1, 2. Mmunyi mudi Yehowa utupesha bintu biende bia mushinga ne muoyo mujima?

YEHOWA n’Nzambi muena tshipapayi. Yeye ke udi mutupeshe bionso bitudi nabi. Or ne arjan ne bubanji buonso bua pa buloba mbia Yehowa, ku diambuluisha diabi, udi utupetesha bitudi nabi dijinga bua tuikale ne muoyo. (Mis. 104:13-15; Hag. 2:8) Mu Bible mudi miyuki ya bungi ya muvua Yehowa mukumbajile bantu bende majinga abu mu tshishima ne bintu biende bia mushinga.

² Munkatshi mua bidimu 40, Yehowa wakapesha bena Isalele mana ne mâyi pavuabu mu tshipela. (Ekes. 16:35) Ke bualu kayi “kabavua bapangile tshintu nansha tshimue to.” (Neh. 9:20, 21) Yehowa wakavudija mafuta makese a mukaji mukamba kampanda mu tshishima ku diambuluisha dia muprofete Elisha. Dipa dia Nzambi adi diakamuambuluisha bua kufutaye mabanza ende, pashishe kushala ne makuta makumbane a yeye ne bana bende kudiabu. (2 Bak. 4:1-7) Yehowa wakambuluisha Yezu bua kupatula biakudia, too ne makuta, mu tshishima pavuabi bikengela.​—Mat. 15:35-38; 17:27.

3. Nnkonko kayi ituandamuna mu tshiena-bualu etshi?

 ³ Kakuena tshintu tshidi mua kupangisha Yehowa bua kukuatshisha bifukibua biende bia pa buloba ne bintu biende bia mushinga bidi bungi tshianana. Nansha nanku, udi anu ulomba bantu bende bua bafile bintu biabu bua kukuatshisha mudimu udi bulongolodi buende buenza. (Ekes. 36:3-7; bala Nsumuinu 3:9.) Bua tshinyi Yehowa mmusue bua tumupeshe bintu bia mushinga bidiye mutupeshe? Mmunyi muvua bantu ba lulamatu ba kale batue midimu ya baleji mpala ba Yehowa mpanda ne bintu biabu bia mushinga? Mmushindu kayi udi bulongolodi buetu buenza mudimu ne makuta atudi tufila lelu? Netuandamune nkonko eyi mu tshiena-bualu etshi.

4. Patudi tutua mudimu wa Yehowa mpanda, tudi tumuleja tshinyi?

⁴ Tutu tupesha Yehowa bintu bualu tudi bamunange ne tumuanyisha. Patudi tumona bionso bidi Yehowa mutuenzele, bidi bitupitshila mutu. Pavua mukalenge Davidi wakula bua bintu bivuabu nabi dijinga bua kuibaka ntempelo, wakamba ne: bintu bionso bitudi nabi mbia kudi Yehowa, ne tshionso tshitudi tupesha Yehowa ntshia mu bikadiye mutupeshe.​—Bala 1 Kulondolola 29:11-14.

5. Mmunyi mudi Bible uleja ne: difila bintu ne muoyo mujima ntshitupa tshinene tshia ntendelelu mulelela?

⁵ Difila bintu mmushindu mukuabu utudi tutendelela Yehowa. Mupostolo Yone wakumvua mu tshikena kumona bena mudimu ba Yehowa bamba mu diulu ne: “Wewe, Yehowa Nzambi wetu, udi mukumbane bua kuangata butumbi ne bunême ne bukole, bualu wakafuka bintu bionso, ne bua disua diebe biakikalaku ne biakafukibua.” (Buak. 4:11) Kuenaku witaba ne: Yehowa mmukumbanyine butumbi ne bunême buonso, bitusaka bua kumupesha bintu bietu bia mushinga anyi? Yehowa wakambila bena Isalele ku diambuluisha dia Mose bua kumueneka kumpala kuende mu bibilu bisatu ku tshidimu. Bu muvua kufila bintu kuikale tshitupa tshia ntendelelu wa bena Isalele mu bibilu abi, kabavua ne bua ‘kumueneka kumpala kua Yehowa bianza bitupu to.’ (Dut. 16:16) Bia muomumue lelu, kufila bintu ne muoyo mujima bua dianyisha ditudi nadi bua mudimu udi wenzeka mu tshitupa tshia bulongolodi bua Yehowa tshia pa buloba ne bua kuwutua mpanda ntshitupa tshinene tshia ntendelelu wetu.

