1-2. a) Tuetu tuelangana meji a nsombelu wa Yezu ne mudimu wende, tudi mua kumvua bishi? b) Ntshinyi tshituamona mu tshiena-bualu etshi?

 PATUTU tufuisha muntu, tutu tushala tumujinga bikole! Patudi tuvuluka matuku a ndekelu a lufu luende, nangananga yeye mukenge kumpala kua kufua, tudi mua kuanji kumvua kanyinganyinga. Kadi mu kupita kua matuku, tutu tubanga kumvuaku disanka patudi tuvuluka bualu kampanda buvuaye mutulongeshe, buvuaye muambe anyi muenze bua kutukankamija anyi kutusekesha.

² Bia muomumue, bitu bitubungamija patutu tubala malu a muvua Yezu mukenge ne muvuaye mufue. Tshikondo tshia Tshivulukilu, tutu tutamba kukeba dîba dia kuelangana meji a mushinga udi nawu lufu luende. (1 Kol. 11:24, 25) Kadi tutu tumvua disanka dia bungi patutu tuela meji a malu onso avua Yezu muambe ne muenze patshivuaye pa buloba. Bitu bitukankamija kabidi bua kuela meji a tshidiye wenza mpindieu ne tshiatuenzelaye kumpala eku. Kuelangana meji a malu aa ne a dinanga didiye mutunange nadi kudi mua kutusaka bua kuleja dianyisha mu mishindu ya bungi, anu mutuabimona mu tshiena-bualu etshi.

3. Mmalu kayi adi atusaka bua kuleja dianyisha bua tshia kupikulangana natshi?

³ Patudi tuelangana meji a nsombelu wa Yezu ne lufu luende, muoyo udi utusaka bua kuleja dianyisha. Pavuaye uyisha pa buloba, uvua ulongesha bantu ubambila malu mimpe abatuadila Bukalenge bua Nzambi. Tudi banange malu malelela adi atangila Bukalenge aa bikole menemene. Tudi ne disanka dia bungi bua tshia kupikulangana natshi bualu tshidi tshitupetesha  mushindu wa kudia bulunda bukole ne Yehowa ne Yezu. Bantu badi baleja mudibu bitabuja Yezu badi kabidi ne ditekemena dia kuikala ne muoyo wa kashidi ne dia kumonangana kabidi ne badibu bafuishe. (Yone 5:28, 29; Lomo 6:23) Katuena ne tshituvua benze bua kutuenzelabu malu mimpe aa to, ne katuena ne tshitudi mua kufuta Nzambi ne Kristo bua bidibu batuenzele to. (Lomo 5:8, 20, 21) Kadi tudi mua kubaleja mutudi ne dianyisha dia bungi. Mushindu kayi?

4. Ntshinyi tshivua Mariya muenze bua kuleja dianyisha bua tshivua Yezu mumuenzele? (Tangila tshimfuanyi.)

⁴ Tuangate tshilejilu tshia Mariya wa ku Magadala, mukaji muena Yuda. Bavua bamukengesha bikole menemene kudi bademon 7. Uvua ne bua kuikala mumone ne: kakuvua muntu uvua mua kumuambuluisha to. Mpindieu anji elabi meji disanka divuaye nadi pakamumbusha Yezu bademon abu! Dianyisha divuaye nadi diakamusaka bua kulua muyidi wende ne kuangata dîba diende, makanda ende, ne bintu biende bua kumukuatshisha mu mudimu wa kuyisha. (Luka 8:1-3) Nansha muvua Mariya musanke bikole bua tshivua Yezu mumuenzele, kavua mua kuikala mumanye ne: Yezu uvua ulua kumuenzela bia bungi kupita apu to. Uvua ne bua kufila muoyo wende bua bukua bantu, “bua muntu yonso udi uleja ditabuja kudiye” apete muoyo wa tshiendelele. (Yone 3:16) Tshidibi, Mariya wakashala mulamate Yezu bua kuleja muvuaye ne dianyisha. Pavua Yezu ukenga ne muoyo ku mutshi wa makenga, Mariya uvua muimane muaba au, umutabalela ne ujinga kukolesha bakuabu bavua muaba au. (Yone 19:25) Yezu mumane kufua, Mariya ne bakaji bakuabu babidi bakalua ne bintu bia dipembu dimpe ku lukita luende bua kumulaba. (Mâko 16:1, 2) Mariya wakapeta diakalenga dinene bua lulamatu luende alu. Wakapeta disanka dia kutuilangana ne Yezu ne kuyukila nende pakavuaye mubishibue ku lufu. Bayidi ba bungi kabakapeta diakalenga adi to.​—Yone 20:11-18.

