TSHIENA-BUALU TSHIA KULONGA 4
Tshidi Didia dienza ne bintu bikese ditulongesha bua Mukalenge wa mu diulu
“Etshi tshidi tshiumvuija mubidi wanyi. . . . Etshi tshidi tshileja ‘mashi anyi a tshipungidi.’”—MAT. 26:26-28.
MUSAMBU WA 16 Tumbishayi Yah bua Muanende Muela Manyi
KADIOSHA *
1-2. (a) Bua tshinyi tudi tuamba ne: Yezu uvua anu ne bua kutuleja mushindu mupepele wa kuvuluka lufu luende? (b) Nngikadilu kayi ya Yezu ituakonkonona?
UDIKU mua kumvuija tshitu tshienzeka mu Tshivulukilu tshia lufu lua Yezu tshidimu tshionso anyi? Kakuyi mpata, ba bungi ba kutudi badi mua kuvuluka malu atu enzeka mu Didia dia dilolo dia Mukalenge. Bua tshinyi? Bualu didia edi kaditu dienzeka ne bintu bipitepite bungi to. Nansha nanku tshibilu etshi ntshia mushinga mukole. Nunku tudi mua kudiebeja ne: ‘Bua tshinyi batu benza didia edi ne bintu bikese nunku?’
2 Pavua Yezu uyisha pa buloba, uvua mumanyike bu muntu uvua ulongesha malu malelela a mushinga mu mushindu mupepele, mutoke, ne uvua umvuika bimpe. (Mat. 7:28, 29) Mmutuleje petu mushindu mupepele kadi wa mushinga mukole wa kuenza Tshivulukilu * tshia lufu luende. Tukonkononayi Didia dia dilolo dia Mukalenge edi bimpe bimpe ne amue malu avua Yezu muambe ne muenze. Netumvue bimpe menemene muvua Yezu ne didipuekesha ne dikima ne dinanga, ne netulonge mutudi mua kutamba kumuidikija.
YEZU UDI NE DIDIPUEKESHA
Diampa ne mvinyo bia mu Tshivulukilu bidi bituvuluija ne: Yezu wakafila muoyo wende bua bualu buetu, kabidi ne: lelu udi ukokesha bu Mukalenge mu diulu (Tangila tshikoso 3-5)
3. Anu mudibu baleje mu Matayi 26:26-28, bua tshinyi tudi tuamba ne: bintu bivua Yezu muenze nabi Didia dia dilolo dia Mukalenge kabivua bipitepite bungi? Bintu bikese bibidi bivuaye mudienze nabi abi bidi bileja tshinyi?
3 Yezu wakenza Didia dia dilolo dia Mukalenge ne bapostolo bende ba lulamatu 11. Wakangata biakudia bia Pasaka bivua bishale, kuenzaye nabi didia edi. (Bala Matayi 26:26-28.) Wakadienza anu ne diampa divua kadiyi diela luevene ne mvinyo bikavuabu nabi abi. Yezu wakambila bapostolo bende ne: bintu bikese bibidi abi bivua bileja mubidi wende ne mashi ende bipuangane bikavuaye pa kufila bua bualu buabu. Bapostolo kabavua mua kukema bua muvua Yezu muenze tshibilu etshi mu mushindu mupepele to. Bua tshinyi?
4. Mmunyi mudi mubelu uvua Yezu mupeshe Mâta utuambuluisha bua kumvua bua tshinyi Yezu uvua muenze bua Tshivulukilu tshikale tshienzeka ne bintu bikese?
4 Tangila tshivua tshienzeke ngondo ndambu kumpala, pakavua Yezu mu tshidimu tshiende tshisatu tshia mudimu wa kuyisha, pavuaye muye kutangila balunda bende ba pa muoyo aba: Lazalo, Mâta, ne Mariya. Pavuabu basombe apu, Yezu wakatuadija kuyisha. Mâta uvuaku, kadi uvua mu ditanaji bualu uvua ulambila muenyi wabu munene biakudia bipitepite bungi. Pakamona Yezu tshivua Mâta wenza, wakamupingaja mu njila ne bulenga buonso, kumuambuluishaye bua kumona ne: biakudia bia bungi kabivua anu ne mushinga to. (Luka 10:40-42) Panyima pa matuku, mêba makese tshianana kumpala kua Yezu kutufuila, wakatumikila yeye nkayende mubelu au. Wakenza bua Didia dia dilolo dia Mukalenge kadikadi ne bintu bipitepite bungi to. Bidi bitulongesha tshinyi bua Yezu?
