SYLVIANA, mpanda-njila wa bakaji udi ne bidimu makumi abidi ne bia mu njila, udi wamba ne: “Pangakateleja balunda banyi balonda malu avuabu bapete pavuabu baye kuambuluisha miaba ivuabu dijinga ne bampanda-njila ba bungi, ngakajinga bikole bua kulabula panyi masanka au. Kadi mvua ntshina ne: tshivua mua kukumbana bua kuambuluisha muaba uvuabu dijinga ne bamanyishi ba bungi to.”

Udiku udiumvua bu Sylviana anyi? Udiku pebe ne dijinga dikole dia kuambuluisha muaba udibu dijinga ne bamanyishi ba Bukalenge ba bungi, kadi udiebeja ni udi mua kukumbaja tshipatshila atshi anyi? Biobi nanku, kolesha muoyo! Yehowa mmuambuluishe bantu bende balume ne bakaji binunu bia bungi bua kutshimuna bipumbishi bivua bibapangishe bua kualabaja mudimu wabu. Bua kumanya muvua Yehowa munzuluile bamue ba kudibu njila, netumone tshidi tshienzeke mu Madagascar, tshidiila tshinayi ku bunene pa buloba bujima.

Mu bidimu 10 bishale ebi, bamanyishi ne bampanda-njila ba tshisumi bapite pa 70 ba mu matunga 11 * mbalue kuambuluisha mu ditunga dia mu Afrike edi mudi bantu ba bungi banange bulelela ne banemeka Bible. Bamanyishi ba bungi ba mu ditunga edi mbaye pabu kuambuluisha ku budisuile mu tshidiila tshinene tshionso etshi bua kumuangalaja mukenji wa Bukalenge. Tumonayi tshidi bamue ba kudibu benze.

Louis ne mukajende Perrine badi ne bidimu makumi asatu ne bia mu njila bakumbuka mu France kuyabu mu Madagascar. Munkatshi mua bidimu, bavua bela meji a kuya ku babende bua kualabaja mudimu wabu, kadi Perrine uvua welakana bua kuya. Udi wamba ne: “Mvua ntshina bua kuya muaba undi tshiyi mumanye. Bivua bintonda bua kushiya dîku dietu, tshisumbu, nzubu, miaba ituvua bibidilangane nayi, ne malu atuvua tuenza pa tshibidilu. Bulelela, buôwa bumvua nabu ke buvua tshipumbishi tshinene tshimvua ne bua kutshimuna.” Mu 2012, Perrine wakapeta dikima, yeye ne Louis kumuangalabu. Mmunyi mudiye udiumvua mpindieu bua dipangadika divuabu bangate? Udi wamba ne: “Pandi mvuluka buôwa bumvua nabu, ndi mua kuamba ne: ditabuja dianyi ndikole pandi mmona tshianza tshia Yehowa mu nsombelu  wetu.” Louis udi pende wamba ne: “Anji elabi meji, balongi betu ba Bible 10 bavua babuele mu Tshivulukilu tshietu tshia kumpala mu Madagascar!”

Tshivua tshipeshe bena dibaka aba bukole bua kutungunuka ne mudimu wabu pavua ntatu ibakuata ntshinyi? Bakasambila Yehowa bamusengelela bua abapeshe bukole buvuabu nabu dijinga bua kunanukila. (Filip. 4:13) Louis udi wamba ne: “Tuakamona ne: Yehowa uvua muandamune masambila etu ne mutupeshe ‘ditalala dia Nzambi.’ Tuakatuishila meji etu pa masanka avua mudimu wetu utupetesha. Kupita apu, balunda betu bavua bashale mu France bavua batufundila mesaje ne mikanda bua kutukolesha bua katulekedi to.”​—Filip. 4:6, 7; 2 Kol. 4:7.