5. Leja mutudi mua kuleja dianyisha bua bionso bidi Yehowa ne Yezu batuenzele.

 ⁵ Tudi petu mua kufila dîba dietu, makanda etu, ne makuta etu bua mudimu wa Bukakenge uye kumpala bua kuleja mutudi ne dianyisha bua bionso bidi Yehowa ne Yezu batuenzele. Tshilejilu, tudi mua kudifila bua kuambuluisha mu mudimu wa dibaka dia nzubu yetu ya malu a ntendelelu ne diyilongolola.

6. Bua tshinyi tudi tuamba ne: tshia kupikulangana natshi ntshifila bua muntu yonso?

⁶ Patudi tumona mudi Yehowa ne Yezu batunange bikole, bidi bitusaka bua kubananga pabu. (1 Yone 4:10, 19) Tudi tubananga kabidi bikole patudi tumona ne: Yezu mmufuile yonso wa kutudi. Mupostolo Paulo uvua mumanye bualu ebu, kulejaye muvuaye ne dianyisha pakafundilaye bena ku Galatiya wamba ne: “Muana wa Nzambi uvua munnange ne mudifile bua bualu buanyi.” (Gal. 2:20) Ku diambuluisha dia mulambu eu, Yehowa mmukukoke kudiye bua udie nende bulunda. (Yone 6:44) Kabienaku bikuenza disanka bua kumanya ne: Yehowa mmumone bualu buimpe kuudi ne mmufile mulambu wa mushinga udi kawuyi kuamba bua ulue pebe mulunda wende anyi? Kabienaku bivudija dinanga diudi munange Yehowa ne Yezu anyi? Mbimpe udiebeje ne: ‘Dinanga adi didi dinsaka bua kuenza tshinyi?’

7. Anu mutudi bamone mu tshimfuanyi, mmunyi mutudi mua kuleja bonso ne: tudi banange Yehowa ne Yezu. (2 Kolinto 5:14, 15; 6:1, 2)

⁷ Dinanga ditudi banange Nzambi ne Kristo didi ditusaka bua kunanga bakuabu. (Bala 2 Kolinto 5:14, 15; 6:1, 2.) Mushindu mukuabu utudi tuleja mutudi ne dinanga adi nkuyisha ne tshisumi. Tudi tuyukila ne bantu bonso batudi tupetangana nabu. Katutu tubenga kuyukila ne muntu bua dikoba diende  anyi tshisamba tshiabu to. Tutu tuyukila kabidi nabu nansha bobu babanji anyi bapele, balonge anyi kabayi balonge. Patudi tuenza nanku, tudi tuenza malu mu diumvuangana ne disua dia Yehowa dia ne: “bantu ba mishindu yonso bapandishibue ne bafike ku dimanya dijalame dia bulelela.”​—1 Tim. 2:4.

8. Mmunyi mutudi mua kuleja mutudi banange bena Kristo netu?

⁸ Tudi kabidi mua kuleja mutudi banange Nzambi ne Kristo patudi tunanga bena Kristo netu. (1 Yone 4:21) Tudi tubatabalela ne muoyo mujima ne tubambuluisha padibu mu ntatu. Tudi tubasamba padibu bafuishe anyi basama, ne tuenza muetu muonso bua kubakankamija padibu batekete mu maboko. (2 Kol. 1:3-7; 1 Tes. 5:11, 14) Tudi tubasambidila, bamanye ne: “disengelela dia muntu muakane didi diambuluisha bikole.”​—Yak. 5:16.

9. Mmushindu kayi mukuabu utudi mua kuleja mutudi banange bena Kristo netu?

⁹ Tudi tuleja kabidi mutudi banange bena Kristo netu patudi tuditatshisha bikole bua kuikala nabu mu ditalala. Tudi tudienzeja bua kubabuikidila bua kufuana Yehowa. Bu muvua Yehowa muanyishe bua Muanende afue bua mpekatu yetu, katuenaku mua kubuikidila bana betu ne muoyo umue padibu batuenzela bibi anyi? Katuena basue kufuana mupika mubi wa mu mufuanu wa Yezu to. Nansha muvua mfumuende mumulekeele dibanza dinene, yeye wakabenga kulekeela mupika nende dibanza dikese. (Mat. 18:23-35) Biwikala kuyi umvuangana ne muntu kampanda mu tshisumbu, kuenaku mua kuya kulengejangana nende kumpala kua kubuela mu Tshivulukilu anyi? (Mat. 5:23, 24) Wewe muenze nanku udi uleja muudi munange Yehowa ne Yezu bikole.

