1. Bua tshinyi tshikondo tshitudi etshi ntshia pa buatshi?

TUDI bushuwa mu tshikondo tshia pa buatshi. Anu mukavua Bible mulaye, Yehowa udi wenda usangisha “musumba munene wa bantu . . . ba mu bisamba bionso ne mu bisa bionso ne mu bukua bantu buonso ne mu miakulu yonso.” Bantu bakadibu basangishe badi benza “tshisamba tshia bukole” tshia bantu ba disanka bapite pa miliyo 8 ‘badi benzela [Nzambi] mudimu wa tshijila munya ne butuku.’ (Buak. 7:9, 15; Yesh. 60:22) Katshia kakutu kuanji kuikala bantu bungi nunku badi bafike ku dinanga Nzambi ne bantu nabu nansha.

2. Bantu badi kule ne Nzambi badi ne mushindu kayi mubi wa dinanga? (Tangila tshimfuanyi tshia ntuadijilu tshia tshiena-bualu.)

² Kadi Bible ukavua kabidi mulaye ne: mu matuku etu aa, bantu badi kule ne Nzambi bavua ne bua kuikala ne mushindu mubi wa dinanga, mmumue ne: budinangi. Mupostolo Paulo wakafunda ne: “Mu matuku a ku nshikidilu . . . , bantu nebikale badinangi, banangi ba makuta, . . . banangi ba masanka pamutu pa kuikala banangi ba Nzambi.” (2 Tim. 3:1-4) Dinanga dia mushindu eu didi dibengangana ne dinanga dia buena Kristo. Padi bantu bipatshila  malu adi abasankisha anu bobu nkayabu, kabena mua kupeta disanka didibu batekemene to. Kadi budi bukebesha nsombelu idi ‘mikole mua kupita nayi.’

3. Netumone bualu kayi mu tshiena-bualu etshi? Bua tshinyi?

³ Paulo uvua mumanye ne: budinangi buvua ne bua kutangalaka pa buloba bujima, bukebela too ne bena Kristo njiwu. Ke bualu kayi wakabadimuija bua ‘kumbuka’ kudi bantu badi ne mushindu mubi wa dinanga eu. (2 Tim. 3:5) Kadi katuena mua kubepuka mu malu onso to. Nunku mmunyi mutudi mua kubenga ngenzelu ya malu ya bena panu badi batunyunguluke ne kudienzeja bua kusankisha Yehowa Nzambi wa dinanga? Tumonayi dishilangana didi pankatshi pa dinanga didi Nzambi utulomba bua kuikala nadi ne dinanga didibu baleje mu 2 Timote 3:2-4. Kumanya dishilangana edi nekutuambuluishe bua kukonkonona ne kuakaja dinanga ditudi ne bua kuikala nadi, mmumue ne: dinanga didi ditupetesha diakalenga ne disanka bia bushuwa.

4. Bua tshinyi kudinanga mu mushindu muakanyine ki nkubi to?

⁴ Mupostolo Paulo wakafunda ku bukole bua nyuma muimpe ne: “Bantu nebikale badinangi.” Mbibi bua tuetu kudinanga anyi? Too, kudinanga mu mushindu muakanyine nkuimpe ne kudi mene ne mushinga. Yehowa mmutufuke nanku. Yezu wakamba ne: “Udi ne bua kunanga mukuebe bu muudi mudinange.” (Mâko 12:31) Tuetu katuyi badinange, katuena mua kunanga mukuetu to. Bible udi wamba kabidi ne: “Balume badi ne bua kunanga bakaji babu bu mibidi yabu bobu bine. Muntu udi munange mukajende mmudinange yeye muine, bualu kakuena muntu ukadiku mukine mubidi wende, kadi udi uwudisha, uwunanga.” (Ef. 5:28, 29) Nanku mbimpe tudinange mu mushindu muakanyine.

5. Mmunyi muudi mua kumvuija mudi bantu badi badinange banekeshe?

⁵ Didinanga didibu baleje mu 2 Timote 3:2 ki ndimpe to, mbudinangi. Bantu badi badinange banekeshe badi bela meji ne: mbapite tshidibu atshi. (Bala Lomo 12:3.) Badi badimona ne mushinga kupita muntu kayi yonso. Badi baditatshisha kakese bua bakuabu. Padi malu kaayi enda bimpe, badi bela bantu bakuabu tshilumbu pa mbidi pamutu pa kuitaba tshiabu tshilema. Mumvuiji kampanda wa malu a mu Bible udi ufuanyikija badinangi ne “nyama wa nkese udi . . . udivunga tshikata bua buoya buende bunefuke bumupeteshe luya . . . kadi . . . utangija misongolo yende mitue kudi nyama mikuabu.” Badinangi ba nunku kabatu bushuwa ne disanka to.

