1-2. a) Ntshikondo kayi tshitu bamue bavuluka bantu bakadibu bafuishe? b) Ntshinyi tshivua Yezu mubanjije butuku bua muladilu wa lufu luende?

TUTU anu tuvuluka bantu batukadi bafuishe nansha bobu bafue kukadi bidimu bia bungi. Bamue batu bavuluka bantu bavuabu bafuishe patu matuku a ngondo a dituku divuabu bafue akumbana.

² Tshidimu tshionso etshi tuetu ne bantu bakuabu ba bungi tutu tudisangisha pa buloba bujima bua kuvuluka lufu lua Yezu Kristo, muntu utudi banange bikole. (1 Pet. 1:8) Tutu tutuilangana nanku bua kuvuluka muntu eu wakafila muoyo wende bua kutupikula ku mpekatu ne ku lufu. (Mat. 20:28) Yezu uvua musue bua bayidi bende bikale bavuluka lufu luende. Butuku bua muladilu wa lufu luende, wakabanjija didia dia dilolo dia pa buadi ne kutumaye dîyi ne: “Tungunukayi ne kuenza nunku bua kumvuluka.”​—Luka 22:19.

3. Ntshinyi tshituamona mu tshiena-bualu etshi?

³ Mu bonso batu babuela mu tshivulukilu tshia lufu lua Yezu anu bantu bakese ke badi ne ditekemena dia kuya mu diulu. Kadi ba bungi batu babuelamu badi bobu ne ditekemena dia kusomba pa buloba. Mu tshiena-bualu etshi netumone malu atu asaka bisumbu bionso bibidi bia bantu aba bua kuikala kubuela mu Tshivulukilu tshidimu tshionso ne disanka. Netumone kabidi mudi dibuela mu tshivulukilu dituambuluisha. Tutuadijayi ne tshitu tshisaka bela manyi bua kubuela mu tshivulukilu.

4. Bua tshinyi bela manyi batu badia diampa ne banua mvinyo mu Tshivulukilu?

⁴ Bela manyi batu babuela mu Tshivulukilu tshidimu tshionso batu badia diampa ne banua mvinyo. Bua tshinyi mbibakumbanyine  anu bobu bua kuikalabu badia diampa ne banua mvinyo? Bua kupeta diandamuna, tukonkononayi tshivua tshienzeke butuku bua ndekelu buvua Yezu mupitshishe pa buloba. Yezu wakabanjija tshivuabu balue kubikila ne: Didia dia dilolo dia Mukalenge pavuabu bajikije kudia Pasaka. Wakapesha bapostolo bende ba lulamatu 11 diampa ne mvinyo, kubambilaye bua badie diampa adi ne banue mvinyo au. Yezu wakabambila bualu bua bipungidi bibidi: tshipungidi tshipiatshipia ne tshipungidi tshia Bukalenge. * (Luka 22:19, 20, 28-30) Bipungidi abi biakapetesha bapostolo abu ne bantu bakuabu ndambu mushindu wa kuluabu bakalenge ne bakuidi mu diulu. (Buak. 5:10; 14:1) Anu bashadile bela manyi * badi bipungidi bibidi ebi bitangila ke badi mua kudia diampa ne kunua mvinyo mu Tshivulukilu.

5. Ntshinyi tshidi bela manyi bamanye bua ditekemena didibu nadi?

⁵ Bualu bukuabu butu bela manyi bazukila bua kubuela mu Tshivulukilu mbua ne: bitu bibapetesha mpunga wa kuela meji a ditekemena didibu nadi. Yehowa mmubapeshe ditekemena dia dikema! Ditekemena dia kuya mu diulu, dia kubenga kufua ne kubenga kubola, dia kukokesha pamue ne Yezu Kristo ukadibu babishe ku lufu ne bashadile ba ku bantu 144 000. Pa kumbusha bionso abi, nebikale kabidi ne diakalenga dia pa buadi dia kumona Yehowa ne abu abidi. (1 Kol. 15:51-53; 1 Yone 3:2) Bela manyi mbamanye ne: mbabasungule bua kupeta diakalenga adi mu diulu. Kadi bidi bikengela ne: bashale anu ne lulamatu too ne ku lufu bua kubanyishilabu bua kuya mu diulu. (2 Tim. 4:7, 8) Bitu bibenza disanka dia bungi patubu bela meji a ditekemena didibu nadi dia kuya mu diulu edi. (Tito 2:13) Kadi netuambe tshinyi bua bena mu “mikoko mikuabu”? (Yone 10:16) Mmalu kayi atu abasaka bua kubuela mu tshivulukilu?

