1. Bua tshinyi lelu bantu ba bungi kabena beyemena Bible?

 BANTU ba bungi lelu mbapangile wa kueyemena. Badi badiebeja bikala bantu badibu banyisha bu mudi bena tshididi, bamanyi ba malu a bia panu, bangenda-mushinga ni badi menemene ne muoyo wa kubambuluisha. Bualu bukuabu, kabatshiena banemeka bamfumu ba bitendelelu to. Ke bualu kayi kabiena bikemesha bua mudibu kabayi beyemena Bible bualu bamfumu ba bitendelelu batu bamba mutubu batumikila malu adimu kabena baatumikila to.

2. Bilondeshile Misambu 119:160, tudi ne bua kuikala batuishibue bua bualu kayi?

² Tuetu batendeledi ba Yehowa tudi batuishibue ne: Yehowa udi “Nzambi wa bulelela” ne utu anu musue tshidi tshimpe buetu tuetu. (Mis. 31:5; Yesh. 48:17) Tudi bamanye ne: tudi mua kueyemena mêyi atudi tubala mu Bible aa: “Nshindamenu muine wa dîyi [dia Nzambi] mbulelela.” b (Bala Misambu 119:160.) Tudi tuitaba tshiakamba mumanyi kampanda wa malu a mu Bible tshia ne: “Mu malu onso avua Nzambi muambe kamuena kalu ka dishima nansha kamue ne kamuena budi mua kupanga kukumbana to. Bantu ba Nzambi badi mua kuitaba bidiye wamba bualu badi bamueyemena.”

3. Netuakule bua tshinyi mu tshiena-bualu etshi?

³ Ntshinyi tshitudi mua kuenza bua kuambuluisha bakuabu bua kueyemenabu pabu Dîyi dia Nzambi? Tukonkononayi malu asatu adi atusaka bua kueyemena Bible. Netuakule bua bujalame budi mu Mifundu, dikumbana dia mêyi a buprofete, ne bua bukole budi nabu Bible bua kushintulula bantu.

4. Bua tshinyi bamue badi bela meji ne: malu adi mu Bible kaatshiena majalame?

⁴ Yehowa Nzambi wakasaka bantu ba lulamatu 40 bua kufunda mikanda ya mu Bible. Kadi kakuena maniskri a ntuadijilu avuabu bafundile Bible nansha amue atshidiku too ne lelu to. c Bible yonso itudi nayi lelu mmitentulula. Bualu abu budi busaka bantu bakuabu bua kudiebeja bikala malu atudi tubala mu Bible ni adi ne bujalame bua buena buvua nabu Mifundu ya ntuadijilu. Ukadiku mudiebeje bua kumanya tshidi tshitujadikila ne: Bible utudi nende lelu udi ne malu majalame anyi?

5. Bavua batentulule Mifundu ya mu tshiena Ebelu mushindu kayi? (Tangila tshimfuanyi tshia pa tshizubu.)

⁵ Yehowa wakambila bantu bende bua batentulule Bible bua kumulama. Wakatumina bakalenge ba Isalele dîyi bua kuditentuila yabu mikanda ya mikenji ya Mose, ne wakasungula bena Lewi bua bikale balongesha bantu mikenji ayi. (Dut. 17:18; 31:24-26; Neh. 8:7) Pakumbuka bena Yuda mu bupika mu Babilona, kasumbu ka batentudi bapiluke ba mikanda kakatuadija kutentula mikanda ya bungi ya Mifundu ya mu tshiena Ebelu. (Eze. 7:6, dim.) Bantu abu bakayitentula bimpe menemene. Pashishe, batentudi abu bakatuadija kubala miaku too ne maleta bua bikale batuishibue ne: mbatentule mikanda ne bujalame buonso. Kadi bu muvuabu bapange bupuangane, kuvua anu tubilema tukese mu mikanda ivuabu batentulule ayi. Nansha nanku, bakavudija mikanda ayi, nunku tubilema atu tuakalua kumueneka pashishe. Mushindu kayi?