6. Bua tshinyi mbimpe tuikale tupeshangana bintu bietu? (Tangila tshimfuanyi tshia ntuadijilu tshia tshiena-bualu.)

⁶ Mbimpe tuikale tupesha bakuabu bintu bietu pamutu pa bobu kuikala anu batupesha. (Bala Nsumuinu 29:21.) Fuanyikijabi ne: muana kampanda udi upesha baledi bende dipa dia ku makuta makese avuabu bamupeshe. Baledi bende badi mua kudiumvua bishi? Anyi muana mukuabu muikale mpanda-njila musombele kuabu kadi upesha baledi bende ndambu wa makuta bua kusakidila ku a biakudia anyi a kufuta ku nzubu. Nansha mudi baledi kabayi mua kutekemena bua muanabu ikale ubenzela nanku, badi bangata dipa adi bualu mmushindu udi muana uleja dianyisha bua bionso bidibu bamuenzela. Bia muomumue, Yehowa mmumanye ne: mbimpe tuikale tufila bintu bietu bia mushinga.

7, 8. Ntshilejilu kayi tshidi bantu ba Yehowa ba kale batushile bua difila dia bintu a) bua malu masunguluke? b) bua mudimu wa Yehowa mu kabujima?

⁷ Tshilumbu tshia difila bintu bietu ntshileja patoke mu Bible. Imue misangu, bantu ba Yehowa bakafila bintu biabu bua malu masunguluke. Tshilejilu, Mose wakalomba bantu bua bafile bintu bua kuibaka ntenta wa tshitendelelu, anu bu muakenza pende  mukalenge Davidi bua kuibaka ntempelo. (Ekes. 35:5; 1 Kul. 29:5-9) Pavua mukalenge Yoasha ukokesha, bakuidi bakangata makuta avuabu basangishe bua kulongolola nzubu wa Yehowa. (2 Bak. 12:4, 5) Pavuabu balombe bena Kristo ba kumpala bua kutumina bena Kristo nabu bintu biabu bua tshiyole tshia nzala tshivuaku, ‘bakadisuika, muntu ne muntu bilondeshile dimona diende, bua kutumina bana babu bavua basombele mu Yudaya diambuluisha.’​—Bien. 11:27-30.

⁸ Misangu mikuabu, bantu ba Yehowa bakafila bintu biabu bua kuambuluisha bantu bavua balombola mudimu wa Nzambi. Mu mikenji ya Mose, bena Lewi kabavua bapete bumpianyi bu bisa bikuabu to. Kadi bena Isalele bavua babapesha tshia dikumi tshivua tshibambuluisha bua kudifila ku mudimu wabu wa ku ntenta wa tshitendelelu. (Nom. 18:21) Bia muomumue, panyima pa matuku, bakaji bakuabu bena tshipapayi ‘bavua bambuluisha [Yezu ne bapostolo bende] ne bintu biabu.’​—Luka 8:1-3.

9. Bintu bivuabu bafila kale bavua babipetela penyi?

⁹ Bushuwa, bintu bivuabu bafila ebi bavua babipeta mu mishindu mishilashilangane. Pavua bena Isalele bafila bintu biabu bua kuibaka ntenta wa tshitendelelu mu tshipela, bakafila pamuapa bimue bintu biakapatukabu nabi mu Ejipitu. (Ekes. 3:21, 22; 35:22-24) Mu bidimu lukama bia kumpala, bamue bena Kristo bavua bapana bintu biabu bu mudi madimi anyi nzubu, batuadila bapostolo makuta. Bapostolo bavua baabanyina bantu bavua bakengela bintu. (Bien. 4:34, 35) Bakuabu bavua bateka makuta ku luseke ne bafila mapa pa tshibidilu bua kutua mudimu wa Nzambi mpanda. (1 Kol. 16:2) Nunku, bantu ba nsombelu yonso, mmumue ne: babanji ba menemene too ne bapele ba menemene, bavua bafila bintu.​—Luka 21:1-4.

10, 11. a) Mmunyi mutudi mua kuidikija lungenyi lua dipeshangana bintu lua bantu ba Yehowa ba kale? b) Mmunyi muudi udiumvua bua diakalenga diudi nadi dia kutua mudimu wa Bukalenge mpanda ne bintu biebe?

¹⁰ Lelu, badi petu mua kutulomba bua kufila bintu bietu bua bualu kampanda busunguluke. Tshilejilu, mbalongolole bua kuibakila tshisumbu tshienu Nzubu wa Bukalenge mupiamupia anyi? Peshi badi balongolola Nzubu wenu wa Bukalenge? Badi mua kutulomba makuta bua kulongolola Nzubu ya Betele, kulongolola mpungilu wetu, anyi kuambuluisha bana betu badi bipupu bikuate. Tudi tufila kabidi bintu bietu bua kuambuluisha badi benza mudimu ku Biro bietu bia pa buloba bujima ne ku Betele yonso. Mapa etu adi ambuluisha bamisionere, bampanda-njila ba pa buabu, ne batangidi ba bijengu. Tshisumbu tshienu tshidi mua kuikala tshidisuike bua tshikale tshifila makuta bungi kampanda bua kuibakila bana betu bakuabu Nzubu ya mpuilu ne ya Bukalenge pa buloba bujima.