Yehowa mmufute Louis ne Perrine bua dinanukila diabu bikole. Louis udi wamba ne: “Mu ngondo wa 10 wa 2014, tuakabuela mu Kalasa ka malu a mu Bible bua bena dibaka * mu France. Kubuela mu kalasa aku kuvua dipa dia kudi Yehowa ditudi katuyi mua kupua muoyo to.” Diakamue pakajikijabu kalasa, bakasanka bua muvuabu babatume mu Madagascar.

Pavua Didier ne mukajende Nadine ba mu France bamuangale baye mu Madagascar mu 2010, bavua ne bidimu bipite pa 50. Didier udi wamba ne: “Tuakenza bumpanda-njila patuvua bansonga, pashishe tuetu kulela bana basatu. Pakakolabu, tuakajinga bua kuya kuambuluisha ku babende.” Nadine udi wamba ne: “Kushiyangana ne bana banyi kuvua kuntonda, kadi bakatuambila ne: ‘Nuenu baye ku babende bua kuambuluisha muaba udibu dijinga ne bamanyishi ba bungi, netusanke bikole be!’ Mêyi abu aa akatukankamija bua kumuangala. Nansha mutudi mpindieu kule ne bana betu, tudi tusanka bualu tudi ne mushindu wa kuyukila nabu pa tshibidilu.”

Kabivua bipepele bua Didier ne Nadine kulongabu tshiena Madagascar to. Nadine udi useka wamba ne: “Katutshiena kabidi ne bidimu 20 to.” Tshivua tshibambuluishe bua kumanya muakulu au ntshinyi? Kumpala bakanji kubuela mu tshisumbu tshia Mfualansa. Pashishe, pakadimonabu bakumbane bua kulonga tshiena Madagascar, bakaya mu tshisumbu tshia muakulu au. Nadine udi wamba ne: “Bantu ba bungi batudi tupeta mu buambi mbasue kulonga Bible. Batu batamba kutuela tuasakidila bua mututu tuya kubatangila. Ku ntuadijilu bivua anu bu tshilota. Ndi munange kuenzela bumpanda-njila mu teritware eu. Pantu njuka mu dinda, ntu ndiambila ne: ‘Mbimpe bia katshia, ndi nya mu buambi lelu!’”

Didier udi uvuluka musangu uvuaye mutuadije kulonga tshiena Madagascar. Udi udiseka wamba ne: “Mvua ndombola tshisangilu kadi tshiyi ngumvua tshintu nansha tshimue pavua bana betu bandamuna. Mvua ngamba anu ne: ‘Tuasakidila.’ Meme kuela muanetu wa bakaji mukuabu tuasakidila, kadi bavua basombe panyima pende kutuadijabu kungenzela jeste bua kummanyisha ne: diandamuna diende kadivua dimpe to. Meme kusungula diakamue muanetu mukuabu wa balume undi ngela meji ne: wakafila diandamuna dimpe.”

Mu mpungilu wa mu 2005, Thierry ne mukajende Nadia bakamona drama wa “Ipatshila malu adi atumbisha  Nzambi.” Drama wa malu a mu Bible uvua wakula bua Timote au wakalenga mioyo yabu, kukoleshaye dijinga diabu dia kuambuluisha muaba uvuabu dijinga bikole ne bamanyishi. Thierry udi wamba ne: “Patuvua tuenda tututa bikashi ku ndekelu kua drama, ngakeyemena kudi mukajanyi, meme kumuebeja ne: ‘Tuetu netuye penyi?’ Yeye kungambila ne: uvua pende wela meji a bualu bumue bumue abu.” Matuku makese pashishe, bakatuadija kudilongolola bua kukumbaja tshipatshila tshiabu atshi. Nadia udi wamba ne: “Tuakakepesha bungi bua bintu bietu ku kakese ku kakese too ne pakashalabi bikumbana mu bibuta binayi!”

Bakafika mu Madagascar mu 2006, kutuadijabu kuenza mudimu anu bimpe. Nadia udi wamba ne: “Bantu batudi tupetangana nabu badi batusankisha bikole.”

