Mu tshiena-bualu tshishale, tuvua bamone tshimanyinu tshivua Yezu mufile. Tshimanyinu atshi tshidi tshileja patoke ne: mbajadike Bukalenge bua Nzambi mu diulu ne Yezu Kristo muikale Mukalenge wabu.

Bible udi uleja ne: pavua Yezu wangata Bukalenge uvua ne bua kuipata Satana ne bademon bende mu diulu. Mpindieu badi anu ne buenzeji pa malu adi enzeka pa buloba, ke bualu kayi malu mmanyanguke bikole katshia ku 1914.​—Buakabuluibua 12:7, 9.

Nansha mudi nsombelu wenda unyanguka pa buloba, Yezu Mukalenge wa Bukalenge bua Nzambi, mmuenze malu kampanda bua kuambuluisha bantu pa buloba. Ku diambuluisha dia mudimu wa pa buloba bujima wa dilongeshangana Bible uvua Yezu mumanyishe, bantu ba bungi badi balonga mêyi manene a mu Bible ne baatumikila mu nsombelu wabu wa dituku dionso. (Yeshaya 2:2-4) Bantu miliyo ya bungi mbalonge mua kuikala ne nsombelu wa disanka mu dîku, ne kabena balekela mudimu wabu wa bianza anyi bintu bia ku mubidi bilua ne mushinga wa bungi menemene mu nsombelu wabu to. Badi balonga bua  kuikala ne diakalenga mpindieu ne badi balua bantu badi Nzambi wanyisha bua kuikala bena dia Bukalenge buende.

Nansha mukadi Yezu ukokesha mu diulu, mbulamatadi ya bana ba bantu itshidi ikokesha pa buloba. Kadi Nzambi wakamuambila ne: “Ndaku ukokeshe munkatshi mua bena lukuna bebe.” (Misambu 110:2) Mu katupa kîpi emu, Yezu neabutule baluishi bende bonso bua kashidi ne neapeteshe aba badi batumikila Nzambi ne muoyo mujima disulakana.

Tshikondo atshi, Bukalenge bua Nzambi nebuangate malu mu bianza bua:

• Kubutula bitendelelu bia dishima. Bitendelelu bidi bilongesha malu a mashimi pa bidi bitangila Nzambi ne bimuenesha bantu kasuba nebibutudibue. Bible udi ufuanyikija bitendelelu bia dishima ne ndumba. Kabutu kabi nekanyingalaje bantu ba bungi.​—Buakabuluibua 17:15, 16.

• Kutuisha makalenge a bantu ku ndekelu. Bukalenge bua Nzambi nebubutule makalenge onso a bana ba bantu.​—Buakabuluibua 19:15, 17, 18.

• Kumbusha bantu babi. Ntshinyi tshiafikila bantu bonso badi badisuike bua kuenza malu mabi ne babenga kutumikila Nzambi? Bible udi wamba ne: “Bantu babi, nebumbushibue pa buloba.”​—Nsumuinu 2:22.

• Kubutula Satana ne bademon. Satana ne bademon bende ‘kabakupambuisha kabidi bisamba’ to.​—Buakabuluibua 20:3, 10.

Kadi malu aa nealeje tshinyi bua bantu bonso badi bitaba Bukalenge bua Nzambi?

Bu mudi Yezu ukokesha mu diulu, neenze malu a bungi kupita muana wa muntu kayi yonso. Nebamuambuluishe kudi bantu 144 000 bakokeshaye nabu, bavuabu basungule mu ba pa buloba. (Buakabuluibua 5:9, 10; 14:1, 3) Neenze bua disua dia Nzambi dikale dienzeka pa buloba. Bukalenge bua Nzambi nebuenzele bantu malu kayi?

• Nebujikije masama ne lufu. “Muntu nansha umue udi musombele mu ditunga kakuamba ne: ‘Ndi nsama,’” ne “lufu kaluakuikalaku kabidi.”​—Yeshaya 33:24; Buakabuluibua 21:4.

• Nebufile ditalala dia bushuwa ne bukubi. “Nebasombe, muntu ne muntu muinshi mua muonji wende wa tumuma tua mvinyo ne muinshi mua mutshi wende wa mfigi, ne muntu kakubatshinyisha.”​—Yeshaya 54:13; Mika 4:4.

• Nebupeteshe bantu mudimu wa nsongo. “Basungula banyi nebasanke bikole menemene bua mudimu wa bianza biabu. Kabakukuata mudimu mukole bua tshianana.”​—Yeshaya 65:22, 23.

• Nebujikije dinyanguka dia buloba. “Tshipela ne buloba bume nebisanke bikole, ne mpata wa tshipela neikale ne disanka ne neele bilongo bu bilongo bia safran.”​—Yeshaya 35:1.

• Nebulongeshe bantu mua kushala ne muoyo kashidi. “Bualu ebu budi bumvuija muoyo wa tshiendelele: bende bakumanya wewe, Nzambi umuepele mulelela, ne yeye uuvua mutume, Yezu Kristo.”​—Yone 17:3.

Nzambi mmusue bua upete mabenesha onso aa. (Yeshaya 48:18) Tshiena-bualu tshidi tshilonda netshiumvuije tshiudi mua kuenza mpindieu bua ulue kuapeta.