Ntshinyi tshidi mua kutuambuluisha bua kupeta nsombelu muimpe matuku atshilualua?

TELEJA MU

Anu mutuvua bamone mu biena-bualu bishale, bantu batu beyemena makole adi kaayi amueneka, beyemena tulasa, bubanji, ne badienzeja bua kuikala bantu bimpe bua kupeta nsombelu muimpe matuku atshilualua. Kadi kubieyemena kudi anu bu kulonda karte ka matunga ka dishima bua kufika muaba kampanda. Abi bidi biumvuija ne: kakuena tshintu tshia kueyemena tshidi mua kutulombola bua matuku atshilualua anyi? Tòo, tshidiku!

BULOMBODI BUDI BUFUMINA MUABA MUTAMBE BUIMPE

Kumpala kua kuangata mapangadika, tutu tuebeja muntu mukulumpe udi ne meji a bungi kutupita. Bia muomumue, tudi mua kupeta buludiki buimpe buenza bua tupeta matuku atshilualua malenga kudi mukulumpe wa kale udi ne meji a bungi kutupita. Mibelu ya kudi Muntu eu idi mu mukanda uvuabu batuadije kufunda kukadi bidimu bitue ku 3 500. Mukanda udi ne mifundu ya tshijila eu badi bawubikila ne: Bible.

Bua tshinyi udi mua kueyemena Bible? Bualu muenaye mmukulumpe wa kale udi ne meji a bungi kupita bonso mu diulu ne pa buloba. Bible udi umubikila ne: “Wa Kale wa Matuku a Bungi.” Wamba kabidi mudiye Nzambi “katshia ku bikondo bia tshiendelele too ne ku bikondo bia tshiendelele.” (Danyele 7:9; Misambu 90:2) Yeye ke “Mufuki wa diulu, Nzambi mulelela, Yeye uvua muenze buloba.” (Yeshaya 45:18) Mmutuambile ne: dîna diende nYehowa.—Misambu 83:18.

Bu mudi Bible mufume kudi Mufuki wa bukua bantu buonso, kena uleja ne: tshisamba kampanda anyi dikoba kansanga ndipite dikuabu nansha. Mibelu idimu idi ne mushinga bikondo bionso ne idi yambuluisha bantu ba miaba yonso. Udiku mu miakulu ya bungi ne badi bamuabanya bikole kupita mukanda kayi wonso. * Abi bidi biumvuija ne: bantu ba miaba yonso badi mua kumubala bipepele ne kulombodibua kudiye. Malu aa adi atua tshidi Bible nkayende muambe etshi mpanda:

“Nzambi kena ne kansungansunga to, kadi udi witaba muntu wa mu tshisamba tshionso udi umutshina ne udi wenza malu makane.”—BIENZEDI 10:34, 35.

Anu mutu muledi udi utabalela bana bende ubapesha buludiki, Yehowa Nzambi Tatu wetu wa dinanga udi utukuatshisha ku diambuluisha dia Bible, Dîyi diende. (2 Timote 3:16) Udi mua kueyemena Dîyi diende edi bualu yeye ke udi mutufuke ne mmumanye tshidi mua kutupetesha disanka.

TUDI MUA KUEYEMENA BIBLE

Tudi mua kuitaba tshidi Bible wamba bua matuku atshilualua bualu kukadi bidimu bipite pa 2 000 bikavuaye muakule bua malu adi enzeke lelu eu, ne bua bikadilu bitudi tumona kudi bantu.

MALU

“Tshisamba netshiluishe tshisamba tshikuabu, bukalenge nebuluishe bukalenge bukuabu. Buloba nebukanke bikole, ne biyole bia nzala ne bipupu bia masama nebienzeke ku muaba ne ku muaba.”—LUKA 21:10, 11.

BIKADILU

“Mu matuku a ku nshikidilu nekuikale bikondo bia malu makole bidi bikole mua kupita nabi. Bualu bantu nebikale badinangi, banangi ba makuta, bena diambu, badibandishi, bapendi ba Nzambi, kabayi batumikila baledi babu, kabayi ne dianyisha, kabayi ne lulamatu, kabayi banange bana babu, kabayi ne lungenyi lua kumvuangana, bashiminyinyanganyi ba malu, kabayi badikanda, bena luonji, kabayi banange malu mimpe, batungidianganyi, bena mutu mukole, badiuwuja ne lutambishi, banangi ba masanka pamutu pa kuikala banangi ba Nzambi.”—2 TIMOTE 3:1-4.

