1-2. Bua tshinyi tutu tubuela mu Tshivulukilu tshidimu tshionso?

 KUKADI bidimu bitue ku 2 000, Yezu wakafila muoyo wende bua bualu buetu, kutupeteshaye mushindu wa kupeta muoyo wa tshiendelele. Butuku bua muladilu wa lufu luende, wakatumina bayidi bende dîyi bua bikale benza tshibilu tshia diampa ne mvinyo bua kuvuluka tshienzedi tshia dinanga tshivuaye ne bua kuenza.​—1 Kol. 11:23-26.

² Tutu tutumikila dîyi dituma dia Yezu adi bualu tudi bamunange bikole. (Yone 14:15) Tshidimu tshionso tshikondo tshia Tshivulukilu, tutu tusambila ne tuelangana meji a mushinga udi nawu lufu luende bua kuleja dianyisha bua malu onso adiye mutuenzele. Tutu kabidi ne disanka dia kuyisha bikole, tukankamija bantu ba bungi bua kubuela netu mu tshibilu tshia pa buatshi etshi. Bushuwa tudi badisuike bua kubenga kulekela tshintu tshitupangisha bua kubuela mu Tshivulukilu.

3. Netumone tshinyi mu tshiena-bualu etshi?

³ Mu tshiena-bualu etshi, netumone mishindu isatu idi ileja mukadi bantu ba Yehowa badienzeje bikole bua kuvuluka lufu lua Yezu. Mishindu ayi nyoyi eyi: 1) kulonda tshilejilu tshidi Yezu mutushile, 2) kubikila bakuabu mu Tshivulukilu, ne 3) kubulela mu Tshivulukilu nansha mu nsombelu mikole.

4. Mmalu malelela kayi atutu tulonga mu Tshivulukilu tshidimu tshionso? Bua tshinyi kumanya malu au kudi ne mushinga? (Luka 22:19, 20)

⁴ Tshidimu tshionso mu Tshivulukilu tutu tuteleja muyuki wa malu a mu Bible utu wandamuna nkonko ya bungi bimpe. Tutu tulonga bua tshinyi bantu batu dijinga ne tshia kupikulangana natshi ne mudi lufu lua muntu umuepele mua kubuikila mpekatu ya bantu ba bungi. Batu batuvuluija tshitu diampa ne mvinyo bileja ne bantu badi ne bua kudia diampa ne kunua mvinyo. (Bala Luka 22:19, 20.) Tutu tuelangana meji a mabenesha adibu balamine bantu badi ne ditekemena dia kusomba pa buloba. (Yesh. 35:5, 6; 65:17, 21-23) Mbimpe tuangate malu malelela aa ne mushinga wa bungi. Bantu miliyare ne miliyare ki mbamanye malu aa ne mushinga utu nawu mulambu wa Yezu to. Kabatu nansha benza Tshivulukilu tshia lufu luende mu mushindu uvuaye mulongeshe bayidi bende bua kuenza to. Bua tshinyi?

5. Pakavua bapostolo ba bungi bafue, mmunyi muvua bantu batuadije kuvuluka lufu lua Yezu?

⁵ Matuku makese bapostolo ba Yezu ba bungi bamane kufua, bena Kristo ba dishima bakabuela mu tshisumbu. (Mat. 13:24-27, 37-39) Bavua bakula “malu makonyangale bua kukoka bayidi mu nyima muabu.” (Bien. 20:29, 30) Bumue bua ku “malu makonyangale” avuabu batuadije kulongesha au buvua ne: Yezu kavua mufile mubidi wende “musangu umue bua kashidi bua kuambula mpekatu ya bantu ba bungi” to. Kadi bavua balongesha ne: mulambu wende uvua ne bua kuikala ufidibua misangu ne misangu. (Eb. 9:27, 28) Lelu bantu ba bungi ba muoyo muimpe badi bitaba dilongesha dia dishima adi. Batu badisangisha mu bitanda biabu pa tshibidilu anyi imue misangu dituku dionso bua kuenza tshitubu babikila ne: “mulambu wa misa.” b Bitendelelu bikuabu kabitu bivuluka lufu lua Yezu pa tshibidilu to, ne benamu ba bungi ki mbamanye bimpe tshitu mulambu wa Yezu umvuija to. Bamue badi mua kudiebeja ne: ‘Lufu lua Yezu ludi bushuwa mua kubuikila mpekatu yanyi anyi?’ Bua tshinyi batu badiebeja nanku? Bualu mbabitabijije kudi bantu badi bitaba ne: lufu lua Yezu kaluena mua kubuikila mpekatu yabu to. Mmunyi muvua bayidi balelela ba Yezu bapite ne tshilumbu atshi?

