Kudi mushindu wa kuikala ne disanka nansha lelu
DIMUE dituku muntu nansha umue kakusama, kukulakaja, anyi kufua to. Udi pebe mua kupeta nsombelu mulenga au. Nansha nanku, nsombelu wa lelu mmuwule tente ne malu makole ne ntatu. Tshidi mua kukuambuluisha bua kuikala ne disanka nansha lelu ntshinyi? Bible udi ufila mibelu idi mua kukulombola bua kupeta nsombelu muimpe wa disanka nansha mpindieu. Tukonkonone imue ntatu ya mu nsombelu ne tumone mudi Bible mua kutuambuluisha.
KUSANKA NE BINTU BITUDI NABI
Mubelu wa mu Bible: “Nsombelu wenu kikadi wa dinanga dia makuta, kadi nusanke ne bintu binudi nabi.”—Ebelu 13:5.
Lelu eu kudi bintu bia bungi bidi bantu bazukila anu bua kupeta. Kadi Bible udi wamba ne: tudi mua ‘kusanka ne bintu bitudi nabi.’ Mushindu kayi?
Epuka “dinanga dia makuta.” Bua “dinanga dia makuta,” bantu badi badikisa ku mubidi, balekelela mêku abu, bapana bunême buabu, banyanga malunda abu, ne kabayi banemeka malu a bikadilu bilenga nansha. (1 Timote 6:10) Badikengeshisha bibi bitambe! Ndekelu wa bionso, munangi wa biuma ‘kakukuta nansha.’—Muambi 5:10.
Angata bantu ne mushinga pamutu pa bintu. Bushuwa, bintu bidi ne dikuatshisha. Kadi kabiena mua kutunanga anyi kutuleja dianyisha to; anu bantu ke badi mua kuenza nanku. Kuikala ne “mulunda mulelela” kudi kuambuluisha bua kuikala ne disanka mu nsombelu nansha katuyi ne bintu bia bungi.—Nsumuinu 17:17.
TUDI MUA KUIKALA NE DISANKA NANSHA LELU TUETU TUTUMIKILA MIBELU YA MU BIBLE
KUTANTAMENA DISAMA
Mubelu wa mu Bible: “Muoyo wa disanka udi buanga buimpe.”—Nsumuinu 17:22.
Anu bu “buanga buimpe,” disanka didi mua kutuambuluisha bua kutantamena disama. Kadi mmunyi mutudi mua kupeta disanka patudi tusama?
Ikala uleja dianyisha. Tuetu tuimanyina anu pa ntatu itudi nayi, “matuku onso” neamueneke anu mabi. (Nsumuinu 15:15) Ke bualu kayi Bible udi wamba ne: “Nuikale . . . bena dianyisha.” (Kolosayi 3:15) Ikala uleja dianyisha bua malu mimpe nansha wowu mikale tumalu tukese. Bintu bu mudi dibandila bulengele bua mushindu udi dîba dibuela ku dilolo, kapepe kimpe, padi muntu utudi banange utua mimuemue, bidi mua kulengeja nsombelu wetu.
Ikala wenzela bakuabu malu. Nansha tuetu katuyi ne makanda a mubidi mimpe, “disanka dia kufila ndipite dia kuangata.” (Bienzedi 20:35) Padi bakuabu banyisha mushindu utudi tudienzeja, bidi bituenza disanka, ne bitumbusha lungenyi ku ntatu yetu. Tudi mua kulengeja nsombelu wetu patudi tuambuluisha bakuabu bua kulengeja wabu.
KUKOLESHA MALANDA MU DIBAKA
Mubelu wa mu Bible: “Nukebe mua kumanya malu adi ne mushinga wa bungi.”—Filipoyi 1:10.
Mulume ne mukaji badi kabayi batamba kusomba pamue badi mua kudinyangila malanda abu mu dibaka. Nunku balume ne bakaji babu badi badileja bena meji padibu bateka dibaka diabu pa muaba wa kumpala, mbualu budi ne mushinga wa bungi mu nsombelu.
Enzayi malu pamue. Nudi mua kulongolola bua kuikala kuenza malu pamue, pamutu pa muntu ne muntu udienzela ende nkayende. Bible udi wamba ne: “Bantu babidi mbapite muntu umue.” (Muambi 4:9) Popamue nudi mua kulamba biakudia, kuibidija mubidi, kuendakana, anyi kunua mulangi wa maluvu.
Leja muudi munange muena dibaka nebe. Bible udi ulomba mulume ne mukaji bua banangangane ne banemekangane. (Efeso 5:28, 33) Kutua mimuemue ne disanka, kupukilaku mukuebe, anyi kumutuadila kantu kudi mua kuambuluisha bua kukolesha malanda mu dibaka. Bushuwa, mulume ne mukaji badi ne bua kulejangana malu a mananga ne kusangila anu bobu babidi.—Ebelu 13:4.
Mona bikuabu:
TABULUKAYI!
Njila wa kupetela disanka—Tukebayi mua kumanya njila au
Utu udimona ne disanka anyi? Ntshinyi tshitu tshipetesha muntu disanka?
DÎKU DIEBE DIDI MUA KUPETA DISANKA
Eyemena Nzambi bua wikale ne disanka mu dibaka diebe
Nkonko ibidi idi mua kukuambuluisha bua kuakaja dibaka diebe
