1-3. (a) Bua tshinyi Yehowa uvua munange Solomo? Mmabenesha kayi avua Solomo mupete? (b) Nnkonko kayi ituandamuna mu tshiena-bualu etshi?

SOLOMO wakalua mukalenge wa Isalele patshivuaye nsonga. Ku ntuadijilu kua bukalenge buende, Yehowa wakamumuenekela mu tshilota umuambila ne: “Lomba tshiudi musue bua nkupeshe.” Solomo wakandamuna ne: ‘Ntshidi anu muana ne tshiena mumanye malu a bungi. . . . Nunku pesha muena mudimu webe muoyo wa ditumikila bua kulumbuluisha tshisamba tshiebe.’ (1 Bak. 3:5-10) Solomo ulomba “muoyo wa ditumikila;” edi si ndilomba didi dileja bupuekele bua dikema! Ke bua tshinyi Yehowa uvua munange Solomo bikole! (2 Sam. 12:24) Diandamuna dia mukalenge utshivua muana edi diakasankisha Nzambi bikole, kufikaye too ne ku dimupesha “muoyo wa meji ne lungenyi.”​—1 Bak. 3:12.

² Pavua Solomo ne lulamatu, wakapeta mabenesha a bungi. Uvua ne diakalenga dia kuibaka ntempelo “bua dîna dia Yehowa Nzambi wa Isalele.” (1 Bak. 8:20) Wakenda lumu bikole bua meji avua Nzambi mumupeshe. Malu avua Nzambi mumusake bua kuamba ku bukole bua nyuma mmafunda mu mikanda isatu ya mu Bible. Mukanda wa Nsumuinu ngumue wa ku mikanda ayi.

³ Mbatele muaku muoyo misangu mitue ku lukama mu mukanda wa Nsumuinu. Tshilejilu, mbambe mu Nsumuinu 4:23 ne: “Kumpala kua bintu bionso biudi ulama, ulame muoyo webe.” “Muoyo” udibu batele mu mvese eu ntshinyi? Netuandamune lukonko elu mu tshiena-bualu etshi. Netuandamune kabidi nkonko mikuabu ibidi eyi: Mmunyi mutu Satana ukeba kunyanga muoyo wetu? Ntshinyi tshitudi mua kuenza bua kulama muoyo wetu? Bua tuetu kushala ne lulamatu kudi Nzambi, bidi bikengela tumanye mandamuna a nkonko ya mushinga eyi.

4-5. (a) Mmunyi mudi mvese wa Misambu 51:6 utuambuluisha bua kumvua tshidi muaku “muoyo” umvuija? (b) Mmunyi mudi ditabalela makanda etu a mubidi dituambuluisha bua kumvua ne: bidi bikengela kutabalela muoyo wetu wa mu tshimfuanyi?

⁴ Muaku “muoyo” udibu batele mu Nsumuinu 4:23 udi uleja ‘munda’ mua muntu anyi ‘tshidi muntu mu musokoko.’ (Bala Misambu 51:6 ne dimanyisha dia kuinshi kua dibeji.) Mu mêyi makuabu, “muoyo” utu umvuija meji adi munda mua muntu, mudiye udiumvua, tshidi tshimusaka bua kuenza malu kampanda, anyi majinga ende. Udi umvuija tshitudi munda menemene, ki ntshitudi ku mêsu to.