5. Bintu bikese bidibu benza nabi Tshivulukilu bidi bileja tshinyi bua Yezu? Mmunyi mudi bualu ebu bumvuangana ne Filipoyi 2:5-8?
5 Yezu uvua ne didipuekesha mu malu onso avuaye wamba ne wenza. Ke bualu kayi kabiena bitukemesha bua muvuaye muleje didipuekesha dia dikema butuku bua kumpala kua lufu luende to. (Mat. 11:29) Uvua mumanye ne: ukavua pa kufila mulambu munene uvua muntu kayi muanji kufila, ne Yehowa uvua ne bua kumubisha ku lufu bua kumuvuija mukalenge mu diulu. Nansha nanku, kavua ukeba bua bikale bavuluka lufu luende ne bintu bipitepite bungi bua kukoka ntema yonso ya bantu kudiye to. Kadi wakambila bayidi bende bua kuikala kumuvuluka musangu umue ku tshidimu ne bintu bikese patupu. (Yone 13:15; 1 Kol. 11:23-25) Bintu bikese ebi kadi bikumbanyine bidi bileja ne: Yezu kavua ne lutambishi to. Tudi ne disanka dia mudi didipuekesha dikale umue wa ku ngikadilu minene ya Mukalenge wetu wa mu diulu.—Bala Filipoyi 2:5-8.
6. Mmunyi mutudi mua kuidikija didipuekesha dia Yezu patudi mu ntatu?
6 Mmunyi mutudi mua kuidikija didipuekesha dia Yezu? Mpatudi tuteka malu a bakuabu kumpala kua etu. (Filip. 2:3, 4) Vuluka tshivua Yezu muenze butuku bua kumpala kua lufu luende. Uvua mumanye ne: ukavua pa kufua lufu lubi; kadi uvua uditatshisha bikole bua bapostolo bende ba lulamatu bakavua pa kupeta kanyinganyinga bua bualu buende. Nunku wakapitshisha butuku abu ubalongesha, ubakolesha, ne ubakankamija. (Yone 14:25-31) Yezu uvua uditatshisha bikole ne budipuekeshi buonso bua diakalenga dia bakuabu kupita muvuaye uditatshisha bua diende yeye. Tshilejilu kayipu tshimpe nunku tshidiye mutushile!
YEZU UDI NE DIKIMA
7. Mmunyi muvua Yezu muleje dikima dia dikema mêba makese yeye mumane kuenza Didia dia dilolo dia Mukalenge?
7 Mêba makese Yezu mumane kuenza Didia dia dilolo dia Mukalenge, wakaleja dikima dia dikema. Mushindu kayi? Yezu wakitaba bua kuenza tshivua Tatu wende musue bua tshimufikile nansha muvuaye mumanye ne: kuenza nanku kuvua kumukebela lufu lua muntu mupie tshibawu tshia bundu tshia dipenda Nzambi. (Mat. 26:65, 66; Luka 22:41, 42) Yezu wakalama muoyo wende mutoke ne bupuangane buonso bua kutumbisha dîna dia Yehowa, kutua bumfumu bua Nzambi mpanda, ne kukanguila bantu badi banyingalala bua mibi yabu njila wa kupetela muoyo wa kashidi. Yezu wakalongolola kabidi bayidi bende bua malu akavua pa kubafikila.
8. (a) Ntshinyi tshivua Yezu muambile bapostolo bende ba lulamatu? (b) Mmunyi muvua bayidi ba Yezu batungunuke anu ne kuidikija dikima diende?
