1-2. (a) Ntshinyi tshidi Yehowa umona padi bantu miliyo ya bungi badisangisha bua Didia dia dilolo dia Mukalenge? (Tangila tshimfuanyi tshia pa tshizubu.) (b) Netuandamune lukonko kayi?

FUANYIKIJABI tshidi Yehowa umona padi bantu miliyo ya bungi pa buloba bujima badisangisha bua Didia dia dilolo dia Mukalenge. Kena anu umona bungi bua bantu to; udi umona muntu ne muntu udi ubuelamu. Tshilejilu, udi umona bantu batu babuelamu tshidimu tshionso. Munkatshi muabu mudi mua kuikala bantu batu babuelamu nansha mudibu babakengesha bikole. Bakuabu kabatu ne tshibidilu tshia kubuela mu bisangilu bietu bikuabu to, kadi batu bamona kubuela mu Tshivulukilu bu bualu bua mushinga mukole budibu ne bua kuenza. Yehowa udi umona kabidi bantu badi mua kuikala balue mu Tshivulukilu bua musangu wa kumpala, pamuapa anu bua kumona tshianana

² Bushuwa, Yehowa udi usanka padiye umona bantu bungi nunku babuela mu Tshivulukilu. (Luka 22:19) Kadi muoyo wa Yehowa kawena nangananga ku bungi bua bantu badi babuelamu to. Muoyo wende udi nangananga ku tshidi tshibasaka bua kubuelamu; tshiotshi atshi ke tshidi ne bualu kudiye. Mu tshiena-bualu etshi, netuandamune lukonko lua mushinga elu: Bua tshinyi tutu tubuela mu Tshivulukilu tshidimu tshionso, tubuela kabidi mu bisangilu bia ku lumingu bidi Yehowa mulongoluele bantu badi bamunange?

3-4. (a) Bua tshinyi tutu tubuela mu bisangilu? (b) Dibuela dietu dia mu bisangilu didi dileja tshinyi bua tshitudi? (c) Bilondeshile tshidi 1 Kolinto 11:23-26 wamba, bua tshinyi katuena ne bua kupumbisha mu Tshivulukilu?

³ Tutu tubuela mu bisangilu nangananga bualu ntshitupa tshia ntendelelu wetu. Tudi tubuelamu kabidi bualu Yehowa udi utulongeshamu. Bena lutambishi kabatu bitaba ne: bikengela babalongeshe  tshintu to. (3 Yone 9) Kadi tuetu, tudi tujinga ne muoyo umue bua kulongeshibua kudi Yehowa ne bulongolodi buende.​—Yesh. 30:20; Yone 6:45.

⁴ Dibuela dietu dia mu bisangilu didi dileja ne: tudi ne didipuekesha, mmumue ne: tudi basue bua Yehowa atulongeshe ne tudi badiakaje bua nanku. Dilolo dia Tshivulukilu tshia lufu lua Yezu, tutu tubuela mu tshisangilu tshinene etshi ki nganu bualu tudi benzejibue bua kubuelamu to, kadi tudi tubuelamu kabidi bualu tudi tutumikila ne didipuekesha dionso dîyi dituma dia Yezu edi: “Tungunukayi ne kuenza nunku bua kumvuluka.” (Bala 1 Kolinto 11:23-26.) Tshisangilu etshi tshidi tshikolesha ditekemena dietu bua matuku atshilualua ne tshituvuluija mudi Yehowa mutunange bikole. Kadi Yehowa mmumanye ne: tudi dijinga ne dikankamijibua ne dikoleshibua misangu ya bungi ku tshidimu. Ke bualu kayi udi utulongoluela bisangilu lumingu luonso ne utulomba bua kubuelamu. Didipuekesha didi ditusaka bua kumutumikila. Tutu tupitshisha mêba a bungi lumingu luonso bua kulongolola bisangilu ebi ne kubuelamu.

