mumonaku ne: bantu mbasue kuenzejangana malu bikole kadi ki mbasue kuikala mu diumvuangana ne bakuabu anyi? Kakuyi mpata, udi mumone ne: bana ba bungi kabena batumikila baledi babu, kabidi ne: bantu mu tshibungi mbanange masanka kupita Nzambi. Malu adi enda anyanguka bikole dituku dionso edi.

Matayi 24:6, 7: “Nenumvue bakula bua mvita ne ngumu ya mvita. . . . Tshisamba netshiluishe tshisamba tshikuabu, bukalenge nebuluishe bukalenge bukuabu.”

Kudi matshinka adi aleja ne: bantu badi bafue mu mvita ne bimvundu katshia ku 1914 mbapite pa miliyo 100, ne bungi ebu mbupite bua bantu ba mu matunga makuabu a bungi. Ela meji ku binsonji, tunyinganyinga, ne ntatu bidi lufu lua bantu bungi nunku lukebeshe. Bisamba mbimonaku tshidi mvita mikebeshe ne mbiyimanyike anyi?

Matayi 24:7: “Nekuikale biyole bia nzala.”

Bulongolodi budi butangila malu a biakudia buakamba ne: “Pa buloba apa tudi tupatula biakudia bikumbane bua kudisha bantu bonso, kadi bantu miliyo 815 (muntu 1 mu bantu 9) batshidi balala ne nzala. Bantu ba bungi kupita apu (muntu 1 mu bantu 3) badi basama masama adi afumina ku didia dibi.” (Programme alimentaire mondial [PAM]) Badi batshinka ne: tshidimu tshionso etshi bana batue ku miliyo 3 badi bafua bua nzala.

Luka 21:11: “Buloba nebukanke bikole.”

Tshidimu tshionso etshi, buloba budi bukanka misangu mitue ku 50 000, bukanka bikole mu mushindu wa bantu bumvua dikanka adi. Misangu mitue ku 100 dikanka dia buloba didi dinyanga nzubu, ne tshidimu tshionso kutu kuenzeka dikanka dikole menemene dia buloba. Bilondeshile ditshinka kampanda, kumbukila ku 1975 too ne ku 2000, bantu 471 000 mbafue ku dikanka dia buloba.

Matayi 24:14: “Nebayishe lumu luimpe elu lua Bukalenge pa buloba bujima budi bantu basombele bua luikale bujadiki kudi bisamba bionso, ne pashishe, nshikidilu nealue.”

Bantemu ba Yehowa bapite pa miliyo 8 badi bayisha lumu luimpe lua Bukalenge bua Nzambi ne bafila bujadiki pa buloba bujima mu matunga matue ku 240. Badi bayisha lumu luimpe mu bimenga binene ne misoko ya kule, mu bisuku, ne mu maloba a ku mikuna. Dîyi dia buprofete didi dimanyisha ne: padi mudimu eu wenzeka wonso mudi Nzambi musue, “nshikidilu nealue.” Nebiumvuije tshinyi? Nebiumvuije ne: bukokeshi bua bantu budi butua ku tshibungubungu ne Bukalenge bua Nzambi budi butuadija kukokesha. Mmilayi kayi yakumbana mu Bukalenge bua Nzambi? Bala tshiena-bualu tshidi tshilonda bua kuyimanya.