6. Mmunyi mudibu mua kuangula bilema bidi mu Bible ivuabu batentulule?

⁶ Bamanyi ba malu a mu Bible ba matuku etu aa badi ne mushindu muimpe wa kujingulula bilema bivuabu benze kudi bantu bavua batentulule Bible. Bua kumvua bualu ebu bimpe, fuanyikijabi ne: mbapeshe bantu 100 mudimu wa kutentula mukanda kampanda ku tshianza. Umue wa kudibu udi wenza katshilema kakese mu mukanda udiye mutentule. Umue mushindu wa kuangula tshilema atshi, nkufuanyikija mukanda wende au ne ya bakuabu. Bia muomumue, padi bamanyi ba malu a mu Bible bafuanyikija maniskri a bungi, badi ne mushindu wa kuangula bilema anyi malu makuabu adi mutentudi kampanda kayi mufunde to.

7. Batentudi ba Bible bakamutentula mushindu kayi?

⁷ Bantu bavua tatentulula Bible bakenza muabu muonso bua kumutentulula ne bujalame buonso. Tumonayi tshilejilu tshimuepele tshidi tshijadika bualu ebu. Mikanda ya ku bianza mijima ya Mifundu ya mu tshiena Ebelu ya kale menemene nya katshia ku 1008 anyi ku 1009 P.Y. Badi bayibikila ne: Codex wa Leningrad. Bidimu bishale ebi, bavua bapete maniskri a bungi a mikanda ya mu Bible ne bitupa biayi ikavua ne bidimu bitue ku 1 000 kupita bia Codex wa Leningrad. Muntu mukuabu udi mua kuela meji ne: bu mukadibu batentulule mikanda ayi misangu ne misangu munkatshi mua bidimu bipite pa 1 000, malu adi mafunda mu Codex wa Leningrad adi ne bua kuikala mashilangane bikole ne a mu mikanda ya kale ayi. Kadi kabiena nanku to. Pavua bamanyi ba malu a mu Bible bafuanyikije maniskri a kale menemene ne a matuku etu aa, mbasangane ne: nansha mudiku dishilangana dikese dia miaku, mukenji wa mu Bible mmulama ne bujalame buonso.

8. Mifundu ya mu tshiena Greke ya buena Kristo mmishilangane ne mikuabu ya kale ku tshinyi?

⁸ Bena Kristo ba mu bidimu lukama bia kumpala bakalonda tshilele tshia batentudi ba Mifundu ya tshiena Ebelu. Bakatentula mikanda 27 ya Mifundu ya tshiena Greke bimpe menemene. Bavua balongesha nayi mu bisangilu biabu ne mu mudimu wa diyisha. Pavua mumanyi wa malu a mu Bible kampanda mufuanyikije  maniskri a Mifundu ya tshiena Greke ivua kayiyi mijimine ne mifundu mikuabu ya tshikondo atshi, wakamba ne: “Mu kuamba kuimpe, kudi mikanda ya bungi ya Mifundu ya tshiena Greke idiku lelu kupita mikanda mikuabu ya tshianana, . . . ne yoyi idi imueneka mikale mijima.” Mukanda mukuabu udi uleja ne: “Tudi mua kueyemena malu atudi tubala mu nkudimuinu mimpe ya Mifundu ya tshiena Greke ya lelu, bualu malu adimu adi apetangana ne avua bafundi ba kale bafunde.”​—Anatomy of the New Testament.