⁵ Tumone mudi kuikala ne makanda a mubidi mimpe kutuambuluisha bua kumona mushinga wa kuikala ne muoyo wa mu tshimfuanyi muimpe. Tshia kumpala, bua kuikala ne makanda a mubidi mimpe, tudi ne bua kusungula biakudia bidi bimpe ne kuikala kuibidija mubidi pa tshibidilu. Bia muomumue, bua tuetu kuikala anu ne makanda a mu nyuma mimpe, tudi ne bua kusungula biakudia bimpe bia mu nyuma ne kuikala kuleja ditabuja dietu kudi Yehowa. Tudi tuleja ditabuja adi patudi tutumikila bitudi tulonga ne tuakula bua ditabuja adi. (Lomo 10:8-10; Yak. 2:26) Tshibidi, tuetu bimanyine pa tshitudi ku mêsu, tudi mua kuela meji ne: tudi ne makanda a mubidi mimpe petu mu bulelela bikale ne disama munda. Mu mushindu wa muomumue, tudi mua kuela meji ne: tudi ne ditabuja dikole bualu tudi ne tshibidilu tshia kuenza malu a mu nyuma, kadi majinga mabi adi mua kuikala enda akola munda muetu. (1 Kol. 10:12; Yak. 1:14, 15) Tudi ne bua kuvuluka ne: Satana mmusue kutunyanga ne meji ende. Mmunyi mudiye mua kuenza nanku menemene? Kadi mmunyi mutudi mua kudikuba?

6. Satana utu ne tshipatshila kayi? Mmunyi mutuye ukeba bua kutshikumbaja?

⁶ Satana nntomboji utu upetula mikenji ya Yehowa ne utu ne budinangi; mmusue bua tumufuane. Kena mua kutuenzeja bua tuele meji anyi tuenze malu anu bu yeye to. Ke bualu kayi utu ukeba bua kukumbaja tshipatshila tshiende mu mishindu mikuabu. Tshilejilu, udi wenza bua tuikale banyunguluka kudi bantu bakadiye  munyange. (1 Yone 5:19) Mmusue bua tuikale tusomba nabu nansha mutudi bamanye ne: malunda mabi ‘neanyange’ ngelelu wetu wa meji ne ngenzelu wetu wa malu. (1 Kol. 15:33) Mukalenge Solomo wakakuatshibua ku mayele ende aa. Wakasela bakaji bampagano ba bungi, ne ndekelu wa bionso bakaji abu bakapeta “bukole bua bungi bua kumunyanga” ne “bakasesuisha muoyo wende ku kakese ku kakese” kule ne Yehowa.​—1 Bak. 11:3; dim.

7. Ntshinyi tshikuabu tshitu Satana umuangalaja natshi ngelelu wende wa meji? Bua tshinyi tudi ne bua kuikala badimuke?

⁷ Satana utu wenza mudimu ne filme ne ndongamu ya ku TV bua kumuangalaja ngelelelu wende wa meji. Mmumanye ne: malu adibu balonda mu filme anyi ku TV kaatu anu atusankisha tshianana to; atu atulongesha mua kuela meji, mua kudiumvua, ne mua kuenza malu. Yezu uvua mupiluke mu dilondela bantu malu bua kubalongesha. Tshilejilu, wakafila mufuanu wa muena Samalea wa luse ne wa muana uvua mumbuke kuabu ne munyangakaje bumpianyi buende. (Mat. 13:34; Luka 10:29-37; 15:11-32) Kadi bantu bakadi Satana munyange ne ngelelu wende wa meji badi mua kulonda malu mu filme anyi ku TV bua kutunyanga. Mbimpe tuikale ne nkatshinkatshi. Filme ne ndongamu ya ku TV bidi mua kutusanguluja ne kutulongesha kabiyi binyanga meji etu. Kadi tudi ne bua kuikala badimuke. Patudi tusungula malu a kujikija nawu lutetuku, mbimpe tudiebeje ne: ‘Filme eu anyi ndongamu wa ku TV eu udi undongesha ne: mbimpe kudilekelela ku majinga anyi a mubidi anyi?’ (Gal. 5:19-21; Ef. 2:1-3) Ntshinyi tshiwenza wewe mujingulule ne: ndongamu kampanda udi uzangika ngelelu wa meji wa Satana? Mbimpe umuepuke anu muudi mua kuepuka disama dia tshiambu!

