1, 2. (a) Mmudimu kayi uvua Yezu wangata ne mushinga wa bungi? Bua tshinyi? (b) Bua tuetu kuenza mudimu bimpe bu “benzejanganyi ba mudimu ne Nzambi,” ntshinyi tshitudi ne bua kuenza?

YEZU KRISTO uvua muena mabaya ne muyishi. (Mâko 6:3; Lomo 15:8) Uvua wenza midimu yonso ibidi eyi bimpe menemene. Bu muvuaye muena mabaya, uvua mumanye mua kuenza mudimu ne biamu bia mudimu, uvuija mitshi bintu bia mushinga. Bu muvuaye kabidi muyishi, dimanya diende dijalame dia Mifundu divua dimuambuluisha bua kumvuija bantu malongesha malelela a mu Dîyi dia Nzambi bimpe. (Mat. 7:28; Luka 24:32, 45) Pakakumbaja Yezu bidimu 30, wakalekela mudimu wa mabaya bualu uvua mumanye ne: kuikala muyishi kuvua mudimu wa mushinga mukole. Wakamba ne: kumanyisha lumu luimpe lua Bukalenge bua Nzambi ke bumue bua ku malu avua Nzambi mumutumine pa buloba. (Mat. 20:28; Luka 3:23; 4:43) Yezu uvua wangata kuyisha ne mushinga wa bungi, ne uvua musue bua bantu bakuabu benze nende mudimu au.​—Mat. 9:35-38.

² Tuetu bonso katuena bena mabaya to, kadi buonso buetu tutu tuyisha lumu luimpe. Kuyisha mmudimu wa mushinga mukole, Nzambi muine udi uwenza; ke bualu kayi tudi tubikidibua ne: “benzejanganyi ba mudimu ne Nzambi.” (1 Kol. 3:9; 2 Kol. 6:4) Tudi tuitabuja ne: “Nshindamenu muine wa dîyi [dia Yehowa] mbulelela.” (Mis. 119:159, 160) Ke bualu kayi tudi tuenza ne muetu muonso bua ‘kulongesha dîyi dia bulelela bimpe menemene’ patudi tuyisha. (Bala 2 Timote 2:15.)  Bua bualu abu, tudi tutungunuka ne kuakaja mushindu utudi tuyisha ne Bible, tshiamu tshinene tshia mudimu tshia kulongesha natshi bantu malu malelela adi atangila Yehowa, Yezu, ne Bukalenge bua Nzambi. Bua kuyisha bimpe, bulongolodi bua Yehowa mbupatule bintu bikuabu bia kuenza nabi mudimu bitudi ne bua kuibidilangana nabi. Bintu ebi bidi mu Biamu bia mudimu bia kulongesha nabi.

3. Mu matuku atudi bashale nawu a kuyisha aa, tudi ne bua kudifila bikole bua kuenza tshinyi? Mmunyi mudi Bienzedi 13:48 utuambuluisha bua kuenza nanku?

³ Udi mua kudiebeja tshitudi tuambidila ne: biamu bietu bia mudimu ebi mbia kulongesha nabi, pamutu pa kuamba ne: mbia kuyisha nabi. “Kuyisha” kudi kumvuija kumanyisha muntu mukenji; kadi “kulongesha” kuoku nkumvuija muntu mukenji au, kuwubueja mu lungenyi ne mu muoyo wende bua enze malu bilondeshile bidiye ulonga. Mu matuku makese atudi bashale nawu a kuyisha aa, tudi ne bua kudifila bikole bua kutuadija malonga a Bible ne kulongesha bantu bulelela. Abi bidi biumvuija kukeba ne muoyo mujima bantu bonso badi “bakaje muoyo wabu bimpe bua kupeta muoyo wa tshiendelele.”​—Bala Bienzedi 13:44-48.

4. Mmunyi mutudi mua kumanya bantu badi “bakaje muoyo wabu bimpe bua kupeta muoyo wa tshiendelele”? Mmunyi mutudi mua kubapeta?