8 Yezu wakaleja kabidi dikima pavuaye kayi mutume meji ende ku kanyinganyinga kavuaye mua kuikala naku, kadi muatume ku majinga a bapostolo bende ba lulamatu. Yeye mumane kupatula Yudasa, wakenza Didia dia dilolo dia Mukalenge. Didia edi divua ne bua kuvuluija bantu bavua ne bua kulua bayidi bende bela manyi mabenesha adi mashi ende abapetesha ne adi tshipungidi tshipiatshipia tshidibu badie nende tshibapetesha. (1 Kol. 10:16, 17) Wakambila bayidi bende tshivuaye yeye ne Tatu wende basue bua benze bua bakumbanyine dibikidibua diabu dia kuya mu diulu. (Yone 15:12-15) Wakabambila kabidi ne: bavua ne bua kupeta ntatu. Pashishe wakabakankamija bua balonde tshilejilu tshiende, kubambilaye ne muoyo mujima ne: “Koleshayi muoyo!” (Yone 16:1-4a, 33) Bidimu bia bungi pashishe, bayidi ba Yezu batshivua anu balonda tshilejilu tshiende tshia didipangisha malu ne kuleja dikima. Bavua bambuluishangana mu ntatu mishilashilangane nansha bia kumona lufu.—Eb. 10:33, 34.
9. Mmunyi mutudi mua kuidikija Yezu mu tshilumbu tshia dileja dikima?
9 Bia muomumue lelu, tudi tulonda tshilejilu tshia Yezu tshia kuleja dikima. Tshilejilu, bitu bilomba dikima bua kuambuluisha bena Kristo netu badibu bakengesha bua ditabuja diabu. Kutu bikondo bitubu bela bana betu mu buloko kabayi ne tshidibu benze. Padibi bienzeka nanku, tudi ne bua kuenza tshionso tshitudi mua kuenza bua bualu buabu, nansha kubakuila kabidi. (Filip. 1:14; Eb. 13:19) Mushindu mukuabu wa kuleja dikima mpatudi tutungunuka ne kuyisha “ne dikima.” (Bien. 14:3) Anu bu Yezu, tudi badisuike bua kuyisha mukenji wa Bukalenge nansha bantu mua kutuluisha anyi kutukengesha. Kadi kudi bikondo bitudi mua kumona ne: katutshiena ne dikima to. Dîba adi ntshinyi tshitudi mua kuenza?
10. Mu mbingu ya kumpala kua Tshivulukilu, ntshinyi tshitudi ne bua kuenza? Bua tshinyi?
10 Tudi mua kuvudija dikima dietu tuetu tuelangana meji a malu ikala mulambu wa Kristo wa kupikulangana nawu mua kutupetesha matuku atshilualua. (Yone 3:16; Ef. 1:7) Mu mbingu ya kumpala kua Tshivulukilu, tudi ne mpunga wa pa buende wa kuvudija dianyisha dietu bua tshia kupikulangana natshi. Mu tshikondo atshi, ikala ubala mvese idibu bafile bua Tshivulukilu ne welangana meji ne muoyo mujima bua malu avua menzeke kumpala kua Yezu kufuaye. Pashishe patudi tudisangisha mu Didia dia dilolo dia Mukalenge, netumvue bimpe menemene mushinga udi nawu diampa ne mvinyo ne mudi mulambu udibi bileja muikale wa pa buawu. Patudi tujingulula bualu budi Yezu ne Yehowa batuenzele ne tumona mudibu butuambuluisha tuetu, balunda ne balela betu, ditekemena dietu didi dikola, ne bidi bitusaka bua kunanukila ne dikima dionso too ne ku ndekelu.—Eb. 12:3.
11-12. Too ne muaba eu, ntshinyi tshitudi balonge?