10-11. Ntshinyi tshidi bakulu mua kuenza bua kuleja ne: mbanange Yehowa ne Yezu? (1 Petelo 5:1, 2)

¹⁰ Mmunyi mudi bakulu mua kuleja ne: mbanange Yehowa ne Yezu? Mmushindu munene nkutabalela majinga a mikoko ya Yezu. (Bala 1 Petelo 5:1, 2.) Yezu wakatokeshila mupostolo Petelo bualu abu. Yeye mumane kuvila Yezu misangu isatu, uvua mua kuikala mupange tshia kuenza bua kuleja muvuaye munange Yezu. Yezu mumane kubishibua ku lufu, wakakonka Petelo ne: “Simona muana wa Yone, udi munnange anyi?” Tudi batuishibue ne: Petelo wakenza anu bualu kampanda bua kuleja muvuaye munange Mfumuende. Yezu wakamuambila ne: “Ulame mikoko yanyi mikese.” (Yone 21:15-17) Petelo wakalamina Mukalenge mikoko bimpe matuku ende onso a muoyo bua kuleja muvuaye mumunange.

¹¹ Bakulu wetu, ntshinyi tshinudi mua kuenza bua kuleja ne: nutshidi nuangata mêyi a Yezu au ne mushinga tshikondo tshia Tshivulukilu? Nudi mua kuleja munudi banange Yehowa ne Yezu bikole nuenu ne tshibidilu tshia kudifila mu mudimu wa bulami ne nuditatshisha bikole bua kuambuluisha bakadi balekele bisangilu ne buambi bua kupingana kudi Yehowa. (Yeh. 34:11, 12) Nudi kabidi mua kutabalela balongi ba Bible ne bapiabapia badi babuela mu Tshivulukilu, nuditatshisha bua kubasankidila, bualu badi mua kulua bayidi ba Kristo.

12. Bua tshinyi kuelangana meji a mêyi avua Yezu muambe butuku bua muladilu wa lufu luende kudi kutupesha dikima? (Yone 16:32, 33)

¹² Yezu wakambila bayidi bende butuku bua muladilu wa lufu luende ne: “Pa buloba nenuikale ne dikenga, kadi koleshayi muoyo!  Ndi mutshimune ba pa buloba.” (Bala Yone 16:32, 33.) Ntshinyi tshivua tshienze bua Yezu ashale ne lulamatu too ne ku lufu ne ikale ne dikima pavuabu bamufunyina kudi baluishi bende? Uvua weyemena Yehowa. Bu muvuaye mumanye ne: bavua mua kukengesha bayidi bende mushindu wa muomumue, wakalomba Yehowa bua kubalama. (Yone 17:11) Bua tshinyi bualu ebu budi butupesha dikima? Mbualu Yehowa udi ne bukole kupita baluishi betu. (1 Yone 4:4) Udi umona malu onso. Tudi batuishibue ne: tuetu bamueyemene, netudiate buôwa ne netuikale ne dikima.

13. Mmunyi muvua Jozefe wa ku Alimataya muleje dikima?

¹³ Tuangate tshilejilu tshia Jozefe wa ku Alimataya. Bena Yuda bavua bamunemeka bikole. Uvua pende mu balumbuluishi ba ku kabadi kanene ka bena Yuda anyi Sanedren. Kadi pavua Yezu uyisha pa buloba, Jozefe kavua ne dikima to. Yone udi utuambila ne: uvua “muyidi wa Yezu wa mu musokoko bualu uvua utshina bena Yuda.” (Yone 19:38) Nansha muvua Jozefe musue mukenji wa Bukalenge, kavua musue bua bantu bamanye ne: uvua muitabuje Yezu to. Uvua mua kuikala utshina ne: uvua mua kulua kujimija muanzu munene uvuaye nawu. Kadi Bible udi utuambila ne: pakafua Yezu, Jozefe “wakaya kudi Pilato ne dikima mu mutshima, wakamulomba tshitalu tshia Yezu.” (Mâko 15:42, 43; Mukanda wa Nzambi) Katshivua kabidi utshina bua kuleja muvuaye muyidi wa Yezu to.

