1. Ntshinyi tshivua muyuki uvuabu benze mu mpungilu wa mu 1935 muenzele nsongalume kampanda?

NSONGALUME mukuabu uvua ne bidimu 18 pakabatijibuaye mu 1926. Baledi bende bavua Balongi ba Bible, ke muvuabu babikila Bantemu ba Yehowa tshikondo atshi. Bavua babalele batanu kuabu, ba balume basatu, ba bakaji babidi. Baledi babu bavua babalongeshe bua kuenzela Yehowa mudimu ne kuidikija Yezu Kristo. Anu bu muvuabi bua Balongi ba Bible tshikondo atshi, nsongalume uvua ne lulamatu eu uvua pende udia diampa ne unua mvinyo tshidimu tshionso mu Didia dia dilolo dia Mukalenge. Kadi ditekemena divuaye nadi bua matuku atshilualua diakashintuluka pakatelejaye muyuki udi kawuyi kupua muoyo uvua ne tshiena-bualu tshia ne: “Musumba munene wa bantu.” Muanetu Rutherford ke uvua muenze muyuki au mu mpungilu uvua muenzeke mu Washington, mu États-Unis mu 1935. Mbualu kayi buvuabu babuluile Balongi ba Bible mu mpungilu au?

2. Mbulelela kayi bua dikema buvua muanetu Rutherford mumvuije mu muyuki wende?

² Mu muyuki au, Muanetu Rutherford uvua muleje bantu bavua ne bua kuikala bena mu “musumba munene” badibu bakuile mu Buakabuluibua 7:9. Tshikondo atshi Balongi ba Bible bavua bela meji ne: musumba munene wa bantu eu uvua wenza tshisumbu tshibidi tshia bantu baya mu diulu badi bobu ne lulamatu lukese. Muanetu Rutherford wakumvuija ne Mifundu ne: ki mbasungule bena mu musumba munene bua kuya mu diulu nansha, kadi bobu badi mikoko mikuabu ya Kristo * yapanduka ku “dikenga  dinene” bua kusomba pa buloba apa bua kashidi. (Buak. 7:14) Yezu wakalaya ne: “Ndi ne mikoko mikuabu idi kayiyi ya mu tshikumbi etshi; yoyi payi ndi ne bua kulua nayi munda, neyumvue dîyi dianyi, neyilue tshisumbu tshimue ne mulami umue.” (Yone 10:16) Bantu badi bu mikoko aba mBantemu ba Yehowa ba lulamatu badi ne ditekemena dia kusomba kashidi mu Mparadizu pa buloba. (Mat. 25:31-33, 46) Tumonayi muvua ngumvuilu mupiamupia wa bulelela eu mushintulule nsombelu wa bantu ba Yehowa ba bungi, kusangisha ne wa muanetu wa balume wa bidimu 18 au.​—Mis. 97:11; Nsu. 4:18.

3-4. Mu mpungilu wa mu 1935, ntshinyi tshiakajingulula bana betu ba bungi bua ditekemena diabu? Bua tshinyi?

³ Muanetu Rutherford wakebeja bateleji mu muyuki wende ne: “Bonso badi ne ditekemena dia kusomba kashidi pa buloba badiku mua kuimana kuulu anyi?” Tshivua tshikondo tshia dikema! Muanetu kampanda uvua mu mpungilu au wakamba ne: pa bantu bu 20 000 bavuamu, bantu bapite pa 10 000 bakimana kuulu. Pashishe ngamba-malu kuambaye ne: “Tangilayi! Musumba munene wa bantu!” Wamba anu nanku, bantu bonso kuelabu mbila ya disanka ne dîyi dikole. Bana betu bavua bimane abu kujingululabu ne: Nzambi kavua mubasungule bua kuya mu diulu to, bualu kavua mubele manyi a nyuma wende to. Dituku dia mpungilu diakalonda, bantu 840 bakabatijibua, kuluabu Bantemu ba Yehowa, ba bungi ba kudibu bavua ba mu mikoko mikuabu.