11 Too ne muaba eu tudi balonge ne: Didia dia dilolo dia Mukalenge kadiena anu dituambuluisha bua kuvuluka mulambu wa mushinga wa kupikulangana nawu to, kadi didi dituvuluija kabidi ngikadilu minene ya Yezu eyi: didipuekesha ne dikima. Yezu mMuakuidi wetu munene wa mu diulu udi utuakuila, nunku bidi bitusankisha bikole bua mudiye utungunuka ne kuleja ngikadilu eyi! (Eb. 7:24, 25) Bua kuleja mutudi ne dianyisha dia bungi, tudi ne bua kuvuluka lufu lua Yezu ne lulamatu anu muvuaye mutulombe. (Luka 22:19, 20) Tudi tuluvuluka dituku didi dipetangana ne dia 14 dia ngondo wa Nisana, dituku dia mushinga mukole dia ku tshidimu.
12 Bintu bikese bia mu Didia dia dilolo dia Mukalenge bidi mua kutuambuluisha bua kujingulula ngikadilu mukuabu uvua musake Yezu bua kutufuila. Pavuaye pa buloba, uvua mumanyike bua ngikadilu au. Nngikadilu kayi au?
YEZU UDI NE DINANGA
13. Mmunyi mudi mvese wa Yone 15:9 ne wa 1 Yone 4:8-10 ileja dinanga didi Yehowa ne Yezu baleje? Dinanga edi didi diambuluisha banganyi?
13 Yezu wakaleja bimpe mu malu onso avuaye wenza ne: Yehowa mmutunange bikole. (Bala Yone 15:9; 1 Yone 4:8-10.) Bualu bua mushinga mbua ne: Yezu uvua mutufuile ne muoyo mujima. Nansha tuetu bela manyi anyi bena mu “mikoko mikuabu,” dinanga dia Yehowa ne dia Muanende didibu batuleje ku diambuluisha dia mulambu au didi dituambuluisha. (Yone 10:16; 1 Yone 2:2) Ela kabidi meji bua bintu bitubu benza nabi Didia dia dilolo dia Mukalenge; bidi bituleja mudi Yezu munange bayidi bende ne ubatua mushinga. Mushindu kayi?
Yezu wakenza Didia dia dilolo dia Mukalenge ne dinanga dionso, kudienzaye ne bintu bikese bua bantu bakumbane bua kudienza mu kupita kua bidimu ne mu nsombelu mishilashilangane (Tangila tshikoso 14-16) *
14. Mmushindu kayi uvua Yezu muleje ne: uvua munange bayidi bende?
14 Yezu wakenza Didia dia dilolo ne bintu bikese bua bayidi bende bela manyi bamone mua kuikala badienza pabu, bileja muvuaye mubanange. Mu bungi bua matuku, bayidi bende bela manyi abu bavua ne bua kuvuluka lufu luende tshidimu tshionso, baluvuluka nunku mu nsombelu mishilashilangane, nansha mu maloko. (Buak. 2:10) Bavua bakumbana kutumikila Yezu anyi? Eyowa!
15-16. Mmunyi muvua bamue bana betu benze Didia dia dilolo dia Mukalenge mu nsombelu mikole?
15 Katshia anu mu bidimu lukama bia kumpala too ne lelu, bena Kristo mbadienzeje ne muabu muonso bua kuvuluka lufu lua Yezu. Mbenze tshionso tshivua tshikengela kuenza bua kulonda muvua Yezu muenze Didia dia dilolo dia Mukalenge, imue misangu bikale mu nsombelu mikole. Mona bilejilu bidi bilonda ebi. Pavua muanetu Harold King mu kazubu ka buloko mu Chine nkayende, wakadimona muenzejibue bua kukeba tshia kuenza. Wakalongolola bia kuenza nabi Tshivulukilu mu musokoko ne bintu bivuaye nabi. Uvua kabidi ulondesha bimpe bimpe muvua matuku aya bua kumanya dituku dikala Tshivulukilu. Pakakumbana dituku adi, yeye nkayende, anu mu kazubu ka buloko aku, wakimba musambu, kusambila, ne kuenza muyuki.
