MU DITUKU dia 25/8/2017, kuvua kuenzeke bualu bua dikema: bavua bapatule Bible​—Nkudimuinu wa bulongolodi bupiabupia mu Tshiluba.

Nkudimuinu wa bulongolodi bupiabupia udi mpindieu munkatshi mua Bible idi bantu badi batshina Nzambi bakuate nayi mudimu munkatshi mua bidimu bia bungi miaba idibu bakula Tshiluba. Kadi bua tshinyi bivua bikengela kukudimuna Bible mukuabu? Nnganyi udi muenze bua bamukudimune? Mmunyi mutudi mua kujadika ne: tudi mua kueyemena Nkudimuinu wa bulongolodi bupiabupia?

Bidimu bishale ebi, mbapatule nkudimuinu ya Bible mipiamipia ya bungi. Nkudimuinu mikuabu mipiamipia mmiambuluishe bua Dîyi dia Nzambi dikale mu imue miakulu bua musangu wa kumpala. Kadi Bible mipiamipia idi ipatuka kabidi mu miakulu mukadi Bible mikuabu ya muakulu au mikalaku. Bua tshinyi? Mukanda kampanda mufunda kudi Sakae Kubo ne Walter Specht udi uleja ne: “Kakuena nkudimuinu kampanda wa Bible udibu mua kuamba ne: ke wa ndekelu to. Nkudimuinu idi ne bua kulonda mudi malu adi bamanyi ba Bible benda bapeta aya ne mudi miakulu yenda ishintuluka.”​—So Many Versions?

Bidimu bidi panshi ebi, bamanyi ba malu a Bible mbashikuluje miakulu ivuabu bafunde Bible ku ntuadijilu bikole, mmumue ne: tshiena Ebelu, tshiena Alama, ne tshiena Greke. Mbapete kabidi mikanda ya mu Bible mifunda ku bianza ya kale ne mijalame kupita ivua bakudimunyi ba Bible balonde kumpala. Nunku badi mua kukudimuna Dîyi dia Nzambi ne bujalame buonso kupita kumpala!

Declan Hayes, mulongeshi munene wa malu a bungenda, wakafunda ne: “Bible ke mukanda utubu bapanyisha bikole tshidimu tshionso.” Kudi misangu idi dijinga dia kupatula mukanda udibu bapanyisha bikole dimueneka bu didi dibuitshidija dijinga dia kuwufunda ne bujalame. Mu Bible kampanda mbasungule  bua kumbusha bitupa bidi pamupatudi bamona ne: bidi bitondesha bantu. Mu Bible mukuabu muomu mbashintulule miaku anyi biambilu bidi mua kutonda bamue babadi ba lelu. Tshilejilu, bua kusankisha bamue bantu, mbabikilamu Nzambi ne: “Tatu-Mamu.”

Pamuapa bualu budi butamba kutatshisha bikole budi butangila dîna dia Nzambi, Yehowa. (Bamue bamanyi badi bakudimuna dîna dia Nzambi ne: “Yahweh.”) Mu Bible ya kale menemene, mbafunde dîna dia Nzambi ne maleta anayi matshintamane a mu tshiena Ebelu adibu balue kufunda ne: YHWH anyi JHVH. Dîna dia pa buadi edi didi mu tshidibu batamba kubikila ne: Dipungila Dikulukulu nkayamu misangu mitue ku 7 000. (Ekesode 3:15; Misambu 83:18) Nunku, bidi bimueneka patoke ne: Mufuki wetu uvua musue bua batendeledi bende bamanye dîna diende ne bikale baditela!

Kadi bidimu nkama ya bungi kumpala, bena Yuda bakalekela kutela dîna dia Nzambi bua bitabataba bivua bikuatshishangana buôwa. Bukua buena Kristo buakalua pabu kulonda bitabataba abi. (Bienzedi 20:29, 30; 1 Timote 4:1) Bakudimunyi ba Bible bakabanga tshilele tshia kufunda muanzu wa “Mukalenge” pa muaba wa dîna dia Nzambi. Lelu Bible ya bungi miumbushe dîna dia Nzambi miaba yonso. Bible mikuabu ya mu Tshiluba mmiumbushe muaku “dîna” mu Yone 17:6, muaba uvua Yezu muambe ne: “Ndi muleje bantu . . . dîna diebe.” Mukanda wa Mvidi Mukulu (wa société biblique de la R.D.Congo) mmukudimune mvese eu ne: “Mvua mukumanyishe.”