Kadi pakapita bidimu 6, Thierry ne Nadia bakapeta lutatu. Marie-Madeleine mamuende wa Nadia uvua musombele mu France wakakuluka, kutshibukaye diboko, kutapika kabidi ku mutu. Ke Thierry ne Nadia kuyukilabu ne munganga wa Marie-Madeleine, pashishe bobu kulomba mamuabu bua alue kusomba nabu mu Madagascar. Wakitaba dibikila adi ne disanka dionso nansha muvuaye ne bidimu 80 tshikondo atshi. Udi udiumvua bishi bua kusomba ku babende? Udi wamba ne: “Kutu misangu itubi bikole bua kuibidilangana ne nsombelu, kadi nansha munkadi mukoke, ndi ndiumvua anu ne mushinga mu tshisumbu. Tshidi tshitamba kunsankisha ntshia ne: nsombelu eu udi wambuluisha bana banyi bua kutungunuka ne mudimu wabu udi upatula bipeta bimpe muaba eu.”

Riana mmuanetu wa balume wa bidimu makumi abidi ne bia mu njila. Uvua mukolele mu Alaotra Mangoro, tshitupa tshia bufuke tshia ku est kua Madagascar. Pavuaye mujikije tulasa tua bikadilu, uvua musue kubuela mu iniversite. Kadi pakalongaye Bible, wakashintulula meji ende. Udi wamba ne: “Ngakajikija kulonga tulasa tua bikadilu, meme kulaya Yehowa ne: ‘Meme mukuate mateta a ndekelu, nengangate bumpanda-njila.’” Pakakuataye, wakakumbaja tshivuaye mulaye. Wakatuadija kusomba mu nzubu umue ne muanetu mukuabu uvua mpanda-njila, kupetaye mudimu wa mêba makese, ne kuangataye bumpanda-njila. Udi wamba ne: “Mvua muangate dipangadika dimpe ditambe.”

Kadi balela ba Riana kabavua bumvue bua tshinyi uvua mubenge kutungunuka ne tulasa bua kupeta mudimu muimpe to. Udi wamba ne: “Papa wanyi ne papa muakunyi ne kakuanyi mukuabu bavua bonso bankankamija bua kubuela mu iniversite. Kadi tshivua musue kuimanyika bumpanda-njila bua kuenza tshintu tshikuabu to.” Matuku ndambu pashishe, Riana uvua musue kuambuluisha muaba uvuabu dijinga ne bamanyishi ba bungi. Ntshinyi tshivua tshimupeteshe dijinga adi? Udi wamba ne: “Bangondavi bakabuela mu kartshie ketu, kuibabu bintu bianyi bia bungi. Bualu ebu buakansaka bua kuela meji a mêyi a Yezu a didibutshila ‘biuma mu diulu.’ Meme kuangata dipangadika dia kuenza mudimu mukole bua kupeta biuma bia mu nyuma.” (Mat. 6:19, 20) Ke yeye kuya mu tshitupa tshia ku sud menemene kua ditunga tshitu ne minanga mikole tshidi mu kilometre 1 300 ne muaba uvuaye musombele. Mu tshitupa atshi ke mudi bena Antandroy basombele. Bua tshinyi wakaya kuine aku?

Ngondo mujima kumpala kua kuibabu Riana bintu, ukavua mutuadije kulonga Bible ne bantu babidi bena Antandroy. Uvua mulonge bimue biambilu bia mu muakulu wabu, yeye kuela meji bua bena Antandroy ba bungi bavua kabayi banji kupeta mukenji wa Bukalenge to. Udi wamba ne: “Ngakasambila Yehowa bua angambuluishe bua kuya mu tshitupa tshia buloba mudibu bakula tshiena Tandroy.”