⁴ Panyima pa muyuki au, muanetu wa balume utuvua batele ku ntuadijilu ne bana betu bakuabu binunu ne binunu bakalekela kudia diampa ne kunua mvinyo mu Didia dia dilolo dia Mukalenge. Budipuekeshi buakasaka bana betu ba bungi bua kuamba anu bu muanetu wa balume mukuabu wakamba ne: “Diampa dimvua mudie ne mvinyo umvua munue mu Tshivulukilu tshia mu 1935 bivua bia ndekelu. Ngakajingulula ne: Yehowa kavua mumpeshe ditekemena dia kuya mu diulu ku diambuluisha dia nyuma wende to. Mvua ne ditekemena dia kusomba pa buloba ne dia kuambuluisha panyi mu mudimu wa divuija buloba mparadizu.” (Lomo 8:16, 17; 2 Kol. 1:21, 22) Katshia anu dîba adi, bena mu musumba munene mbavule bikole ne badi benza mudimu diapa ku diapa pamue ne bela manyi batshidi bashale pa buloba.

5. Mmunyi mudi Yehowa umona bantu badi balekele kudia diampa ne kunua mvinyo mu Tshivulukilu?

⁵ Mmunyi mutu Yehowa umona bantu badi balekele kudia diampa ne kunua mvinyo mu Tshivulukilu panyima pa 1935? Muanetu yeye udia diampa ne unua mvinyo mu Didia dia dilolo dia Mukalenge mutuishibue ne: Yehowa mmumusungule kadi ulua kujingulula pashishe ne: ki mbamuele manyi to, Yehowa udi umumona bishi? (1 Kol. 11:28) Bamue bavua badia diampa ne banua mvinyo bualu kabavua bumvue ditekemena diabu bimpe to. Kadi bobu bitaba ne muoyo mujima ne: badi benza tshia tshianana ne baleka kudia diampa ne kunua mvinyo eku batungunuka ne kuenzela Yehowa mudimu ne lulamatu, Yehowa neababale munkatshi mua mikoko mikuabu. Nansha mudi bena mu mikoko mikuabu kabayi badia diampa ne kabayi banua mvinyo, badi batungunuka ne kubuela mu Tshivulukilu bualu badi ne dianyisha dia bungi bua malu adi Yehowa ne Yezu babenzele.

6. Ndîyi kayi didi Yezu mutumine banjelu?

⁶ Bu mukadi dikenga dinene dilembelele, mbimpe tutangilule tshidi Buakabuluibua nshapita wa 7 wamba kabidi bua bena Kristo bela manyi ne bua musumba munene wa mikoko mikuabu. Yezu udi utumina banjelu dîyi bua bikale anu bakuate mpepele inayi ya kabutu. Bua kuyilekelelabu bua yitute pa buloba, anu padibu batua bela manyi bonso tshimanyinu, mmumue ne: banyishibua kashidi kudi Yehowa. (Buak. 7:1-4)  Nebafute bana babu ne Kristo bela manyi bua lulamatu luabu. Difutu adi ndiodi edi: badi balua bakalenge ne bakuidi mu diulu. (Buak. 20:6) Yehowa ne Yezu ne banjelu nebasanke bikole pamonabu bela manyi 144 000 bapeta difutu diabu mu diulu.

7. Anu mudi Buakabuluibua 7:9, 10 uleja, mbanganyi bavua Yone mumone mu tshikena kumona? Uvua mubamone benza tshinyi? (Tangila tshimfuanyi tshia pa tshizubu.)

⁷ Yone mumane kuakula bua bakalenge ne bakuidi 144 000 abu, udi umona bualu bukuabu bua dikema ebu: “musumba munene wa bantu” upanduka ku Armagedone. Etshi tshisumbu tshibidi tshia bantu ntshishilangane ne tshia kumpala bualu tshiotshi ntshinene bikole ne tshidi ne bantu bungi kabuyi kubala. (Bala Buakabuluibua 7:9, 10.) Bantu ba mu musumba munene ‘mbavuale mizabi mitoke,’ bileja ne: mbadilame ‘kabayi katoba’ ka malu a mu ndongoluelu wa Satana ne mbashale balamate Nzambi ne Kristo. (Yak. 1:27) Badi bela lubila ne dîyi dikole bamba mudibu bapanduke anu bua tshidi Yehowa ne Yezu Muana wa mukoko wa Nzambi benze. Bualu bukuabu, mbakuate malala a mabue ku bianza, bileja ne: badi bitaba Yezu ne disanka dionso bu mukalenge udi Yehowa muteke.​—Fuanyikija ne Yone 12:12, 13.

