BILONDESHILE Matayi 13:24-26, Yezu wakamba ne: “Bukalenge bua mu diulu budi anu bu muntu uvua mukune maminu mimpe mu budimi buende. Pavua bantu balale, muena lukuna wende wakalua, wakakuna lupela mu mponda, wakaya. Pakatolokabi ne pakelabi ntete, lupela luakamueneka palu.” Bamue bafundi badi bamba ne: bualu budibu bambe mu tshilejilu etshi kabuvua buenzeka to, kadi bilondeshile mikenji ya bena Lomo ya kale, bualu bua nunku buvua mua kuenzeka.

Diktionere kampanda dia malu a mu Bible didi dileja ne: mu mikenji ya bena Lomo, kukuna lupela mu budimi bua muntu mukuabu bua kudisombuela kuvua bualu bubi menemene. Bu muvuaku mukenji eu, bidi bileja ne: bualu bua nunku buvua bushuwa buenzeka. Mumanyi wa mikenji ya bena Lomo Alastair Kerr udi umvuija ne: mu tshidimu tshia 533 panyima pa Kristo, mfumu wa bena Lomo Justinien wakapatula kakanda kende ka mikenji (Digest). Kakanda aka kavua kenza ne imue mikenji ya bena Lomo ne mêyi avuabu bambe kudi bamanyi ba mikenji bapiluke ba kumbukila mu tshidimu tshia 100 too ne tshia 250 panyima pa Kristo. Bilondeshile kakanda aku, umue wa ku bamanyi aba Ulpian wakakula bua bualu kampanda buvua buenzeke mu bidimu bia 100 ne pamutu. Bavua bakune lupela mu budimi bua muntu, ne biakudia bionso kunyangukabi. Kakanda aku kadi kaleja ne: tshidime uvua ne bukenji bua kuangata makuta kudi muntu uvua munyange biakudia biende bua kusumba biakudia bia tshianana.

Bualu ebu buvua bushuwa buenzeka mu bukalenge bua Lomo bua kale, ne bidi bileja ne: bualu bua mu tshilejilu tshia Yezu buvua buenzeka mu nsombelu wa bantu.