6. Mu 1872, ntshinyi tshivua kasumbu ka balongi ba Bible kafike ku dimanya?

⁶ Ku ntuadijilu kua bidimu bia 1800, kasumbu ka balongi ba Bible kavuabu balombola kudi Charles Taze Russell kakatuadija kulonga malu a mu Bible bikole. Bavua basue kumanya bulelela budi butangila mushinga udi nawu mulambu wa Yezu ne mushindu uvuabu ne bua kuvuluka lufu luende. Mu 1872, pavuabu bakebulule malu mu Bible bakafika ku dimanya ne: Yezu uvua bushuwa mufile tshia kupikulangana natshi bua bantu bonso. Kabakadilamina malu au to. Kadi bakaamanyisha bakuabu ku diambuluisha dia mikanda, bikandakanda, ne dia bibejibeji. Pashishe bua kuidikija bena Kristo ba mu bidimu lukama bia kumpala, bakatuadija kudisangisha anu musangu umue ku tshidimu bua kuenza Tshivulukilu.

7. Mmunyi mudi malu avua balongi ba Bible ba kumpala abu bakebulule atuambuluisha?

⁷ Malu avua bena Kristo ba muoyo muimpe bakebulule kukadi bidimu bia bungi au adi atuambuluisha lelu. Mushindu kayi? Yehowa mmutuambuluishe bua kumanya bulelela budi butangila mulambu wa Yezu ne tshidiwu  ukumbaja. (1 Yone 2:1, 2) Tudi bamanye kabidi ne: Bible udi umvuija mishindu ibidi ya ditekemena bua bantu badi basankisha Nzambi: bamue nebapete muoyo udi kawuyi ufua mu diulu ne bakuabu miliyo ne miliyo nebashale ne muoyo kashidi pa buloba. Tudi tusemena pabuipi ne Yehowa patudi tumona mudiye mutunange bikole ne mudi mulambu wa Yezu wambuluisha yonso wa kutudi. (1 Pet. 3:18; 1 Yone 4:9) Nunku anu bu bana betu ba lulamatu ba kale abu, tutu tubikila petu bantu bua balue mu Tshivulukilu tshitutu tuenza bilondeshile tshilejilu tshidi Yezu mutushile.

8. Ntshinyi tshikadi bantu ba Yehowa benze bua kubikila bakuabu mu Tshivulukilu? (Tangila tshimfuanyi.)

⁸ Bantu ba Yehowa mbabikile bakuabu mu Tshivulukilu kukadi bidimu bia bungi. Ku ntuadijilu kua 1881, bakalomba bana betu ba mu États-Unis bua kudisangishila kua muntu ku Allegheny mu tshimenga tshia Pennsylvanie bua tshibilu tshia pa buatshi atshi. Pashishe tshisumbu tshionso tshiakatuadija kudienzela Tshivulukilu. Mu ngondo 3 wa 1940, bakambila bamanyishi bua kubikilabu muntu yonso uvua witaba bulelela mu teritware wabu. Mu 1960, Betele wakatumina bisumbu mabeji a dibikila bua musangu wa kumpala. Katshia anu pine apu, tukadi babanyine bantu mabeji a dibikila miliyare ne miliyare. Bua tshinyi tutu tudifila bikole bua kubikila bantu mushindu eu?

9-10. Patutu tudienzeja bua kubikila bakuabu mu Tshivulukilu bitu biambuluisha banganyi? (Yone 3:16)

⁹ Bualu bumue butu butusaka bua kubikila bakuabu bua kubuela netu mu Tshivulukilu budi ne: tudi basue bua badi babuelamu bua musangu wa kumpala bamanye tshidi Yehowa  ne Yezu benzele yonso wa kutudi. (Bala Yone 3:16.) Tudi batekemene ne: malu adibu bumvua mu Tshivulukilu ne bamonamu neabasake bua kulonga bia bungi bua kuluabu batendeledi ba Yehowa. Kadi bitu biambuluisha bakuabu kabidi.

