EYOWA, avua ambuluisha bimue bikondo. Tuangatayi tshilejilu. Dutelonome 24:14, 15 udi wamba ne: “Kuena ne bua kudia muntu muangata ku mudimu udi mu lutatu ne udi mupele bintu to, nansha yeye muikale muanenu anyi muntu musombe buenyi mu buloba buebe . . . Tshianana neadidile Yehowa bua bualu buebe ne newikale ne dipila dia mpekatu.”

Mbapete dilomba dia buena edi pabuipi ne tshimenga tshia Ashdod, difunda katshia mu bidimu bia 600 kumpala kua Yezu. Dilomba edi difunda pa tshiyoyi, pamuapa bua muntu kampanda uvua wenzelangana mudimu mu budimi uvua mua kuikala mupange kufila bungi bua ntete buvuabu bamukosele, didi diamba ne: “Pavua muena mudimu webe [muntu uvua ulomba] mujikije kuela bintu bivuaye munowe mu diyeba kukadi matuku ndambu, Hoshayahu muana wa Shobayi wakalua, kuangataye tshilamba tshia muena mudimu webe. . . . Bantu bonso batuvua tunowa nabu mu munya mukole nebajadike . . . ne: tshindi muambe ntshilelele. Tshiena muenze bualu bubi nansha bumue. . . . Nguvena wetu, wewe kuyi mumone ne: bidi bikengela kupingajila muena mudimu webe tshilamba tshiende, mupingajilatshi nansha bua luse! Kuena ne bua kushala mupuwe padi muena mudimu webe kayi ne tshilamba tshiende to.”

Mufundi wa malu a kale Simon Schama udi wamba ne: dilomba edi “kadiena dituleja anu muvua muena mudimu eu mushikile bua kupeta [tshilamba tshiende] to. Kadi didi kabidi dituleja ne: muntu uvua ulomba eu uvua mumanyaku mikenji ya mu Bible, nangananga ya mu Lewitiki ne mu Dutelonome idi ikandika kukengesha bapele.”