Nzambi katu ne kansungansunga to, ne mmusue kubenesha bantu bonso.

Nzambi wakalaya muprofete Abalahama ne: “mêku onso a pa buloba neabeneshibue ku diambuluisha diebe.”​—Genese 12:3.

Ndilongesha kayi ditudi tupeta? Nzambi mmutunange bikole ne mmusue kubenesha mêku onso, mmumue ne: bantu balume, bantu bakaji, ne bana, badi bamutumikila.

Nzambi udi ne luse, udi ubenesha bantu bonso badi badienzeja bua kumumanya.

Nzambi wa Bukole Buonso wakapesha Mose bukole bua kuenzaye bishima binene. Nansha nanku, Mose wakasambila wamba ne: “Ndi nkulomba bua ummanyishe njila yebe, bua nkumanye ne ntungunuke ne kuanyishibua ku mêsu kuebe.” (Ekesode 33:13) Dilomba dia Mose edi diakasankisha Nzambi, ke yeye kuvudija dimanya diende, kumuambuluisha bua kujingulula njila yende ne kumanya ngikadilu yende bimpe. Tshilejilu, Mose wakalonga ne: Mufuki wende ‘nNzambi wa luse udi uditeka pa muaba wa bakuabu.’​—Ekesode 34:6, 7.

Ndilongesha kayi ditudi tupeta? Nzambi mmusue kutubenesha bonso, mmumue ne: bantu balume, bantu bakaji, ne bana, bituikala tuditatshisha bua kumumanya bimpe. Udi utuambila mu Mifundu yende ya tshijila mutudi mua kumutendelela ne mudiye musue kutuanyisha ne muoyo mujima ne kutubenesha.

Nzambi udi mua kutupetesha masanka ashala kashidi tuetu tulonga malu adi atangila Yezu, malu avuaye muenze ne mulongeshe.

Mu Dîyi dia Nzambi mudi malu a bungi menemene adi akula bua nsombelu wa Yezu ne bua malongesha ende. Nzambi uvua mupeshe Yezu bukole bua kuenza bishima bia bungi binene, bu mudi bia bampofu batabala, bampudi matshi bumvua, ne balema benda. Uvua ujula too ne bafue. Nunku Yezu uvua muleje kadiosha ka masanka ikala Nzambi mua kupetesha bukua bantu kumpala eku. Uvua muleje tshidi yonso wa kutudi mua kuenza bua kupeta masanka aa, kuambaye ne: “Bualu ebu budi bumvuija muoyo wa tshiendelele: bende bakumanya wewe, Nzambi umuepele mulelela, ne yeye uuvua mutume, Yezu Kristo.”​—Yone 17:3.

Yezu uvua utabalelangana, uvua ne luse, ne bulenga. Umue musangu, Yezu wakambila bantu ne: “Nulonge malu kundi, bualu meme ndi mupole malu ne mupuekele mu muoyo, nunku nuenu nenupetulule bukole.” (Matayi 11:29) Bantu balume, ne bantu bakaji, bana ne bakole, bakitaba ba bungi, bobu kulua kudi Yezu. Yezu uvua wenzela bantu bakaji malu ne bulenga, ubatua mushinga ne ubanemeka, kadi bantu bakuabu ba tshikondo tshiende kabavua benzela bantu bakaji malu mimpe to.

Ndilongesha kayi ditudi tupeta? Yezu uvua munange bantu bikole, ne mmutushile tshilejilu tshimpe tshia mutudi ne bua kuenzelangana malu.

Mifundu ya tshijila idi ilongesha ne: “buetu tuetu, bulelela, kudi anu Nzambi umue,” idi ilongesha kabidi ne: Yezu Kristo mmutuadi wa mukenji wa budipuekeshi uvua Nzambi mutume. (1 Kolinto 8:6) Yezu wakaleja patoke ne: Nzambi mmunene kumupita yeye, kuleja kabidi ne: Nzambi uvua mumutume pa buloba.​—Yone 11:41, 42; 14:28. *