¹⁰ Tutu tubikila kabidi bantu bakadi balekele kuenzela Yehowa mudimu. Tutu tubabikila nanku bua kubavuluija ne: Yehowa utshidi anu mubanange. Ba bungi batu bitaba dibikila dietu adi, ne bitu bitusankisha bikole patutu tubamona. Kubuela mu Tshivulukilu kutu kubavuluija ne: bavua banange kuenzela Yehowa mudimu bikole ku kale. Tuangate tshilejilu tshia Monica. c Wakatuadija kuyisha kabidi mu tshipupu tshia korona. Yeye mumane kubuela mu Tshivulukilu tshia mu 2021, wakamba ne: “Buanyi meme, Tshivulukilu etshi tshivua tshia pa buatshi. Ndi muenze bidimu 20 tshiyi nyisha to, kadi bua musangu wa kumpala ndi muyishe kabidi bantu ne mubabikile mu Tshivulukilu. Mvua muenze muanyi muonso bua kubikila bakuabu bualu ndi nganyisha tshidi Yehowa ne Yezu bangenzele bikole.” (Mis. 103:1-4) Nansha bantu bobu bitaba dibikila dietu anyi kabayi baditaba, tudi tuenza muetu muonso bua kubabikila mu Tshivulukilu, bamanye ne: Yehowa udi wanyisha bionso bitudi tuenza.

11. Mmunyi mudi Yehowa ubenesha bitudi tuenza bua kubikila bantu mu Tshivulukilu? (Hagai 2:7)

¹¹ Yehowa mmubeneshe bitudi tuenza bua kubikila bantu mu Tshivulukilu bikole. Mu 2021, nansha muvua tshipupu tshia korona tshitupangishe bua kuenza mudimu wetu bu kuonso eku, bantu 21 367 603 bavua babuele mu Tshivulukilu. Katshia bantu kabatu banji kubuelamu bungi abu to. Bungi abu mbupite bua Bantemu ba Yehowa ba buloba bujima misangu mitue ku ibidi ne tshitupa. Bushuwa Yehowa katu anu utangila bungi patupu to. Utu utangila nangananga badi babuelamu. (Luka 15:7; 1 Tim. 2:3, 4) Tudi batuishibue ne: patudi tubikila bakuabu, Yehowa udi utuambuluisha bua kupeta badi bakaje muoyo wabu bimpe.​—Bala Hagai 2:7.

12. Nnsombelu kayi idi mua kuenza bua bitukolele bua kubuela mu Tshivulukilu? (Tangila tshimfuanyi.)

¹² Yezu wakamanyisha ne: mu matuku a ku nshikidilu, netutuilangane ne nsombelu mikole ya mishindu yonso, bu mudi buluishi bua mu dîku, dikengeshibua, mvita, masama, ne nsombelu mikuabu ya bungi. (Mat. 10:36; Mâko 13:9; Luka 21:10, 11) Kudi misangu idi nsombelu eyi yenza bua bitukolele bua kuvuluka lufu lua Yezu. Ntshinyi tshidi bena Kristo netu benze bua kutantamena ntatu ya nunku? Mmunyi mudi Yehowa mubambuluishe?