6. Mmalu kayi atudi tupeta patudi tunanga Nzambi?

⁶ Bamanyi ba malu a mu Bible badi baleja ne: mupostolo Paulo mmutele budinangi kumpala kua ngikadilu mikuabu mibi ivua ne bua kutangalaka mu matuku a ku nshikidilu bualu buobu ke budi buyilela. Kadi bantu badi banange Nzambi badi bobu baleja ngikadilu mishilangane bikole ne ya mibi. Bible udi usuikakaja dinanga didi Nzambi utulomba bua kuikala nadi pamue ne disanka, ditalala, lutulu, bulenga, buimpe, ditabuja, bupole, ne didikanda. (Gal. 5:22, 23) Muimbi wa misambu wakafunda ne: “Ba diakalenga mbantu badi Yehowa muikale Nzambi wabu!” (Mis. 144:15) Yehowa udi Nzambi wa disanka, bantu bende batu pabu ne disanka. Kabidi, bantu ba Yehowa mbashilangane ne badinangi badi basue anu kupeta bintu, bualu bobu badi ne disanka dia kudifila bua diakalenga dia bakuabu.​—Bien. 20:35.

7. Nnkonko kayi yatuambuluisha bua kukonkonona mushindu utudi banange Nzambi?

⁷ Mmunyi mutudi mua kumanya bituikala tukadi tuenda tudinanga bikole kupita Nzambi? Tangila mubelu udi mu Filipoyi 2:3, 4 eu: “Kanuenji bualu nansha bumue ne lungenyi lua dikokangana anyi lua kudimona bapite bakuabu, kadi ne didipuekesha, numone bakuabu bu banupite nuenu, panudi kanuyi  nutangila anu malu enu nkayenu, kadi nutangila kabidi malu a bakuabu.” Tudi mua kudiebeja ne: ‘Ntuku ntumikila mubelu eu mu nsombelu wanyi anyi? Ndiku nkeba kuenza disua dia Nzambi ne muoyo mujima anyi? Ntuku ndienzeja bua kuambuluisha bakuabu mu tshisumbu ne mu buambi anyi?’ Kudifila bua bakuabu kakutu anu kupepele to. Kudi kulomba didienzeja ne didipangisha amue malu. Kadi kakuena bualu bukuabu budi mua kutusankisha bikole kupita kumanya ne: tudi ne dianyisha dia Mutambe Bunene wa diulu ne buloba.

8. Dinanga dia Nzambi ndisake bamue ku dienza tshinyi?

⁸ Dinanga dia Nzambi ndisake bamue bua kulekela midimu ivua mua kubavuija babanji anu bua kuenzela Yehowa mudimu wa bungi. Ericka, udi musombele mu États-Unis, mmunganga. Kadi pamutu pa kuipatshila muaba wa lumu mu mudimu wa bumunganga, wakangata bumpanda-njila bua pa tshibidilu, ne yeye ne bayende mbambuluishe mu matunga a bungi. Udi uvuluka wamba ne: “Malu a bungi atuvua badimuenene patuvua tuambuluisha mu teritware wa muakulu muenyi pamue ne balunda batudi bapete, mbituvuije bushuwa babanji. Ntu anu ngondopangana, kadi kufila dîba ne makanda anyi bua kuambuluisha bantu bua buondopibue mu nyuma ne kutabalela majinga a bena mu tshisumbu, mbimpeteshe disanka dia katshia ne ditalala dia mu muoyo.”

9. Bua tshinyi dinanga dia makuta kadiena dipetesha disanka?

⁹ Paulo wakafunda ne: bantu bavua ne bua kuikala “banangi ba makuta.” Kukadi bidimu ndambu, mpanda-njila kampanda wa mu Irlande wakambila muntu mukuabu malu a Nzambi. Muntu au kukangulaye kabuta kende ka makuta, kupatula makuta, kuela muulu wamba ne didisua ne: “Ke wanyi nzambi eu!” Nansha mudi bantu ba bungi kabayi mua kuamba nanku patoke, lelu buloba mbuwule tente ne banangi ba makuta ne ba bintu bidiwu mua kusumba. Kadi Bible udi utudimuija ne: “Muntu udi munange arjan kakukuta arjan nansha, anyi muntu udi munange biuma kakukuta tshidiye upeta to.” (Muam. 5:10) Bantu ba nunku batu anu bajinga makuta makuabu, ne padibu badienzeja bua kuapeta, badi badituadila “tunyinganyinga tua bungi.”​—1 Tim. 6:9, 10.