¹¹ Tuetu bonso tudi mua kutua mudimu udi Yehowa ukumbaja mu matuku a ku nshikidilu aa mpanda ne bintu bietu. Bantu kabatu batamba kumona patutu tufila mapa to. Tutu tuela makuta mu musokoko mu tushete tua mapa tudi mu Nzubu wa Bukalenge, anyi tudi mua kufidila mapa etu ku Enternete mu site wa jw.org. Pamuapa tudi mua kumona ne: mapa etu makese au kaena ne mushinga to. Pabi makuta a bungi atudi tupeta lelu kaena afumina ku mapa manene manene mafila kudi bantu bakese to, kadi adi afumina ku mapa makese makese mafila kudi bantu ba bungi. Bana betu nansha badi kabayi ne kantu badi bu bena Makedonia bavua mu ‘bupele bukole’ kadi badilombele nkayabu bua bapete pabu diakalenga dia kufila bintu biabu, ne kubifilabu ne muoyo mujima.​—2 Kol. 8:1-4.

12. Mmunyi mudi bulongolodi buetu budienzeja bua kutula mu mushindu muimpe makuta adi bantu bafila?

 ¹² Bena mu Kasumbu Kaludiki badi basambila bikole ne benza muabu muonso bua kuikala ne lulamatu ne kuikala badimuke mu ditula makuta adi bulongolodi bupeta. (Mat. 24:45) Badi balongolola mua kuatula mudibi bikengela. (Luka 14:28) Bikondo bia kale, balami ba makuta mafila bua bualu kampanda bavua badienzeja bua kuatula anu bua bualu buvuabu baafidile. Tshilejilu, Ezela wakapingana ku Yelushalema ne bintu bivua mukalenge wa bena Pelasa mufile bu mudi or, arjan, ne bintu bikuabu bia mushinga mupite lelu pa dolare miliyo 100. Ezela wakamona ne: bintu ebi bivua mapa a budisuile mapesha Yehowa ne wakaleja malu masunguluke a kuenza bua kulama bubanji ebu pavuabu bapitshila mu miaba ya njiwu. (Eze. 8:24-34) Mupostolo Paulo wakasangisha makuta bua kuambuluisha bena Kristo ba mu Yudaya. Wakenza bua bantu bavua baya kufila makuta au benze “malu onso ne bulelela, ki nganu ku mêsu kua Yehowa kadi ne ku mêsu kua bantu kabidi.” (Bala 2 Kolinto 8:18-21.) Lelu, bulongolodi buetu budi butula ne dîsu dikole makuta adi bantu bafila, anu bu muvua Ezela ne Paulo benze.

13. Mmushindu kayi utudi ne bua kumona mashintuluka adi bulongolodi buetu buenze matuku mashale aa?

¹³ Bena mu dîku badi mua kuakaja malu padibu bajinga kuikala ne nkatshinkatshi mu ditula makuta adibu bapeta anyi padibu bajinga kupepeja nsombelu wabu ne kukepesha ditula makuta bua benzele Yehowa mudimu wa bungi. Ke tshitu bulongolodi bua Yehowa buenza. Bidimu bishale ebi, kudi malu mapiamapia a bungi mimpe adibu buenze. Kuvua misangu ivuabu butula makuta a bungi kupita avuabu bupeta bua tshikondo kampanda. Nunku, bulongolodi buetu budi bukeba mishindu ya dikepesha ditula makuta ne dipepeja mudimu bua bukumbane kuenza malu a bungi ne makuta ebe audi ufila ne muoyo mujima.

14-16. a) Ngamue malu kayi adi bulongolodi buetu bukumbaja ne makuta audi ufila? b) Mmushindu kayi udi malu adibu bukumbaja aa akuambuluisha?

¹⁴ Bantu ba bungi bakadi benzele Yehowa mudimu bidimu bia bungi badi bamba ne: kabatu banji kumona tshikondo tshidi ne biakudia bia bungi bia mu nyuma bu etshi to. Mu bidimu bidi panshi ebi, tudi bapete site wa jw.org ne JW Télédiffusion. Bible​—Nkudimuinu wa bulongolodi bupiabupia ukadi mupatuke mu miakulu mikuabu ya bungi. Mu 2014 ne 2015, tuvua benze mpungilu wa matuku asatu wa bantu bafumine mu matunga a bungi wa “Tungunukayi tshia kumpala ne kukeba Bukalenge bua Nzambi!” mu bimue bipalu binene mu bimenga 14 pa buloba  bujima. Malu avuabu bambamu avua masankishe bonso bavua babuelamu.