14. Biwikala utshidi utshina bantu, mbimpe wenze tshinyi?

¹⁴ Ukadiku pebe mutshine bantu bu Jozefe anyi? Pautu ku mudimu anyi mu kalasa, bitu bikutonda bua kudimanyisha muudi Ntemu wa Yehowa anyi? Utshidi welakana bua kutuadija kuyisha anyi kubatijibua bualu udi ne buôwa bua tshidi bantu mua kukuamba anyi? Kulekedi malu aa akupangisha bua kuenza tshiudi mumanye ne: ke tshimpe to. Sambila ne muoyo mujima. Ambila Yehowa akupeshe dikima dia kuenza disua diende. Paudi umona mudi Yehowa wandamuna masambila ebe, neupete bukole ne dikima dia bungi.​—Yesh. 41:10, 13.

15. Disanka divua nadi bayidi pakabamuenekela Yezu diakabasaka bua kuenza tshinyi? (Luka 24:52, 53)

¹⁵ Pakafua Yezu, bayidi bakabungama bikole. Tekabi ne: uvua pebe muyidi. Bavua bajimije mulunda wabu munanga ne bumvue kabidi bu ne: bavua bajimije ditekemena diabu. (Luka 24:17-21) Kadi pakabamuenekela  Yezu, wakakeba dîba dia kubumvuija mudimu udiye nawu mu dikumbana dia mêyi a buprofete. Wakabapesha kabidi mudimu wa mushinga wa kuenza. (Luka 24:26, 27, 45-48) Dîba divua Yezu mubande mu diulu matuku 40 pashishe, dibungama divua nadi bayidi diakandamuka disanka. Bu muvuabu bamanye ne: Mfumuabu uvua ne muoyo ne uvua pabuipi bua kubambuluisha bua kukumbaja mudimu mupiamupia uvuaye mubapeshe, bakumvua disanka. Disanka diabu diakabasaka bua kutumbisha Yehowa kabayi balekela.​—Bala Luka 24:52, 53; Bien. 5:42.

16. Mmunyi mutudi mua kuidikija bayidi ba Yezu?

¹⁶ Mmunyi mutudi mua kuidikija bayidi ba Yezu? Tudi mua kupeta disanka patudi tutendelela Yehowa kabiyi anu tshikondo tshia Tshivulukilu to, kadi bua tshidimu atshi tshijima. Abi bidi bilomba kuteka malu a Bukalenge bua Nzambi pa muaba wa kumpala. Tshilejilu, ba bungi mbakajilule mêba abu a mudimu bua kuikala kuyisha, kubuela mu bisangilu, ne kuenza ntendelelu wa mu dîku pa tshibidilu. Kudi badi balekele too ne dikeba dia bintu bidi bakuabu bangata ne mushinga bua kuambuluisha tshisumbu bikole anyi bua kuya kuambuluisha muaba udibu dijinga ne bamanyishi ba bungi. Nansha mudibi bitulomba dinanukila bua kutungunuka ne kuenzela Yehowa mudimu, yeye udi utulaya bua kutubenesha bikole tuetu bateke malu a Bukalenge pa muaba wa kumpala.​—Nsu. 10:22; Mat. 6:32, 33.

17. Udi mudisuike bua kuenza tshinyi tshikondo tshia Tshivulukilu etshi? (Tangila tshimfuanyi.)

¹⁷ Tudi ne mioyo kuulu kuulu bindile bua kubuela mu Tshivulukilu mu Dibidi dia 4/4. Kadi kuindidi too ne dîba adi bua kushisha kuelangana meji a nsombelu wa Yezu ne lufu luende ne a dinanga didi yeye ne Yehowa batunange nadi to. Babidila mpunga yonso wa tshikondo tshionso tshia Tshivulukilu bua kuenza nanku. Tshilejilu, keba dîba dia kubala malu avua menzeke adibu baleje mu foto idi mu tshiena-bualu tshia ne: “Lumingu lua ndekelu lua muoyo wa Yezu pa buloba,” mu Tshisakidila tshia 12, mu Bible​—Nkudimuinu wa bulongolodi bupiabupia. Welangane meji a malu au. Paudi wenda uabala, keba mvese idi ivudija dinanga diebe, dikima diebe, disanka diebe, ne ikusaka bua kuleja dianyisha dia bungi. Pashishe wele meji a mishindu misunguluke iudi mua kuleja dianyisha ne muoyo mujima. Ikala mutuishibue ne: Yezu neasanke bua bionso biwenza bua kumuvuluka tshikondo tshia Tshivulukilu etshi.​—Buak. 2:19.