1. Dîku dia ba Yakobo divua dîku dia mushindu kayi?

YAKOBO muanabu ne Yezu uvua mukolele mu dîku dia bantu bavua balamate Yehowa bikole. * Yozefe ne Mariya baledi bende bavua banange Yehowa bikole, ne benza muabu muonso bua kumuenzela mudimu. Yakobo uvua kabidi ne diakalenga dikuabu, tutuende uvua ne bua kulua Masiya uvuabu balaye. Yakobo uvua ne diakalenga dia pa buadi dia kuikala mu dîku adi!

2. Mmalu kayi avua mua kufikisha Yakobo ku dinanga tutuende?

² Kuvua malu a bungi avua mua kufikisha Yakobo ku dinanga tutuende. (Mat. 13:55) Tshilejilu patshivua Yezu ne bidimu 12 patupu, ukavua mumanye Mifundu bimpe menemene. Bualu abu buvua bukemesha balongeshi ba mu Yelushalema bikole. (Luka 2:46, 47) Yakobo uvua mua kuikala muenze mudimu wa mabaya pamue ne Yezu. Pikalabi bivua nanku, mmumue ne: uvua mufike ku dimanya tutuende au bimpe menemene. Misangu ya bungi Nathan Knorr uvua wamba ne: “Paudi wenza mudimu ne muntu udi umanya malu ende a bungi.” * Yakobo uvua pende mua kuikala mumone muvua “Yezu [utungunuka] ne kukola mu meji ne mu mubidi ne mu dianyishibua kudi Nzambi ne kudi bantu.” (Luka 2:52) Nunku tudi mua kudiambila ne: Yakobo uvua mua kuikala munkatshi mua bantu ba kumpala bavua balue bayidi ba Yezu. Kadi kabivua bienzeke nanku to.

3. Mmalu kayi avua Yakobo muenze tshikondo tshivua Yezu wenza mudimu wende wa diyisha pa buloba?

 ³ Yakobo kavua mulue muyidi wa Yezu tshikondo tshivua Yezu wenza mudimu wende wa diyisha pa buloba to. (Yone 7:3-5) Uvua mua kuikala pende munkatshi mua balela ba Yezu bavua bela meji ne: “Mmujimije lungenyi.” (Mâko 3:21) Kabidi kakuena tshidi tshileja ne: pavuabu bapopele Yezu ku mutshi wa makenga, Yakobo uvua pende muaba au ne Mariya mamuabu to.​—Yone 19:25-27.

4. Mmalu kayi atuamona?

⁴ Panyima pa bidimu, Yakobo wakalua kuitabuja Yezu ne kuluaye mukulu uvuabu banemeka mu tshisumbu tshia bena Kristo. Mu tshiena-bualu etshi netumone malu abidi adi tshilejilu tshia Yakobo mua kutulongesha. Netumone 1) bua tshinyi tudi ne bua kuikala tudipuekesha ne 2) tshitudi mua kuenza bua kulua balongeshi bimpe.

5. Ntshinyi tshiakenza Yakobo pavua Yezu mumumuenekele panyima pa yeye mumane kujuka ku lufu?

⁵ Ndîba kayi divua Yakobo mulue muyidi wa Yezu wa lulamatu? Yezu mumane kujuka ku lufu, ‘wakamuenekela Yakobo, pashishe bapostolo bonso.’ (1 Kol. 15:1-7) Yakobo wakalua muyidi wa Yezu panyima pa dituilangana diabu adi. Pavua bapostolo mu nzubu wa kuulu ku Yelushalema basombe bindile bua kupeta nyuma muimpe Yakobo uvua pende muaba au. (Bien. 1:13, 14) Panyima pa matuku, Yakobo wakalua kupeta diakalenga dia kuikala wa mu kasumbu kaludiki ka mu bidimu lukama bia kumpala. (Bien. 15:6, 13-22; Gal. 2:9) Tshikondo kampanda kumpala kua tshidimu tshia 62 P.Y., nyuma muimpe wakasaka Yakobo bua kufundila bena Kristo bela manyi mukanda. Mukanda au udi ne malu adi atuambuluisha petu lelu eu, nansha tuetu ne ditekemena dia kupeta muoyo wa tshiendelele mu diulu anyi pa buloba. (Yak. 1:1) Josèphe mumanyi wa malu a kale muena Yuda wakafunda ne: Anania muakuidi munene wa bena Yuda ke wakatuma dîyi bua bashipe Yakobo. Yakobo wakashala anu mulamate Yehowa too ne pakafuaye.

