Kudiku tshijadiki mu bintu bia kale biangula tshidi tshitua malu a mu Bible mpanda anyi? Mu 2014 tshiena-bualu tshia mu tshibejibeji kampanda tshiakela lukonko lua ne: “Mbantu bungi kayi ba mu tshikondo tshivuabu bafunde Bible mu tshiena Ebelu badibu bajadike bilondeshile bintu bia kale biangula?” (Biblical Archaeology Review) Tshiakandamuna ne: “Bobu bakese badi 50.” Tatenai ke muntu uvuabu kabayi bafunde mu tshiena-bualu atshi. Uvua nganyi? Tumonayi mu tshikoso mudimu uvuaye wenza pavuabu bafunda Bible.

Yelushalema uvua tshitupa tshia bukalenge bunene bua bena Pelasa musangu kampanda. Tshimenga tshivua muaba uvua bena Pelasa babikila ne: Dishiya dia Musulu, mmumue ne: ku ouest kua Pelata. Bena Pelasa bamane kutshimuna bukalenge bua Babilona, bakalekela bena Yuda bavuabu bakuate ne bakabitabila bua kuibakulula ntempelo wa Yehowa mu Yelushalema. (Ezela 1:1-4) Kadi baluishi ba bena Yuda bakabatatshisha mu mudimu wabu ne bakabashiminyina muvuabu batombokele Pelasa bua mudimu eu. (Ezela 4:4-16) Mu bukokeshi bua Dayawesha I (522-486 K.B.B.), munene kampanda muena Pelasa diende Tatenai wakakeba bua kumanya malu a bungi mu tshilumbu etshi. Bible udi umubikila ne: “Gouverneur wa buloba bua dishiya dia muamua dia musulu wa Pelata.”​—Ezela 5:3-7.

Mabue a bungi avua ne dîna dia Tatenai avua mashale bu tshitupa tshia bintu bia kale bia dîku. Dibue edi didi dituangaja muntu wa mu dîku kampanda kudi muntu kansanga udibu bakuile mu Bible ntshijadiki tshia katshia pavua Dayawesha I ne bidimu 20, mmumue ne: mu 502 K.B.B. Tshidi tshileja ntemu uvuabu basumbe bu muena mudimu wa “Tattannu, Gouverneur wa Dishiya dia Musulu wa Pelata”​—Tatenai umue umue udi mu mukanda wa mu Bible wa Ezela.

Muntu eu uvua wenza mudimu kayi? Mu 535 K.B.B., Kolesha munene wakalongolola bukokeshi buende mu umue wa ku provense uvuabu babikila ne: Babilona ne dishiya dia muamua dia Musulu wa Pelata. Bakalua kutapulula provense eu mu bitupa bibidi, tshitupa tshimue bavua batshibikila patupu ne: dîshiya dia muamua dia musulu wa Pelata. Tshivua tshikongoloja Koele-Sulia, Foinike, Samalea ne Yuda ne bavua pamuapa babikokeshila ku Damaseke. Tatenai uvua mulombole tshitupa etshi kumbukila mu 520-502 K.B.B.

Tatenai mumane kuya mu Yelushalema bua kukeba bua kumanya bikala bena Yuda bavua batombokele Pelasa, wakatuadila Kolesha luapolo lua ne: bena Yuda bavua bamba ne: bavua babitabile kudi Kolesha bua kuibakulula ntempelo wa Yehowa. Bintu biakakebululabu mu bintu bia kale bia mushinga bia mukalenge biakajadika bualu abu. (Ezela 5:6, 7, 11-13; 6:1-3) Nunku bavua balombe Tatenai bua kabuelakanyi mu tshilumbu atshi, ne wakitaba.​—Ezela 6:6, 7, 13.

Bushuwa, “Gouverneur wa buloba bua dishiya dia muamua dia Musulu wa Pelata” kavua mukumbaje bualu bua nsongo mu nsombelu wende. Kadi mona ne: Mifundu idi imutela ne yakula buende yeye anu muaba udi mumukumbanyine. Bualu ebu budi butupesha tshijadiki tshikuabu tshia ne: bintu bia kale biangula bitu misangu ne misangu bileja mudi miyuki ya mu Bible mikale milelela.