Ba bungi badi bela meji ne: bantu badi balonge bikole ne babanji nebikale ne nsombelu muimpe matuku atshilualua. Buabu buobu, dilonga tulasa tua iniversite didi mua kuambuluisha muntu bua kulua muenji wa mudimu wa dipoko, muena mu dîku wa nsongo, ne muena mu ditunga wa nsongo. Badi kabidi mua kuela meji ne: dilonga tulasa tuimpe nedipeteshe muntu mudimu wa makuta a bungi, kabidi ne: bantu badi bapeta makuta a bungi nebikale ne disanka.

Mona tshidi Zhang Chen wa mu Chine muambe: “Buanyi meme bivua bikengela mpete dipoloma dia mu iniversite bua bupele buanyi bujike. Mvua mmona kabidi ne: mudimu wa makuta a bungi ke uvua mua kuenza bua mpete nsombelu muimpe wa disanka.”

Bua kupeta nsombelu mulenga, bantu ba bungi mbasue kulonga mu iniversite miende lumu, bu mudi ya mu matunga makuabu. Kudi bantu ba bungi bavua benza nanku too ne pavua disama dia korona dilue kuenza bua bakandike ngendu ya kuya mu matunga makuabu. Luapolo lua 2012 lua bulongolodi kampanda ludi luamba ne: “Mu balongi bonso badi balongela ku babende, balongi ba mu Asie badi bia pa lukama 52.”​—Organisation de Coopération et de Développement Economiques.

Misangu ya bungi, baledi batu badipangisha malu a bungi anu bua bana babu baye ku babende bua kulonga iniversite. Qixiang wa mu Taïwan udi uvuluka wamba ne: “Baledi betu kabavua ne makuta a nsongo to, kadi bakatutuma bunayi buetu mu États-Unis bua kuya kulonga tulasa tua iniversite.” Bena mu dîku diabu bakabuela mabanza bua kufuta makuta mu inivesite au; ke muvuabi kabidi bua mêku makuabu a bungi.

Dilonga tulasa didi dituambuluisha mu mushindu kampanda, kadi kaditu anu dipetesha badi batulonga bivuabu batekemene bua kupeta to. Tshilejilu, panyima pa bantu ba bungi bamane kudipangisha malu a bungi ne babuele mabanza a bungi bua kudifutshila kalasa, kabena anu bapeta mudimu uvuabu basue to. Luapolo lufila kudi Rachel Mui mu tshikandakanda kampanda mu ditunga dia Singapour ludi luamba ne: “Bidi bimueneka ne: bulofu bua bantu badi bajikije tulasa tua iniversite budi buenda anu buvula.” (Business Times) Jianjie wa mu Taïwan udi ne mapoloma a bungi a mu iniversite udi wamba ne: “Bua dishikila, ba bungi bakadi bitaba bua kuenza mudimu udi kawuyi upetangana nansha ne tulasa tudibu balonge to.”

Bantu badi ne mushindu wa kupeta mudimu bilondeshile tulasa tudibu balonge badi mua kumona pabu ne: kabena anu ne nsombelu uvuabu bela meji ne: nebikale nende to. Pakajikija Niran tulasa tua iniversite mu Royaume-Uni, wakapingana muabu mu Thaïlande yeye kupetamu mudimu. Udi wamba ne: “Dipoloma dianyi ndingambuluishe bua kupeta mudimu wa makuta a bungi anu mumvua mutekemene. Kadi bua kupeta dine difutu adi bivua bindomba kuenza mudimu wa bungi ne kufila dîba dia bungi kabidi. Ndekelu wa bionso, kumpanyi wakatua bena mudimu ba bungi tshikolo, ne meme panyi. Meme kumona ne: kakuena mudimu nansha umue udi mua kufikisha muntu ku dipeta nsombelu muimpe to.”

Nansha babanji anyi badi bapete nsombelu utu bantu bamba ne: mmuimpe au, badi anu batuilangana ne ntatu ya mu mêku, masama, ne batshidi anu basamisha mutu bua kukeba makuta. Katsutoshi wa mu Japon udi wamba ne: “Mvua ne makuta a bungi kadi tshivua ne disanka to, bualu bakuabu bavua bangumvuila mukawu ne bangenzela malu mabi.” Lam, mamu kampanda wa mu Vietnam udi wamba ne: “Ndi mmona bantu ba bungi badisunsula bua kupeta mudimu wa makuta a bungi, bela meji ne: neubapeteshe bukubi, kadi mu bulelela, badi bela bua tshiombe musabu, mmumue ne: kabakuikala mu bukubi to, badi mene mua kupeta masama a mitu.”

Anu bu Franklin, bantu ba bungi mbafike ku dimona ne: kudi malu a bungi a kuenza adi ne mushinga pamutu pa kudifila ku dilonga tulasa tutumbuke ne kulua babanji. Bamue ki mbimanyine pa bintu bia ku mubidi mu nsombelu wabu to, tshibi buabu buobu, bidi bikengela kuikala muntu muimpe ne kuenzela bakuabu malu mimpe bua kupeta nsombelu muimpe matuku atshilualua. Eu ke mushindu udi mua kujadikila muntu ne: neapete nsombelu muimpe matuku atshilualua anyi? Tshiena-bualu tshidi tshilonda netshiandamune lukonko elu.