⁴ Mmunyi mutudi mua kumanya bantu badi “bakaje muoyo wabu bimpe bua kupeta muoyo wa tshiendelele”? Anu bu mu bidimu lukama bia kumpala, tudi tupeta bantu abu anu patudi tuyisha. Nunku, mbimpe tulonde anu tshivua Yezu muambe etshi: “Mu tshimenga tshionso anyi mu musoko wonso unudi nubuela, nukebamu muntu udi mukumbane.” (Mat. 10:11) Katuedi meji ne: bantu badi kabayi ba muoyo muimpe, bena lutambishi anyi badi kabayi ne dijinga nansha dikese dia malu a Nzambi nebitabe anu lumu luimpe to. Batudi tukeba tuetu mbantu badi ne bululame mu muoyo, badi ne budipuekeshi, ne badi ne nzala ya bulelela. Tudi mua kufuanyikija mushindu utudi tukeba bantu ne tshivua Yezu, muena mabaya, mua kuikala muenze pavuaye ukeba anu mitshi ivua mikumbane bua kuenza bia mu nzubu, biibi, mitshi ya tshikokedi, anyi bintu bikuabu. Pavuaye anu uyipeta, uvua wangata biamu biende bia mudimu, wenza bintu abi ne dimanya diende. Tudi ne bua kuenza bia muomumue patudi tudienzeja bua kuvuija bantu ba muoyo mululame bayidi.​—Mat. 28:19, 20.

5. Tshitudi ne bua kumanya bua Biamu bietu bia mudimu bia kulongesha nabi ntshinyi? Fila tshilejilu. (Tangila tshimfuanyi tshia ntuadijilu tshia tshiena-bualu.)

⁵ Tshiamu tshionso tshia mudimu tshitu ne watshi mudimu. Tuangatabi tshilejilu tshia biamu bia mudimu bia bena mabaya bivua Yezu mua kuikala muenze nabi mudimu. * Uvua dijinga ne biamu bia kupima nabi mabaya ne kuenzapu tumanyinu, kuakosa, kuatubula, kuasonga, kuabotesha, ne kualamakaja. Bia muomumue, tshintu tshionso tshia mu Biamu bietu bia mudimu bia kulongesha nabi tshidi ne watshi mudimu. Tumonayi mpindieu mutudi mua kuenza mudimu ne bintu bia mushinga ebi.

6, 7. (a) Mmunyi muukadi muyishe ne tuarte tua jw.org? (b) Bipatshila bibidi bidi mu mabeji a kubikila nawu bantu mu bisangilu bidi biambuluisha ku tshinyi?

⁶ Tuarte tua jw.org. Tudi bunene bukese kadi tudi tutuambuluisha bua kudimanyisha kudi bantu ne tubafikisha mu site wetu, muaba udibu mua kulongela malu a bungi adi atutangila anyi mene kulomba bua kulonga Bible. Kukadi bantu bapite pa 400 000 badi balombe bua kulonga Bible mu site wa jw.org, ne dituku dionso edi kudi bantu bakuabu nkama ne nkama badi balomba bua kumulonga! Mbimpe wikale ne ndambu wa tuarte tua jw.org bua kubabidila mpunga ya kuyisha bantu baudi mua kutuilanga nabu.

⁷ Mabeji a kubikila nawu bantu mu bisangilu. Adi ne bipatshila bibidi. Mbambamu ne:  “Tudi tukulomba bua kulonga Bible ne Bantemu ba Yehowa.” Pashishe mbalejamu ne: udi mua kulonga Bible “mu bisangilu bietu” “anyi ne muntu ukulongesha pa nkayebe.” Nunku, mabeji aa adi aleja bantu tshitudi ne alomba bantu “badi bamanye ne: badi dijinga ne malu a mu nyuma” bua kulonga netu Bible. (Mat. 5:3) Bushuwa, nansha bantu bitabe bua kulonga Bible anyi babenge, tudi anu tubabikila mu bisangilu bietu. Bobu balue, nebadiumvuile malu a bungi adibu mua kulonga mu Bible.