6. Bua tshinyi bena mu mikoko mikuabu batu babuela mu Tshivulukilu tshidimu tshionso?

⁶ Bena mu mikoko mikuabu batu babuela pabu mu Tshivulukilu, kadi kabatu badia diampa anyi banua mvinyo to. Nansha nanku batu ne disanka dia kubuelamu. Mu 1938 ke muakabikilabu bantu badi ne ditekemena dia kusomba pa buloba bua kubuela mu Tshivulukilu bua musangu wa kumpala. Mu Tshibumba tshia Nsentedi tshia dia 1/3/1938 mu Anglais bavua baleje ne: “Nebikale bimpe menemene bua bena mu [mikoko mikuabu] babuele pabu mu tshisangilu etshi bua kumona muditshi tshienzeka. . . . Ntshikondo tshia bobu kusanka pabu.” Anu mutu bantu batubu babikila mu tshibilu tshia dibaka basanka bua kumona muditshi tshienzeka, ke mutu bena mu mikoko mikuabu basanka pabu bua kubuela mu Tshivulukilu nansha mudibu kabayi badia diampa ne banua mvinyo to.

7. Bua tshinyi bena mu mikoko mikuabu batu bindila ne muoyo kuulu kuulu muyuki wa Tshivulukilu?

⁷ Bena mu mikoko mikuabu batu pabu bela meji a ditekemena didibu nadi. Batu bindila ne muoyo kuulu kuulu bua kuteleja muyuki wa Tshivulukilu. Mu muyuki au batu bakula bua malu a bungi ikalabu mua kuenzela bantu ba lulamatu kudi Kristo ne bantu 144 000 bakokesha pamue nende mu bukokeshi bua bidimu tshinunu. Bantu bakokeshila mu diulu abu nebambuluishe bua kuvuija buloba Mparadizu ne kufikisha bantu ku bupuangane ku bulombodi bua Yezu Kristo mfumuabu. Bena mu mikoko mikuabu badi babuela mu Tshivulukilu batu ne disanka dia bungi padibu bela meji a muakumbana milayi ya mu Bible bu mudi  eyi idi mu Yeshaya 35:5, 6; 65:21-23; ne mu Buakabuluibua 21:3, 4. Padibu badifuanyikija bobu bine ne bantu badibu banange bakadi mu Mparadizu, bidi bikolesha ditekemena diabu dia malu atshilualua ne dipangadika diabu dia kushala balamate anu Yehowa kashendende.​—Mat. 24:13; Gal. 6:9.

8. Mbualu kayi bukuabu butu busaka bena mu mikoko mikuabu bua kubuela mu Tshivulukilu?

⁸ Tumonayi bualu bukuabu butu busaka bena mu mikoko mikuabu bua kubuela mu Tshivulukilu. Mbasue kuleja mudibu banange bela manyi ne babatua mpanda. Bible ukavua mudianjile kumanyisha ne: bela manyi ne bantu badi ne ditekemena dia kusomba pa buloba bavua ne bua kuenza mudimu tshianza mu tshianza. Mushindu kayi? Tumonayi bimue bilejilu.

9. Bilondeshile mulayi udi mu Zekâya 8:23, ntshinyi tshidi bena mu mikoko mikuabu bumvua bua bela manyi?

⁹ Bala Zekâya 8:23. Mulayi eu udi uleja bimpe menemene tshidi bena mu mikoko mikuabu bumvua bua bena Kristo nabu bela manyi. Tshiambilu tshia ne: “muena Yuda” ne tshia ne: “nenu” bidi bileja bionso bibidi bashadile bela manyi. (Lomo 2:28, 29) “Bantu dikumi ba miakulu yonso ya bisamba” badi baleja bena mu mikoko mikuabu. ‘Mbakuate [bela manyi] bikole,’ mmumue ne: mbabalamate bikole, badisange kudibu mu ntendelelu mukezuke. Nunku padi bena mu mikoko mikuabu badisangisha ne bela manyi dilolo dia Tshivulukilu, badi baleja mudibu babalamate bikole.

10. Ntshinyi tshidi Yehowa muenze bua kukumbaja mulayi udi mu Yehezekele 37:15-19, 24, 25?

¹⁰ Bala Yehezekele 37:15-19, 24, 25. Bua kukumbaja mulayi eu, Yehowa mmuenze bua bela manyi ne bena mu mikoko mikuabu benze mudimu pamue dikaya dituangane ne dikuabu. Mu mulayi eu mbakule bua mitshi ibidi. Bonso badi ne ditekemena dia kuya mu diulu badi bu mutshi uvuabu bangate “bua Yuda” (tshisamba tshivuabu bangatshila bakalenge ba Isalele), ne bonso badi ne ditekemena dia kupeta muoyo pa buloba badi bu mutshi “wa Efelayima.” * Yehowa uvua ne bua kusangisha bisumbu bionso bibidi ebi bua bilue “mutshi umue.” Bidi biumvuija ne: badi benza mudimu mu buobumue ku bukokeshi bua Kristo Yezu, mukalenge wabu umuepele. Tshidimu tshionso etshi, bela manyi ne bena mu mikoko mikuabu batu babuela mu Tshivulukilu bu “tshisumbu tshimue” tshidi ne “mulami umue,” kadi ki mbu bisumbu bibidi bitapuluke to.​—Yone 10:16.