8. Buakabuluibua 7:11, 12 udi utuambila tshinyi bua bena mu dîku dijima dia Yehowa dia mu diulu?

⁸ Bala Buakabuluibua 7:11, 12. Tshidi tshienzeka mu diulu ntshinyi? Yone udi umona bena mu dîku dijima dia Yehowa dia mu diulu bikale ne disanka padibu bamona bena mu musumba munene batumbisha Nzambi. Bena mu dîku dia Yehowa aba nebasanke bikole pamonabu dikumbana dia bualu bua mu tshikena kumona ebu, mmumue ne: pamonabu bena mu musumba munene bafuma mu dikenga dinene ne muoyo.

9. Bilondeshile Buakabuluibua 7:13-15, bantu ba mu musumba munene badi benza tshinyi lelu?

⁹ Bala Buakabuluibua 7:13-15. Yone udi wamba ne: bantu ba mu musumba munene au “mbasukule mizabi yabu ne bayitokeshe mu mashi a Muana wa mukoko.” Abi bidi biumvuija ne: badi ne kondo ka muoyo kimpe, ne Yehowa udi ubanyisha. (Yesh. 1:18) Mbadilambule kudi Nzambi, babatijibue balue bena Kristo ne baleja mudibu ne ditabuja dikole mu mulambu wa Yezu ne bikale balunda ba Yehowa. (Yone 3:36; 1 Pet. 3:21) Nunku mbakumbane bua kuimana kumpala kua nkuasa wa butumbi wa Nzambi bua kumuenzela “mudimu wa tshijila munya ne butuku” mu lubanza lua pa buloba lua ntempelo wa mu nyuma. Nansha lelu, badi benza mudimu wa bungi wa kuyisha Bukalenge ne kuvuija bantu bayidi, bawenza ne tshisumi tshionso, baleja mudibu bateka malu a Bukalenge pa muaba wa kumpala.​—Mat. 6:33; 24:14; 28:19, 20.

10. Bena mu musumba munene mbashindike tshinyi? Mmulayi kayi wamonabu ukumbana?

¹⁰ Bena mu musumba munene badi bafuma mu dikenga dinene mbashindike ne: Nzambi neatungunuke ne kubatabalela, bualu “Yeye udi musombe mu nkuasa wa bukalenge neabalule ntenta wende pa mutu pabu.” Mulayi udi mikoko mikuabu mindile ne muoyo mujima eu newukumbane bushuwa: “[Nzambi] neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi.”​—Buak. 21:3, 4.

11-12. a) Anu mudi Buakabuluibua 7:16, 17 uleja, musumba munene wa bantu neupete masanka kayi? b) Ntshinyi tshidi mikoko mikuabu mua kuenza ne Tshivulukilu? Bua tshinyi?

¹¹ Bala Buakabuluibua 7:16, 17. Patudi tuakula apa, bamue bantu ba Yehowa badi bakenga ne nzala bua ntatu ya malu a mpetu anyi bua ndululu ne mvita bidi bitua bipela miaba idibu basombele. Mbele bakuabu mu maloko bua ditabuja diabu. Kadi bantu bikala mu musumba munene badi ne disanka dia kumanya ne: papandukabu ku kabutu ka ndongoluelu mubi wa malu eu, nebikale ne biakudia bia ku mubidi ne  bia mu nyuma bungi tshianana. Pabutuka ndongoluelu mubi wa Satana eu, Yehowa neenze bua musumba munene wa bantu ukubibue ku “luya lukole” lua tshiji tshiende tshiapumuinaye bisamba. Pajika dikenga dinene, Yezu nealombole bantu bapanduka pa buloba ku “mâyi a muoyo wa [tshiendelele].” Anji elabi meji: bantu ba mu musumba munene badi ne ditekemena dia pa buadi. Mu bantu bungi kabuyi kubala bakadi basombe pa buloba apa, bobu kabakulabula lufu pamuapa to!​—Yone 11:26.