9. Bilondeshile Yeshaya 40:8, mbulelela kayi budi butangila mukenji wa mu Bible?

⁹ Malu atudi tubala ne tulonga mu Bible utudi nende lelu mmajalame bualu batentudi ba bungi bakadienzeja bikole munkatshi mua bidimu nkama ne nkama bua kuatentula bimpe menemene. d Kakuyi mpata, Yehowa ke uvua muenze bua mukenji wende udiye mutumine bantu ulamibue ne bujalame buonso. (Bala Yeshaya 40:8.) Bushuwa bamue badi mua kuamba ne: dilama mukenji wa mu Bible kadiena disua kumvuija ne: Bible mmufundisha ku bukole bua nyuma wa Nzambi to. Nanku tumonayi malu adi atujadikila ne: Bible mmufundisha ku nyuma wa Nzambi.

10. Fila tshilejilu tshia dîyi dia buprofete divua dikumbane tshidi tshijadika bulelela budi mu 2 Petelo 1:21. (Tangila bimfuanyi.)

¹⁰ Mu Bible mudi mêyi a buprofete a bungi akadi makumbane, amue a kudiwu avua makumabane panyima pa bidimu nkama ya bungi bamane kuafunda. Malu a kale adi ajadika ne: mêyi a buprofete au akakumbana. Kabiena bitukemesha to, bualu tudi bamanye ne: Yehowa ke Muena mêyi a buprofe a mu Bible. (Bala 2 Petelo 1:21.) Elabi meji a mêyi a buprote adi akula bua dikuluka dia tshimenga tshia Babilona wa kale. Mu bidimu bia 700 K.Y., muprofete Yeshaya wakamanyisha ku bukole bua nyuma wa Nzambi ne: bavua ne bua kukuata tshimenga tshia bukole tshia Babilona. Wakatela too ne dîna dia Kolesha mfumu uvua ne bua kutshitshimuna, kumanyishaye bimpe muvuabu ne bua kutshikuata. (Yesh. 44:27–45:2) Yeshaya wakamanyisha kabidi ne: ndekelu wa bionso bavua ne bua kubutula Babilona butubutu ne kumushiya  tshipela. (Yesh. 13:19, 20) Ke tshiakenzeka menemene. Bena Madayi ne bena Pelasa bakakulula Babilona mu tshidimu tshia 539 K.Y., ne muaba uvua tshimenga tshinene atshi mmushale bikulu too ne lelu.​—Tangila filme wa Bible uvua mudianjile kumanyisha dikuluka dia Babilona mu mukanda wa mu biamu wa Shala ne muoyo kashidi!, dilongesha 03 kamutu ka bualu 5.

11. Umvuija mudi mêyi adi mu Danyele 2:41-43 enda akumbana lelu.

¹¹ Mêyi a buprofete kaavua makumbane anu ku kale to; tudi tumona mudiwu enda akumbana kabidi lelu. Tshilejilu, tuakulabi bua dikumbana dia dikema dia mêyi a buprofete a Danyele adi atangila bukokeshi bua buloba bujima bua Grande-Bretagne ne États-Unis. (Bala Danyele 2:41-43.) Dîyi dia buprofete adi dikavua dileje ne bujalame buonso ne: bukokeshi bua buloba bujima ebu nebuikale “tshitupa bukole” anu bu tshiamu tshifiike ne “tshitupa butekete” anu bu diima. Tudi tumona mudi mêyi aa malelela. Grande-Bretagne ne États-Unis mbaleje mudibu ne bukole bua bungi anu bu tshiamu tshifiike, kuenzabu mudimu munene bua kutshimuna mvita yonso ibidi ya buloba bujima ne mbatungunuke ne kuikala ne biluilu bia bukole bua bungi. Kadi mbatekeshe kabidi bukokeshi buabu kudi bena matunga abu batu bajukila kulu bua kuakuila manême abu ku diambuluisha dia tumpanye tua manême a bantu, bisumbu bia bantu badi bakuila bena mudimu anyi bakeba budikadidi. Mumanyi kampanda wa malu a tshididi mmuambe matuku mashale aa ne: “Kakuena ditunga nansha dimue lelu pa buloba didi ditapuluke mu malu a tshididi bu mudi dia États-Unis to.” Ditunga dia Grande-Bretagne didi tshitupa tshikuabu tshia bukokeshi bua buloba bujima, nditapuluke padi bikole bidimu bishale ebi bualu benamu bavua babenga bua muvuadi didisange ne matunga makuabu a ku Mputu. Ditapuluka edi ke didi dienza bua bikolele bukokeshi bua buloba bujima bua Grande-Bretagne ne États-Unis bua kuangata mapangadika ne ne muoyo umue.

