1, 2. Ntshintu kayi tshidi tshitambe kuenzela bantu bibi menemene? Muenatshi nnganyi?

TELEFONE, miendu ya nzembu, mashinyi, ne frigo mbintu bikese patupu bidi bantu bapatule bitu bituambuluisha. Kadi bantu mbapatule bintu bikuabu bitu bitukebela njiwu, bu mudi: bingoma bia masashi ne bitubu bajiika, makanya, bombe, ne bikuabu. Nansha nanku, kudi tshintu tshidi tshipatuke kumpala kuabi bionso tshidi tshitambe kuenzela bantu bibi menemene. Ke tshinyi atshi? Ndishima! Dishima didi diumvuija kuamba bualu budi kabuyi bulelela anu bua kudinga muntu mukuabu. Mmuntu kayi wa kumpala uvua mushimangane? Yezu Kristo wakamba bua “Diabolo” ne: udi “tatu wa dishima.” (Bala Yone 8:44.) Ndîba kayi divuaye mushimangane bua musangu wa kumpala?

² Kukadi mpindieu bidimu binunu ne binunu katshia washimangana mu budimi bua Edene. Adama ne Eva bavua basombe bimpe mu Mparadizu muvua Mufuki wabu mubateke, kadi pashishe Diabolo kubuela mu tshialu. Uvua mumanye muvua Nzambi mubelele mukenji wa kubenga kudia “mutshi wa dimanya dia tshidi tshimpe ne tshidi tshibi,” bua kabafu bua dipanga kutumikila. Nansha nanku, Satana wakambila Eva ku diambuluisha dia nyoka ne: “Kanuena nufua bulelela to [dishima dia kumpala dia katshia]. Bualu Nzambi mmumanye ne: dituku dine dinudi nudia bimuma biawu, mêsu enu neatabale, nenuikale bu Nzambi, bamanye tshidi tshimpe ne tshidi tshibi.”​—Gen. 2:15-17; 3:1-5.

3. Bua tshinyi tudi tuamba ne: Satana uvua mushime Adama ne Eva ne meji mabi? Dishima diende adi ndikebeshe tshinyi?

 ³ Satana uvua mushimangane ne meji mabi bualu uvua mumanye bimpe ne: bu Eva muitabe tshivuaye mumuambile ne mudie tshimuma, uvua ne bua kufua. Eva ne Adama bakabenga kutumikila mukenji wa Yehowa, ne ndekelu wa bionso bakafua. (Gen. 3:6; 5:5) Kupita apu, bua mpekatu wabu au, ‘lufu ndutampakane kudi bantu bonso.’ Mu bulelela, “lufu luakakokesha bu mukalenge . . . , kabidi too ne pa bantu bavua kabayi benze mpekatu mu mushindu wa muomumue ne uvua Adama mushipe mikenji.” (Lomo 5:12, 14) Lelu, pamutu pa bantu kuikala ne muoyo mupuangane udi kawuyi ne ndekelu bu muvua Nzambi mulongolole ku ntuadijilu, badi bashala ne muoyo anu “bidimu 70, anyi 80 pikala muntu ne bukole bua bungi;” ne nsombelu wabu ‘mmuwule tente ne ntatu ne tunyinganyinga.’ (Mis. 90:10) Dikenga dia kasuba, bionso ebi anu bua dishima dia Satana!

4. (a) Nnkonko kayi itudi ne bua kuandamuna? (b) Bilondeshile Misambu 15:1, 2, nnganyi udi mua kulua mulunda wa Yehowa?

⁴ Yezu wakumvuija bienzedi bia Diabolo wamba ne: “Kakimana bikole mu bulelela, bualu bulelela kabuena munda muende to.” Too ne lelu, bulelela kabuena munda mua Satana to, bualu utshidi anu “upambuisha ba pa buloba bonso” ne mashimi ende. (Buak. 12:9) Katulekedi Diabolo utupambuisha nansha. Mpindieu tuandamunayi nkonko isatu eyi: Mmunyi mutu Satana upambuisha bantu lelu? Bua tshinyi bantu batu bashima? Bua tuetu kubenga kunyanga malanda etu ne Yehowa bu Adama ne Eva, mmunyi mutudi mua kuleja ne: tudi ‘tuamba bulelela’ misangu yonso?​—Bala Misambu 15:1, 2.