8. Bua tshinyi mbia mushinga bua bantu kuluabu mu bisangilu bietu nansha musangu umue? Fila tshilejilu.

⁸ Mbimpe tutungunuke ne kubikila bantu mu bisangilu nansha musangu umue. Bua tshinyi? Bualu paluabu, nebamone ne: Bantemu ba Yehowa batu balongesha bulelela budi bufumina mu Bible ne bambuluisha bantu bua kumanya Nzambi, kadi bitendelelu bia dishima biobi kabitu bienza nanku to. (Yesh. 65:13) Ray ne mukajende Linda ba mu États-Unis bakamona bualu ebu kukadi bidimu ndambu. Bakamona ne: bivua bikengela batuadije kuya mu tshitendelelu kampanda. Bavua bitabuja Nzambi ne bavua dijinga ne malu a mu nyuma, nunku bakatuadija kubuela mu tshitanda ne tshitanda tshia nzambi, mu tshimenga tshiabu. Muvua bitanda bia nzambi bungi bu ntundu ne ngenena. Ku ntuadijilu, bakamba ne: bua kushalabu mu tshitendelelu kampanda, anu bobu bapetamu malu abidi aa: bua kumpala, bavua ne bua kulonga bualu kampanda dîba didibu mu masangisha, ne buibidi, bena mu tshitanda atshi bavua ne bua kumueneka ne: mbantu ba Nzambi. Bidimu bia bungi pashishe, bobu bamane kubuela mu bitanda bionso bia mu tshimenga, bakadimona bedibue mâyi ku makasa. Kabavua balonge bualu nansha bumue, ne bantu bavua baya mu bitanda abi kabavua ne mvuadilu uvua ukumbanyina muaba wa kutendelela to. Pakapatukabu mu masangisha a tshitendelelu tshia ndekelu tshivuabu babuele, Linda wakaya ku mudimu wende, Ray yeye kupingana kumbelu; pavuaye wenda upinganapu, yeye kumona Nzubu wa Bukalenge, ke yeye ne: ‘Nganji nya mmone tshidi bantu baba benza.’ Bushuwa, wakamona bualu butambe buimpe buvuaye kayi muanji komona! Bantu bonso bavua ku Nzubu wa Bukalenge bavua bayukila bimpe ne musangelu, bavuale mu mushindu muakanyine. Ray kubuelaye, kusombalaye lua kumpala, kuanyishaye bikole bivuaye uteleja! Bivua anu bu muvua mupostolo Paulo muleje tshidi muntu udi ulua mu bisangilu bia bena Kristo bua musangu wa kumpala mua kuamba, tshia ne: “Bulelela, Nzambi udi munkatshi muenu.” (1 Kol. 14:23-25) Pa kumbusha dituku adi, Ray wakatuadija kubuela mu bisangilu bionso bia Dia lumingu, ne pashishe kutuadija kubuela mu bia munkatshi mua lumingu. Linda pende wakatuadija kubuela, buonso buabu kuitababu dilonga dia Bible ne kubatijibuabu nansha mukavuabu ne bidimu 70 ne bia mu njila.

9, 10. (a) Bua tshinyi mbipepele bua kuyisha ne trakte? (b) Umvuija mutudi mua kuyisha ne trakte wa Bukalenge bua Nzambi ntshinyi?

⁹ Trakte. Tudi ne trakte 8 idi ituambuluisha bua kuyukila ne bantu bipepele. Katshia batuadija kuyipatula mu 2013, bakadi bayipatule bungi butue ku miliyare itanu! Bulenga bua trakte eyi mbua ne: paudi umanya mua kuyisha ne umue, neukumbane bua kuyisha ne mikuabu bualu idi anu mushindu umue. Mmunyi muudi mua kutuadija kuyukila ne muntu ku diambuluisha dia trakte kampanda?

¹⁰ Tshilejilu, wewe musungule trakte wa Bukalenge bua Nzambi ntshinyi? leja muntu lukonko ludi pa mutu, umuebeje ne: “Ukadiku mudiebeje ne: Bukalenge bua Nzambi ntshinyi anyi? Udi wela meji ne: . . . ?” Pashishe muambila bua asungule diende diandamuna ku asatu adi kuinshi. Kumuambidi ne: diandamuna diende ndimpe anyi ndibi to, bulula muaba wa “Tshidi Bible wamba,” ne umubadile Danyele 2:44 ne Yeshaya 9:6. Kuoku mushindu, tungunukayi ne muyuki. Bua kujikija, muleja lukonko ludi panyima pa trakte, muinshi mua “Lukonko lukuabu,” lua ne: “Malu neikale mushindu kayi mu Bukalenge bua  Nzambi?” Nebikuambuluishe bua kuasa tshishimikidi tshia malu anualua kuyukila musangu walonda. Panudi nutuilangana kabidi, udi mua kuya nende mu dilongesha dia 7 mu broshire wa Lumu luimpe lua kudi Nzambi! utu pende utuambuluisha bua kutuadija kulonga Bible ne bantu.

11. Umvuija mudibu benze bibejibeji bietu. Ntshinyi tshitudi ne bua kumanya bua bualu buabi?

¹¹ Bibejibeji. Tshibumba tshia Nsentedi ne Tabulukayi! ke bibejibeji bidibu batamba kupatula ne kukudimuna pa buloba bujima! Bu mudibu babibala kudi bantu pa buloba bujima, mbafunde biena-bualu pa bizubu biabi bua kukoka ntema ya bantu ba mishindu yonso. Tudi ne bua kuyisha nabi bua kupetesha bantu nyota ya kumanya tshidi ne mushinga wa bungi lelu. Kadi bua tuetu kubipesha bantu, tudi ne bua kumanya ne: malu adimu mmafundila banganyi.