5. Bua tshinyi bantu badi ne didipuekesha batu bitaba dibikila dia Yehowa?

⁵ Tshidimu tshionso etshi, bantu ba bungi badi ne didipuekesha batu bitaba dibikila dia Yehowa dia kulongeshibua kudiye. (Yesh. 50:4) Batu basue kubuela mu Tshivulukilu, ne pashishe batu batuadija kubuela mu bisangilu bietu bikuabu. (Zek. 8:20-23) Tuetu bonso nabu tutu basue bua Yehowa ‘muambuluishi wetu ne musungidi wetu’ atulongeshe ne atulombole. (Mis. 40:17) Tuambilangane bulelela: Ntshinyi tshidi mua kutusankisha bikole anyi kuikala ne mushinga wa bungi kupita ditaba dibikila dia kulongeshibua kudi Yehowa ne Yezu Muanende udiye munange bikole menemene?​—Mat. 17:5; 18:20; 28:20.

6. Mmunyi muvua didipuekesha diambuluishe muntu kampanda bua kubuela mu Tshivulukilu?

⁶ Tshidimu tshionso tutu tudienzeja bua kubikila bantu ba bungi menemene bua kubuela mu Tshivulukilu tshia lufu lua Yezu. Tshivulukilu ntshiambuluishe bantu ba bungi badi ne didipuekesha batu bitaba bua kubuelamu. Tshilejilu, kukadi bidimu bia bungi bavua bapeshe tatu kampanda dibeji dia dibikila bua kubuela mu Tshivulukilu. Wakambila muanetu wa balume uvua mumupeshadi ne: kakupeta mushindu wa kubuelamu to. Kadi dilolo dia Tshivulukilu, muanetu eu wakakema bua kumumona ubuela mu Nzubu wa Bukalenge. Mushindu uvua bana betu bamuakidile wakamulenga ku muoyo bikole, kutuadijaye kubuela mu bisangilu bia ku lumingu. Mu tshidimu tshijima atshi, wakapangila anu bisangilu bisatu tshianana. Ntshinyi tshivua tshimuambuluishe bua kubuela mu bisangilu bionso nunku? Uvua ne bupuekele bua bungi buvua bumusake bua kushintulula meji ende. Muanetu uvua mumubikile au wakalua kuamba ne: “Mmuntu wa didipuekesha dia bungi be!” Kakuyi mpata, Yehowa uvua mukoke muntu eu bua amutendelele; lelu ukadi mubatijibue.​—2 Sam. 22:28; Yone 6:44.

7. Leja mudi malu atudi tulonga mu bisangilu ne atudi tubala mu Bible mua kutuambuluisha bua tuikale ne didipuekesha.

⁷ Malu atudi tulonga mu bisangilu ne atudi tubala mu Bible adi mua kutuambuluisha bua tuikale ne didipuekesha. Mu bisangilu bia mu mbingu ya kumpala kua Tshivulukilu, batu batamba kuakula bua Yezu ne bua didipuekesha divuaye muleje pavuaye mufile muoyo wende bu tshia kupikulangana natshi. Matuku a kumpala kua Tshivulukilu, batu batulomba bua kubala miyuki ya mu Bible ya malu adi akula bua lufu lua Yezu ne dibishibua diende. Malu atutu tulonga mu bisangilu abi ne atutu tubala mu miyuki ya mu Bible ayi atu avudija dianyisha dietu bua mulambu wa Yezu uvuaye mufile bua bualu buetu. Bidi bitusaka bua kuikala petu ne didipuekesha ne kuenza disua dia Yehowa nansha padibi bitukolele.​—Luka 22:41, 42.

8. Mmunyi muvua Yezu muleje dikima?

⁸ Tudi tudienzeja bua kuidikija kabidi Yezu mu tshilumbu tshia dileja dikima. Elabi meji bua dikima divua Yezu muleje matuku a kumpala kua lufu luende. Uvua mumanye bimpe ne: bena lukuna bende bakavua pa kumupuekesha milongo, kumututa, ne kumushipa. (Mat. 20:17-19) Nansha nanku wakitaba anu bua kufua. Pakakumbana tshikondo tshia kufuaye, wakambila bapostolo bende ba lulamatu bavua nende mu Getesemane ne: “Jukayi, tuyayi. Monayi! Muntungidi ukadi pabuipi.” (Mat. 26:36, 46) Pakalua tshisumbu tshia bantu tshivua ne bia mvita bua kumukuata, wakasemena kumpala, kudimanyishaye, pashishe kuambilaye basalayi bua balekele bapostolo baye. (Yone 18:3-8) Edi ndikima dia dikema divua Yezu muleje! Lelu bena Kristo bela manyi ne mikoko mikuabu badi badienzeja bua kuleja dikima anu bu Yezu. Mushindu kayi?