16 Tangila tshilejilu tshikuabu. Bana betu ba bakaji bavua mu buloko kampanda tshikondo tshia mvita mibidi ya buloba bujima bakateka muoyo wabu mu njiwu bua kuvuluka Didia dia dilolo dia Mukalenge. Kadi bu mutu didia edi kadiyi dilomba bintu bia bungi, bakapeta mushindu wa kudienza mu musokoko. Bakamba ne: “Tuakimana babumbakane pamue mu tshijengu, bateke kabasa ka kutekela makasa kabuikidija tshilamba tshitoke kavua ne diampa ne mvinyo bitekapu munkatshi muetu. Tuvua batemeshe buji mu kazubu amu bualu bu tuetu batemeshe nzembu bavua mua kutumona. . . . Tuakambulula mitshipu yetu ituvua benze ne muoyo mujima kudi Tatu wetu bua kubingisha dîna diende dia tshijila ne makanda etu onso.” Edi divua ditabuja dia dikema divuabu baleje! Bushuwa, Yezu uvua mutuleje dinanga dia dikema bua muvuaye muenze bua tuikale tuenza Tshivulukilu nansha mu nsombelu mikole!
17. Nnkonko kayi itudi mua kudiela?
17 Bu mudi Tshivulukilu tshienda tshisemena, mbimpe tudiele nkonko eyi: ‘Mmunyi mundi mua kutamba kuidikija Yezu mu tshilumbu tshia dilejangana dinanga? Ntu ntabalela majinga a bena Kristo nanyi bikole kupita muntu ntabalela anyi meme anyi? Ntu nkeba bua bena Kristo nanyi benze tshidibu kabayi mua kuenza anyi ntu mumanye bimpe mikalu yabu?’ Tuikalayiku tuidikija Yezu ne ‘tuditeka pa muaba wa bakuabu.’—1 Pet. 3:8.
LAMA MALONGESHA AA BIMPE MU LUNGENYI
18-19. (a) Ndituishibua kayi ditudi nadi? (b) Udi mudisuike bua kuenza tshinyi?
18 Mukenji wa kuenza Tshivulukilu tshia lufu lua Kristo kawakushala kabidi matuku a bungi to. ‘Palua’ Yezu mu dikenga dinene, neasangishe bashadile ba ku “basungula” bende mu diulu, dîba adi katuakutshienza kabidi to.—1 Kol. 11:26; Mat. 24:31.
19 Nansha mutuikala katuyi tuenza kabidi Tshivulukilu, tudi ne dituishibua dia ne: bantu ba Yehowa nebikale anu bavuluka ne disanka muvua didia edi dienza ne bintu bikese dileja didipuekesha, dikima, ne dinanga bitu muntu wa pa buloba nansha umue kayi muanji kuleja. Tshikondo atshi, bantu bavua benza didia edi nebambile bantu bonso bikala ne muoyo bualu buadi bua diakalenga diabu bonso. Kadi bua didia edi kutuambuluishadi ku mpindieu, tudi ne bua kudisuika bua kuidikija didipuekesha dia Yezu, dikima diende, ne dinanga diende. Tumanye ne: tuetu tuenza nanku, Yehowa neatufute.—2 Pet. 1:10, 11.
MUSAMBU WA 13 Kristo udi tshilejilu kutudi
^ tshik. 5 Mu matuku makese emu netubuele mu Didia dia dilolo dia Mukalenge bua kuvuluka lufu lua Yezu Kristo. Didia dienza ne bintu bikese edi didi ditulongesha malu a bungi adi atangila didipuekesha dia Yezu, dikima diende, ne dinanga diende. Mu tshiena-bualu etshi, netulonge mutudi mua kuleja petu ngikadilu yende ya mushinga eyi.
^ tshik. 2 DIUMVUIJA: Tshivulukilu tshidi tshiumvuija kuenza bualu kampanda bua pa buabu bua kuvuluka muntu anyi bualu kansanga bua mushinga ne kanemu konso.
^ tshik. 56 DIUMVUIJA DIA TSHIMFUANYI: Batendeledi ba Nzambi ba lulamatu benza Tshivulukilu mu bidimu lukama bia kumpala; ku ndekelu kua bidimu bia 1800; mu buloko bua bena Nazi; ne mu matuku a etu aa, mu Nzubu wa Bukalenge muenza anu ne musaka nkayawu mu Amerike wa ku sud, muaba utu luya.
