Bua tshinyi tudi dijinga ne Bukalenge bua Nzambi?
Katshia anu ku tshibangidilu, Mufuki wetu udi ne dîna dia Yehowa nkayende ke uvua Mukokeshi. Uvua ukokesha ne dinanga. Wakalongoluela bantu budimi bua Edene muaba muimpe wa kusombela. Wakabapesha kabidi biakudia bia bungi, ne mudimu muimpe wa kuenza. (Genese 1:28, 29; 2:8, 15) Bantu bavua mua kuikala ne ditalala bu bobu bashale ku bukokeshi bua Nzambi bua dinanga.
Bantu ba kumpala bakabenga bua Nzambi kuikala Mukokeshi wabu
Bible udi uleja ne: muanjelu mukuabu uvua ntomboji wakaluabu kubikila ne: Satana Diabolo, wakaluisha bukokeshi buakane bua Nzambi. Uvua bu uvua wamba ne: bantu nebikale ne disanka, nansha Nzambi yeye kayi ubalombola ne ubakokesha. Bia dibungama, Adama ne Eva baledi betu ba kumpala bakidikija Satana, kutombokelabu Nzambi.—Genese 3:1-6; Buakabuluibua 12:9.
Bu muvua Adama ne Eva babenge bukokeshi bua Nzambi, bakajimija Mparadizu uvuabu basombele ne ditekemena dia kuikala ne muoyo kashidi. (Genese 3:17-19) Dipangadika diabu adi diakakebela kabidi bana bavuabu balue kulela ntatu. Bible udi wamba ne: bu muvua Adama muenze mpekatu, ‘mpekatu wakabuela mu ba pa buloba ne lufu lua kabuela palu bua mpekatu au.’ (Lomo 5:12) Mpekatu au wakafikisha ku lutatu lukuabu lubi lua ne: ‘Muntu udi ukokesha muntu mukuabu bua kumukengesha.’ (Muambi 8:9) Mu mêyi makuabu, padi bantu bakokesha, ntatu idi anu yenda ivula.
BANTU BADI BATUADIJA KUKOKESHA
Nimeloda wakatombokela Yehowa
Nimeloda ke muntu wa kumpala wakatuadija kukokesha pa buloba udibu batele mu Bible. Wakatombokela bukokeshi bua Yehowa. Katshia anu ku tshikondo tshia Nimeloda, bantu badi ne bukole mbakokeshe mu mushindu mubi. Kukadi bidimu bitue ku 3 000, Mukalenge Solomo wakafunda ne: “Ngakamona binsonji bia bantu bavuabu bakengesha, ne kakuvua muntu wa kubasamba. Bavua babakengesha bavua ne bukole.”—Muambi 4:1.
Nansha lelu bidi anu nanku. Mu 2009, mukanda mukuabu wa Bulongolodi bua matunga masanga uvua muambe ne: kukokesha mu mushindu mubi kudi kuenda kuvula ke “bumue bua ku malu adi enza bua malu mabi ikalaku lelu pa buloba bujima.”
DÎBA DIA NZAMBI KUANGATA MALU MU BIANZA
Bantu badi dijinga ne bakokeshi bimpe ne mbulamatadi mulenga. Ke tshidi Mufuki wetu mulaye.
Nansha mbulamatadi mitambe buimpe ya bana ba bantu mmipangile bua kujikija nsombelu mikole idi nayi bantu
Nzambi mmujadike Bukalenge anyi mbulamatadi wikala mua kupingana pa muaba wa mbulamatadi yonso ya bana ba bantu ne “buobu nkayabu nebushalaku kashidi.” (Danyele 2:44) Bukalenge ebu ke budi bantu miliyo ne miliyo basambila bua bulue. (Matayi 6:9, 10) Nzambi nkayende kakulombola mbulamatadi eu to. Kadi mmusungule muntu kampanda uvua ne muoyo pa buloba bua kuikala Mukokeshi. Mmuntu kayi udi Nzambi musungule?
