Bantu bapite bungi pa buloba bujima badi bela meji ne: difesto dia Nowele ndisekelela dia mufikilu wa diledibua dia Yezu Kristo. Kadi ukadiku mukonkonone bua kumanya bikala bena Kristo ba kumpala, bu mudi bapostolo ba Yezu ne bayidi bende, benza Nowele anyi? Udi mumanye tshidi Bible wamba bua mifikilu ya diledibua anyi? Kumanya mandamuna a nkonko eyi kudi mua kutuambuluisha bua kumanya bikalabi bimpe bua bena Kristo kuenzabu Nowele.

Tshia kumpala, Bible kena wakula bua difesto dia mufikilu wa diledibua dia Yezu nansha dimue anyi dia mutendeledi wa Nzambi mukuabu wa lulamatu to. Udi wakula anu bua bantu babidi bavua benze mifikilu yabu ya diledibua. Nansha umue wa kudibu kavua mutendeledi wa Yehowa, Nzambi wa mu Bible to, ne pavuabu benza mifikilu ya diledibua yabu ayi bualu bubi buakenzekamu. (Genese 40:20; Mâko 6:21) Bilondeshile mukanda kampanda, bena Kristo ba kumpala kabavua banyisha “tshilele tshia bampangano tshia disekelela mifikilu ya diledibua” to.​—Encyclopædia Britannica.

Bible kena wamba dituku divuabu balele Yezu menemene to. Mukanda mukuabu udi wamba ne: “Dipungila Dipiadipia anyi mukanda mukuabu kayi wonso kawena ujadika dituku dia diledibua dia Yezu nansha.” (Cyclopedia wa McClintock ne Strong) Mu bulelela, bu Yezu musue bua bayidi bende bikale benza mufikilu wa diledibua diende, uvua mua kuenza bua bamanye dituku dia diledibua edi bimpe.

Tshibidi, Bible kena wamba ne: Yezu uvua muenze Nowele anyi ne: muyidi wende nansha umue uvua mumuenze to. Mukanda mukuabu udi wamba ne: bavua bakule bua musangu wa kumpala bua dienza Nowele “mu mukanda wa bena Lomo uvua upatuka ku tshidimu ne ku tshidimu wa Philocalus uvua muangatshile malu ende mu mikanda mifunda pamuapa mu 336 panyima pa Yezu.” (New Catholic Encyclopedia) Bushuwa, tshikondo atshi bakavua bajikije kufunda Bible ne Yezu ukavua mumbuke pa buloba bidimu bia bungi menemene. Ke bualu kayi McClintock ne Strong badi baleja ne: “Nowele ki mmufumine kudi Nzambi, ne kabidi ki mbamufunde mu Dipungila Dipiadipia to.” *

Yezu Mulongeshi munene uvua muleje patoke malu avuaye musue bua bayidi bende benze, ne malu aa mmafunda mu Bible. Kadi kuenza Nowele kakuena mu malu avuaye muambe au to. Anu bu mutu mulongeshi musue bua balongi bende kabenji bidiye kayi mubalongeshe, Yezu pende mmusue bua bayidi bende kabayi “dia muamua dia malu adi mafunda.”​—1 Kolinto 4:6.

Ku lukuabu luseke, kudi bualu bua mushinga buvua bena Kristo ba kumpala batamba kuenza: ntshivulukilu tshia lufu lua Yezu. Yezu nkayende wakambila bayidi bende dîba divuabu ne bua kuenza tshivulukilu etshi ne mushindu wa kutshienza. Malu masunguluke avuaye mubambile aa, pamue ne dituku dia lufu luende, mbifunda mu Bible.​—Luka 22:19; 1 Kolinto 11:25.

Anu mutudi bamone, Nowele ndisekelela dia mufikilu wa diledibua, ne bena Kristo ba kumpala kabavua benza tshilele tshia bampangano etshi to. Bualu bukuabu, Bible ki mmuleje ne: Yezu anyi bantu bakuabu bavua benza Nowele to. Bua malu aa, bena Kristo binunu ne binunu pa buloba bujima mbafike ku dimona ne: kabena ne bua kuenza Nowele to.