5. Mmunyi mudi Satana upambuisha bantu lelu?

⁵ Mupostolo Paulo uvua mumanye ne: tudi mua kupangisha Satana bua “kutudia lungenyi, bualu katuena bapange mayele ende to.” (2 Kol. 2:11; dim.) Tudi bamanye ne: Diabolo ke udi ukokesha ba pa buloba bonso, too ne bitendelelu bia dishima, malu a tshididi, ne malu a bungenda mushinga bua lukuka. (1 Yone 5:19) Kabiena bitukemesha bua mudi Satana ne bademon bende basaka bantu badi ne bukokeshi bua ‘kuamba malu a dishima’ to. (1 Tim. 4:1, 2) Tshilejilu, bamue bangenda mushinga batu benza madisuisha a dishima bua kupanyisha bantu bintu bidi mua kubenzela bibi anyi bua kubadia makuta.

6, 7. (a) Bua tshinyi bamfumu ba bitendelelu bena mashimi ke badi nangananga ne dipila? (b) Mmalongesha kayi a dishima aukadi mumvue kudi bamfumu ba bitendelelu?

⁶ Bamfumu ba bitendelelu badi bashima badi nangananga ne dipila bualu badi bateka ditekemena dia bantu badi babitaba dia kupeta muoyo mu njiwu. Muntu yeye muitabe dilongesha dia dishima ne muenze bualu budi Nzambi mukandike, udi mua kupangila muoyo wa kashidi. (Hosh. 4:9) Yezu uvua mumanye ne: bamfumu ba bitendelelu ba tshikondo tshiende bavua ne dipila bua dishima diabu. Wakabambila mu mpala ne: “Diakabi dienu, nuenu bafundi ne Bafalese, bena lubombo! bualu nudi nutambakana pa mbuu ne pa buloba bume bua kuitabujija muntu umue buena Yuda, kadi padiye witabuja, nudi numuvuija mukumbanyine Ngena [kabutu ka tshiendelele] misangu ibidi kunupita nuenu.” (Mat. 23:15; dim.) Yezu uvua mulumbuluishe bamfumu ba bitendelelu bena dishima abu mu mêyi mashile. Bavua bushuwa ‘bafume kudi tatuabu Diabolo, mushipianganyi.’​—Yone 8:44.

⁷ Bamfumu ba bitendelelu bena dishima mbavulangane lelu, batu bababikila ne: bapastere, bakuidi, bambi, batatu ba bunsantu, ne bikuabu. Mbafuanangane ne bafalese, bualu badi “bapangisha bulelela [bua mu Dîyi dia Nzambi] bua kabumanyiki” ne ‘mbashintakaje bulelela bua Nzambi ku dishima.’ (Lomo 1:18, 25) Badi ne malongesha a dishima bu mudi dia Ngena wa kapia, dibenga kufua dia anyima; balongesha  ne: muntu utu uledibua kabidi panyima pa lufu luende, kabidi ne: Nzambi udi wanyisha bantu badi balala ne balume anyi bakaji nabu, ne wanyisha diselangana diabu.

8. Mbualu kayi bua dishima buamba bamfumu ba tshididi mu katupa kîpi emu? Tudi ne bua kuenza tshinyi pambabu bualu abu?

⁸ Bamfumu ba tshididi mbashime bantu bua kubapambuisha. Tukadi pa kumvua dimue dia ku mashimi matambe bunene pamba bantu ne: mbapete “ditalala, ne kakuena bualu bua kutshina!” Kadi “dîba adi kabutu ka tshimpitshimpi nekalue kudibu diakamue.” Bana betu, katukuatshiki ku buteyi buabu bua dilengulula kabutu ka ndongoluelu wa malu eu kakadi pabuipi to! Bushuwa, tudi “bamanye bimpe menemene ne: dituku dia Yehowa didi dilua anu bu mutu muivi ulua butuku.”​—1 Tes. 5:1-4.

9, 10. (a) Bua tshinyi bantu batu bashima? Dishima ndipatule bipeta kayi? (b) Nshinyi tshitudi ne bua kuvuluka bua Yehowa?

⁹ Padi tshintu tshipiatshipia tshipatuka ne bantu batshinanga bikole, batu balua kutshipatula tshia bungi. Ke mudibi kabidi bua dishima. Dishima nditape bu meshi lelu mu bantu, ne ki mbantu badi ne bukokeshi nkayabu batu badinga bakuabu to. Tshiena-bualu tshia ne: “Malu atu atusaka bua kushima” tshifunda kudi Bhattacharjee tshiakamba ne: “Kushima nkulue kumanyika bu ngikadilu udi bantu baledibue nende.” Bantu batu batamba kushima bua kudikuba anyi bua diakalenga diabu. Batu bashima bua kusokoka bilema biabu ne bienzedi biabu bibi anyi bua kudiangana makuta ne kupeta bintu bikuabu. Bilondeshile tshiena-bualu atshi, kudi bantu batu “bashima anu bu badi banua mâyi, bashima badibu kabayi bamanye, bena mudimu nabu, balunda babu, ne balela babu mu malu onso.”