10. Ntshinyi tshiakafunda Agû bua bubanji ne bupele?

¹⁰ Bushuwa tuetu bonso tudi dijinga ne makuta. Adi atupetesha ndambu wa bukubi. (Muam. 7:12) Kadi muntu udiku mua kuikala bushuwa ne disanka yeye anu ne makuta makumbane bua majinga ende manene anyi? Eyowa! (Bala Muambi 5:12.) Agû muana wa Yake wakafunda ne: “Kumpeshi bupele anyi bubanji nansha. Ndie anu tshianyi tshitupa tshia biakudia.” Tudi mua kumvua bipepele bua tshinyi kavua musue kuikala mupele wa menemene to. Anu muvuaye mumvuije pashishe, kavua musue kutetshibua bua kuiba to, bualu kuiba kuvua mua kupendesha Nzambi. Kadi bua tshinyi wakalomba bua kalu mubanji? Wakafunda ne: “Bua tshilu kukuta ne ndue kukuvila ngamba ne: ‘Yehowa nnganyi?’” (Nsu. 30:8, 9) Pamuapa udi mua kuikala mumanye bantu badi beyemena bubanji buabu pamutu pa kueyemena Nzambi.

11. Yezu wakafila mubelu kayi bua makuta?

¹¹ Bantu badi banange makuta kabena mua kusankisha Nzambi to. Yezu wakamba ne: “Muntu nansha umue kena mua kuenzela bamfumu babidi mudimu to; bualu neakine umue ne neanange mukuabu, anyi nealamate umue ne neapetule mukuabu. Kanuena mua kuikala bapika ba Nzambi ne ba Biuma popamue to.” Kumpala wakanji kuamba ne: “Lekelayi kudibutshila biuma pa buloba padi bishi bia mbumbu ne dimoma bibidia ne padi bivi babuela ne babiba. Kadi nudibutshile biuma mu diulu mudi bishi bia mbumbu anyi dimoma kabiyi bibidia, ne mudi bivi kabayi babuela ne babiba.”​—Mat. 6:19, 20, 24.

12. Bua tshinyi nsombelu mupepele udi mua kutuambuluisha bua kuenzela Yehowa mudimu bipepele? Fila tshilejilu.

 ¹² Bantu ba bungi mbamone ne: kuikala ne nsombelu mupepele kudi kubapetesha disanka, kubapetesha kabidi dîba dia bungi dia kuenzela Yehowa mudimu. Jack udi musombele mu États-Unis, wakapanyisha nzubu wende munene ne kumpanyi wende bua yeye ne mukajende bangate bumpanda-njila. Udi wamba ne: “Bivua bitukolele bua kulekela nzubu muimpe utuvua nende ne lupangu luetu lua ku ntshiama. Kadi munkatshi mua bidimu bia bungi mvua mpingana kumbelu ne tshiji tshia malu a ku mudimu. Mukajanyi uvua mpanda-njila uvua yeye anu ne disanka. Uvua ungambila ne: ‘Wanyi mfumu undi ngenzela mudimu mmfumu muimpe be!’ Mpindieu undi panyi mpanda-njila, meme ne mukajanyi tudi tuenzela Muntu umuepele mudimu, mmumue ne: Yehowa.”

13. Mmunyi mutudi mua kumanya mmuenenu utudi nende bua makuta?

¹³ Bua kumanya mmuenenu utudi nende bua makuta, tudi mua kuandamuna nkonko eyi ne muoyo mujima: ‘Ndiku bushuwa ngitaba tshidi Bible wamba bua makuta ne ntshilonda mu nsombelu wanyi anyi? Dikeba makuta ke didi pa muaba wa kumpala mu nsombelu wanyi anyi? Ntuku ngangata bintu bia ku mubidi ne mushinga wa bungi kupita malanda anyi ne Yehowa ne bantu bakuabu anyi? Ndiku bushuwa ngeyemena Yehowa ne: udi unkumbajila majinga andi nawu anyi?’ Tuikalayi batuishibue ne: kakuela bonso badi bamueyemena mâyi ku makasa nansha kakese.​—Mat. 6:33.

14. Kuikala ne mmuenenu muakanyine wa masanka kudi kumvuija tshinyi?

¹⁴ Anu mukavua Bible muambe, bantu ba bungi lelu ‘mbanangi ba masanka.’ Anu mudibi kabiyi bibi bua kudinanga anyi kumona makuta mu mushindu muakanyine, kabiena kabidi bibi bua kusanka mu mushindu muakanyine to. Yehowa ki mmusue tuikale tudipangisha masanka onso a mu nsombelu anyi tubenga kupita kapepa mu mushindu muimpe udi usankisha to. Bible udi ukankamija bantu badi balamate Nzambi wamba ne: “Ndaku, udie biakudia biebe ne disanka, ne unue mvinyo webe ne muoyo wa disanka.”​—Muam. 9:7.