6. Mmushindu kayi uvua Yakobo mushilangane ne bamfumu ba bitendelelu ba mu tshikondo tshiabu?

⁶ Yakobo uvua ne budipuekeshi. Bua tshinyi tudi tuamba nanku? Mona dishilangana divua pankatshi pa tshivua Yakobo mulue kuenza ndekelu wa bionso bua bualu bua Yezu ne tshivua bamfumu ba bitendelelu ba bungi benze bobu. Pavuaye mupete bijadiki bivua bileja patoke ne: Yezu mMuana wa Nzambi, wakadipuekesha kuitabaye bualu abu. Kadi ki ntshivua bamfumu ba bakuidi ba mu Yelushalema benze bobu to. Tshilejilu, kakuvua mushindu  wa bobu kubenga ne: Yezu uvua mujule Lazalo ku lufu to. Pamutu pa kuitababu ne: Yezu uvua mutumibue wa Yehowa, bakakeba bobu ne meji onso mushindu wa kushipa Yezu ne Lazalo. (Yone 11:53; 12:9-11) Pakalua Yezu muine kubishibua ku lufu, bakumvuangana bua kusokoka bantu bualu abu. (Mat. 28:11-15) Bamfumu ba bitendelelu abu bakabenga kuitabuja Masiya bualu bavua ne lutambishi.

7. Bua tshinyi bidi bikengela tuepuke lutambishi?

⁷ Dilongesha: Tuepukayi lutambishi ne tuikalayi badiakaje bua Yehowa atulongeshe. Anu mudi disama mua kupapisha mijilu ya muoyo wa muntu biupangisha mua kuendawu bimpe, lutambishi ludi palu mua kupapisha muoyo wetu wa mu tshimfuanyi lutupangisha mua kutumikila Yehowa. Bafalese bakalekela mioyo yabu ipapa, biobi kubafikisha ku dibenga kuitaba bijadiki bivua bileja patoke ne: Yezu uvua ne nyuma wa Nzambi ne kabidi uvua Muanende. (Yone 12:37-40) Lutambishi luabu alu luvua lubateka mu njiwu bualu bivua bibapangisha bua kupeta muoyo wa tshiendelele. (Mat. 23:13, 33) Kulekela dîyi dia Nzambi ne nyuma wende bishintulula bumuntu buetu ne bitulombola mu diangata dia mapangadika kudi ne mushinga wa bungi. (Yak. 3:17) Yakobo wakalekela bua Yehowa amulongeshe bualu uvua ne budipuekeshi. Anu mutualua kubimona, budipuekeshi buende abu buakenza bua alue mulongeshi muimpe.

8. Ntshinyi tshiatuambuluisha bua kulua balongeshi bimpe?

⁸ Yakobo kavua mulonge tulasa tua bungi to. Bidi bimueneka ne: bamfumu ba bitendelelu ba mu tshikondo tshiabu bavua bela meji ne: ‘kavua mulonge to, ne uvua muntu tshianana’ anu muvuabu bangata mupostolo Petelo ne Yone. (Bien. 4:13) Kadi patudi tubala mukanda wa mu Bible udibu binyike dîna diende tudi tumona ne: Yakobo uvua mulonge mua kuikala mulongeshi muimpe. Tudi petu mua kuikala katuyi balonge tulasa tua bungi anu bu Yakobo. Nansha nanku, tudi mua kulua balongeshi bimpe nyuma wa Yehowa yeye utuambuluisha ne bulongolodi buende bobu butulongesha. Tukonkononayi mpindieu tshilejilu tshivua Yakobo mushiye yeye uvua mulongeshi ne tshiditshi mua kutulongesha.