¹⁰ Kushima nunku nkupatule bipeta kayi? Bantu kabatshiena beyemenangana ne malanda abu mmafue. Tshilejilu, elabi meji mudibi mua kutonda bikole mulume udi ne lulamatu kudi mukajende padiye umanya ne: mukajende au udi wenza buenzavi kadi umushima bua kamanyi bidiye wenza. Ela kabidi meji mudibi bibi menemene padi mulume wa tshikisu ukengesha mukaji ne bana kumbelu, kadi pa bantu uleja mudiye mubanange ne ubatabalela. Kadi mbimpe tuvuluke ne: bantu badi badinga nunku kabena ne tshidibu mua kusokoka Yehowa to, bualu “bintu bionso bidi butaka ne mbibulula patoke” kudiye.​—Eb. 4:13.

11. Tshilejilu tshibi tshia Anania ne Sapila tshidi tshitulongesha tshinyi? (Tangila tshimfuanyi tshia ntuadijilu tshia tshiena-bualu.)

¹¹ Tshilejilu, Bible udi wamba bua mulume kampanda ne mukajende ba mu bidimu lukama bia kumpala ne: ‘Satana uvua mubapeshe dikamakama’ dia kushima Nzambi. Anania ne Sapila bakalongolola mu muoyo wabu bua kushima bapostolo. Bakapana tshitupa tshia buloba kadi kubatuadilabu anu ndambu wa makuta. Bena dibaka aba bavua basue kuleja bena mu tshisumbu muvuabu bantu bimpe, badileja bena muoyo wa tshipapayi kupita bakuabu, ke bobu kuambila bapostolo ne: bavua bafile makuta onso. Kadi Yehowa uvua mumanye tshivuabu benze, nunku wakabanyoka bua bualu abu.​—Bien. 5:1-10.

12. Nkuepi kudi bena mashimi babi badi kabayi bashintuluka baya batangile? Bua tshinyi?

¹² Mmunyi mutu Yehowa umona dishima? Satana ne bena mashimi babi badi kabayi bashintuluka badi benda baya batangile mu “dijiba dia kapia.” (Buak. 20:10; 21:8; Mis. 5:6) Bua tshinyi? Bualu Yehowa mmuteke bena mashimi abu mu mulongo umue ne muntu yonso ‘udi ne bienzedi bia muendi ku mêsu kua Nzambi.’​—Buak. 22:15, dim.

13. Ntshinyi tshitudi bamanye bua Yehowa? Bidi bitusaka bua kuenza tshinyi?

¹³ Tudi bamanye ne: Yehowa “kena bu muntu wetu utu ushima eu” to. Mu bulelela, ‘Nzambi kena mua kushima’ to. (Nom. 23:19; Eb. 6:18) ‘Yehowa mmukine ludimi ludi ludinga.’  (Nsu. 6:16, 17) Bua Nzambi kutuanyisha, tudi ne bua kutumikila mukenji wende udi utulomba bua kuamba bulelela. Ke bua tshinyi ‘katuena tushimangana to.’​—Kolos. 3:9.

14. (a) Tudi bashilangane ne bena bitendelelu bia dishima ku tshinyi? (b) Umvuija dîyi dinene didi mu Luka 6:45.

¹⁴ Ngumue mushindu kayi udi bena Kristo balelela bashilangane ne bena mu bitendelelu bia dishima? Tudi ‘tuamba bulelela.’ (Bala Zekâya 8:16, 17.) Paulo wakumvuija ne: “Tudi tudianyishisha bu bena mudimu ba Nzambi, . . . mu diamba mêyi malelela.” (2 Kol. 6:4, 7) Yezu wakamba bua muntu ne: “Mukana muende mudi muamba anu malu adi mavulangane mu muoyo.” (Luka 6:45) Nunku padi muntu muimpe ne bulelela mu muoyo wende, mukana muende mudi muamba malu malelela. Neambe bulelela mu nsombelu yonso, mmumue ne: kudi bantu badiye kayi mumanye, bena mudimu nende, balunda bende, ne balela bende. Tukonkonone bimue bilejilu bia mutudi mua kuleja ne: tudi tudienzeja bua kuikala ne bululame mu malu onso.

15. (a) Bua tshinyi kuikala ne nsombelu wa mpala ibidi ki nkuimpe nansha kakese? (b) Ntshinyi tshidi mua kuambuluisha bansonga bua kukandamena buenzeji bubi bua bansonga nabu? (Tangila dimanyisha.)