12. Mêyi a buprofete a mu Bible adi atupesha dishindika kayi?

¹² Mêyi a buprofete a bungi akadi makumbane adi akolesha dishindika dietu dia ne: malu adi Nzambi mutulaye kumpala eku neakumbane. Tudi tumvua anu bu muimbi wa misambu wakalomba Yehowa ne: “Ndi njinga lupandu luebe bikole, bualu dîyi diebe nditekemena dianyi.” (Mis. 119:81) Ku diambuluisha dia Bible, Yehowa mmutupeshe ne bulenga buonso “matuku atshilualua mimpe ne ditekemena.” (Yel. 29:11) Katuena tupeta ditekemena dia matuku atshilualua aa ku bukole buetu to, kadi mpatudi tueyemena milayi ya Yehowa. Tuikalayi tulonga mêyi a buprofete a mu Bible bimpe bua tutungunuke ne kukolesha dieyemena dietu mu Dîyi dia Nzambi.

13. Bilondeshile Misambu 119:66, 138, ntshijadiki kayi tshikuabu tshidi tshitusaka bua kueyemena Bible?

¹³ Bua kumanya tshijadiki tshikuabu tshidi mua kutusaka bua kueyemena Bible, mona malu mimpe atu bantu batu batumikila mibelu idimu bapeta. (Bala Misambu 119:66, 138.) Tshilejilu, bena dibaka bakavua pa kushipa dibaka diabu bakadi mpindieu ne disanka bualu bavua batumikile mibelu ya mu Bible. Bana babu badi ne disanka bua mudibu bakole mu dîku dia bena Kristo mudi baledi babanange ne babatabalela.​—Ef. 5:22-29.

14. Fila tshilejilu tshidi tshileja mudi kutumikila mibelu ya mu Bible kuambuluisha bantu bua kuikala ne nsombelu muimpe.

¹⁴ Kutumikila mibelu ya meji idi mu Bible nkuambuluishe too ne benzavi banene bua kushintuluka. Mona muvua mibelu ya mu Bible miambuluishe muena buloko kampanda diende Jack. e Uvua muenzavi wa tshikisu tshia bungi  uvuabu bakosele tshibawu tshia lufu. Kadi dimue edi wakasomba muaba uvua bana betu balongeshangana Bible. Mushindu uvua bana betu abu benzelangana malu ne bulenga wakalenga Jack ku muoyo bikole; ke yeye kuitaba pende bua kutuadija kulonga Bible. Bu muvuaye utumikila malu a mu Bible avuaye ulonga, wakatuadija kulengeja bikadilu biende ne bumuntu buende. Pakapita matuku, wakalua mumanyishi udi kayi muanji kubatijibua, pashishe yeye kubatijibua. Uvua uyisha bena buloko nende malu a Bukalenge bua Nzambi ne tshisumi tshionso; kuambuluishaye bantu banayi bua kulonga Bible. Pakakumbana dituku dia kushipabu Jack, ukavua mushintuluke mulue muntu muimpe. Umue wa ku bantu bavua bamulumbuluila wakamba ne: “Jack ukadi mushintuluke, katshiena muntu umvua mumanye kukadi bidimu 20 to. Malu adi Bantemu ba Yehowa bamulongeshe mmalengeje nsombelu wende.” Nansha muakashipabu Jack, tshilejilu tshiende tshidi tshileja ne: tudi mua kueyemena Dîyi dia Nzambi bualu didi ne bukole bua kushintulula bantu bua batuadije kuenza malu mimpe.​—Yesh. 11:6-9.