Bua tshinyi badi babenga kutela dîna dia Nzambi? Tukonkonone amue malu adibu bafunde mu tshibejibeji tshia Practical Papers for the Bible Translator. Ntshipatula kudi tshibambalu tshia Alliance biblique universelle (ABU) tshidi tshilombola mudimu wa bungi udi wenzeka pa buloba bujima bua dikudimuna Bible. Tshiena-bualu tshia muomu amu tshiakamba ne: “Bu mudi maleta a YHWH mikale kakuyi mpata dîna dia muntu, mushindu mutambe buimpe wa kudikudimuna bilondeshile mikenji ya dikudimuna uvua wa kufunda maleta a mu Anglais adi apetangana ne a mu tshiena Ebelu pa muaba wa maleta a mu tshiena Ebelu.” Kadi tshiena-bualu atshi tshivua tshidimuija ne: “Nansha nanku, kudi amue malu a kutabalela.”

“Malu” au adi ne bualu buawu menemene anyi? Bilondeshile tshibejibeji etshi, kudi bamanyi badi bela meji ne: “Tuetu bafunde dîna bu mudi Yahweh, bidi mua kufila lungenyi lubi . . . , bileja ne: ‘Yahweh’ nNzambi wa ku babende, anyi Nzambi mukuabu udi kayi mumanyike, mushilangane ne Nzambi ukadibu bobu bamanye.” Kadi Bible udi ulongesha ushindika ne: Yehowa Nzambi mmushilangane ne nzambi ivua bantu bavua kabayi bena Kristo batendelela!​—Yeshaya 43:10-12; 44:8, 9.

Bamanyi ba malu a Bible bakuabu badi bamba mudibu balonda anu bilele anyi dikasa dia bantu bakuabu padibu bafunda muanzu wa “Mukalenge” pa muaba wa dîna dia Nzambi. Kadi Yezu wakapisha bantu bavua balonda bilele bivua kabiyi bitumbishisha Nzambi. (Matayi 15:6) Bualu bukuabu, lungenyi lua kufunda muanzu pa muaba wa dîna kaluena ne nshindamenu mu Bible to. Yezu Kristo udi ne mianzu ya bungi, bu mudi: “Dîyi dia Nzambi” ne “Mfumu wa bamfumu.” (Buakabuluibua 19:11-16) Nunku tudiku mua kufunda mianzu eyi pa muaba wa dîna dia Yezu anyi?

Tshiena-bualu tshikuabu mu tshibejibeji tshitukadi batele atshi tshidi tshiamba ne: “Mfundilu wa dîna ‘Yehowa’ ngua kuepuka.” Bua tshinyi? “Misangu ya bungi bamanyi ba malu a Bible badi bela meji ne: nshindumuinu mutambe buimpe udi ufuanangana ne wa kumpala ngua ‘Yahweh.’” Nansha nanku, mbakudimune mêna a mu Bible adi mamanyike bikole bu mudi Yeshaya, Yelemiya, ne Yezu mu mushindu udi kawuyi mufuanangane bikole ne muvuabu baashindumuna mu tshiena Ebelu tshia kale (Yeshayahu, Yirmeyah, ne Yehohshua). Bu mudi mfundilu wa dîna “Yehowa” muikale mushindu mujalame wa kukudimuna dîna dia Nzambi (mfundilu udibu bakuate nende mudimu mu Tshiluba ne mu miakulu mikuabu munkatshi mua bidimu nkama ya bungi), dibenga kufunda dîna edi nunku kadiena ne nshindamenu mujalame to. Bushuwa, bidi bimueneka ne: dibenga kufunda dîna dia Nzambi ki ndimanyine pa malu adi bamanyi ba malu a Bible bamba to, kadi ndimanyine pa mushindu udi bantu badiumvua ne pa mmuenenu mubi ukadibu nende.

Kadi tshilumbu muaba eu ki ntshia malu adi bamanyi bamba to. Tshilejilu, mufidi wa ngenyi wa mu tshibambalu tshia ABU wa mu Inde wakafunda bua tshidi tshienzeka padibu bumbusha dîna dia Nzambi mu Bible muvuadi kumpala. Wakamba ne: “Muanzu wa Nzambi kawutu wambila bena Hindu bualu to; mbasue kumanya dîna disunguluke dia Nzambi, ne bobu kabayi bamanye dîna adi, kabena mua kudia malanda ne muenadi to.” Bushuwa, tudi mua kuamba bualu bua muomumue ebu bua bantu bonso badi bakeba Nzambi. Kumanya dîna dia Nzambi kudi ne mushinga  wa bungi bua kujingulula tshidiye, mbuena kuamba ne: mmuntu utudi mua kufika ku dimanya, kadi ki mbukole kampanda bua tshianana to. (Ekesode 34:6, 7) Ke bualu kayi Bible udi wamba ne: “Muntu yonso udi ubila dîna dia Yehowa neapandishibue.” (Lomo 10:13) Batendeledi ba Nzambi mbenzenjibue bua kuenza mudimu ne dîna dia Nzambi!