9. Umvuija mushindu uvua Yakobo ulongesha.

 ⁹ Yakobo kavua ulongesha ne miaku mikole anyi mu mushindu mukodiakane to. Kuenza nanku kuvua kuambuluisha bavua bamuteleja bua kumanya tshia kuenza ne mushindu wa kutshienza. Tuangatabi tshilejilu tshia mushindu mupepele uvuaye mulongeshe ne: mbimpe muena Kristo anyishe bua kukenga bua buakane kayi ulaminangana munda to. Wakafunda ne: “Tudi tuangata bantu badi bananukile bu bena diakalenga. Nudi bumvue lumu lua dinanukila dia Yobo ne bamone muvua Yehowa mumuenzele malu ku ndekelu, ne bamone mudi Yehowa muikale ne dinanga dikole menemene ne luse.” (Yak. 5:11) Mona ne: Yakobo uvua wangatshila malu avuaye ulongesha mu Mifundu. Uvua ulongesha ne Dîyi dia Nzambi bua kuambuluisha bavua bamuteleja bua bamanye ne: misangu yonso Yehowa utu ufuta bantu badi bamulamate anu bu muvua Yobo. Yakobo uvua mulongeshe bualu ebu mu mêyi mapepele ne majalame. Pavuaye ulongesha nanku, uvua utuma ntema ya bantu kudi Yehowa, kayi uyikoka kudiye to.

10. Mmushindu kayi utudi mua kuidikija Yakobo patudi tulongesha?

¹⁰ Dilongesha: Tuikalayi tulongesha ne miaku mipepele, tuangatshila malu mu Dîyi dia Nzambi. Katuikadi ne tshipatshila tshia kuleja bakuabu mutudi bamanye bia bungi to, kadi tuikale ne tshipatshila tshia kubaleja mudi Yehowa mumanye malu a bungi ne mudiye uditatshisha bikole bua bualu buabu. (Lomo 11:33) Netufike ku tshipatshila atshi tuetu tuangatshila malu atudi tulongesha mu Mifundu misangu yonso. Tshilejilu, pamutu pa kuambila mulongi wa Bible tshiuvua wewe mua kuenza bu wewe muikale yeye, muambuluisha bua kuelangana meji a bilejilu bidibu bakuile mu Bible ne bua kujingulula mushindu utu Yehowa wela meji ne umona malu. Tuetu tuenza nanku nebibasake bua kuenza malu bua kusankisha Yehowa, ki mbua kutusankisha tuetu to.

11. Nntatu kayi ivua bena Kristo nayi mu tshikondo tshia Yakobo? Mmubelu kayi wakabapeshaye? (Yakobo 5:13-15)

¹¹ Yakobo uvua wangata malu muvuawu. Patudi tubala malu a mu mukanda uvua Yakobo mufunde, bidi bimueneka ne: uvua mumanye ntatu ivua nayi bena Kristo nende, kubapeshaye mibelu mimpe ya mua kupitabu nayi. Tshilejilu, bamue bena Kristo bavua ne lujoko lua kutumikila mibelu. (Yak. 1:22) Bakuabu bavua banemeka babanji kupita bapele. (Yak. 2:1-3) Banga pabu kabavua bakokesha bua kukanda ludimi luabu to. (Yak. 3:8-10) Bena Kristo abu bavua ne lutatu lukole, kadi Yakobo uvua mutekemene anu ne: bavua mua kushintuluka. Uvua ufila mibelu ayi ne dîyi dimpe kayi udia tshibanga to, ukankamija bavua dijinga ne diambuluisha bua balombe bakulu babambuluishe bua kuakaja malu.​—Bala Yakobo 5:13-15.