¹⁵ Netuambe tshinyi biwikale nsonga udi musue kulengelela bena diebe? Dienzeja bua kuenji malu adi bakuabu benze mabavuije bena mpala ibidi to. Badi bamueneka bantu bimpe padibu ne bena mu mêku abu anyi bena Kristo nabu, kadi padibu ne bansonga badi kabayi batendelela Yehowa anyi babuela ku Enternete, badi benza malu bu bena panu. Badi mua kuakula buakulavi, kuvuala bibi, kuteleja mijiki mibi, kunua maluvu makole kupitshisha anyi bintu bidi bikuata, kupatuka ne nsongakaji anyi ne nsongalume, peshi kuenza malu makuabu mabi. Wabu wonso nkushima, bashima baledi babu, bena Kristo nabu, too ne Nzambi. (Mis. 26:4, 5) Bituikale anu ‘tunemeka [Yehowa] ne mishiku yetu, kadi mioyo yetu kule menemene nende,’ mmumanye bualu abu. (Mâko 7:6) Mbitambe buimpe bua tuetu kuenza tshidi Bible wamba etshi: “Muoyo webe kawalakanyi benji ba mpekatu, kadi ikala ne ditshina dia Yehowa dituku dijima.”​—Nsu. 23:17. *

16. Bua tshinyi mbimpe kuamba bulelela paudi uwuja dilomba dia kuenza mudimu wa pa buawu?

¹⁶ Pamuapa udi musue kuikala mpanda-njila wa pa tshibidilu anyi kuenza midimu mikuabu ya pa buayi ya ku dîba ne ku dîba, bu mudi kuya ku Betele. Paudi uwuja dilomba, mbimpe  wikale ne bululame ne ufile mandamuna malelela ku nkonko idi itangila makanda ebe a mubidi, dijikija diebe dia lutetuku, ne bikadilu biebe. (Eb. 13:18) Kadi biwikale muenze bualu budi Yehowa mukine anyi budi bulubakaja kondo kebe ka muoyo kadi kuyi mubuambile bakulu? Mbimpe ukebe diambuluisha kudibu bua wenzele Nzambi mudimu ne kondo ka muoyo kimpe.​—Lomo 9:1; Gal. 6:1.

17. Ntshinyi tshitudi ne bua kuenza padi baluishi batuebeja malu a bana betu?

¹⁷ Tshilejilu, ntshinyi tshiudi ne bua kuenza padi bamfumu bakandika mudimu wa Bukalenge mu ditunga dienu ne padibu bakuebeja malu adi atangila bena Kristo nebe? Udi ne bua kubambila malu onso audi mumanye anyi? Ntshinyi tshivua Yezu muenze pavua nguvena muene Lomo mumuele nkonko? Mu diumvuangana ne dîyi dinene dia mu Bible dia ne: kudi “tshikondo tshia kupuwa ne tshikondo tshia kuakula,” kuvua misangu ivua Yezu kayi wamba bualu nansha bumue! (Muam. 3:1, 7; Mat. 27:11-14) Mu nsombelu wa nunku, kubenga kusokolola malu nkuimpe bua katuteki bana betu mu njiwu.​—Nsu. 10:19; 11:12.

18. Ndibanza kayi ditudi nadi padi bakulu batuebeja malu adi atangila bena Kristo netu?

¹⁸ Ntshinyi tshiwenza wewe mumanye ne: muena Kristo nebe mmuenze mpekatu munene? Bakulu badi ne mudimu wa kulama tshisumbu tshikezuke badi mua kujinga bua kukuebeja bua ubambile tshiudi mumanye bua bualu abu. Ntshinyi tshiwenza nangananga pikalabi ne: udi muenze mpekatu au mmulunda webe anyi mmulela webe? Bible udi wamba ne: “Muntu udi ujadika malu ne lulamatu neambe bulelela.” (Nsu. 12:17; 21:28) Ke bualu kayi udi ne dibanza dia kuambila bakulu malu onso mudiwu, kuambi amue ushiya makuabu to, ne kukonyangaji malu to. Badi ne bukenji bua kumanya malu mudiwu bua bamanye mushindu muimpe wa kuambuluisha muenji wa mpekatu au bua apetulule malanda ende ne Yehowa.​—Yak. 5:14, 15.

19. Ntshinyi tshituamona mu tshiena-bualu tshialonda?

¹⁹ Muimbi wa misambu Davidi wakasambila Yehowa ne: “Wewe udi wanyisha bulelela budi nabu muntu munda.” (Mis. 51:6) Davidi uvua mumanye ne: muambi wa bulelela ngeu udi nabu mu muoyo wende. Bena Kristo balelela badi ‘bambilangana bulelela’ mu nsombelu yonso. Umue mushindu utudi mua kuleja mutudi batendeledi ba Nzambi badi bashilangane ne bena panu mpatudi tuyisha bantu, tubalongesha malongesha malelela. Netumone mutudi mua kuenza nanku mu tshiena-bualu tshialonda.