8. Mmunyi mudi baledi mua kuambuluisha bana babu bua kulama mioyo yabu?

⁸ Nuenu baledi, nudi ne mudimu wa pa buawu wa kulama bana benu bua Satana atue mênu mu mutshi mu bionso bidiye wenza bua kunyanga mioyo yabu. Bushuwa nutu nuenza muenu muonso bua bana benu kabapetshi masama.  Nutu nulama mbanza yenu ne mankenda, ne nuimansha tshintu tshionso tshidi mua kunukebela nuenu ne bana benu masama. Bia muomumue, nudi ne bua kuenza bua bana benu kabatangidi filme, ndongamu ya ku TV, kabanayi manaya a mu biamu, anyi kubuela mu site ya Enternete bidi mua kubanyanga ne ngelelu wa meji wa Satana. Yehowa mmunupeshe bukokeshi bua kutabalela makanda a mu nyuma a bana benu. (Nsu. 1:8; Ef. 6:1, 4) Nunku kanutshinyi bua kubelela mikenji idi mimanyine pa mêyi a mu Bible to. Bambilayi bidibu mua kutangila ne kubenga kutangila, ne bambuluishayi bua bumvue tshinudi bangatshile mapangadika au. (Mat. 5:37) Padibu benda bakola, balongeshayi mua kudijinguluila tshidi tshimpe ne tshidi tshibi bilondeshile mikenji ya Yehowa. (Eb. 5:14) Ikalayi bamanye ne: bana benu nebalonge malu a bungi ku binudi nuamba, kadi nangananga ku binudi nuenza.​—Dut. 6:6, 7; Lomo 2:21.

9. Leja lumue lua ku ngenyi idi Satana umuangalaja. Bua tshinyi ludi ne njiwu?

⁹ Satana udi kabidi utusaka bua tueyemene meji a bantu pamutu pa kueyemena meji a Yehowa bualu mmusue kunyanga muoyo wetu. (Kolos. 2:8) Mona lumue lua ku ngenyi idi Satana umuangalaja: wewe kuyi mubanji kuena muntu to. Bantu badi bela meji mushindu eu badi mua kulua babanji anyi kubenga kulua babanji. Nansha balue babanji anyi kabayi balue babanji, badi mu njiwu. Bua tshinyi? Bualu badi mua kulua kuditua anu mu dikeba makuta, bibafikisha too ne ku dinyanga makanda abu a mubidi, malanda abu ne bena mu mêku abu, too ne bulunda buabu ne Nzambi anu bua makuta. (1 Tim. 6:10) Tudi ne disanka bua mudi Tatu wetu wa mu diulu udi ne meji utuambuluisha bua tuikale ne nkatshinkatshi mu tshilumbu tshia makuta.​—Muam. 7:12; Luka 12:15.

10-11. (a) Ntshinyi tshitudi mua kuenza bua kudikuba? (b) Ntshinyi tshivua bansentedi benza bikondo bia kale? Mmunyi mutu kondo ketu ka muoyo kenza malu bu nsentedi?

¹⁰ Tuetu basue kulama muoyo wetu bimpe, tudi ne bua kumanya mua kujandula njiwu idiku ne kukeba tshia kuenza musangu umue bua kudikuba. Muaku udibu bakudimune ne: “ulame” udi mu Nsumuinu 4:23 udi utuvuluija mudimu uvua nsetendedi wenza. Mu matuku a mukalenge Solomo, bansentedi bavua bimana pa bimanu bia tshimenga ne bamanyisha pavuabu bamona bena lukuna babaluila. Bualu ebu budi butuambuluisha bua kumanya tshitudi ne bua kuenza bua kupangisha Satana bua kunyanga meji etu.