12. (a) Tabulukayi! mmuenzela banganyi? Udi ne tshipatshila kayi? (b) Mmalu kayi mimpe audi mupete paudi muyishe ne tshibejibeji etshi matuku adi panshi aa?

¹² Tabulukayi! muenzela bantu badi mua kuikala ne dimanya dikese dia Bible anyi kabayi nadi. Pamuapa ki mbamanye malongesha a bena Kristo, anyi mbedibue mâyi ku makasa kudi bitendelelu, peshi ki mbamanye ne: Bible utu wambuluisha bantu to. Tshipatshila tshinene tshia Tabulukayi! ntshia kujadikila mubadi ne: Nzambi udiku. (Lomo 1:20; Eb. 11:6) Tshidi kabidi tshiambuluisha mubadi bua kuitabuja ne: Bible udi “mu bulelela . . . dîyi dia Nzambi.” (1 Tes. 2:13) Biena-bualu bisatu bia pa bizubu bia bibejibeji bia Tabulukayi! bua tshidimu tshia 2018 mbiobi ebi: “Njila wa kupetela disanka,” “Malu 12 adi endesha mêku bimpe,” ne “Diambuluisha bua bantu badi bafuishe.”

13. (a) Tshibumba tshia Nsentedi tshia bantu bonso ntshienzela banganyi? (b) Mmalu kayi mimpe audi mupete paudi muyishe ne tshibejibeji etshi matuku adi panshi aa?

¹³ Tshibumba tshia Nsentedi tshia bantu bonso tshidi tshiakula bua malu a mu Bible bua bantu badi banemeka Nzambi ne Dîyi diende mu mushindu kampanda. Badi mua kuikala bamanye amue malu a mu Bible, kadi kabayi bumvua bimpe menemene tshidiye ulongesha. (Lomo 10:2; 1 Tim. 2:3, 4) Biena-bualu bisatu bia pa bizubu bia bibejibeji bia Tshibumba tshia Nsentedi etshi bua tshidimu tshia 2018 bidi biandamuna nkonko eyi: “Bible utshidi ne mushinga too ne lelu anyi?,” “Ntshinyi tshidi tshituindile kumpala eku?,” ne “Nzambi utu ukutabalela anyi?”

14. (a) Bu mudi filme yetu mikale payi Biamu bietu bia mudimu bia kulongesha nabi, idi ne tshipatshila kayi? (b) Mmalu kayi mimpe audi mupete paudi muleje bantu filme eyi?

¹⁴ Filme. Mu matuku a Yezu, muena mabaya kavua wenza mudimu ne biamu bidi bienda ne nzembu to. Kadi lelu, bena mabaya badi ne biamu bia mudimu bidi bienda ne nzembu bu mudi: si wa nzembu, biamu bia kutubula nabi mabaya, bia kuabotesha nabi, bia kubueja nabi misonso, ne bikuabu. Pa kumbusha mikanda yetu mipatula pa mabeji, lelu tudi ne filme milenga ya kuleja bantu. Inayi ya kudiyi itudi mua kulongesha nayi bantu nyoyi eyi: Bua tshinyi mbimpe kulonga Bible?, Mmushindu kayi utu dilonga dia Bible dienzeka?, Tshitu tshienzeka ku Nzubu wa Bukalenge ntshinyi?, ne Les Témoins de Jéhovah: Qui sommes-nous? Filme eyi nya minite ibidi; idi ituambuluisha bimpe bua kuyisha muntu musangu wa kumpala. Filme ya mile tudi mua kuyileja bantu batudi tupinganyina anyi bantu badi ne dîba dia bungi. Bintu bilenga ebi bidi mua kupetesha bantu nyota ya kulonga Bible ne kubuela mu bisangilu bietu.

15. Fila tshilejilu tshia mudi filme yetu ikoka ntema ya bantu padibu bayitangila mu muakulu wabu.

¹⁵ Tshilejilu, muanetu wa bakaji mukuabu wakatuilangana ne mamu wa mu Micronésie uvua wakula muakulu wa yapois, kumulejaye filme wa Bua tshinyi mbimpe kulonga Bible? mu muakulu wende. Pakatuadija filme kuleja, mamu au wakamba ne: “Si mmu muakulu wanyi,  bualu bua dikema! Ngakuilu wende udi uleja ne: ngua mu tshidiila tshietu. Mmuakulu wanyi menemene!” Pashishe wakamba ne: uvua ne bua kubala mikanda ne kutangila filme yetu yonso ivua mu muakulu wende idi mu jw.org. (Fuanyikija ne Bienzedi 2:8, 11.) Tuangate tshilejilu tshikuabu. Muanetu kampanda wa bakaji wa mu États-Unis wakafundila muana wa tutuende ku Enternete, umuleja muaba wa kututa bua kubuela ne kumona filme umue umue au mu muakulu wende mu site wetu. Wakamutangila, kumufundilaye pende ne: “Muaba udibu bakule bua mukokeshi wa muoyo mubi udi ukokesha buloba mmukoke ntema yanyi bikole. Ndi muwuje dilomba bua kulonga Bible.” Muanabu eu udi mu ditunga didibu bakandike mudimu wetu!