12. Mmunyi mutudi mua kutungunuka ne kumona malu mu mushindu muimpe patudi tuambuluisha balongi betu ba Bible?

¹² Dilongesha: Tuikalayi tuangata malu mudiwu, kadi tumona bakuabu mu mushindu muimpe. Bantu ba bungi batudi tulongesha Bible badi mua kuikala ne lutatu lua kutumikila mibelu idimu. (Yak. 4:1-4) Bidi mua kubangata matuku bua kulekela bikadilu bibi ne kulonga mua kuikala ne ngikadilu ya buena Kristo. Anu bu Yakobo, bidi bikengela tubambile ne dikima malu adibu ne bua kuakaja. Bidi bikengela kabidi tutungunuke ne kumona malu mu mushindu muimpe, batekemene ne: Yehowa neakoke bena bupuekele kudiye, ubapesha bukole bua kushintulula malu.​—Yak. 4:10.

13. Anu mudibu baleje mu Yakobo 3:2 ne mu dimanyisha dia kuinshi kua dibeji, mbualu kayi buvua Yakobo mumanye?

¹³ Yakobo kavua udiangata ne mushinga mupitshidile to. Yakobo kavua umona ne: yeye uvua muntu wa pa buende anyi ne: uvua mupite bena Kristo nende bua muvuaye muanabu ne Yezu anyi bua mudimu munene uvuabu bamupeshe  to. Uvua ubikila bena Kristo nende bakuabu ne: “Bana betu bananga.” (Yak. 1:16, 19; 2:5) Kavua usaka bakuabu ku diela meji ne: yeye uvua mupuangane to. Pamutu pa nanku, wakadibueja yeye muine mu bualu buvuaye muambe bua ne: “tuetu bonso tutu tuenza bilema misangu ya bungi.”​—Bala Yakobo 3:2 ne dimanyisha dia kuinshi kua dibeji.

14. Bua tshinyi tudi ne bua kuikala tuleja ne: tutu petu tuenza bilema?

¹⁴ Dilongesha: Tuvulukayi ne tuetu bonso tutu tuenza bilema. Katuikadi tuela meji ne: tudi bapite bantu batudi tulongesha mu mushindu kampanda to. Bualu tuetu tuenza malu adi mua kufikisha mulongi ku diela meji ne: tuetu katutu tuenza bilema, udi mua kumona ne: yeye kakukokesha bua kutumikila mikenji ya Nzambi nansha kakese. Kadi tuetu tuambila mulongi wetu katuyi tudia tshibanga ne: bitu pamuapa bitukolela petu bua kutumikila mêyi manene a mu Bible, tumumvuija mushindu udi Yehowa mutuambuluishe bua kuakaja malu mu nsombelu wetu, netumuambuluishe bua kumonaye ne: udi pende mua kuenzela Yehowa mudimu.

15. Bilejilu bivua Yakobo mufile bidi mushindu kayi? (Yakobo 3:2-6, 10-12)

¹⁵ Yakobo uvua ufila bilejilu bivua bilenga mioyo ya bantu. Nyuma muimpe uvua umulombola, ne pamuapa uvua kabidi mua kuikala mulongele malu a bungi a mua kuikala mulongeshi muimpe ku bilejilu bivua tutuende Yezu ufila. Bilejilu bivua Yakobo mufile mu mukanda uvuaye mufunde mbipepele bua kumvua.​—Bala Yakobo 3:2-6, 10-12.