Nunku bivua bualu bua dikema buvua buenzeke mu 1950 pavuabu bapatule Bible wa mu Anglais wa Nkudimuinu wa bulongolodi bupiabupia wa Mifundu ya tshiena Greke ya buena Kristo bua musangu wa kumpala. Mu bidimu dikumi biakalonda, bakapatula Mifundu ya tshiena Ebelu anyi tshidibu batamba kubikila ne: Dipungila Dikulukuluku bitupa ku bitupa. Mu 1961 bakapatula Bible mujima mu Anglais mu mukanda umue. Bualu bua mushinga budi ne: Nkudimuinu wa bulongolodi bupiabupia mmukudimune dîna dia Nzambi “Yehowa” miaba mitue ku 7 000 yonso ivuadi mu Dipungila Dikulukulu. Tshidi tshitamba kusankisha ntshia mudibu bapingaje dîna dia Nzambi misangu 237 mu Mifundu ya tshiena Greke ya buena Kristo, anyi “Dipungila Dipiadipia.”

Dipingaja dîna edi kadiena dinemeka anu Nzambi to, kadi didi divudija kabidi dimanya dietu. Tshilejilu, nkudimuinu ya bungi mmikudimune Matayi 22:44 ne: ‘Mukalenge wakambila mukalenge wanyi.’ Kadi nnganyi udi wakula, ne udi wakula ne nganyi? Nkudimuinu wa bulongolodi bupiabupia mmukudimune Matayi 22:44 ne: “Yehowa wakambila Mukalenge wanyi,” utela mêyi a Misambu 110:1 anu mudiwu. Nunku babadi badi mua kujingulula bimpe dishilangana didi pankatshi pa Yehowa Nzambi ne Muanende.

Nkudimuinu wa bulongolodi bupiabupia mmupatula kudi Watch Tower Bible and Tract Society, tshia mudimu tshimanyike kudi mbulamatadi tshidi tshileja mpala wa Bantemu ba Yehowa. Munkatshi mua bidimu bipite pa lukama, Bantemu ba Yehowa mbapatule Bible pa mebeji ku diambuluisha dia biamu ne mbayabanye pa buloba bujima. Kasumbu kampanda ka bena Kristo kadi kamanyike mu dîna dia Kasumbu ka dikudimuna Bible wa bulongolodi bupiabupia ke kavua kapeshe Bantemu ba Yehowa Nkudimuinu wa bulongolodi bupiabupia bua kumukonkononabu bua kumona ni uvua mukumbane. Bu muvua bena mu kasumbu aka kabayi basue kudikebela lumu, bakalomba bua kabamanyishi mêna abu to, nansha bobu bamane kufua.​—1 Kolinto 10:31.

Bua tshinyi mbabikile Bible eu ne: Nkudimuinu wa bulongolodi bupiabupia? Mêyi a mbangilu a Bible uvuabu bapatule mu 1950 akaleja ne: Dîna edi didi dileja dishindika dikole dia ne: bantu bakadi “ku tshiibi tshia bulongolodi bupiabupia” budibu balaye mu 2 Petelo 3:13. Anu bu muvua kasumbu aku kafunde, “tshikondo tshitudi tumbuka ku bulongolodi bua kale batangile mu bulongolodi bupiabupia” etshi, mbimpe nkudimuinu ya Bible yenze bua “bulelela bua Dîyi dia Nzambi buonso” bukenkeshe.

Bavua batambe kuimanyina pa bujalame. Bakudimunyi ba Bible wa mu Anglais bavua bamukudimuine ku tshiena Ebelu tshia kale, tshiena Alama, ne tshiena Greke, batangila mikanda mitambe buimpe ivuaku. *  Bavua benze muabu muonso mua kuenza bua kukudimuna mikanda ya kale ayi ne bujalame buonso, kadi mu ngakuilu udi babadi ba lelu mua kumvua kakuyi lutatu.

Kabiena bikemesha bua mudi bamanyi bakuabu batumbishe Nkudimuinu wa bulongolodi bupiabupia bua bujalame buende ne mudibu bafunde malu anu muvuawu. Mu 1989 mulongeshi Benjamin Kedar, mumanyi wa malu a tshiena Ebelu wa mu Isalele, wakamba ne: “Mu dikebulula dianyi dia malu a miakulu mu diumvuangana ne Bible ya mu tshiena Ebelu ne diyikudimuna, misangu ya bungi ntu ntangila Bible udibu babikila ne: Nkudimuinu wa bulongolodi bupiabupia wa mu Angais. Pandi ngenza nunku, ndi ntuishibua misangu yonso ne: Bible eu udi uleja mudimu muenza ne bululame buonso bua kufika ku diumvua ne bujalame buonso bidibu bafunde.”