16. Umvuija tshidibu benzele broshire wa: (a) Teleja Nzambi bua upete muoyo wa tshiendelele. (b) Lumu luimpe lua kudi Nzambi! (c) Badi benza disua dia Yehowa lelu mbanganyi

¹⁶ Broshire. Mmunyi muudi mua kulongesha muntu bulelela bikalaye kayi mumanye kubala bimpe anyi katuyi ne mikanda mu muakulu wabu? Tudi ne tshintu tshidi mua kumuambuluisha, ke broshire wa Teleja Nzambi bua upete muoyo wa tshiendelele. * Tudi kabidi ne broshire mutambe buimpe wa Lumu luimpe lua kudi Nzambi! udi utuambuluisha bua kutuadija kulonga Bible ne bantu. Udi mua kuleja muntu malongesha 14 adi panyima ne kumuambila bua asungule didi dimusankisha bikole. Pashishe tuadija kumulongeshadi. Ukadiku muenze nunku ne bantu bauvua mupinganyine anyi? Tudi kabidi ne broshire muisatu wa Badi benza disua dia Yehowa lelu mbanganyi? Mbenze broshire eu bua balongi ba Bible bamanye bulongolodi buetu. Bua kumanya mua kulongesha nende, bala Mabeji a Tshisangilu tshia Nsombelu ne mudimu wetu wa buena Kristo a ngondo 3/2017.

17. (a) Mukanda wonso wa kulongesha nawu bantu Bible udi ne tshipatshila kayi? (b) Ntshinyi tshidibu balombe bantu bonso badi babatijibua? Bua tshinyi?

¹⁷ Mikanda. Wewe mumane kutuadija kulongesha muntu ne broshire, nudi mua kubuela nende mu mukanda wa Mmalu kayi adi Bible utulongesha? dîba dionso diudi musue. Mukanda eu newupeteshe muntu dimanya dia bungi dia malongesha a mu Bible a nshindamenu. Panudi nuwujikija, ne bikala mulongi uya kumpala mu nyuma, nubuele nende mu mukanda wa Mua kushala mu dinanga dia Nzambi. Mukanda eu newumuleje mua kutumikila mêyi manene a mu Bible dituku dionso. Vuluka ne: nansha mulongi wa Bible mumane kubatijibua, udi ne bua kutungunuka ne kulonga mikanda eyi too ne padiyi ijika. Nebimuambuluishe bua kujalama mu bulelela.​—Bala Kolosayi 2:6, 7.

18. (a) Bu mutudi balongeshi ba bulelela, 1 Timote 4:16 udi utulomba bua kuenza tshinyi? Netupatule bipeta kayi? (b) Ntshipatshila kayi tshitudi ne bua kuikala natshi patudi tuyisha ne Biamu bietu bia mudimu bia kulongesha nabi?

¹⁸ Bu mutudi Bantemu ba Yehowa, mbatupeshe “mukenji wa bulelela wa lumu luimpe” udi mua kupetesha bantu muoyo wa tshiendelele. (Kolos. 1:5; bala 1 Timote 4:16.) Ke bualu kayi mbatupeshe Biamu bia mudimu bia kulongesha nabi bidi ne bintu bionso bitudi nabi dijinga. (Tangila katshiena-bualu ka “ Biamu bia mudimu bia kulongesha nabi.”) Tulongeshayi bantu ku diambuluisha dia bintu ebi bimpe menemene kuoku mushindu. Mumanyishi yonso udi mua kusungula mukanda udi mua kumuambuluisha bua kutuadija kuyukila ne muntu udi musue kulonga bulelela dîba didiye musue. Kadi tshipatshila tshietu ki nganu tshia kufila mikanda yetu anyi kuyishila bantu badi kabayi basue kuteleja mukenji wetu to. Tshipatshila tshietu ntshia ne: bantu badi ne bululame, badi ne budipuekeshi, ne badi ne nzala ya Dîyi dia Nzambi, mmumue ne: badi “bakaje muoyo wabu bimpe bua kupeta muoyo wa tshiendelele” balue bayidi.​—Bien. 13:48; Mat. 28:19, 20.