¹² Mikoko mikuabu idi ne ditekemena dilenga dia dikema didi dibasaka bua kuleja Yehowa ne Yezu dianyisha! Nzambi ki mmubasungule bua kuya mu diulu to, nansha nanku Yehowa udi ubatua mushinga wa muomumue ne udiye utua bela manyi. Bena mu bisumbu bionso bibidi ebi badi mua kutumbisha Nzambi ne Kristo. Dibuela diabu mu Didia dia dilolo dia Mukalenge ke umue mushindu udibu benza nanku.

13-14. Bua tshinyi bela manyi batshidi pa buloba ne bena mu mikoko mikuabu badi babuela mu Tshivulukilu?

¹³ Bidimu bidi panshi ebi, mu bantu 1 000 batudi mua kuteka ne: mbabuele mu Tshivulukilu, kudi mua kumueneka anu muntu umue udi udia diampa ne unua mvinyo. Mu bisumbu bia bungi kamuena muntu udi udia diampa ne unua mvinyo mu Tshivulukilu to. Bualu ebu budi buleja ne: bantu ba bungi badi babuela mu Tshivulukilu badi ne ditekemena dia kusomba pa buloba. Kadi bua tshinyi badi babuela mu Tshivulukilu? Bua bualu bua muomumue butu busaka bantu bua kubuela mu difesto dia dibaka dia mulunda wabu. Mbasue kuleja mudibu banange mulume ne mukaji badi baselangana ne mbasue kubatua mpanda. Nunku bena mu mikoko mikuabu badi babuela mu Tshivulukilu bualu mbasue kuleja mudibu banange Kristo ne bela manyi ne babatua mpanda ne kuleja kabidi mudibu ne dianyisha bua mulambu wa Yezu udi wenza bua bapete mushindu wa kusomba kashidi pa buloba.

¹⁴ Bualu bukuabu bua mushinga budi bubasaka bua kubuela mu Tshivulukilu budi ne: mbasue kutumikila dîyi didi Yezu mubatumine. Pavua Yezu muenze didia dia pa buadi adi ne bapostolo bende ba lulamatu, wakabambila ne: “Tungunukayi ne kuenza nunku bua kumvuluka.” (1 Kol. 11:23-26) Ke bualu kayi badi batungunuka ne kubuela mu Didia dia dilolo dia Mukalenge bidimu bionso bitshidi bamue bela manyi ne muoyo pa buloba apa. Kabidi, bena mu mikoko mikuabu batu babikila muntu yonso bua alue kubuela nabu mu Tshivulukilu.

15. Patudi mu Tshivulukilu, ntshinyi tshidi yonso wa kutudi mua kuenza bua kutumbisha Nzambi ne Kristo?

 ¹⁵ Patudi mu Tshivulukilu, tutu tuimba misambu ne tusambila pamue bua kutumbisha Nzambi ne Kristo. Tshiena-bualu tshia muyuki wa Tshivulukilu tshia tshidimu etshi ntshiotshi etshi: “Leja muudi ne dianyisha bua tshidi Nzambi ne Yezu bakuenzele!” Muyuki eu neuvudije dianyisha diudi nadi kudi Yehowa ne kudi Kristo. Padibu benda bapitshisha diampa ne mvinyo, bateleji nebikale benda bavuluka tshidibi bileja, mmumue ne: mubidi wa Yezu ne mashi ende. Netuvuluke kabidi ne: Yehowa wakalekela bua Muanende atufuile bua tupete muoyo. (Mat. 20:28) Muntu yonso udi munange Tatu wetu wa mu diulu ne Muanende neabuele mu Tshivulukilu.