15. Mmasanka a mushindu kayi adibu bakuila mu 2 Timote 3:4?

¹⁵ Bible udi wakula mu 2 Timote 3:4 bua  bantu badi banange masanka kabayi banange Nzambi. Mona ne: mvese eu kena wamba ne: bantu bavua ne bua kunanga masanka bikole kupita Nzambi bienze bu ne: bavua mua kumunanga ndambu to. Kadi udi wamba ne: ‘pamutu pa Nzambi.’ Mumanyi kampanda wa malu a mu Bible wakafunda ne: “[Mvese] eu kenaku umvuija ne: bantu abu mbanange kabidi Nzambi mu mushindu kampanda to. Udi umvuija ne: ki mbamunange nansha kakese to.” Ndidimuija kayipu dilenga bua badi ne dinanga dinekesha dia masanka! Bible udi uleja ne: “banangi ba masanka” mbantu badibu ‘basesuisha kudi masanka a muoyo eu.’​—Luka 8:14.

16, 17. Ntshilejilu kayi tshidi Yezu mushiye bua bidi bitangila masanka?

¹⁶ Yezu wakaleja muvuaye ne mmuenenu muakanyine menemene wa masanka. Wakabuela mu “tshibilu tshia dibaka” ne mu “tshibilu tshinene.” (Yone 2:1-10; Luka 5:29) Mu tshibilu tshia dibaka, wakenza tshishima tshia mâyi akudimuka mvinyo, kumusakidilabu ku mukese uvua mushale. Umue musangu, wakabenga mmuenenu mubi wa didimona bakane uvua nende bantu bavua bamupepeja bualu uvua udia ne unua.​—Luka 7:33-36.

¹⁷ Kadi Yezu kavua mudine ne kasuki mu masanka to. Uvua muteke Yehowa pa muaba wa kumpala mu nsombelu wende ne wenza tshionso tshivuaye mua kuenza bua kuambuluisha bakuabu. Wakitaba bua kufua lufu lubi pa mutshi bua kupandisha bantu. Yezu wakambila bonso bavua basue kumulonda ne: “Nudi ba diakalenga padi bantu banupenda, banukengesha ne banushiminyina malu mabi a mishindu yonso bua bualu buanyi. Nusanke, nuikale ne disanka dia bungi, bualu difutu dienu ndinene mu diulu, bualu mushindu eu ke uvuabu bakengeshe baprofete bavua kumpala kuenu.”​—Mat. 5:11, 12.

18. Nnkonko kayi yatuambuluisha bua kumanya mutudi banange masanka?

¹⁸ Mmunyi mutudi mua kumanya mushindu utudi banange masanka? Mbimpe tudiebeje ne: ‘Ntu ngangata dipita kapepa ne mushinga wa bungi kupita bisangilu ne buambi anyi? Ntuku musue kudipangisha amue malu bua kuenzela Nzambi mudimu anyi? Pantu nsungula mishindu kampanda ya dipita kapepa, ntuku nkeba kumanya mudi Yehowa uyimona anyi?’ Bituikala bushuwa banange Nzambi, netudienzeje bua kuepuka malu onso atudi batuishibue ne: adi amunyingalaja ne atudi tumona ne: adi mua kumunyingalaja.​—Bala Matayi 22:37, 38.

19. Mbantu kayi badi kabayi bushuwa mua kupeta disanka?

¹⁹ Bidimu bikadi bitue ku 6000 bidi bantu bamone kasuba mu bulongolodi bua Diabolo bukadi ku nshikidilu kuabu ebu. Lelu, buloba mbuwule tente ne bantu badi badinange anu bobu, banange makuta, ne banange masanka. Bantu abu badi bajinga anu kupeta bia bungi, bateka majinga abu kumpala kua bionso mu nsombelu wabu. Bantu ba nunku kabena bushuwa mua kupeta disanka to. Kadi Bible udi yeye wamba ne: “Wa diakalenga mmuntu udi Nzambi wa Yakoba muikale muambuluishi wende, udi ne ditekemena diende mu Yehowa Nzambi wende.”​—Mis. 146:5.

20. Mmunyi mudi dinanga dia Nzambi dikupeteshe disanka?

²⁰ Dinanga dia Nzambi didi divula anu kuvula mu bantu ba Yehowa, ne tshidimu tshionso etshi bantu bakuabu badi pabu benda bamumanya ne bamunanga. Etshi ntshijadiki tshia ne: Bukalenge bua Nzambi budi bukokesha ne mu katupa kîpi emu nebutuadile bantu masanka bungi kabuyi kubala. Disanka dilelela dia kashidi didi difumina ku dienza disua dia Nzambi ne ku dimanya ne: tudi tusankisha Udi ku Mutu kua Bionso. Bantu badi banange Yehowa nebasanke bua kashidi. Mu tshiena-bualu tshidi tshilonda netumone imue ngikadilu idi ifumina ku budinangi ne mudiyi ibengangana ne ngikadilu mimpe idi nayi bantu ba Yehowa.