Nunku mbikumbane bua mudi Bantemu ba Yehowa bakudimune Nkudimuinu wa bulongolodi bupiabupia mu miakulu mikuabu pa kumbusha wa mu Anglais. Bakadi bamupatule mujima anyi tshitupa mu miakulu mipite pa 150. Bua kupepeja mudimu eu, bavua benze mushindu wa kukudimuna Bible udi wangata dilonga miaku ya mu Bible ne programe ya ordinatere. Bakenza tshibambalu tshia midimu ya dikudimuna bua kuambuluisha bakudimunyi. Kasumbu Kaludiki ka Bantemu ba Yehowa kadi kalondesha mudimu wa dikudimuna Bible kupitshila ku Komite udi utangila difunda. Kadi mudimu eu utu wenzeka mushindu kayi?

Tshia kumpala, badi bateka kasumbu ka bena Kristo ba tshisumi bua benze kasumbu ka dikudimuna. Malu mamonamona mmaleje ne: padi bakudimunyi bakudimuna pamue mu kasumbu pamutu pa kukudimuna muntu ne muntu pa nkayende, badi bakudimuna bimpe menemene, bantu ba bungi bumvua. (Nsumuinu 11:14) Misangu ya bungi, muena mu kasumbu aka yonso mmukudimunyi ukadi mukudimune mikanda ya Bantemu ba Yehowa. Pashishe badi balongesha bena mu kasumbu aka mikenji ya nshindamenu ya dikudimuna Bible ne mushindu wa kukuata mudimu ne programe ya pa buayi ya ordinatere.

Badi bambila kasumbu ka bakudimunyi bua kukudimuna Bible udi mujalame kadi udi bantu bonso mua kumvua bipepele. Badi ne bua kukudimuna ku muaku ku muaku padiku mushindu, kadi kabayi banyanga ngumvuilu wa bidibu bakudimuna to. Badi bafika ku dienza nanku bishi? Tuangate tshilejilu tshia Bible mupiamupia udibu bafume ku dipatula eu. Kasumbu ka bakudimunyi kavua katuadije ne kusungula miaku ya mu Tshiluba idi ipetangana ne miaku minene yonso ya mu Bible idibu bafunde mu Nkudimuinu wa bulongolodi bupiabupia wa mu Anglais. Programe wa Watchtower Translation System wa mu ordinatere uvua upatula miaku ya mu Bible idi ipetangana ne idi ne mumvuija a muomumue. Uvua uleja kabidi miaku ya mu tshiena Greke anyi ya mu tshiena Ebelu tshia kale kudibu bangatshile miaku ya mu Anglais bua mukudimunyi amanye mudibu bakudimune miaku ya mu tshiena Greke anyi ya mu tshiena Ebelu ayi miaba mikuabu kabidi. Bionso ebi bivua biambuluishe bikole bua kusungula miaku ya mu Tshiluba ivua ipetangana ne ya mu Anglais. Pavua bena mu kasumbu bapetangane bua miaku ayi, bakatuadija kukudimuna Bible benza mudimu ne ordinatere bua kupatula miaku ya mu Tshiluba ivua ipetangana ne ya mu Anglais pavuabu benda bakudimuna mvese ku mvese.

Kadi dikudimuna kadiena anu kupingaja miaku pa muaba wa mikuabu to. Bakudimunyi bavua ne bua kuenza mudimu wa bungi bua kumona bikala miaku ya mu Tshiluba ivuabu basungule ifila lungenyi lujalame lua mu Bible miaba yonso. Bavua kabidi ne bua kujadika ne: mikenji ya muakulu ne mfundilu ya biambilu bivua bimpe ne bikale mutubu babiakula. Mudimu mukole uvuabu benze udi udimuenekela nkayawu. Mu Bible wa mu Tshiluba wa Nkudimuinu wa bulongolodi bupiabupia, mbakudimune Dîyi dia Nzambi mu mushindu mupepele bua kubala, mutokesha bimpe, umvuika bimpe, ne wamba anu tshivua mu mikanda ya kale. *

Tudi tukulomba bua udibadile Bible​—Nkudimuinu wa bulongolodi bupiabupia eu nkayebe. Udi mua kumupetela kudi bapatudi ba tshibejibeji etshi anyi mu tshisumbu tshia Bantemu ba Yehowa ba muaba uudi. Udi mua kumubala ne dishindika dia ne: udi wamba mêyi a Nzambi mu muakulu webe anu mudiwu menemene. Kakuyi mpata neudimuene ne: dipatuka dia Bible eu matuku mashale aa divua bushuwa bualu bua dikema mu nsombelu wa bantu ba Nzambi!