9. (a) Bua tshinyi bidi mua kutulomba dikima bua kubuela mu bisangilu pa tshibidilu? (b) Mmunyi mudi tshilejilu tshietu mua kukolesha bena Kristo netu badibu bele mu maloko bua ditabuja diabu?

⁹ Bua kubuela mu bisangilu pa tshibidilu, bidi mua kutulomba bua kuikala ne dikima padiku nsombelu mikole. Bamue bana betu ba balume ne ba bakaji batu babuela mu bisangilu nansha mudibu ne tunyinganyinga tua bungi, batekeshibue mu mikolo, anyi bikale ne masama. Bakuabu batu babuelamu ne dikima dionso nansha mutubu babaluisha kudi bena mu mêku abu anyi bakokeshi ba mbulamatadi. Anji elabi meji bua mudi tshilejilu tshietu tshikolesha bena Kristo netu badibu bele mu maloko bua ditabuja diabu. (Eb. 13:3) Padibu bumvua ne: tudi tutungunuka ne kuenzela Yehowa mudimu nansha mu ntatu, bidi bibakolesha bua kuikalabu anu ne ditabuja, ne dikima, ne muoyo mutoke. Ke tshivua tshienzekele mupostolo Paulo. Pavuaye mu buloko mu Lomo, uvua usanka dîba dionso divuaye umvua ne: bena Kristo nende bavua benzela Nzambi mudimu ne lulamatu. (Filip. 1:3-5, 12-14) Matuku makese kumpala kua kumulekelabu anyi patshivuabu bamulekelelaku, wakafundila bena Ebelu mukanda. Wakafundila bena Kristo ba lulamatu abu bua ‘batungunuke ne kunangangana bu bana ba muntu’ ne bua kabalekedi kudisangisha pamue nansha.​—Eb. 10:24, 25; 13:1.

10-11. (a) Mbanganyi batudi ne bua kubikila mu Tshivulukilu? (b) Mbualu kayi budi mu Efeso 1:7 budi butusaka bua kuenza nanku?

¹⁰ Tudi tuleja mutudi ne dikima patudi tubikila balela betu, bena mudimu netu, ne bena mutumba netu mu Tshivulukilu. Bua tshinyi tudi tubabikilamu? Bua bungi bua dianyisha ditudi nadi bua malu adi Yehowa ne Yezu batuenzele, katuena mua kudikanda bua kubikila bantu bakuabu mu tshivulukilu to. Tudi basue bua bamanye tshidibu mua kuenza bua “ngasa” wa Yehowa utudi bapete ku diambuluisha dia tshia kupikulangana natshi abambuluishe pabu.​—Bala Efeso 1:7; Buak. 22:17.

¹¹ Patudi tuleja dikima dia kudisangisha pamue, tudi tuleja kabidi ngikadilu mukuabu wa mushinga mukole utu Nzambi ne Muanende baleja mu mishindu ya dikema.

12. (a) Mmunyi mudi bisangilu bietu bikolesha dinanga ditudi nadi bua Yehowa ne bua Yezu? (b) Ntshinyi tshidi 2 Kolinto 5:14, 15 utulomba bua kuenza bua kuidikija Yezu?

¹² Dinanga ditudi nadi bua Yehowa ne bua Yezu didi dituenzeja bua kubuela mu bisangilu. Pashishe malu atudi tulonga mu bisangilu abi adi akolesha dinanga edi. Batu batuvuluijamu malu adi Yehowa ne Muanende batuenzele. (Lomo 5:8) Tshivulukilu tshiotshi tshitu tshituvuluija nangananga mudibu batunange bikole, banange too ne bantu badi kabayi bamanye mushinga wa tshia kupikulangana natshi. Bu mutudi ne dianyisha dia bungi, tudi tudienzeja bua kuidikija Yezu mu malu atudi tuenza matuku onso. (Bala 2 Kolinto 5:14, 15.) Bualu bukuabu, muoyo wetu udi utusaka bua kutumbisha Yehowa bua mudiye mufile tshia kutupikula natshi. Umue mushindu utudi mua kumutumbisha nkufila mandamuna mu bisangilu ne muoyo mujima.