13. Mmunyi muvua Yehowa mubeneshe dikima dia Artem ne didisuika diende bua kuenza Tshivulukilu mu buloko?

¹³ Buloko. Bana betu badibu bele mu buloko bua ditabuja diabu batu benza tshidibu mua kuenza bua kuvuluka lufu lua Yezu. Tuangate tshilejilu tshia Artem. Tshikondo tshia Tshivulukilu tshia mu 2020, bakamuela mu kazubu ka buloko ka metre 17 mu nseke yonso inayi kavuabu bela anu bena buloko 5. Nansha muvuabu bamuele mu buloko amu, wakapeta bintu bia kuenza nabi diampa ne mvinyo bia Tshivulukilu; wakalongolola kabidi bua kudienzela muyuki wa Tshivulukilu. Kadi bena buloko nende bakuabu bavua banua makanya ne bakula bibi bikole. Ntshinyi tshiakenzaye? Wakabalomba bua balekele kuenza bivuabu benza abi anu bua dîba dimue patupu. Wakakema bikole bua muvua bena  buloko nende abu bumvuangane bua kulekela kuenza bivuabu benza abi pavuaye utuadija Tshivulukilu. Udi wamba ne: “Mvua mubalombe bua kubambila malu a mu Tshivulukilu.” Nansha muvuabu babenge, bakatuadija kumuela nkonko pavuabu bamumone mubuele mu Tshivulukilu ne bumvue bivuaye wambamu.

14. Mmunyi muvua bantu ba Yehowa badienzeje bua kuenza Tshivulukilu nansha muvuaku tshipupu tshia korona?

¹⁴ Tshipupu tshia korona. Pavua tshipupu etshi tshiditute, bantu ba Yehowa kabavua babuele mu Tshivulukilu bamonangane mpala ne mpala to. Kadi kabivua bibapangishe bua kuenza Tshivulukilu to. d Bisumbu bivua ne mushindu wa kubuela ku Enternete biakenzela Tshivulukilu ku biamu bia benda bamonangana. Mpindieu netuambe tshinyi bua bantu bakuabu miliyo ne miliyo bavua kabayi ne mushindu wa kubuela ku Enternete? Mu matunga makuabu, bakalongolola malu bua kupitshishila muyuki ku tshisanji anyi ku TV. Bakakuata kabidi muyuki au ku Betele mu  miakulu mipite pa 500 bua nansha bantu ba miaba mile bamone mua kuenza Tshivulukilu. Bana betu ba lulamatu bakalongolola malu bua bena Kristo netu bavua dijinga ne muyuki au bawupete pabu.

15. Tshilejilu tshia Sue tshidi tshikulongesha tshinyi?

¹⁵ Buluishi bua mu dîku. Buluishi bua mu dîku ke lutatu lunene luvua nalu bamue bua kubuela mu Tshivulukilu. Tuangate tshilejilu tshia mulongi wa Bible mukuabu diende Sue. Dituku dimue kumpala kua Tshivulukilu tshia mu 2021, Sue wakambila mulongeshi wende wa Bible ne: bu mudibu bamuluisha kuabu, kakupeta mushindu wa kubuela mu Tshivulukilu to. Mulongeshi wende wa Bible kumubadilaye Luka 22:44. Pashishe yeye kumumvuija ne: patudi tupeta ntatu mbimpe tulombe Yehowa mu disambila ne tumueyemene ne muoyo mujima bua kulonda tshilejilu tshia Yezu. Dituku diakalonda, Sue wakalongolola diampa ne mvinyo bia Tshivulukilu ne wakatangila ndongamu wa pa buende wa ntendelelu wa mu dinda mu jw.org. Dilolo adi wakalondela Tshivulukilu ku telefone mu nzubu wende wa bulalu. Pashishe yeye kufundila mulongeshi wende wa Bible ne: “Dituku dishale uvua munkankamije bikole. Mvua muenze tshionso tshimvua mua kuenza bua kubuela mu Tshivulukilu, ne Yehowa mmungambuluishe bikole. Ndi ne disanka dia bungi ne ndi ngela Yehowa tuasakidile wa bungi.” Udi wela meji ne: Yehowa udi mua kukuambuluisha wewe mutuilangane ne lutatu lua muomumue anyi?

16. Bua tshinyi tudi batuishibue ne: Yehowa neabeneshe didienzeja dietu bua kubuela mu Tshivulukilu? (Lomo 8:31, 32)

¹⁶ Yehowa udi ne dianyisha dia bungi bua mutudi tudienzeja bua kuvuluka lufu lua Yezu. Tudi batuishibue ne: neatubeneshe tuetu tuleja dianyisha bua tshidiye mutuenzele. (Bala Lomo 8:31, 32.) Nanku tudisuikayi bua kubuela mu Tshivulukilu tshia tshidimu etshi ne tuenzayi tshionso tshitudi mua kuenza bua kuyisha bikole tshikondo tshia Tshivulukilu etshi.