11. Ntshinyi tshidi bantu badi bu “mikoko” idibu batele mu Matayi 25:31-36, 40 benza bua kuleja mudibu batua bana babu ne Kristo mpanda?

¹¹ Bala Matayi 25:31-36, 40. “Mikoko” idi Yezu muakuile mu tshilejilu etshi idi ileja bantu bakane ba mu matuku a ku nshikidilu badi ne ditekemena dia kupeta muoyo pa buloba, mmumue ne: mikoko mikuabu. Bantu bakane aba badi batua bana babu ne Kristo bela manyi batshidi pa buloba mpanda ne lulamatu luonso. Badi babakuatshisha bua kukumbaja mudimu munene udibu nawu wa kuyisha bantu pa buloba bujima ne kubavuija bayidi.​—Mat. 24:14; 28:19, 20.

12-13. Mmalu kayi makuabu atu bena mu mikoko mikuabu benza bua kuleja ne: badi bakuatshisha bana babu ne Yezu?

¹² Tshidimu tshionso mu mbingu ya kumpala kua Tshivulukilu, bena mu mikoko mikuabu batu badifila mu kampanye ka pa buloba bujima ka dibikila bantu batu bitaba lumu luimpe bua kubuela mu Tshivulukilu. Padibu benza mudimu eu badi baleja mudibu bakuatshisha bana babu ne Kristo. (Tangila kazubu ka ne: “ Ukadi wenda udilongolola bua Tshivulukilu anyi?”) Batu kabidi bambuluisha bua kulongolola malu onso adi akengedibua bua Tshivulukilu tshienzeke mu bisumbu bionso bia pa buloba bujima, nansha mudiku kakuyi bela manyi  mu bisumbu bia bungi. Bena mu mikoko mikuabu batu basanka bikole bua kukuatshisha bana babu ne Kristo mushindu eu. Mbamanye ne: Yezu udi umona bionso bidibu benzela bana babu ne Kristo bela manyi aba bienze anu bu ne: badi bamuenzelabi yeye muine.​—Mat. 25:37-40.

¹³ Mmalu kayi makuabu atu atusaka tuetu bonso bua kubuela mu Tshivulukilu, nansha tuetu bikale ne ditekemena dia kuya mu diulu anyi dia kushala pa buloba?

14. Mmalu kayi adi Yehowa ne Yezu benze bua kuleja mudibu batunange bikole?

¹⁴ Tudi ne dianyisha dia bungi bua mudi Yehowa ne Yezu batunange. Yehowa mmutuenzele malu a bungi adi aleja ne: mmutunange. Kadi kudi bualu bumue budiye mutuenzele budi bupite makuabu onso. Nzambi wetu uvua muleje mudiye mutunange bikole pavuaye mutume Muanende wa mushinga mukole bua kukengaye bua bualu buetu ne kutufuila. (Yone 3:16) Yezu uvua muleje pende mudiye mutunange bikole pavuaye muitabe bua kufila muoyo wende bua bualu buetu. (Yone 15:13) Kakuena tshintu nansha tshimue tshitudi mua kufuta Yehowa ne Yezu bua dinanga didibu batunange nansha. Kadi tudi mua kuleja dianyisha ditudi nadi bua dinanga edi mu mushindu utudi tuenza malu mu nsombelu wetu dituku dionso. (Kolos. 3:15) Tutu kabidi tubuela mu Tshivulukilu bualu tudi basue kuela meji a mudibu batunange ne bua kuleja mutudi petu babanange.