13. Mmunyi mutudi mua kuleja ne: tudi banange Yehowa ne Muanende bikole? Umvuija.

¹³ Dinanga dikole ditudi nadi bua Yehowa ne bua Muanende didi mua kumuenekela mu mushindu utudi tudipangisha amue malu bua bakuabu. Misangu ya bungi, tudi ne bua kudipangisha malu mashilashilangane bua kuebuela mu bisangilu bietu. Bisumbu bia bungi bitu bienza tshisangilu tshia munkatshi mua lumingu ku dilolo pakadi ba bungi ba kutudi batshioke bua midimu yabu. Bitu bienza tshikuabu ku ndekelu kua lumingu patu bantu bakuabu bikisha. Yehowa utu umona ne: tudi tubuela mu bisangilu nansha tuetu batshioke anyi? Eyowa, utu umona! Mu bulelela, patudi tudienzeja bikole bua kubuelamu, Yehowa pende udi usanka bikole bua dinanga ditudi tumuleja.​—Mâko 12:41-44.

14. Leja mudi Yezu mutushile tshilejilu tshia kudipangisha amue malu bua kuleja mutudi banange bantu bakuabu.

¹⁴ Yezu mmutushile tshilejilu tshia kudipangisha amue malu bua kuleja mutudi banange bantu bakuabu. Wakitaba bua kufuila bayidi bende ne uvua kabidi uteka malu abu kumpala kua ende yeye matuku onso. Tshilejilu, uvua usomba ne bayidi bende nansha pavuaye mutshioke anyi pavuaye ne malu mamutonde. (Luka 22:39-46) Uvua kabidi utamba kutuma lungenyi ku tshivuaye mua kuenzela bakuabu, kayi ulutuma ku tshivuabu mua kumuenzela yeye to. (Mat. 20:28) Padi dinanga dietu bua Yehowa ne bua bena Kristo netu dikole nanku, netuenze muetu  muonso bua kubuela mu Didia dia dilolo dia Mukalenge ne mu bisangilu bietu bikuabu bionso.

15. Mbanganyi nangananga batudi ne bua kuambuluisha?

¹⁵ Tudi mu dîku dia pa buloba bujima dia bena Kristo balelela, ne tutu basue kupitshisha mêba a bungi tubikila bantu bapiabapia bua badisange kutudi. Kadi tudi tuditatshisha nangananga bua kuambuluisha “bana betu mu ditabuja” bakadi balekele kuyisha ne kubuela mu bisangilu. (Gal. 6:10) Patudi tubakankamija bua kubuela mu bisangilu bietu, nangananga mu Tshivulukilu, bidi bileja mutudi babanange. Anu bu Yehowa ne Yezu, tutu tumvua disanka dia bungi padi muanetu ukadi mulekele kuyisha ne kubuela mu bisangilu upingana kudi Yehowa Tatu wetu wa dinanga ne Mulami wetu.​—Mat. 18:14.

16. (a) Mmunyi mutudi mua kukankamijangana? Bisangilu bietu nebituambuluishe mushindu kayi? (b) Bua tshinyi etshi ke tshikondo tshimpe tshia kuvuluka mêyi a Yezu adi mu Yone 3:16?

¹⁶ Mu mbingu idi ilonda, bikila bantu ba bungi menemene bua balue kubuela mu Tshivulukilu mu Ditanu dia 19/4/2019 dilolo. (Tangila kazubu ka “ Neubabikile anyi?”) Mu tshidimu tshijima etshi, tuikalayi ne tshibidilu tshia kubuela mu bisangilu bionso bidi Yehowa utulongoluela bua kukankamijangana. Bu mudi ndongeluelu wa malu eu usemena ku ndekelu, bisangilu bietu nebituambuluishe bua kuikala anu ne didipuekesha, dikima, ne dinanga. (1 Tes. 5:8-11) Tulejayi ne muoyo wetu wonso mutudi tumvua bua Yehowa ne Muanende bua mushindu udibu batunange bikole.​—Bala Yone 3:16.