15. Mmunyi mudi kutumikila malu a mu Bible kuenza bua bantu ba Yehowa bikale bashilangane ne bantu bakuabu lelu? (Tangila tshimfuanyi.)

¹⁵ Bantu ba Yehowa badi mu buobumue bualu batu batumikila bulelela budi mu Bible. (Yone 13:35; 1 Kol. 1:10) Ditalala ne buobumue bitudi nabi mbintu bia mushinga mukole bualu bantu ba bungi lelu mbatapulula kudi malu a tshididi, dishilangana dia makoba ne dia nsombelu. Nsongalume mukuabu diende Jean wakakema bikole pavuaye mumone buobumue budi munkatshi mua bantu ba Yehowa. Uvua mukolele mu ditunga kampanda dia mu Afrike. Pakatuadija mvita mu ditunga diabu, wakabuela mu busalayi pashishe kuluaye kunyemena mu ditunga divua pabuipi apu. Yeye kupetangana ne bantemu ba Yehowa mu ditunga adi. Udi wamba ne: “Ngakalonga ne: bayidi ba mu tshitendelelu tshilelela kabatu babuelakana mu malu a tshididi ne ki mbatapulukangane to, kadi mbanangangane.” Udi wamba kabidi ne: “Mvua muditshipe bua kuluila ditunga dietu. Kadi pangakalonga bulelela, buakansaka bua kudilambula kudi Yehowa.” Jean wakashintuluka bikole. Pamutu pa  kuluisha bantu badi bishilangane nende, ukadi uyisha bantu bonso badiye utuilangana nabu bulelela bua mu Bible. Bu mudi mibelu ya mu Bible yakaja bimpe nsombelu ya bantu ba miaba ya bungi mishilashilangane, ntshijadiki tshinene tshidi tshitusaka bua kueyemena Dîyi dia Nzambi.

16. Bua tshinyi mbia mushinga bua tueyemene Dîyi dia Nzambi bikole?

¹⁶ Bu mudi bulongolodi ebu buenda bunyanguka anu kunyanguka, nebikale bikole menemene bua kueyemena dîyi dia Nzambi. Bantu badi mua kutuadija kutusaka bua kuikala ne dielakana dia ne: malu adi mu Bible ki mmalelela ne Yehowa ki mmuteke mupika wa lulamatu udi mudimuke bua kutulombola. Kadi tuetu bikale ne dishindika dia ne: Dîyi dia Yehowa ditu anu bulelela, netukandamene tshintu tshionso tshialuisha ditabuja dietu. ‘Netudisuike bua kutumikila mêyi a Yehowa ne mikandu biende bikondo bionso, too ne ku ndekelu.’ (Mis. 119:112) ‘Katuakumvua bundu’ bua kuambila bakuabu bulelela ne kubakankamija bua babutumikile to. (Mis. 119:46) Netunanukile mu nsombelu mikole menemene too ne mu dikengeshibua bikale ne “lutulu ne disanka.”​—Kolos. 1:11; Mis. 119:143, 157.

17. Mvese wetu wa tshidimu neatuvuluije tshinyi?

¹⁷ Tudi ne dianyisha dia bungi bua mudi Yehowa mutusokoluele bulelela! Bulelela abu budi butuambuluisha bua tuikale ne dishindika ne batukije; budi kabidi butulongesha mutudi ne bua kuenza malu mu bulongolodi ebu budi buenda bunyanguka bibi menemene. Budi butupetesha ditekemena dia matuku atshilualua mimpe patuadija Bukalenge bua Nzambi kukokesha pa buloba. Mvese wetu wa tshidimu tshia 2023 atuambuluishaku bua kushala bashindame bashindike ne: malu onso adi mu Dîyi dia Nzambi, tuambe ne: nshindamenu muine wadi mbulelela.​—Mis. 119:160.