MU YELUSHALEMA wa lelu mudi nzubu kampanda wa dilamina bintu bia kale bia mu maloba adibu bakuile mu Bible. Mu nzubu amu mudi dibue kampanda didi ne mifundu ivuabu bafundapu pankatshi pa bidimu 700 ne 600 kumpala kua Kristo. Dibue adi divua diangula mu nyongolo kampanda uvuabu bajiikilangana uvua pabuipi ne Hebelone mu Isalele. Bavua bafundapu ne: “Hagaf muana wa Hagav edibue mulawu kudi Yahweh Sabaote.” Mmunyi mudi mifundu ayi ijadika tshidi Bible wamba? Idi ileja ne: dîna ditu nadi Nzambi, dia Yehowa, divuabu bafunda mu maleta a tshiena Ebelu tshia kale aa: YHWH divua dimanyike bimpe, ne bantu bavua baditela matuku onso bikondo bia kale abi. Mu nyongolo ivuabu bajiikilangana ayi, mudi kabidi mifundu mikuabu idibu bafundamu, ileja ne: bantu bavua ne tshibidilu tshia kupetelangana mu nyongolo ayi anyi baya kusokomamu bavua batamba kufunda dîna dia Nzambi, bafunda kabidi ne mêna a bantu ku bimanu biayi, ne mu mêna a bantu amu muvua maleta a dîna dia Nzambi.

Mulongeshi wa tshikunda wa mu tulasa tua bifulu bia mabue a masanga tua mu Géorgie diende Rachel Nabulsi udi wakula pende bua mifundu ayi wamba ne: “Bu mudibu bafunde dîna dia YHWH mu mifundu ayi misangu ya bungi, bualu ebu budi ne mushinga wa bungi. . . . Malu avuabu bafunde ne mifundu eyi bidi bileja ne: dîna dia YHWH divua ne mushinga wa bungi kudi bena Isalele ne bena Yuda.” Bualu ebu budi bujadika tshidi Bible wamba, bualu mbafundamu dîna dia Nzambi mu maleta a tshiena Ebelu YHWH misangu binunu ne binunu. Mêna a bantu ba bungi avua ne maleta a dîna dia Nzambi.

Miaku ivuabu bafunde pa dibue ya ne: “Yahweh Sabaote” idi yumvuija ne: “Yehowa wa biluilu.” Bualu ebu budi busua kuleja ne: mu bikondo bivuabu bafunda Bible, bantu kabavua ne tshibidilu tshia kutela anu dîna dia Nzambi to, bavua batela kabidi tshiambilu tshia ne: “Yehowa wa biluilu.” Bualu ebu budi bujadika kabidi tshidi Bible wamba, bualu mu Bible mudi tshiambilu tshia “Yehowa wa biluilu” misangu 283 mu mifundu ya tshiena Ebelu, nangananga mu Yeshaya, mu Yelemiya, ne mu Zekâya.