NANSHA muvua dibenga kutumikila dia Adama ne Eva baledi betu ba kumpala difikishe bukua bantu buonso ku mpekatu ne ku lufu, kadivua dishintulule disua dia Nzambi bua bantu to. Nzambi udi ujadika misangu ne misangu mu Bible, Dîyi diende difunda ne: disua diende ki ndishintuluke to.

• “Bantu bakane nebapiane buloba, nebasombapu bua kashidi.”​—Misambu 37:29.

• “Neamine lufu kashidi, ne Mukalenge Mutambe Bunene Yehowa neakupule binsonji ku mêsu kua bantu bonso.”​—Yeshaya 25:8.

• “Muena lukuna wa ndekelu udi ne bua kubutudibua ndufu.”​—1 Kolinto 15:26.

• “Lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi.”​—Buakabuluibua 21:4.

Mmunyi muikala Nzambi mua ‘kumina lufu’ anyi kulubutula? Anu mutudi bamone, Bible udi wamba patoke ne: ‘Bantu bakane nebasombe pa buloba bua kashidi.’ Kadi udi wamba kabidi ne: “Kakuena muntu muakane pa buloba utu wenza anu malu mimpe.” (Muambi 7:20) Bua kutshimuna lufu, Nzambi neenze bua bantu kabatumikidi kabidi mikenji yende anyi? Kabiena mua kuenzeka to! Kakuenza nanku nansha, bualu ‘Nzambi kena mua kushima.’ (Tito 1:2) Nunku Nzambi neenze tshinyi bua kukumbaja disua diende dia dinanga divuaye nadi pavuaye mufuke bantu?

Yehowa Nzambi wakaleja dinanga pavuaye mufile tshia kupikulangana natshi bua kupikula bukua bantu ku lufu. Lungenyi lua nshindamenu ludi lutangila bualu bua tshia kupilangana natshi ludi ne: badi bafuta tshintu tshia mushinga mukumbanangane ne wa tshidibu banyange anyi bafuta bidibu balomba ku dikosa dia bilumbu. Bu mudi bantu bonso bena mpekatu ne babakosele tshibawu tshia lufu, Bible udi wamba patoke ne: “Kakuena nansha umue wabu udi mua kukuula muanabu, anyi kupesha Nzambi tshia kumupikula natshi, (mushinga wa kupikula nawu muoyo wabu mmukole menemene kabayi mua kuwukumbaja musangu nansha umue).”​—Misambu 49:7, 8.

Padi muntu mupange bupuangane ufua, udi mua kufuta anu tshibawu tshia mpekatu yende nkayende; kena mua kudipikula yeye muine, anyi kufuta bua mpekatu ya muntu mukuabu nansha. (Lomo 6:7) Tuvua dijinga ne muntu mupuangane uvua kayi ne mpekatu bua kufilaye muoyo wende, kabiyi bua mpekatu yende to, kadi bua yetu tuetu.​—Ebelu 10:1-4.

Ke bualu menemene buvua Nzambi mulongolole ne muenze. Wakatuma Muanende Yezu bua kuledibuaye pa buloba bu muntu mupuangane kayi ne mpekatu. (1 Petelo 2:22) Yezu wakamba ne: uvua mulue “bua kuenzela bakuabu mudimu ne kufila muoyo wende bu tshia kupikulangana natshi pa muaba wa bantu ba bungi.” (Mâko 10:45) Wakafua bua kutshimuna muena lukuna wetu lufu bua tuetu kupeta muoyo.​—Yone 3:16.

Lelu eu, mu dikumbana dia mulayi wa mu Bible, tudi mu “bikondo bia malu makole bidi bikole mua kupita nabi,” bidi bijadika ne: tudi mu “matuku a ku nshikidilu” wa ndongoluelu mubi wa malu eu. (2 Timote 3:1) Matuku a ku nshikidilu neatufikishe ku “dituku dia dilumbuluisha ne dia dibutuka dia bantu babi.” (2 Petelo 3:3, 7) Kadi bantu badi banange Nzambi nebapanduke ku kabutu aku ne nebikale ne diakalenga dia kupeta “muoyo wa tshiendelele.”​—Matayi 25:46.

Bantu bakuabu miliyo ya bungi nebikale ne diakalenga dia kupeta muoyo wa tshiendelele pabishibuabu ku lufu. Yezu wakabisha muntu ku lufu pavuaye muye ku musoko wa Naina. Muana mulela umue wa mukaji  mukamba kampanda uvua mufue, nunku Yezu “wakamumvuila luse,” kumubishaye ku lufu. (Luka 7:11-15) Bualu bukuabu, mupostolo Paulo wakamba ne: “Ndi ne ditekemena kudi Nzambi . . . ne: nekuikale dibishibua dia bantu ku lufu, dia bakane ne dia badi kabayi bakane.” Ditekemena dia mushinga mukole edi didi dileja dinanga dia pa buadi didi nadi Nzambi bua bukua bantu.​—Bienzedi 24:15.

Bantu miliyare ne miliyare nebindile ne muoyo kuulu kuulu bua kupeta muoyo wa kashidi. Bible udi wamba ne: “Bantu bakane nebapiane buloba, nebasombapu bua kashidi.” (Misambu 37:29) Mu tshikondo atshi nebikale ne disanka dia bungi ne nebakoleshibue bua kumona dikumbana dia mêyi a mupostolo Paulo avuaye mufunde kukadi bidimu bitue ku 2 000 aa: “Lufu, ditshimuna diebe didi penyi? Lufu, kalonda kebe kadi penyi?” (1 Kolinto 15:55) Lufu, muena lukuna wa bukua bantu udi ukuatshisha buôwa neatshimunyibue!