Bamue bantu badi badiebeja bikalabu bashintulule Dîyi dia Nzambi. Muprofete Yeshaya wakamba ne: Dîyi dia Nzambi “didi dishala kashidi.” (Yeshaya 40:8) Tshidi mua kutujadikila ne: mbalame milayi ya Nzambi ne bujalame buonso ntshinyi?

Nzambi udi ne bukole bua kulama Dîyi diende ne kuenza bua kabadinyangi to. Kale pavuabu bafunda Dîyi dia Nzambi ku bianza, batentudi ba lubatshi bavua babala dileta ne dileta dionso divuamu bua kuikala bajadike ne: kakuena tshintu tshidibu bashintulule, tshidibu basakidile, anyi tshidibu bapue muoyo to. Nansha nanku, bantu mbapange bupuangane, nunku bamue batentudi bakenza tubilema.

Kudi mikanda ya kale binunu ne binunu ya Mifundu minsantu idi mifunda ku bianza. Padi mukanda umue muikale ne katshilema nansha kakese, badi bawufuanyikija ne mikuabu bua kumanya bulelela.​—Bua kumanya malu makuabu, bala tshiena-bualu tshia ne: “La Bible a-t-elle été modifiée ou falsifiée ?” mu jw.org. mu Mfualansa.

Tuangate tshilejilu tshia mikanda ya kale idibu babikila ne: mivungu ya ku Mbuu Mufue, ivuabu bapete mu nyongolo idi pabuipi ne Mbuu Mufue kudi bena Arabe mu 1947. Mikanda ya kale eyi idi ne bitupa bia Mifundu ya tshijila bivuabu bafunde kukadi bidimu bipite pa binunu bibidi. Bamanyi bapiluke ba malu a mu Bible mbatete kufuanyikija mikanda ya kale eyi ne Mifundu ya tshijila itudi nayi lelu. Ntshinyi tshidibu basangane?

Mbasangane ne: malu adi mu Dîyi dia Nzambi ditudi nadi lelu adi apetangana ne avua mu Mifundu ya ku ntuadijilu. * Dikonkonona mikanda ya kale eyi bimpe bimpe ndileje ne: malu atudi tubala mu Mifundu ya tshijila mmêyi a Nzambi anu muvuaye muafundishe ku kale. Tuikalayi bajadike ne: Nzambi mmuenze ne muende muonso bua kulama bujalame bua Mifundu ya tshijila too ne lelu eu.

Nunku tudi mua kubala Dîyi dia Nzambi ne dishindika dionso, bamanye ne: malu atudi tubalamu mmajalame. Bua bualu abu, tukonkononayi malu atudi mua kumanya bua Nzambi ku diambuluisha dia baprofete bende.