Ntshinyi tshiudi wamba bua Bible paudi umona malu akavuaye muambe kukadi bidimu bia bungi enzeka lelu eu ne mu katoba? Bushuwa newitabe tshidi Leung wa mu Hong Kong wamba tshia ne: “Mêyi a buprofete a mu Bible mbaafunde kukadi bidimu. Muntu nansha umue kena mua kudianjila kulaya malu pashishe alue kuenzeka anu muvuaye muambe amu nansha. Kudi anu muntu udi mutupite kule ne kule udi mufundishe Bible eu ku bukole bua nyuma.”

Mu Bible mudi mêyi a buprofete nkama ne nkama akadi makumbane. * Bidi bijadika ne: Bible n’Dîyi dia Nzambi bushuwa. Yehowa udi wamba ne: “Meme ndi Nzambi, ne kakuena mukuabu bu meme to. Ndi ndianjila kumanyisha ndekelu wa bualu ku tshibangidilu tshiabu.” (Yeshaya 46:9, 10) Nunku udi ne bualu buimpe budi mua kukusaka bua kueyemena tshidi Bible wamba bua matuku a tshilualua.

BIBLE UDI MUA KUKUAMBULUISHA LELU NE MATUKU ATSHILUALUA

Wewe ulonda buludiki budi mu Mifundu minsantu, bidi bikuambuluisha. Mona bimue bilejilu.

MMUENENU MUIMPE WA MAKUTA NE MUDIMU

“Dianza dijima dia dikisha ndimpe kupita manza abidi majima a mudimu mukole ne dipata dia lupepele.”—MUAMBI 4:6.

NSOMBELU WA MU DÎKU

“Yonso wa kunudi udi ne bua kunanga mukajende bu mudiye mudinange; mukaji pende udi ne bua kuikala ne kanemu kakole kudi bayende.”—EFESO 5:33.

MUA KUSOMBA NE BAKUABU

“Umbusha tshiji ne lekela luonji; kufiiki munda ne kulu kuenza malu mabi.”—MISAMBU 37:8.

Wewe utumikila tshidi Bible wamba neupete nsombelu muimpe lelu eu ne mu matuku atshilualua. Mu Bible mudi milayi ya Nzambi idi yakula bua nsombelu mulenga mu matuku atshilualua, bu mudi

DITALALA NE BUKUBI

“Nebikale ne disanka dipite bungi mu ditalala divule.”—MISAMBU 37:11.

NZUBU NE BIAKUDIA BUA MUNTU YONSO

“Nebase nzubu ne nebasombelamu, ne nebadime madimi a tumuma tua mvinyo ne nebadie tumuma tuawu.”—YESHAYA 65:21.

MASAMA NE LUFU KABITSHIYIKU KABIDI

“Lufu kaluakuikalaku kabidi, nansha madilu, nansha mbila ya miadi, nansha bintu bidi bisama.”—BUAKABULUIBUA 21:4.

Ntshinyi tshiudi ne bua kuenza bua wewe kupeta malu adibu balaye aa? Bala tshiena-bualu tshidi tshilonda.

^ tshik. 6 Bua kumanya malu makuabu adi atangila dikudimuna ne diabanya dia Bible, buela mu site wa jw.org utangile mu LA BIBLE ET VOUS > LA BIBLE & L’HISTOIRE.

^ tshik. 16 Bua kumanya malu makuabu, bala nshapita wa 9 wa mukanda wa La Bible: Parole de Dieu ou des hommes? mupatula kudi Bantemu ba Yehowa. Udi mu site wa jw.org. Tangila mu BIBLIOTHÈQUE > LIVRES & BROCHURES.

Mona bikuabu:

TSHIBUMBA TSHIA NSENTEDI

Bulelela bua malu enzeka matuku a tshilualua

Kolesha dieyemena diebe mu malu adi Nzambi wamba bua matuku ashilualua bua buloba ne bua bantu basombelapu.

TSHIBUMBA TSHIA NSENTEDI

Mibelu ya mu Bible idi ne mushinga lelu anyi?

Bu mudi mamanyisha amuangalaka mu minite mikese, bua tshinyi kubala mukanda mufunda kukadi bidimu bitue ku 2 000?

TSHIBUMBA TSHIA NSENTEDI

Muntu udiku mua kumanya malu atshilualua anyi?

Kudi muntu udi umanyisha malu atshilualua ne bujalame buonso.

TSHIBUMBA TSHIA NSENTEDI

Bible ne matuku ebe atshilualua

Dîyi dia Nzambi didi mua kutuambuluisha bua kumanya mua kupita ne ntatu yetu, ntatu ya buatshia buila itudi tuetu bonso tutuilangana nayi mu buloba butudi katuyi bamanye tshiatufikila malaba ebu. Kadi Bible kena wimanyina anu apu to. Udi utuambuluisha kabidi bua kumona matuku atshilualua bimpe.

TSHIBUMBA TSHIA NSENTEDI