¹¹ Mu bikondo bia kale, bansentedi bavua benza mudimu pamue ne balami ba ku biibi. (2 Sam. 18:24-26) Bu muvuabu benza mudimu pamue, tshimenga tshivua mu bukubi bualu bavua benza bua biibi bikale bikanga dîba dionso divua muena lukuna mua kulua. (Neh. 7:1-3) Kondo ketu ka muoyo * kalongesha kudi Bible kadi paku mua kuenza malu anu bu nsentedi ne kutudimuija padi Satana ukeba kunyanga muoyo wetu, mmumue ne: padiye ukeba kunyanga meji etu, mutudi tudiumvua, tshidi tshitusaka bua kuenza malu kampanda, anyi majinga etu. Dîba dionso didi kondo ketu ka muoyo katuta, mbimpe tukateleje ne tuenze muetu muonso bua kuepuka njiwu.

12-13. Tudi bafuane kudishima bua kuenza tshinyi? Kadi ntshinyi tshitudi ne bua kuenza?

¹² Tuangate tshilejilu tshia mushindu utudi mua kuenza bua ngelelu wa meji wa Satana katunyangi. Yehowa mmutulongeshe ne: ‘masandi ne  malu a bukoya a mishindu yonso kabiena [ne bua] kutedibua nansha munkatshi muetu’ to. (Ef. 5:3) Kadi netuenze tshinyi bena mudimu netu anyi balongi netu bobu batuadije kuakula malu a masandi? Tudi bamanye ne: tudi ne bua “kulekela malu adi kaayi a Nzambi ne majinga a panu.” (Tito 2:12) Kondo ketu ka muoyo (anyi nsentedi wetu) kadi mua kutudimuija ne: wamanya, kudi njiwu! (Lomo 2:15) Netukateleje anyi? Pamutu pa kukateleja, tudi bafuane kudishima, tubanga kuteleja bantu abu anyi tutangila bimfuanyi bidibu mua kuikala balejangana. Pabi edi ke dîba dia tuetu kushintulula malu a kuakula anyi kukeba kua diya kuya bua kuepuka njiwu.

¹³ Padi binetu batusaka bua tuele meji a malu mabi anyi tuenze, bidi bikengela tuikale ne dikima bua kubakandamena. Tuikale batuishibue ne: Yehowa udi umona mutudi tudienzeja bua kukandamana, ne neatupeshe bukole ne meji bidi bikengela bua kukandamena ngelelu wa meji wa Satana. (2 Kul. 16:9; Yesh. 40:29; Yak. 1:5) Kadi ntshinyi tshikuabu tshitudi mua kuenza bua kulama muoyo wetu?

14-15. (a) Ntshinyi tshitudi ne bua kunzuluila muoyo wetu? Mmunyi mutudi mua kuenza nanku? (b) Mmunyi mudi Nsumuinu 4:20-22 utuambuluisha bua kuenza bua dibala dietu dia Bible kutuambuluishadi bikole? (Tangila kabidi kazubu ka “ Mua kuelangana meji.”)

¹⁴ Bua kulama muoyo wetu, katuena anu ne bua kubenga malu mabi adi mua kutunyanga to, kadi tudi kabidi ne bua kuitaba malu adi mua kutuambuluisha. Vuluka kabidi bualu bua tshimenga tshivua tshinyunguluka kudi bimanu. Mulami wa biibi uvua ukanga biibi bia tshimenga bua muena lukuna kabuedimu to, kadi kuvua bikondo bivuaye ukangula biibi bua babueje biakudia ne bintu bikuabu mu tshimenga. Bu bobu bashiya biibi anu bikanga, bena mu tshimenga bavua bafua ne nzala. Bia muomumue, mbimpe tuikale ne tshibidilu tshia kunzuluila ngelelu wa meji wa Nzambi muoyo wetu bua awulombole.

