Bible udi wamba ne: Goleyata uvua bule bua ‘coudées [nkubita] isambombo ne ntanta wa tshianza.’ (1 Samuele 17:4) Coudée anyi nkubita udibu bakuila muaba eu uvua ne bule bua santimetre 44,5; ntanta wa tshianza uvua ne santimetre 22,2. Nunku nkubita isambombo ne ntanta wa tshianza bidi bienza metre 2 ne santimetre 90. Bamue badi bamba ne: Goleyata kavua mua kuikala bule abu to, kadi elabi meji, ngumu idi ileja ne: matuku etu aa muntu mule bikole menemene udi ne bule bupite pa metre 2 ne santimetre 70. Tudiku mua kuamba bushuwa ne: Goleyata kavua bule abu anyi? Uvua wa mu tshisamba tshia Lefa, bantu bavua bamanyike muvuabu bale menemene. Mukanda kampanda wa mu Egypte wa mu bidimu bia 1200 kumpala kua Yezu udi uleja ne: bamue baluanganyi ba mvita ba mu Kanana bavua bale bapite pa metre 2 ne santimetre 40. Nanku, nansha bikala bule bua Goleyata bukemesha, buvua bulelela.

Kuvua bikondo bivua bamanyi bamba ne: Davidi uvua muntu wa mu muanu, kadi kabiena nanku to. Bakebuludi mbapete bintu kampanda bia kale ne mbafundapu ne: “nzubu wa Davidi.” Bualu bukuabu, Yezu wakaleja muvua Davidi muntu mulelela. (Matayi 12:3; 22:43-45) Muyuki udi wakula bua Bumasiya bua Yezu udi ne bijadiki bibidi bidi bileja ne: uvua wa mu ndelanganyi ya Mukalenge Davidi. (Matayi 1:6-16; Luka 3:23-31) Bushuwa, Davidi uvua muntu mulelela.

Bible udi wamba ne: mvita eyi yakenzekela mu tshibandabanda tshia Ela. Uvua muaba musunguluke, bualu bena Peleshete bavua base tshitudilu tshiabu pa mukuna kampanda uvua pankatshi pa bimenga bibidi, tshia Soko ne tshia Azeka. Bena Isalele bavua bimanyine mu tshibandabanda tshivua tshitangilangane ne bena Peleshete. Miaba eyi ivua milelela anyi?

Mona tshidi muntu kampanda uvua muye kuendakana muaba au wamba: “Muntu uvua utuleja njila kavua utendelela to, wakaya netu mu tshibandabanda tshia Ela. Tuakangata kajila kakatufikisha pa mutu pa mukuna. Patuakatangila tshibandabanda tshijima, wakatubadisha 1 Samuele 17:1-3. Pashishe wakatshifunkuna wamba ne: ‘Kuaka, ku diabakaji dienu, ke muaba uvua Soko.’ Ukudimuka wamba ne: ‘Dia muamua, ku diabalume dienu ke muaba uvua Azeka. Bena Peleshete bavua base tshitudilu pankatshi pa bimenga biabia, muaba kampanda mu tukunakuna tudi kumpala kuenu etu. Pamuapa tudi bimane muaba uvua bena Isalele base tshitudilu.’ Ngakela meji ne: Shaula ne Davidi bavua bimanyine muaba umvua au. Pashishe tuakapueka mu tshibandabanda, tuetu kusabuka kasulu, mu kuamba kuimpe kakavua kume, ne kavua ne mabue tente. Ngakafuanyikija muvua Davidi muiname wangula mabue mafinunuke atanu, ne dimue dia ku mabue au ke divuaye mushipe nadi Goleyata.” Anu bu bantu bakuabu ba bungi, muntu uvua muye kuendakana eu, wakakema bikole bua kumona bujalame budi nabu Bible mu tumalu tuonso.

Kakuena tshijadiki nansha tshimue tshidi mua kutusake bua kuela muyuki wa kale eu mpata to. Udi wakula bua bantu balelela ne bua miaba milelela. Bualu bua mushinga, muyuki eu udi mu Dîyi dia Nzambi difundisha ku nyuma wende, nunku udi ufumina kudi Nzambi wa bulelela udi kayi mua ‘kudinga.’​—Tito 1:2; 2 Timote 3:16.