16. Bua tshinyi mbimpe tuikale tufila bilejilu bidi biakanyine?

¹⁶ Dilongesha: Tuikalayi tufila bilejilu bidi biakanyine menemene. Patudi tufila bilejilu bidi biakanyine tudi tuambuluisha bantu bua kudifuanyikijila malu atudi tubalongesha mu lungenyi. Malu adibu badifuanyikijila au adi abambuluisha bua kuvuluka malongesha manene a mu Bible. Yezu uvua mufidi munene wa bilejilu biakanyine, nunku muanabu Yakobo wakalonda dikasa diende. Tukonkononayi mpindieu tshilejilu kampanda tshivua Yakobo mufile, tumone bua tshinyi ntshiakanyine menemene.

17. Bua tshinyi tshilejilu tshidi mu Yakobo 1:22-25 ntshiakanyine?

¹⁷ Bala Yakobo 1:22-25. Kudi malu a bungi adi avuija tshilejilu tshia lumuenu tshivua Yakobo mufile etshi tshiakanyine. Uvua ujinga kulongesha bualu busunguluke bua ne: bua Dîyi dia Nzambi kutuambuluishadi kabiena bikengela  anu tudibale patupu to, bidi bikengela kutumikila kabidi tshididi diamba. Yakobo uvua musungule tshilejilu tshivua bantu bavua bamuteleja bamanye bimpe, tshia muntu uditangila mu lumuenu. Uvua ujinga kulongesha tshinyi? Padi muntu uditangila mu lumuenu umona kantu kadiye mua kuakaja kadi kayi wakaja to ndipanga dia lungenyi. Bia muomumue kabidi, patudi tubala Dîyi dia Nzambi tumonamu bualu butudi mua kuakaja mu nsombelu wetu kadi katuyi tubuakaja to ndipanga dia lungenyi.

18. Mmalu kayi asatu atudi ne bua kuenza patudi tufila bilejilu?

¹⁸ Udi mua kuenza malu asatu aa bua kuidikija Yakobo paudi ufila bilejilu: 1) Ikala mujadike ne: tshilejilu tshiudi ufila tshidi tshipetengana ne bualu buudi wakuila. 2) Fila tshilejilu tshidi bantu mua kumvua bipepele. 3) Patula dilongesha didi mu tshilejilu atshi patoke. Wewe ne lutatu lua mua kupeta bilejilu biakanyine, udi mua kutangila mu Index des publications de Témoins de Jéhovah. Neupetamu bilejilu bia bungi bidi mua kukuambuluisha mu ka tshiena-bualu ka “Illustrations.” Kadi uvuluke ne: bilejilu bidi anu bu mutu mikro, mmumue ne: bidi mua kuambuluisha bua bantu bumvue malu audi ulongesha bimpe. Nanku mbimpe wikale ufila bilejilu anu bua kumvuija ngenyi minene. Bushuwa bualu bunene butu butusaka bua kulengeja ndongeshilu wetu ki mbua kukoka ntema ya bantu kutudi to, kadi mbua kuambuluisha bantu ba bungi menemene bua kubuelabu pabu mu dîku dia Yehowa dia disanka.

19. Ntshinyi tshitudi mua kuenza bua kuleja mutudi banange bana betu ba balume ne ba bakaji?

¹⁹ Tuetu katuena bapete diakalenge dia kuikala ne tutu mu dîku udi mupuangane to, kadi tudi bapete diakalenga dia kuenzela Yehowa mudimu pamue ne bana betu ba balume ne ba bakaji mu dîku dinene dia bena Kristo. Tudi tuleja mutudi babanange patudi tusomba nabu, tumanyina malu makuabu kudibu, ne tuenza nabu mudimu wa diyisha ne dilongesha tshianza mu tshikuabu ne lulamatu. Tuetu tudienzeja bua kuidikija Yakobo mu ngikadilu yetu, mu bienzedi bietu, ne mu ndongeshilu wetu netuambike Yehowa bunême ne netuambuluishe bantu badi bakaje mioyo yabu bua kusemena pabuipi ne Tatu wetu wa mu diulu udi mutunange.