¹⁵ Bible udi ne ngelelu wa meji wa Yehowa. Nunku dîba dionso ditudi tumubala, tudi tulekela meji a Yehowa alombola mushindu utudi tuela meji, tudiumvua, ne tuenza malu. Ntshinyi tshitudi mua kuenza bua dibala dietu dia Bible kutuambuluishadi bikole? Mbimpe tusambile. Muanetu kampanda wa bakaji udi wamba ne: “Kumpala kua kubala Bible ntu nsambila Yehowa, mmulomba bua angambuluishe bua ‘mmone bimpe malu a kukema’ adi mu Dîyi diende.” (Mis. 119:18) Mbimpe tuelangane kabidi meji bua malu atudi babale. Patudi tusambila, tubala, ne tuelangana meji, Dîyi dia Nzambi didi dibuela ‘munda menemene mua muoyo wetu.’ Dîba adi netufike ku dinanga meji a Yehowa.​—Bala Nsumuinu 4:20-22; Mis. 119:97.

16. Mmunyi mudi kutangila ndongamu ya ku TV wa jw.org kuambuluishe bana betu ba bungi?

¹⁶ Mushindu mukuabu utudi tulekela ngelelu wa meji wa Yehowa utulombola mpatudi tutangila bintu bidi mu TV wa jw.org^®. Muanetu kampanda ne mukajende badi bamba ne: “Ndongamu ya ku ngondo ya ku TV eu idi bushuwa diandamuna dia ku masambila etu! Itu itukolesha ne itukankamija patudi babungame anyi tudimona bu bantu balekelela. Misangu ya bungi patudi kumbelu tutu tuteleja misambu ya ku TV eu itu bana betu badimbila. Tutu tuyela patutu tulamba, tukolopa mu nzubu, anyi nansha patudi tunua tshiayi.” Ndongamu eyi itu ituambuluisha bua kulama muoyo wetu. Idi itulongesha mua kuela meji bu Yehowa ne mua kukandamana padibu batusaka bua kuitaba ngelelu wa meji wa Satana.

17-18. (a) Anu mudi 1 Bakalenge 8:61 muleje, patudi tutumikila malu adi Yehowa utulongesha, ntshinyi tshidi tshienzeka? (b) Tshilejilu tshia mukalenge Hezikiya tshidi tshitulongesha tshinyi? (c) Mu diumvuangana ne disambila dia Davidi didi mu Misambu 139:23, 24, tudi mua kusambila bua bualu kayi?

¹⁷ Musangu wonso utudi tupeta masanka bua malu mimpe atudi benze, ditabuja dietu didi dikola menemene. (Yak. 1:2, 3) Tudi tudiumvua bimpe bualu tudi benze bua Yehowa adiumvue ne  disanka dia kutubikila ne: bana bende, ne dijinga dietu dia kumusankisha didi dikola. (Nsu. 27:11) Diteta dionso ditudi tupeta mmpunga wa tuetu kuleja ne: katuena tuenzela Tatu wetu udi ututabalela mudimu ne muoyo mukuatshidile to. (Mis. 119:113) Kadi tudi tuleja ne: tudi banange Yehowa ne muoyo mujima, mmumue ne: bikale ne muoyo udi utusaka anu bua kutumikila mikenji yende ne kuenza disua diende.​—Bala 1 Bakalenge 8:61.

¹⁸ Kadi katuakuenza bilema anyi? Netubienze bualu tudi bapange bupuangane. Tuetu benze bilema, tuvuluke tshilejilu tshia mukalenge Hezikiya. Wakenza bilema, kadi wakanyingalala, pashishe kutungunukaye ne kuenzela Yehowa mudimu “ne muoyo mujima.” (Yesh. 38:3-6; 2 Kul. 29:1, 2; 32:25, 26) Nunku, tuepukayi bintu bidi Satana wenza nabi mudimu bua kutunyanga ne meji ende. Tusambilayi bua tupete “muoyo wa ditumikila.” (1 Bak. 3:9; bala Misambu 139:23, 24.) Tudi mua kushala ne lulamatu kudi Yehowa anu tuetu balame muoyo wetu kupita bintu bikuabu bionso.