15. Bua tshinyi tshia kupikulangana natshi tshidi ne mushinga wa bungi kudi bela manyi ne kudi bena mu mikoko mikuabu?

¹⁵ Tudi ne dianyisha divule menemene bua dipa dia tshia kupikulangana natshi. (Mat. 20:28) Bela manyi batu bangata tshia kupikulangana natshi ne mushinga wa bungi, bualu tshiotshi ke tshidi tshienze bua bapete ditekemena didibu nadi. Yehowa mmubabale bu bakane ne mmubangate bu bana bende bua ditabuja diabu mu mulambu wa Kristo. (Lomo 5:1; 8:15-17, 23) Bena mu mikoko mikuabu pabu badi ne dianyisha bua tshia kupikulangana natshi. Bu mudibu baleja ditabuja mu mulambu wa Kristo, mbalue bakezuke kumpala kua Nzambi, badi mua kumuenzela mudimu wa tshijila, ne mbatekemene bua kupanduka ku “dikenga dinene.” (Buak. 7:13-15) Mushindu umue udi bela manyi ne bena mu mikoko mikuabu baleja dianyisha didibu nadi bua tshia kupikulangana natshi mpadibu babuela mu Tshivulukilu tshidimu tshionso.

16. Mbualu kayi bukuabu bututu tubuelela mu Tshivulukilu?

¹⁶ Bualu bukuabu bututu tubuelela mu Tshivulukilu mbua ne: tudi basue kutumikila Yezu. Yonso wa kutudi mmusue kutumikila dîyi divua Yezu mutume dilolo divuaye mubanjije Tshivulukilu edi: “Tungunukayi ne kuenza nunku bua kumvuluka.” Tutu tutumikila dîyi edi nansha tuetu ne ditekemena dia kuya mu diulu anyi dia kusomba pa buloba.​—1 Kol. 11:23, 24.

17. Mmushindu kayi udi Tshivulukilu tshituambuluisha bua kusemena pabuipi ne Yehowa?

¹⁷ Tudi tusemena pabuipi ne Yehowa. (Yak. 4:8) Anu mutudi balonge, Tshivulukilu tshidi tshitupetesha mpunga wa kuela meji a ditekemena didi Yehowa mutupeshe ne a mudiye mutunange bikole. (Yel. 29:11; 1 Yone 4:8-10) Patudi tuela meji a ditekemena dilelela ditudi nadi dia malu adi alua ne a dinanga dia kashidi didi Nzambi mutunange, bidi bikolesha dinanga ditudi petu banange Yehowa, bikolesha kabidi malanda atudi badie nende.​—Lomo 8:38, 39.

18. Kuela meji a malu adi atangila tshilejilu tshia Yezu kudi kutusaka ku dienza tshinyi?

¹⁸ Bidi bitusaka bua kulonda mu makasa a Yezu. (1 Pet. 2:21) Matuku atu madianjile dia  Tshivulukilu, tutu tubala ne tuela meji a malu adibu balonde mu Bible a mushindu uvua Yezu mupitshishe matuku ende a ndekelu a pa buloba, a lufu luende, ne a dibishibua diende ku lufu. Pashishe dilolo dia Tshivulukilu tutu tulonda muyuki utu utuvuluija mudi Yezu mutunange. (Ef. 5:2; 1 Yone 3:16) Patudi tubala malu adi atangila tshilejilu tshia Yezu tshia didifila bua bakuabu ne tuela meji a malu au, tudi tudiumvua benzejibue bua “kutungunuka ne kuenda anu bu muvua yeye au muende.”​—1 Yone 2:6.

19. Ntshinyi tshitudi mua kuenza bua kushala mu dinanga dia Nzambi?

¹⁹ Bidi bitusaka bua tudisuike bua kushala anu mu dinanga dia Nzambi. (Yuda 20, 21) Tudi tushala mu dinanga dia Nzambi patudi tudienzeja bua kumutumikila, kutumbisha dîna diende, ne kusankisha muoyo wende. (Nsu. 27:11; Mat. 6:9; 1 Yone 5:3) Dibuela mu Tshivulukilu didi ditusaka kabidi bua kuikala badisuike bikole bua kuenza malu dituku dionso benze anu bu badi bambila Yehowa ne: ‘ndi musue kushala mu dinanga diebe bua kashidi!’

20. Mmalu mimpe kayi atu atusaka bua kubuela mu Tshivulukilu?

²⁰ Nansha tuetu ne ditekemena dia kupeta muoyo wa tshiendelele mu diulu anyi pa buloba, tudi ne malu mimpe adi atusaka bua kubuela mu Tshivulukilu. Tshidimu tshionso patutu tudisangisha dituku dia Tshivulukilu, tutu tuvuluka lufu lua Yezu Kristo, muntu utudi banange. Kupita bionso, tutu tuvuluka tshienzedi tshinene tshia dinanga didi Yehowa mutunange pavuaye mufile Muanende bu tshia kupikulangana natshi. Tshidimu etshi Tshivulukilu netshienzeke mu Ditanu dia 15/4/2022 dilolo. Tudi banange Yehowa ne Muanende, nunku dituku dia mufikilu wa lufu lua Yezu, katulekedi tshintu nansha tshimue tshitupangisha bua kubuela mu Tshivulukilu to.