¹⁵ Bantu ba bungi mbaleje dianyisha bua malu malenga a pa buawu adi bulongolodi bua Yehowa bubapetesha. Tshilejilu, bena dibaka kampanda badi bambuluisha mu dimue ditunga dia mu Asie bakafunda bua JW Télédiffusion ne: “Tudi tuenzela mudimu mu tshimenga tshikese. Nunku, kudi misangu itutu tudiumvua nkaya, tupua too ne bunene bua mudimu wa Yehowa muoyo. Kadi patutu anu tutangila programe mishilashilangane ya ku JW Télédiffusion, tutu tuvuluka ne: tudi mu dîku dia bana betu ba pa buloba bujima. JW Télédiffusion udi usankisha bena Kristo netu ba muaba utudi basombele bikole. Batu batamba kuamba ne: patubu bajikija kulonda programe wa ku ngondo, batu badiumvua pabuipi ne bena mu Kasumbu Kaludiki. Lelu badi ne disanka dia kuikala mu bulongolodi bua Nzambi kupita ne kumpala.”

¹⁶ Pa buloba bujima, badi benda bibaka Nzubu ya Bukalenge mitue ku 2 500 anyi bayilongolola. Pakatuadija bena mu tshisumbu kampanda tshia mu Honduras kubuela mu Nzubu wabu wa Bukalenge mupiamupia, bakafunda mukanda bamba ne: “Tudi bushuwa ne disanka diyila ne panshi dia kuikala mu dîku dia Yehowa dia mu diulu ne pa buloba, ne dia kuikala ne bana betu ba pa buloba bujima badi batuambuluishe bua kumona tshituvua bindile ne muoyo mujima tshia kupeta Nzubu wa Bukalenge muaba utudi tshikumbana.” Bantu ba bungi batu baleja dianyisha dia muomumue padibu bapeta Bible ne mikanda mikuabu mikudimuna mu muakulu wabu, anyi padibu babambuluisha dîba dia bipupu, peshi patubu bapeta bipeta bimpe bia diyisha miaba idi bantu ba bungi.

17. Mmunyi mudi malu adi bulongolodi buetu buenza aleja ne: Yehowa udi utuambuluisha?

¹⁷ Bantu bakuabu badi kabayi Bantemu kabena mua kumvua mutudi tufika ku dienza mudimu wonso eu anu ne mapa a budisuile. Pavua mfumu wa kumpanyi kampanda munene mulue kutangila umue wa ku nzubu yetu ya dipatuila mikanda, wakakema pakamonaye ne: bena budisuile ke bavua benza mudimu wonso au ku diambuluisha dia mapa a budisuile, kakuyi dipanyisha bintu anyi dilongolola bibilu bua kubueja makuta. Wakamba ne: tshitudi tuenza katshiena mua kuenzeka to. Uvua muambidilamu! Tudi bamanye ne: tshidi tshienzeka anu bualu Yehowa udi utuambuluisha.​—Yobo 42:2.

18. a) Mmabenesha kayi atudi tupeta patudi tukuatshisha mudimu wa Bukalenge ne bintu bietu? b) Mmunyi mutudi mua kulongesha bana betu ne bantu bapiabapia mua kufila bintu biabu?

¹⁸ Yehowa udi utunêmesha padiye utuanyishila bua kufila bintu bietu bua kukuatshisha mudimu munene wa Bukalenge udi wenzeka lelu. Udi utujadikila ne: netupete mabenesha a bungi patudi tuenza nanku. (Mal. 3:10) Yehowa udi utulaya ne: muntu udi ufila ne tshianza tshilekelela neatante. (Bala Nsumuinu 11:24, 25.) Tudi tupeta kabidi disanka patudi tufila bintu bietu, bualu “disanka dia kufila ndipite dia kuangata.” (Bien. 20:35) Tudi ne diakalenga dia kulongesha bana betu balela ne bantu bapiabapia ku mêyi etu ne ku tshilejilu tshietu mudibu pabu mua kufila bintu biabu ne kupeta mabenesha a bungi.

19. Tshiena-bualu etshi ntshikuambuluishe mushindu kayi?

¹⁹ Bionso bitudi nabi mbifume kudi Yehowa. Kumupingajila bivuaye mutupeshe kudi kuleja mutudi bamunange ne tuanyisha bionso bidiye mutuenzele. (1 Kul. 29:17) Pavua bantu bafila bintu bua kuibaka ntempelo, “bakasanka bua kufila milambu ya budisuile eyi, bualu bavua bapesha Yehowa milambu ya budisuile ne muoyo mujima.” (1 Kul. 29:9) Tuetu petu tutungunukayi ne kupeta disanka ne diakalengele patudi tupingajila Yehowa bintu bitudi bapetele ku tshianza tshiende.