16. Mmu ngumvuilu kayi mudi bela manyi ne bena mu mikoko mikuabu bikale muomumue?

¹⁶ Tshidi tshienza bua bela manyi bikale bashilangane ne mikoko mikuabu ki mmushinga udibu nawu ku mêsu kua Nzambi to. Bobu bonso badi ne mushinga wa muomumue kudiye, bualu uvua mubasumbe bonso ku mushinga wa muomumue, mmumue ne: mufile muoyo wa Muanende munanga. Mbashilangane anu ku ne: bela manyi badi ne ditekemena dia kuya mu diulu kadi mikoko mikuabu yoyi idi ne ditekemena dia kusomba pa buloba. Kadi buonso buabu badi ne bua kushala ne lulamatu kudi Nzambi ne kudi Kristo. (Mis. 31:23) Manya kabidi ne: nyuma wa Nzambi udi mua kuenza mudimu ne bukole bua muomumue abu kutudi tuetu bonso. Bidi biumvuija ne: Yehowa udi upesha muntu yonso nyuma wende bilondeshile tshidi muntu au natshi dijinga, nansha yeye muela manyi anyi wa mu mikoko mikuabu.

17. Ntshinyi tshidi bela manyi batshidi pa buloba bindile ne muoyo kuulu kuulu?

¹⁷ Bena Kristo bela manyi kabavua baledibue ne ditekemena dia kuya mu diulu to. Nzambi ke udi ubabuejadi mu mioyo yabu. Meji abu atu ku ditekemena adi, basambila bua bualu buadi, ne batu ne muoyo kuulu kuulu bua kupeta difutu diabu mu diulu. Kabena nansha mua kudifuanyikijila muikala mubidi wabu wa mu nyuma to. (Filip. 3:20, 21; 1 Yone 3:2) Nansha nanku, mbindile ne muoyo kuulu kuulu bua kutuilangana ne Yehowa ne Yezu ne banjelu ne bela manyi bakadi babadianjidile. Badi bazuka bua kusombabu nabu mu Bukalenge bua mu diulu.

18. Mmalu kayi adi mikoko mikuabu mindile ne muoyo kuulu kuulu?

¹⁸ Bena mu mikoko mikuabu mbanange ditekemena ditu bantu bonso nadi dia kusomba pa buloba badinange ne muoyo umue. (Muam. 3:11) Mbindile ne muoyo kuulu kuulu dituku dikalabu mua kuambuluisha mu mudimu wa dikudimuna buloba bujima mparadizu. Mbindile kabidi ne  muoyo kuulu kuulu dituku dikalabu mua kuibaka nzubu yabu, kukuna bia pa madimi, ne kukolesha bana kabayi basama. (Yesh. 65:21-23) Badi bazuka bua kuendakana miaba ya bungi pa buloba apa bua kumona mikuna, mêtu, ne mbuu, ne kulonga bintu bionso bivua Yehowa mufuke. Kadi badi nangananga ne disanka dia kumanya ne: bulunda buabu ne Yehowa nebutungunuke anu ne kushema.

19. Mpunga kayi utu Tshivulukilu tshipetesha yonso wa kutudi? Netutshienze dituku kayi tshidimu etshi?

¹⁹ Yehowa mmupeshe mutendeledi wende yonso udi mudilambule kudiye ditekemena dia dikema bua matuku atshilualua. (Yel. 29:11) Tshivulukilu tshia lufu lua Kristo tshidi tshipetesha yonso wa kutudi mpunga munene wa kutumbisha Nzambi ne Kristo bua tshidibu batuenzele bua tumone mua kupeta muoyo udi kawuyi ne ndekelu. Kakuyi mpata, Tshivulukilu ke mpunga wa mushinga mukole menemene utu nende bena Kristo balelela bua kudisangisha. Netutshienze panyima pa dibuela dia dîba mu Disambombo dia 27/3/2021. Tshidimu etshi bantu ba bungi mbasombele miaba idibu ne budikadidi bua kubuela mu tshisangilu tshia mushinga etshi. Bamue nebabuelamu nansha mudibu babaluisha. Bakuabu nebenzele Tshivulukilu etshi mu maloko. Bana betu, tudi tujingila tshisumbu tshionso, kasumbu konso, nansha muntu udi pa nkayende Tshivulukilu tshilenga. Panuikala nuenda nutshienza, mêsu a Yehowa, a Yezu, a banjelu, ne a bela manyi bakadi babishibue, neikale kunudi!