Riana kuyaye, diakamue kupetaye lutatu lua kupeta mudimu. Muntu kampanda kumuambilaye ne: “Bua tshinyi udi mulue munemu? Bantu ba munemu batu baya kuudi mufume aku bua kupeta midimu.” Panyima pa mbingu ibidi, Riana wakumbuka muaba au bua kuya kubuela mu mpungilu wa rejon kayi ne dikuta dia nsongo, wenda udiebeja tshia kuenza. Dituku dia ndekelu dia mpungilu, muanetu wa balume mukuabu kuelaye Riana tshintu mu mpaya wa nkotshi. Tshintu atshi tshivua makuta makumbane bua yeye kualukila ku bena Antandroy ne kutuadija kuenda kamushinga ka yaourt. Riana udi wamba ne: “Ngakamona muvua tshianza tshia Yehowa tshingambuluishe anu pa dîba menemene. Ke meme kutungunuka ne kuambuluisha bantu bavua kabayi banji kupeta mushindu wa kulonga malu a Yehowa.” Kuvua kabidi mudimu wa bungi wa kuenza mu tshisumbu. Riana udi wamba kabidi ne: “Bavua bampesha muyuki wa patoke ku mbingu yonso ibidi. Yehowa uvua undongesha ku diambuluisha dia bulongolodi buende.” Lelu, Riana utshidi anu umanyisha mukenji  wa Bukalenge kudi bantu badi bakula tshiena Tandroy badi basue kulonga malu a Yehowa.

Yehowa udi utujadikila ne: “muntu yonso udi udikebela dibenesha mu buloba neabeneshibue kudi Nzambi wa bulelela.” (Yesh. 65:16) Patudi tudienzeja bikole bua kutshimuna bipumbishi bua kualabaja mudimu wetu, bushuwa Yehowa neatubeneshe. Vuluka tshilejilu tshia Sylviana utudi batele ku ntuadijilu kua tshiena-bualu etshi. Uvua utshina ne: kavua mua kukumbana bua kuambuluisha muaba uvuabu dijinga ne bamanyishi ba bungi to. Bua tshinyi uvua wela meji nanku? Udi wamba ne: “Mukolo wanyi wa dia bakaji mmuîpi ku wa dia balume ku sentimetre 9. Nunku ntu ntebuka ne ntshioka lukasa.”

Nansha nanku, mu 2014, Sylviana wakalamata Sylvie Ann, mpanda-njila utshivua nsongakaji wa mu tshisumbu tshiabu, bobu kuya kusombela mu kasoko kakuabu kadi mu kilometre 85 ne tshimenga tshivuabu basombele. Nansha muvua Sylviana mupete bipumbishi, wakakumbaja tshivuaye ujinga ne muoyo mujima, ne wakapeta mabenesha a dikema! Udi wamba ne: “Meme mumane kuenza tshidimu tshimue tshianana muaba wanyi mupiamupia umvua nyishila eu, Doratine mamu kampanda utshivua nsonga umvua mulonge nende Bible wakabatijibua mu mpuilu wetu wa tshijengu.”

Anu mudi mêyi a ditabuja a bana betu badi baye kuambuluisha muaba udibu dijinga ne bamanyishi ba bungi aleja, patudi tudienzeja bua kutshimuna tshipumbishi kampanda bua kualabaja mudimu wetu, tudi tudimuenena mudi bualu budi Yehowa mulaye bena mudimu bende ebu buikale bulelela: “Nenkukoleshe, eyowa, nenkuambuluishe.” (Yesh. 41:10) Nunku malanda etu ne Yehowa adi akola bikole. Kabidi, kudifila ku budisuile, muaba utudi basombele anyi mu ditunga dienyi, kudi kutulongolola bua mudimu wa Nzambi udi mutuindile mu bulongolodi bupiabupia. Didier utukadi batele udi wamba ne: “Kuenza mudimu muaba udibu dijinga ne bamanyishi ba bungi kudi anu bu kalasa katudi tulonga bua matuku atshilualua.” Nunku, bantu ba bungi badi basue babuelaku mu kalasa aka!